Ekim. 18
18
Ŋiticisyo a ŋisacaradotin ka ŋilepi
1Kirwor Ekapolon neni ka Aron tema, “Ŋiyany daadaŋ ŋulu iyanyere akibois ŋina asegan, eruwor nakou kon ka nakyes a ŋidwe kon a ŋulusapa ta nakyes a ŋituŋa a daadaŋ a ŋulu a ekabila a papa kon; nai iyanyi ŋulu iyanyere asacaradotonu, eruwor nakou kon bon ka nakyes a ŋidwe kon a ŋulusapa bon. 2Aŋun, yau daŋ ŋikaitotoi kon ŋulu a ekabila a Lepi, ekabila a papa kon, ikotere ikitiyanakinete iyoŋ apaki ŋina itiyaata iyoŋ kaapei ka ŋidwe kon ŋulusapa alokiŋaren eema ŋolo ka Acamunet. 3Itiyaete ikes ŋiticisyo aŋuna kon ka aŋuna ke eema daadaŋ. Nai nyecamitae ikes etapete ŋiboro ŋulu isitiyao anakibois a ŋina asegan, kori anamuroet, ani ketapa ikes ŋiboro ŋul etwakete kaapei ka iyoŋ. 4Emaikina iyoŋ kitiyata ka ikes ikotere iteete eema ŋolokilipet ka itiyaete ŋiticisyo daadaŋ aloeema, mam ituŋanan ŋinigela ŋini emaikina toapu neni kus. 5Iyes ŋikulepek itiyaete ŋiticisyo anakibois a ŋina asegan ka anamuroet ikotere nyeyakaun nabo anyunyura neni a Ŋisirael. 6Ayoŋ tokona atyaka ŋikaitotoi kon, ŋilepi aneni a Ŋisirael a ŋuluce; erae tokona ikes ŋulu kon ikwapei ainakinet ŋina italeoritae aŋuna ke Ekapolon, ikotere itiyaete ŋiticisyo aloeema a ŋolokilipet. 7Nai iyoŋ ka ŋidwe kon ŋulusapa kitiyata ejok ŋiticisyo kus ŋulu ka asacaradotonu alotooma daadaŋ ŋuna iitana anamuroet ka anakibois a ŋina asegan nooi. Akainak ayoŋ iyoŋ asacaradotonu ikwapei ainakinet, ituŋanan ŋinigela daadaŋ ŋini eapuuni nen, emaikina toarae.”
Ŋainakineta ŋuna emaikina ŋisacaradotin toryamut
8Kirwor Ekapolon neni ka Aron tema, “Akainak ayoŋ iyoŋ apolokin ŋainakineta ŋuna eyaunio neni kaŋ, ŋainakineta a Ŋisirael ŋuna asegak daadaŋ. Adau ayoŋ ainakin ikes neni kon ka neni a ŋidwe kon a ŋulusapa, ikwapei ŋainakineta ŋuna emaikina ŋisacaradotin toryamut, erae ŋuna kus ŋikaru ka ŋikaru. 9Erae ŋainakineta ŋuna asegak nooi ŋuna nyicunyaryo anamuroet nu ŋuna kon: Ŋainakineta daadaŋ ŋuna akainakinete Ŋisirael ayoŋ ikwapei ŋuna asegak nooi, kerae aŋuna a ŋikinyom, ŋainakineta aŋuna ka asecit ka ŋainakineta aŋuna ke ekaile, erae ŋainakineta ŋun ŋuna kon ka ŋuna a ŋidwe kon a ŋulusapa. 10Emaikina iyes kimuja ŋainakineta ŋun erae ŋuna asegak nooi, emaikina erae ŋisapa make enyamete; erae ŋainakineta ŋun ŋuna esegak aneni kus. 11Erae daŋ ŋainakineta nu ŋuna kus: Ŋainakineta daadaŋ ŋuna etyakanaryo anainakineta a Ŋisirael aŋuna ikyaanaryo, akainak ayoŋ iyoŋ kaapei ka ŋidwe kon ŋulusapa ka ŋulupesur ikwapei ainakinet ŋina a ŋikaru ka ŋikaru. Ituŋanan daadaŋ ŋini nyitoroniyaritae alokal kon epedori akinyam ŋainakineta ŋun. 12Akimyet ŋina ajokan daadaŋ, epiini ŋolo ajokan daadaŋ ka ŋikinyom ŋulu ajokak daadaŋ ta ŋainakineta ŋuna ajokak ŋuna einakinete Ŋisirael neni ke Ekapolon, adau ayoŋ ainakin ikes neni kon. 13Ŋaraito ŋuna esyaunak ŋuna a ŋinyomen a daadaŋ a akwap kec, ŋuna eyaunete ikes neni ke Ekapolon, eruworosi ŋuna kon. Ituŋanan daadaŋ ŋini nyitoroniyaritae alokal kon, epedori akinyam ikes. 14Ibore daadaŋ ŋini italeoritae aŋuna kaŋ alo Isirael, erae ŋini kon. 15Ikiyae daadaŋ, kerae ŋini a ituŋanan, kori ŋini a etyaŋ, ŋini einakinitae neni a Ekapolon, eruwor ŋin kon, nai emaikina iyoŋ ikilokonyu ikiyae a ituŋanan ka ikiyae a ibarasit a ŋini itoroniyaritae daŋ emaikina iyoŋ ikilokonyu. 16Ilokonyunio ŋikiyae ŋul eriŋa erae apolou kec elap epei, ilokonyunio ikes a etacit a ŋolo etubunitoe, a ŋolo erae ŋicekelya ŋikan ŋulu ke esilipa, ipimere ecekel a ŋolo ecamunito ŋituŋa daadaŋ isitiyao anakibois a ŋina asegan. 17Nai ikiyae ŋini ka ate, kori a amesek, kori a ameot, nyilokonyunio, erae ikes ŋulu asegak. Emaikina iyoŋ towuatak ŋaokot kec namuroet ka kicuny ŋasepwa kec erae ainakinet ŋina epeyo ŋina ebob eure keŋ aneni ka a Ekapolon, 18nai erae akiriŋ kec ŋina kon, lopite ŋolo eraakar atorobu ka amuro ŋina aloteten a ainakinet a ŋina ikiyanaryo ŋuna kon. 19Ŋainakineta ŋuna asegak daadaŋ ŋuna einakinete Ŋisirael neni ke Ekapolon, akainak ayoŋ iyoŋ ka ŋidwe kon ŋulusapa ka ŋulupesur, erae ainakinet ŋina emaikina iyes toryamut erae ŋina kus ŋikaru ka ŋikaru. Erae ŋun Acamunet ŋinaruba alokiŋaren Ekapolon, ŋina emaikina iyoŋ ka ŋiletok kon kiwuapa.” 20Abu nai Ekapolon tolimok Aron tema, “Nyiyakaunotor iyes ŋalup ŋuna eruworosi ŋuna kus anakwap a Ŋisirael, mam ŋalup ikikorakinio iyes, ayoŋ Ekapolon aruwor ibore ŋini iryamunete iyes ka ŋini eruwor ŋini kus aneni a Ŋisirael.”
21“Ainak ayoŋ ŋilepi atutubet apei alotooma ŋitomon a ŋinibore daadaŋ alo Isirael aruwor ŋini kec totacere ikes aŋuna ke etic a ŋolo itiyaete ikes alotooma eema ŋolokilipet. 22Ameun tokona, nyecamakinitae Ŋisirael ŋuluce eapiyarete loeema ŋolokilipet, ani kitiyata ikes ŋun, esecete ka etwakete. 23Nai ŋilepi ikes itiyaete ŋiticisyo aloeema a ŋolokilipet, asecit daadaŋ ŋina itiyaete ikes a nen, eruwor nakyes kec; eruwor ŋun ŋakiro ŋuna etubunitoe ŋuna emaikina kiwuapae ŋikaru ka ŋikaru. Nai nyeryamunete ŋadilup alo Isirael, 24anerae adau ayoŋ ainakin ŋilepi atutubet apei alotooma ŋitomon a ŋiboro a Ŋisirael a ŋulu etyakarete ikes erae ainakinet neni ke Ekapolon. Aŋun, alimu ayoŋ atemar emam ŋalup ekorakinio ikes aneni a Ŋisirael.”
25Abu nai Ekapolon kirwor neni a Moses tema, 26“Tolimok ŋilepi ŋakiro nu ebe, ‘Ani ijaunete ikes aneni a Ŋisirael atutubet apei alotooma ŋitomon a ŋiboro kec a ŋulu akainak ayoŋ iyes aneni kec ikwapei ekiner kus, emaikina iyes totyakasi atubet apei alotooma ŋitomon a ŋiboro a ŋul erae ainakinet neni ke Ekapolon. 27Imarakinio ŋun erae ainakinet kus neni kaŋ, ŋina a ŋikinyom a ŋulu eramyo analos ka ŋina a epiini a ŋolo ecuunio anacuet a epiini. 28Aŋun, iinakinete iyes daŋ ainakinet neni ke Ekapolon alotooma ŋitomon ŋuna ijauni iyoŋ aneni a Ŋisirael, ido iinakini iyoŋ anainakineta a ŋun neni ka Aron a esacaradoti ainakinet neni ke Ekapolon. 29Alotooma ŋainakineta daadaŋ ŋuna ijauni iyoŋ, emaikina iyoŋ totyaka ainakinet ŋina emaikina erae ŋina ke Ekapolon, ainakinet ŋina ajokan nooi alotooma ŋainakineta ŋun iŋes emaikina kitaleoroe.’ 30Tolimok daŋ ikes ebe, ‘Ani kidaut iyes atyakar neni ajokan nooi a ŋainakineta a ŋun, idoŋete ŋunace daadaŋ erae ŋuna a ŋilepi, ikwapei ŋikinyom ŋulu eramunio analos ka epiini ŋolo ecuunio anacuet epiini. 31Ipedorete iyes akimuj ŋiboro ŋul aneni daadaŋ icamitotor, iyes kaapei ka ŋituŋa a ŋikalya kus, anerae erae eropit kus aŋuna a ŋiticisyo a ŋulu itiyaete iyes aloeema a ŋolokilipet. 32Nyikitoroniaryo iyes kitiyata ŋun, anerae iinakis iyes neni ajokan nooi a ŋainakineta a ŋun neni ke Ekapolon. Nyemaikina iyes tomunaasi ŋainakineta a Ŋisirael ŋuna asegak, ani kitiyata iyes ŋun itwakete.’ ”
Currently Selected:
Ekim. 18: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.