Ekim. 5
5
Ŋituŋa ŋulu itoroniyaritae
(Ŋilep. 15:1-33)
1Kirwor Ekapolon neni a Moses tema, 2“Tolimok Ŋisirael kiritasi analomar kec ituŋanan daadaŋ ŋini eyakatar atapon, kori ŋulu eyakar ibore ŋini elele anakuwan keŋ ka ituŋanan daadaŋ ŋini itoroniyaritae aŋuna ketapitor akuwan a ituŋanan a ŋini etwanit, 3emaikina iyoŋ kirita ikes daadaŋ kiŋa alomar, kerae aberu, kori ekile, ikotere nyitoroniyasi alomar ŋina ikiboiyo ayoŋ kaapei ka iyes.” 4Apotu nai Ŋisirael kitiyata ŋun, kiritasi analomar kec ŋituŋa ŋul daadaŋ ikwapei alimokinitor Ekapolon Moses.
Akiki ka Akitac
(Ŋilep. 6:1-7)
5Kiruwor Ekapolon neni a Moses tema, 6“Tolimok Ŋisirael ŋakiro nu, ‘Ani kitiya aberu, kori ekile aronis neni a ŋinicetuŋanan, toŋer akikinyomit Ekapolon, asec ituŋanan ŋin. 7Emaikina iŋes toki asecit ŋina adau iŋes akisec ka totac ibore daadaŋ ŋini emaikina iŋes totac aŋuna ka asecit keŋ, ido kiyatak nabo apeitutubet alotooma ŋikan alotacit a ŋol, inak nai neni a ituŋanan a ŋini asecitae aneni keŋ. 8Nai ani ketwanit ituŋanan ŋini asecitae aneni keŋ ka tomam iyenet keŋ eyai ŋini epedori akijaar ŋiboro ŋulu etacakinitae iŋes, einakinio etacit ŋol neni ke esacaradoti aŋuna ke Ekapolon kaapei ka emesek ŋolomookunet ikasecan anasecit keŋ. 9Ŋainakineta daadaŋ ŋuna italeunitoe ŋuna eyaununeete Ŋisirael neni ke esacaradoti erae ainakinet, eruworosi ŋainakineta ŋun ŋuna ke esacaradoti a ŋolo ijauni ikes. 10Ŋainakineta daadaŋ ŋuna italeunitoe ŋuna eauni ituŋanan, erae ŋuna a ilope, nai ŋainakineta daadaŋ ŋuna einakinio esacaradoti, erae ŋuna a esacaradoti.’ ”
Ŋakiro ŋuna ka aberu a ŋina a nyikinyoma
11Kirwor Ekapolon neni a Moses tema, 12“Kirwor neni a Ŋisirael, tolimok ikes ŋakiro nu, ‘Ani keŋer aberu ŋina iisitae ekile keŋ tocamu ekile ece 13ka ani kiryamakina iŋes ka ekile ece nai nyeyeni lokile keŋ, kori nyeyenete ŋituŋa ŋuluce daŋ, aŋuna amamukar ituŋanan abu kikamu iŋes itiyae ŋun, 14kori ketamanakini ekile aberu keŋ atemar erae aberu keŋ akaloman, ido tolomite kire, kori ketamanaki ekile aberu keŋ atemar erae akaloman, ido nyelomit iŋes, 15emaikina ekile ŋol yau aberu keŋ neni a esacaradoti kaapei ka ainakinet aŋuna ka aberu keŋ, emaikina iŋes yau akilo ŋina a ŋakirya a ŋuna a ŋikinyom a ŋulu esibito erau, nai nyemaikina iŋes kinyalak akimyet, kori kiwuak ekinyate, anerae erae ŋin ainakinet ŋina a ŋikinyom aŋuna ka atamakinit atemar esecit ituŋanan, ainakinet ŋina a ŋikinyom ŋina isileereunere ŋakiro ŋuna a kire.’
16“Emaikina nai esacaradoti yau aberu ŋin kiŋaren, kimyek iŋes towo alokiŋaren namuroet; 17tolemu nai esacaradoti ŋakipi ŋuna itesegitae, kiwuak nabakuli ŋina eyeunitae a ŋalup, tolemu nabo ŋalup alokwap Asaduku ŋina ka Acamunet kiwuak nakipi ŋun; 18ido yau aberu ŋin kitowo alokiŋaren Ekapolon, tolaca akitambara anakoku a aberu, kiwuak nakan a aberu a ŋin ainakinet ŋina a ŋikinyom aŋuna ka atamakinit atemar esecit ituŋanan, totiŋite esacaradoti anakan keŋ ŋakipi ŋuna adwarak ŋuna eyaunete ŋilam. 19Tolimok nai esacaradoti aberu ŋin kikoŋ tema, ‘Ani pa kiryamakina iyoŋ ka ekile ŋolo nyerae ekile kon, kori pa kimunonit iyoŋ ŋakiro aneni a ekile kon, mam ŋuna aronok itiyakin neni kon kimat iyoŋ ŋakipi nu ŋuna eyaunete ŋilam. 20Nai, ani kimunonit iyoŋ ŋakiro aneni a ekile kon toriŋa imina iŋes, ani kilomit iyoŋ kiryamakina ka ekile ece,’ 21tolimok nai esacaradoti aberu ŋin kikoŋ ŋakiro nu ŋuna a ŋilam tema, ‘Agasi ikituruwo Ekapolon iyoŋ ŋina a ŋilam alotuŋa kon a daadaŋ ka togolokin aperyet kon ka tobuu akook kon. 22Agasi tolomasi ŋakipi nu ŋuna eyaunete ŋilam neni a ituŋanan nakook kon, kiturubak ŋaokot eponito anaperyet a akook kon ka torinyiyo aperyet a akook kon.’ Tolimu nai aberu ŋin tema, ‘Kitiyakin ŋun, kitiyakin.’
23“Emaikina nai esacaradoti kigirak ŋilam ŋul daadaŋ nakaratas, ido kilotak ŋakiro ŋun nabakuli ŋina eya ŋakipi ŋuna adwarak. 24Emaikina esacaradoti inak aberu ŋin tomat ŋakipi ŋun ŋuna einakinete ituŋanan ŋilam, ani elomarete ŋakipi ŋun nakook keŋ, einakinete iŋes aryeba ŋina apipilan nooi. 25Elemuni nai esacaradoti ainakinet ŋina a ŋikinyom anakan a aberu, kikyaa erae ainakinet neni ke Ekapolon, kiwuak namuroet. 26Ekaku elemuni iŋes ŋakirya ŋadi ileleba akan keŋ erae ainakinet ŋina ke etal, ido kicuny a namuroet. Kedau akitiya ŋun, inak nai aberu ŋakipi tomat. 27Kedau esacaradoti akitamat aberu ŋin ŋakipi, ani kelomit aberu ŋin ka kimunonit ŋakiro aneni a ekile keŋ, apaki ŋina edolyoto ŋakipi ŋuna emasi iŋes nakook keŋ einakinete iŋes aryeba ŋina apipilan nooi, togolokin aperyet anakook keŋ ka tobuu akook keŋ. Eruwor aberu ŋin ŋina ilamam alotuŋa keŋ. 28Nai, ani pa kelomit aberu ŋin, mam ŋakiro itiyakin neni keŋ ka erubakini idoe.
29“Erae lo ekisil apaki daadaŋ ŋina elomia aberu toriŋa erukito ka ekile keŋ, 30kori apaki daadaŋ ŋina eyakaunor ekile aŋayaŋayat, totamanak aberu keŋ ŋakiro atemar kori elomit. Eyaari nai iŋes aberu keŋ kiŋaren Ekapolon, kitiya nai esacaradoti ŋakiro ŋun. 31Nyesecit ekile erae keya aberu keŋ neni a esacaradoti, nai ani kesecit aberu, emaikina kisicanae aŋuna ka asecit keŋ.”
Currently Selected:
Ekim. 5: NIB2008
Highlight
Share
Compare
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.