Kub 28
28
Isaaka naayohereza Yakobbo kuswera omba Labbani
1Aho Isaaka yayeta Yakobbo yamusabira omugisa, yamuteererra ati: “Otalikisura okaswera omukazi Omukanaani. 2Imuka ogende Padanaramu omunju ya Beesweri swenkuru, oku nuho oswere omukazi omu ha bahara ba Labbani nyokoromi. 3Ruhanga ow'obusobozi bwona, akuhe omugisa, akukanyise muno, nukwo orugwemu amahanga maingi. 4#Kub 17:4-8.Akuhe omugisa nk'ogu yahaire Abburahamu kandi aguhe n'abaijukuru bawe, nukwo musobole kutunga ensi enu ei mwasuhuukiiremu, Ruhanga ei yahaire Abburahamu!” 5Isaaka nukwo yaragire ati Yakobbo; Yakobbo yagenda Padanaramu omba Labbani mutabani wa Beesweri Omuramini munyanya Rebbeka, nyina Yakobbo na Esau.
Esau naaswera Maharati
6Aho Esau yamanya Isaaka nkooku akaba asabiire Yakobbo omugisa kandi amutumire Padanaramu aswereyo omukazi. Kandi yamanya Isaaka obu akaba naasabira Yakobbo omugisa, nkooku yamuteereriire ati: “Otalikisura okaswera omukazi Omukanaani.” 7Esau yamanya Yakobbo nkooku ahuliire ebigambo bya ise na nyina, yagenda Padanaramu. 8Esau obu yayetegeriize Isaaka ise nkooku atarukugonza abakazi Abakanaani, 9yagenda omba Isimairi, yaswerayo omukazi, yamwongera ha bakazi be abandi, ibara ly'omukazi ogu nuwe Maharati muhara wa Isimairi, mutabani w'Abburahamu, munyanya Nebayosi.
Yakobbo naabonekerwa
10 #
Ama 10:10. Yakobbo yaruga Beesiseba yakwata omuhanda ogurukugenda Harani. 11Yahika omu kiikaro ekimu, nambere yaraire ekiro eki, habwokuba izooba likaba ligoroobere. Yakoma ibaale limu yalyesagura, yabyama, yagwijagira. 12#Yoh 1:51.Yaroota naarora itembero erikaba lisimbire ha itaka, ensonga yalyo erumire iguru; kandi yarora bamalaika ba Ruhanga nibatemba nibatemburuka itembero eri. 13#Kub 13:14,15.Yarora MUKAMA ayemeriire ha itembero eruguru, yagamba ati: “Ninyowe MUKAMA Ruhanga ow'Abburahamu swenkuru kandi Ruhanga owa Isaaka, ensi enu ei obyamireho, ndigikuha kandi ndigiha n'abaijukuru bawe; 14#Kub 12:3; 22:18.abaijukuru bawe, balingana ecuucu y'ensi, mulikanya muhike Bugwaizooba, obukiizi bw'emoso n'obw'obulyo; omuli iwe n'omu baijukuru bawe, enganda zoona ez'omunsi, numwo ziriheererwa omugisa. 15Omanye nkooku ndi hamu na iwe kandi ndaakulindaga h'orakagendaga hoona, ndikugarra omunsi enu, habwokuba tindikurugaho ntakakozire eki nkugambiire.” 16Aho Yakobbo yasisiimuka, yagamba ati: “Mazima kwo, MUKAMA ali omu kiikaro kinu, eki, mbaire ntakimanyire.” 17Akatiina kandi yagamba ati: “Ekiikaro kinu, ka nikitiinisa! Ekiikaro kinu, tikiri kindi na kindi, niyo nju ya Ruhanga, kandi gunu nugwo mulyango gw'iguru.”
18Yakobbo obu yaimukire nyenkya kara, yakwata ibaale eri akaba ayesagwire, yalisimba, yaliseesaho amagita libe kiijukyo. 19Ekiikaro eki, yakiruka ibara Besweri, ira lyona, orubuga oru rwayetwaga ibara Luuzi. 20Aho Yakobbo yaragaana naagamba ati: “Ruhanga obu araikara na nyowe, akandinda omu rugendo runu oru ndukugendamu, akampa ebyokulya n'ebyokujwara, 21nukwo ngaruke n'obusinge omuka ya ise nyowe, obu nubwo MUKAMA aliba Ruhanga wange, 22kandi ibaale linu eri nsimbire kuba kiijukyo, lirifooka nju ya Ruhanga; kandi ha byona ebi oraampaga, ndaakugarurraga kimu kya ikumi.”
Currently Selected:
Kub 28: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
