Kub 42
42
Bagenzi ba Yosefu nibagenda Misiri kusaka engano
1Yakobbo obu yahuliire ngu Misiri haliyo ebyokulya, yakaguza abatabani ati: “Habwaki muli aho nimurorangana kwonka?” 2#Ebik 7:12.Yagamba ati: “Mpuliire ngu Misiri haliyo ebyokulya, mugende mutusakireyo ebyokulya ebi turaalya, tuleke kwitwa enjara.” 3Aho bagenzi ba Yosefu ikumi, baagenda Misiri kusaka ebyokulya. 4Baitu Yakobbo ataikirize Benyamiini owanyina Yosefu kugenda na bagenzi be abandi, habwokuba akatiina yateekereza ati: taikara kugwerwa akabi. 5Aho batabani ba Isirairi baagenda Misiri n'abantu abandi kusaka ebyokulya, habwokuba kiihe ekaba egwire omunsi Kanaani.
6Omu kasumi ako, Yosefu nuwe akaba ali mulemi omukuru omunsi Misiri, kandi nuwe yaguzaaga abantu boona ab'omunsi ebyokulya. Bagenzi ba Yosefu baija baajuumara omumaiso ge. 7Yosefu obu yabarozire, yabamanyirra, baitu yabeehugya nk'atabamanyire, tiyabaza nabo kurungi. Yabakaguza ati: “Murugire nkaha?” Baamugarukamu bati: “Turugire omunsi Kanaani, twizire kusaka ebyokulya.” 8Yosefu noobu yamanyiriire bagenzi be, baitu bo batamumanyirre. 9#Kub 37:5-10.Yosefu yaijuka ebirooto ebi yaroosire ebikaba nibibakwataho, yabagambira ati: “Inywe muli ntasi, mwizire kwetegereza obuceke obunyakuli omwihanga lyaitu.” 10Baamugarukamu bati: “Nangwa, mukama waitu, abairu bawe eki baiziriire, nukwo kusaka ebyokulya. 11Tuli baana b'omusaija omu, tuli bantu beesigwa, itwe abairu bawe tituli ntasi,” 12yabagarukamu ati: “Nangwa mwizire kutata obuceke bwaitu.” 13Baamugarukamu bati: “Itwe abairu bawe, tuzaarwa tuli ikumi na babiri, tuli baana b'omusaija omu arukwikara omunsi Kanaani, macura gaitu akasigara na isiitwe, ondi akafa.” 14Baitu Yosefu yabagarukamu ati: “Nangwa, mbagambiirege nti: muli ntasi. 15Faraaho naakaanyite, timurukwija kuruga hanu, kubananukira nkooku mutali ntasi, muleete macura ganyu. 16Mutume omu hali inywe, atabarre mugenzi wanyu, inywe mube mukyali omunju y'enkomo, nukwo twetegereze ebigambo byanyu obu biraaba biri by'amazima, obu garaaba gatali mananu, nindahira Faraaho, mazimakwo muli ntasi.” 17Boona yabata omunju y'enkomo, bamalemu ebiro bisatu.
Simyoni naasigara omu nkomo ali mwema
18Ha kiro ekya kasatu, Yosefu yabagambira ati: “Kinu nikyo musemeriire kukora, nukwo mwomeere, habwokuba, nintiina Ruhanga: 19Obu muraaba muli beesigwa leka mugenzi wanyu omu asigale omu nkomo, abasigaireho, mugende mutwale ebyokulya, mujune abantu baanyu enjara, 20mundeetere mugenzi wanyu macura, nubwo turaabananukira kandi timwaitwe.” Baikiriza eki yabagambiire. 21Nubwo bagambirangaine bati: “Mananukwo, nitujunaanwa habw'okukora kubi mugenzi waitu oli, habwokuba tukarora nkooku akaba naasaalirwa, kandi noobu yatwesengeriize, tutamugirre mbabazi, nikyo turukubonabonera tuti.” 22#Kub 37:21,22.Rubbeni yabakaguza ati: “Ntabagambire nti omusigazi mutamukora kubi? Baitu mwaigara amatu, hati nikyo turukujunaanirwa habw'okumukora kubi.” 23Bbo batamanye Yosefu nkooku arukumanya engambo yabo, habwokuba obu yabaga naabaza nabo, haabahoga omuntu arukuhindura. 24Aho Yosefu yabarugaho, yagenda ha rubaju, yarra. Obu yagarukire nambere bali, yabaihamu Simyoni, yamuboha nibarora. 25Hanyuma, yaragira abaheereza baijuze ensahu zaabo ebyokulya kandi bagarre sente eza buli muntu omu nsahu ye, kandi bababohere n'entanda, ebi byona baabikora.
26Kandi baata ebyokulya byabo ha nkaina zaabo, baagenda. 27Obu baahikire omu ngoonyo, omu hali bo yasumurra ensahu ye, aihemu ebyokulya eby'enkaina ye, yarora sente ze ziri omu minwa y'ensahu ye, 28yagambira bagenzi be ati: “Sente zange zingaruliirwe nzinu, naisanga omu minwa y'ensahu.” Obu baahuliire eki, ebikiratima byabateera. Baarorangana nibatukumira nibagamba bati: “Kinu, Ruhanga atukozire ki?”
29Obu baahikire isebo omunsi Kanaani, baamusubirra byona ebyabaireho nibagamba bati: 30“Omusaija omulemi w'ensi eri, atabaze na itwe kurungi, akatweta ntasi abaagenderiire kutata ensi yabo. 31Itwe twamugarukamu tuti: ‘Tuli bantu beesigwa, tituli ntasi. 32Tukazaarwa tuli ikumi na babiri, tuli baana b'omusaija omu, omu akafa, macura gaitu akasigara na isiitwe omunsi Kanaani.’ 33Nubwo omusaija omulemi w'ensi egi yagambire ati: ‘Kubananukira nkooku muli bantu beesigwa, munsigire mugenzi wanyu omu, abandi mugende mutwale ebyokulya, mujune abantu baanyu enjara. 34Mundeetere mugenzi wanyu macura, obu nubwo ndaamanya nkooku mutali ntasi, baitu muli bantu beesigwa, kandi ndaabagarurra mugenzi wanyu, nukwo musuuburre omunsi munu.’ ”
35Obu bakaba nibacukumura ebyokulya ebikaba biri omu nsahu, kwija kurora ekikonjonjo kya sente eza buli muntu kiri omu nsahu ye, bbo na isebo obu baaboine sente ezi, baatiina, amaani gaabahwa. 36Isebo Yakobbo yagamba ati: “Ka mwammaraho abaana, Yosefu akafa, Simyoni taroho, kandi hati nimwenda kutwara na Benyamiini, ebi byona nibigwera nyowe.” 37Nubwo Rubbeni yagambiire ise ati: “Obu ntalimukugarurra, oliita batabani bange babiri, munkwase, ndimukugarurra.” 38Yakobbo yagarukamu ati “Omwana wange onu torukwija kumutwara, habwokuba owanyina akafa, kandi uwe wenka nuwe asigaireho. Kakuba agwerwa akabi omu rugendo oru murukwija kugendamu, buli nyowe omusaija omukuru n'enju zange zinu, arukusaalirwa ati, muraaba munziikire Nyabuyonga.”
Currently Selected:
Kub 42: BRR2008
Highlight
Share
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
