Kub 38
38
Ebintu ebyabaireho Yuda na Tamara
1Omu kasumi ako, Yuda akaahukana na bagenzi be, yagenda ha bukiizi bw'obulyo, yateera eheema ye, yaikara n'Omw'Aduramu, ibara lye Hiira. 2Oku, Yuda nuho yaroliire omwisiki, ibara lye Hiira. Muhara w'Omukanaani, yamuswera, 3omwisiki yatwara enda yazaara omwana omwojo, yamuruka ibara Eri. 4Yatwara enda endi, nabwo yazaara omwojo, yamuruka ibara Onani. 5Kandi yayongera yazaara omwojo, yamuruka ibara Sera. Hiira kuzaara omwana ogu, bakaba bali Kezibu. 6Yuda yaswererra Eri, mutabani we omuzigaijo, omukazi ou yamuswereriire, ibara lye nuwe Tamara. 7Baitu Eri omuzigaijo gwa Yuda yabiihizaga muno MUKAMA, MUKAMA nukwo kumwita. 8Aho, Yuda yagambira omutabani Onani ati: “Nosemerra kuteerana na muka mugenzi wawe, ozarre mugenzi wawe abaana.” 9Baitu Onani yamanya nkooku abaana batarukwija kuba be, buli kasumi obu yateeranaga na uwe, amaizi yagataga hansi, aleke kuzarra mugenzi we abaana. 10Eki yakoraga, kikabiihiza MUKAMA, na uwe nukwo kumwita. 11Hanyuma Yuda yagambira Tamara muka mwana we ati: “Garuka owanyu, omunju ya sso, oikale oli mufaakati, okuhika Sera mutabani wange obu alikakura.” Habwokuba Yuda akatiina naateekereza ati: Omwana ogu, na uwe naija kufa nka bagenzi be. Nubwo Tamara yagenda yaikara omunju ya ise.
12Obu haahingwireho akasumi, muka Yuda muhara wa Suha yafa, Yuda obu yarugire omu kiinamirro, yagenda Timuna omu bantu abaasaarraga entaama ze ebyoya, akagenda na munywani we Hiira Omwaduramu. 13Tamara obu baamugambiire bati: “Sozaara naagenda Timuna, kusaza entaama ze ebyoya,” 14yajuura ebijwaro eby'obufaakati, yayotera, yayeswekerra orugoye ha mutwe, yaikarra ha irembo ly'orubuga Enaimu, orunyakuli ha muhanda ogunyakutwara Timuna habwokuba akamanya Sera nkooku akuzire kandi nkooku batamumuhaire kumuswera. 15Yuda obu yamurozire, yamweta malaaya, habwokuba akaba ayeswekeriire ha maiso. 16Yamwirirra ha ruguudo rubaju nambere akaba aikaliire, yamugamba ati: “Ningonza kubyama na iwe,” habwokuba Yuda atamanye omukazi ogu nkooku ali muka mwana we. Omukazi yamukaguza ati: “Kubyama na nyowe, oraampa ki?” 17Yuda yamugarukamu ati: “Omu igana lyange, ndaihamu embuzi ngikuhe.” Omukazi yagarukamu ati: “Nyikiriize, kyonka noija kumpa omusimbo ogu ndaikara nagwo, okuhika obu oraakagitweka.” 18Yuda yakaguza omukazi ati: “Nkusimbire ki?” Omukazi yagarukamu ati: “Empeta enyakuroho emanyikirizo yawe, omuyondo gwawe, n'omwigo ogu okwasire.” Ebintu ebi yabimuha, hanyuma yabyama na uwe. Omukazi yatwara enda. 19Omukazi yaimuka, yayesukura orugoye oru akaba ayeswekeriire, yagaruka yajwara engoye ze ez'obufaakati.
20Yuda obu yahaire munywani we Omwaduramu embuzi kugitwarra omukazi nukwo aiheyo ebintu ebi yasimbireyo, kitumwa, omukazi atamusangeho. 21Yakaguza abantu ab'omu kiikaro eki ati: “Malaaya akaba aikaliire ha muhanda rubaju, ali nkaha?” Baamugarukamu bati: “Hanu tihakabahoga malaaya.” 22Nubwo omukwenda yagaruka hali Yuda yamugambira ati: “Omukazi timmusangireho, kandi n'abantu ab'omu kiikaro eki, bangambiire ngu hali tihakabahoga malaaya.” 23Yuda yagamba ati: “Omukazi, ebintu kaikarre kimu nabyo, abantu bataija kumanya bakatusekeereza, embuzi ngitwekere, baitu tiwamusangaho.”
24Obu haahingwireho ameezi nk'asatu, abantu baagambira Yuda bati: “Tamara muka mwana wawe, akafooka malaaya, kandi n'omu bwa malaaya omu atwaliiremu enda.” Yuda yagamba ati: “Mumuleete hanu bamwokye afe.” 25Obu bakaba nibamuleeta, yatumaho isezaara naamumanyisa ati: “Omusaija mukama w'ebintu binu, nuwe yantwekere.” Yayongera yagamba ati: “Nkwesengeriize, oyetegereze mukama w'empeta enyakuroho emanyikirizo enu, omuyondo n'omwigo gunu.” 26Yuda yaikiriza ebintu ebi nkooku biri bye, kandi yagamba ati: “Omukazi onu ahikiriire, habwokuba ntamuhe mutabani wange Sera kumuswera.” Okuruga obu, atongere kubyama na uwe.
27Akasumi ke ak'okuzaara obu kaahikire, omunda ye, hasangwamu abarongo. 28Omu kasumi ak'okuzaara, omu hali bo, yaturukya omukono, omuzaalisa yakwata akahuuzo akarukunanata, yakamuboha ha mukono naagamba ati: “Onu nuwe abandize kuzaarwa.” 29Baitu ogu, obu akaba naagarra omukono munda, mugenzi we yaturuka, omuzaalisa yagamba ati: “Iwe wahagura ota kubanza kuturuka?” Nukwo kumuruka ibara Pereezi. 30Hanyuma, mugenzi we yaturuka, anyina akahuuzo akarukunanata, baamuruka ibara Zera.
Currently Selected:
Kub 38: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
