Ekim. 20
20
Ŋakipi ŋuna a Meriba
(Awos. 17:1-7)
1Todolut Ŋisirael daadaŋ naloŋisat ŋina a Sin elap ŋolo ke epei, kiboiyoto ŋituŋa alo Kades. Abu Miriam totwan a nen ka tonukae nen.
2Amam ŋakipi ŋuna emasete ŋituŋa a nen; aŋun, apotu ŋituŋa daadaŋ tocunun kisiburata Moses ka Aron. 3Kisiburata ŋituŋa Moses temasi, “Okoe, kerae ca totwakitetei isua daŋ apaki ŋina amunyarya Ekapolon ŋiyeneta kosi. 4Kaanukiro iyaunia iyoŋ ŋituŋa ke Ekapolon naloŋisat na, otwaka isua kaapei ka ŋibaren kosi a ne? 5Kaanukiro ikiyaunia iyoŋ isua anakwap a Ijipit, nakibois na ŋina aronon nooi? Nyerae na akwap ŋina eya ŋikinyom, kori a ŋaboboryo, kori ŋikito a epiini ka ŋina emam ŋakipi ŋuna emasyo.” 6Apotu nai Moses ka Aron toloto aneni ayai atukot a ŋituŋa, toloto lopuke ŋolo ke eema a ŋolokilipet, toryediko, todolo ŋireetin kwap, abu nai akica a Ekapolon totakanu neni kec. 7Kirwor Ekapolon neni a Moses tema, 8“Totiŋ ebela, ido tocunakisi ka Aron Ŋisirael daadaŋ tolimok ataaba epupete ikes kitolomu ŋakipi a nen. Aŋun, itolomuni iyoŋ ŋakipi anataaba aŋuna kec. Iinakini nai iyoŋ ŋakipi neni a ŋituŋa ka ŋibaren kec.”
9Aŋun, abu Moses tolemu ebela totiŋ alokiŋaren Ekapolon, ikwapei ecikitor Ekapolon iŋes. 10Tonyaraut Moses ka Aron ŋituŋa iwapei diyete ataaba, tolimok Moses ikes tema, “Kiirasi iyes ŋikaŋerok, ikiinakinio isua iyes ŋakipi anataaba a na a?” 11A nen, kikyaa Moses akan keŋ, toram ataaba ŋin ŋarwa ŋaarei a ebela keŋ; kiyesun ŋakipi elalak nooi, tomata ŋituŋa ka ŋibaren kec. 12Nai tolimok Ekapolon Moses ka Aron tema, “Aŋuna pa ikikinyomitotor iyes ayoŋ, ikotere itoodiunete apedor kaŋ ŋina asegan iteete Ŋisirael, nyeruwor iyes iyaarete ŋituŋa lu nakwap ŋina ainakinit ayoŋ ikes.” 13Arae ŋun ŋakipi a Meriba #20:13 Meriba Iŋes atemar ebura neni aponiata Ŋisirael kiŋuruŋura neni a Ekapolon ka neni abunio Ekapolon kitoodiunia apedor keŋ ŋina asegan.
Towounae Ŋisirael atubor anakwap a Edom
14Alo Kades, abu Moses kiyakiya ŋituŋa neni ke erwosit a Edom ebala; “Ŋakiro alokaato kon a Isirael ikes nu, iyeni iyoŋ ŋatyokisyo daadaŋ ŋuna aponi isua toryamunae: 15Iyeni iyoŋ epite ŋolo atiyaarotor atapapaa kosi Ijipit, kiboi isua alo Ijipit apaki ŋina aoyan ka apotu Ŋijipitian ikisicana isua ka atapapaa kosi, 16ido ani ikaloikinio isua Ekapolon, abu kiira akigworo kosi, tosodi kiyaku emalaika keŋ, ŋolo abu ikiyau isua anakwap a Ijipit, ikiya tokona isua ne Kades, lotaun ŋolo eyai lokukoru a akwap kon. 17Ikilipit tokona isua iyoŋ, kimyekinae isua totuboretei anakwap kon, nyeriyo isua lomanikor edio, kori lomanikor a ŋikito ke epiini, nyemasyo isua ŋakipi anakare ka adio, emekinio isua erot ŋolo a ŋirwosi, akitodol ŋina etuborere isua anakwap kon.”
18Nai apotu Ŋiedomi temasi, “Nyitorete iyes nakwap kosi, ani kitiyata iyes ŋun eponio isua akitijikin iyes.” 19Tolimokis Ŋisirael ikes temasi, “Iwuapakinio ro isua erot bon, ido ani kemasi isua kaapei ka ŋibaren kosi ŋakipi kus, itemokino isua ikisicani a ŋun. Ekudyoko ro ŋakiro nu, kimyekinae ro iyes isua totuboretei.” 20Temasi Ŋiedomi, “Nyitorete iyes a nakwap kosi jik.” Apotu nai Ŋiedomi potu neni a Ŋisirael erae ajore ŋina alalan nooi, eyakatar ŋiboro ŋulu ke ejie. 21Aŋun, apotu Ŋiedomi towout Ŋisirael akitor nakwap kec, ido apotu Ŋisirael nyitor nakwap a Ŋiedomi.
Atwanare ka Aron
22Towotokis Ŋisirael daadaŋ alo Kades todolo Moru Or. 23Alo Moru Or a ŋolo eyai lokukoru a akwap ke Edom, kirwor Ekapolon neni a Moses ka Aron tema, 24“Emaikina Aron totwana ikwapei atapapaa keŋ, anerae nyelomari iŋes nakwap ŋina ainak ayoŋ Ŋisirael aŋuna iponiata iyes toŋero ŋuna alimuni ayoŋ aŋuna a ŋakipi a Meriba. 25Ya Aron ka lokoku keŋ Eleasar Moru Or; 26ani edolete nen, tolacu ŋilowi aneni ka Aron, ido kitanapik neni a lokoku keŋ a Eleasar. Nai etwani Aron ikwapei atapapaa keŋ, etwani iŋes aina.” 27Kitiya Moses ikwapei ecikitor Ekapolon iŋes; kitipeiyosi iŋes ka Aron ta Eleasar kidiama lomoru Or iteete ŋituŋa daadaŋ. 28Tolaca Moses ŋilowi aneni ka Aron, kitanapik neni a Eleasar alokoku ka Aron, ido abu Aron totwana alokidiama emoru. Totiyaun nai Moses ka Eleasar alokidiama emoru. 29Ani eanyunete Ŋisirael daadaŋ atemar ketwana Aron, apotu kigworo iŋes ŋirwa ŋatomoniuni.
Currently Selected:
Ekim. 20: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.