MATEO 18
18
Ache dejja shai ebionei queaca'a etii epojji bacaje cuaa huohuipea-aicapoa Jesosaa
(Mc 9.33-37; Lc 9.46-48)
1Ma pojjajotiiya aje o shajja-ajjajji poanicuaa Jesosa aniyasijje jjanequichipiquimajje huohuiajjacapoa oya jama ba'a: —¿Ache dejja ebionei queaca'a etii epojji bacaje cuaa Eyacuiñajjiya ojjañacuana huoojeacapoquianitii meshi Eyahuasijje?—
2Majoya Jesosaa oe dejjasho'i iyaacapoa o shajja-ajjajji poanicuanayiyesamaneijo enequimeejji. 3Oya majotii nequimeemajje Jesosaa jama huohuime acapoa cuana ba'a: —Eyaya quiana e'ejojonei huohuiaña. Miquianaya pea jjashahuabaqui'yome mipomajje, jiquio ecua esho'iquiana oyaneitii queaca'a poani jjashahuabaquiajja jama mipomajje, Eyacuiñajjiya ojjañacuana huoojeacapoquianitii meshi Eyahuasijje enobiqui'yojjitii pojjeama poaje. 4Jamajjeya joya dejja ebionei queaca'a etii epojji bacaje cuaa ma quijje Eyacuiñajjiya ojjañacuana huoojeacapoquianitii meshi Eyahuasijje comaya oyaneitii queaca'a poani jjabaquiajja poaje. Jiquio jjeyanei ani esho'i jama jjashahuabaquime poaje oya. 5Ojjaña joya ecuea epeejji queapame ja'ajjequijji poanicuana ecuea bajjanijo jiquio dejjasho'i ja'acajjequiani jama, eya pea-aiya queapame ja'acajjequije.—
6Jesosaa huohuipea-aicapoa cuana jama ba'a: —Ojjaña joya ecuea epeejji ca'a-ama eyacua ejo ejjashahuabaqui'yo queamimishi pomeesapojjicuana comaya canaajeyocahua mei-aijo bae-ai enaojjo queadoeneeyasijje edojonobiajeameequi'yojji ohua o queamimishi epomeeca cuahuajo. Jamaya queapame pome ojaya pea queamimishi pomeejjima yajji, Eyacuiñajjija oya queaneeneetii pomee'yojjima yajji. 7Jamajjeya joya peacuana queamimishi pomeejji poanicuana oya pea-ai queamimishinee poani Eyacuiñajjijo. Queahuisocuana jama nequicaya Eyacuiñajjiya bacani. Dejja peacuana queamimishi pomeejji poani caca oe ¡queaneenee canequi'yahua!
8—Bacue, mique emeya, mique ejeojjiya pea-ai miya queamimishitii pomeecani jjabaquimajje jajasejjajeacue eme, ejeojji pea-ai. Quea-mihuesha jeajeacue. Majoya quijje miya queapame poqui'yome Eyahuasijje jamatii mehuojja, jeojjihuojja pea-ai poani. Queapame pojjeama mi po'yome Cuaqui-ai quijjo'yoajja jaahuasijje ejeajea'yo nequi jamatii meña, jeojjiñatii pea-ai. 9Oya jayojja miya miquea ecojjaa queamimishitii pomeecani jjabaquimajje ecojja jjequicajjajeacue. Quea-mihuesha jeajeacue. Majoya mi quijje queapame poqui'yome Eyacuiñajji nequi meshi Eyahuasijje jamatii cojjamiji oe nequi. Queapame pojjeama mi po'yome Cuaqui-ai quijjo'yoajja jaahuasijje ejeajea'yo nequi jamatii cojjabecatii.—#18.9 Nota: Jiquio esohuicuana mimiani eme, ejeojji pea-ai ejajasejjajeaneijjijo pojjeama. Jiquio esohui jama poanijje ba'a: joya mi queamimishi pomeejji poani miquea cajaa acajji, nahueca'ajja.*
Esohui ebameesahuajji oveja ecuaquishojo
(Lc 15.3-7)
10Jesosaa esohui huohuitiicapoa cuana jama ba'a: —Jiquio ejo jjashahuabaqui'yanicuana joya ecua esho'iquiana jjashahuabaquiani jama, ¡a'a oya peajja jayojja poso bajji! Eyaya quiana e'ejojonei huohuiaña. O jaahuanajji poani angelcuana Eyacuiñajji Eyajo ani cojjaneijo nequipoquianitii o bapoquiajjitii. 11Eya Dejjapojji epo poeyanaje jiquio meshiyasijje ojjaña joya ecuaquisho jayojja ba'eca nahue'yohua.#18.11 Nota: Jiquio esohui versículo 11 ebionei tehuejjima poa, quijje ca tehuecapoa.
12—Bacue, oe dejja 100 oveja huisomejji poani. Majoya oe oja oveja ecuaquisho bamajje, ¿yajja ohuaya acaje'yo? ¿A'a acuae ohuaya 99 huisome ovejacuana jeananacaje so'o ma oenei ecuaquisho oveja sa-ajja'yohua? E'e de, poquije oya o sa-ajja'yohua. 13Oja oveja ecuaquisho ba'yomajje queabihuinee poaje'yo. E'ejojonei eyaya quiana huohuiaña oya queabihuinee poaje'yo o ba'yomajje, ma ecua oya queabihui poani oja 99 huisome ovejacuana cuaquishojjimajo jama pojjeama. 14Oya jayojja pea-ai miquianajaya Chii-ai Eyajo nequi jjashahuabaquiani. Ma ojo jjashahuabaquije'yocuana joya ecua esho'iquiana jama ojaya comaya queanahuenee poaje, jamajjeya cua ecuaquisho jayojja poanicuana sa-ajjacaje'yo ohuaya.—
Jiquio esenijje Jesosaja epeejji queamimishi poajo, yajja oya acajji huohuipea-aicapoa
(Lc 17.3)
15Jesosaa huohuitiicapoa cuana jama ba'a: —Miquea meshijo ba'e oe Jesosaja epeejji minijje queamimishi poajo mimiqui'yocue onijjenei oja mimishijo peacuanaja shajja-ajjajjima yajji. Oya miquea esohui queaja'a shajja-ajjamajje jjabaquije queamimishi poanaje. Majoya minijje jjapeequije o'oya. 16Ohua miquea esohui mishajja-ajjacajo pea dejja Jesosaja epeejji beca pojja'a iyaacue oja mimishijo queaja'a o cojjaneijo emimio'oyajji. Eyacuiñajjija esohui ma yahuajonei tehuecapoa jama pea-ai poani ba'a: Mishajja-ajjacajo peacuana, tres pojja'a shajja-ajjameecue oja mimishi quio mi onijje mimije o'oya o cojjaneijo nequimajje. 17Jamatii ohua miquianaja esohui mishajja-ajjacajo ojjaña Jesosaja epeejjicuana ma meshijo ba'e jjachichaquipoquianicuana iyaaquicue ejjachichaquijji oja mimishijo emimio'oyajji onijje ja'anei. Ohua ojjañacuanaja esohui mishajja-ajjacajo, onijje jjapeequipajea'yocue. Dejja joya ecua Roma emeshimeseja yajji bejjo chichapoquiajji poani Eyacuiñajjima' jama ba'yome oya acue.
18—Eyaya e'ejojonei quiana huohuiaña, cua miquiaaya ameejjima aña jiquio meshijo nequiya Eyacuiñajjiya Eyajo nequiya bacaje jamaya queapame. Cua miquiaaya peacuana ameeaña jiquio meshijo nequiya Eyacuiñajjiya Eyajo nequiya bapea-aicaje jamaya queapame.
19—Eyaya quiana huohuipea-aiaña, beca miquiana Jesosaja epeejji jiquio meshijo nequi oya jayojja pea-ai jjashahuabaquime poajo Eyacuiñajjinijje emimijji, oja mimi shajja-ajjacaje Eyacuiñajjiya. Cua beca miquiaa saña huisotii Eyacuiñajjiya miya quiacaje. 20Jamajjeya ecuea epeejjicuana jjachichaquiajo ecuea bajjanijo jamatii beca ani, tres pojja'a eya majo pea-ai nequiani onijje— jama huohuimeya acapoa Jesosaa.
21Majoya aje Pedro poeapoa Jesosa nequiyasijje o huohuiajjaa. Jama acahuapoa ba'a: —Emeshimesenei, miquea epeejji enijje queamimishi poajo, ¿achehuisojo shai eyaya oja mimishi pajeaje'yo, a'a siete huisome pojja'a?—
22Jesosaa oya jama saja-ame acapoa ba'a: —Ecuea miya ehuohuijji siete huisomeneijotii pojjeama. Queahuisoneeneejo ca oja mimishi pajea'yocue 490 huisome jamajo.—
Jesosaa huohuipea-aicapoa esohui ebameesahuajji oe dejja peaja mimishi pajeasapo'yoajjanei poajejo
23Jesosaa huohuitiicapoa cuana pea esohui jama ba'a: —Eyacuiñajjiya ojjañacuana queapamenee huoojeacapoquianitii meshi jiquiajjaya poani ba'a: Oe emeshimese etii poaniya huohuiajjaca'yonaje achehuiso ma ojo chacochacopoquianicuanaja cuenta nequi esosequiamee'yojji. 24Majoya emeshimeseya cuentacuana huohuiajjaca'yoquijotii oe ojo chacochacopoquiani dejja yecapoa cuaa. Ojaya cuenta queahuisoneenee nequi, yajja sosequia'yome yajji poanaje. 25Ma ojo chacochacopoquiani dejjaja bejjo oepojjinei poanaje. Ojaya chama'nei queahuiso poanaje bejjocuanaya oja cuenta sosequiajeyo'yojji. Jamajjeya emeshimeseya queaqueneya huohuicapoa cuana jama ba'a: “Joya jiquiojo nequi queacuentahuisonee poani quiajeacue bejjo sosejje. Majoya ohuaya chacocaje peajo o jjeshejjijo. Oja huanase, oja bacuacuana pea-ai quiajeacue bejjo sosejje, oja aquianacuana pea-ai. Jamaya ohuaya oepojjinei sosequiacaje'yo.” 26Emeshimeseya jama huohuime acajje dejja queacuentahuiso o ani cojjaneijo oja ecuioshajjajo nequioqueñanaje emeshimese huohuiajjaneineijji. Jama huohuiajjaneime acanaje ba'a: “Emeshimese, ¡a'a ecuana dojojeamee'yojji equiajeajji! Ishoapoquiasocue eya, quijjepishana eyaya miya sosequiajeyoje'yo” jamaya ohuaya a-ajjacanaje. 27Ohua jama huohuiajjaneineime acajje emeshimese queayeno jjashahuabaquinaje ojo. Jamajojoya aje oja cuenta ojjañatii pajeaca'yonaje, apoa aca'yonaje emeshimeseya. Majoya oya huoojeaca'yonaje queabihui cuentama'yo.
28—Majo nequi cuayaqui'yomajje dejja queacuentahuiso poanajeya bacanaje pea onijje emeshimesejo chacochacopoquiani dejja. Ma dejjaja ca oepojjinei cuenta enequi ojo ma queacuentahuiso poanaje dejjajo. Majoya ohuaya ma pea oepojji cuentajji dejja epiquijo iñaca'ajeamajje jama yajeame acanaje oya ba'a: “Miquea eya cuenta sosequia'yojjima, jjeyahuanei mo sosequia'yocue.” 29Majoya ma oepojjinei cuentajji poani dejja o cojjaneijo nequi anioquenaje oja ecuioshajjajo o huohuiajjaneineijji jama ba'a: “Ishoasocue eya. Quijjepishana eyaya miya ecuea cuenta sosequiajeyoje'yo.” 30Ma ebionei queacuentahuiso poanaje dejja ca oja cuenta ishoasapo-ajja poanaje ma pea oepojjinei cuentajji dejjaja. Jamajojoya aje ohuaya oya jeanobiameecanaje ejjajeanobiaquijji equiyasijje majotii anija ojaya cuenta esosequiajeyo'yojji. 31Majoya aje pea dejjacuana emeshimesejo chacochacopoquiani pea-ai oya ejjajeanobiaquijji equijo ejeanobia ani shajja-ajjamajje queayenonee poanaje ojo. Jamajjeya poquinaje cuana emeshimese huohuiya yajja dejja queacuentahuiso poanajeya pea acanaje oja cuenta oepojjineijo. 32Ojaya esohui shajja-ajjamajje emeshimeseya ma queacuentahuisonee poanaje dejja jjequimeecanaje onijje emimijji. Jama yajeame acanaje oya ba'a: “Miya queamimishineenee. Eyaya miquea cuenta queahuisoneenee nequi yajja sosequia'yome yajji pajea'yonaje miyaya eya huohuiajjaneineinajejojoya. 33Jamajjeya miquea pea-ai ma pea minijje chacochacopoquinajeja cuenta oepojjinei pajeapea-aica'yojji poanaje. Jiquio ecua eya mijo queayenonee poanaje jama pea-aiya miya popea-aicajji poanaje ojo” jama yajeameya oya acanaje. 34Majoya emeshimese queaquenenee nequiya huohuicanaje cuana o queanee ajjijo ejjajeanobiaquijji equiyasijje. Majotii oya anipoquije oja cuenta esosequiajeyo'yojji.—
35Jesosaa huohuipea-aicapoa jama ba'a: —Oya jayojja quiana acaje ecue Chiiya Eyajo nequiya miquiaaya pea minijje ba'eca ecuea epeejjija mimishi pajea'yojjima ajo. Jamajjeya oe e'ejojonei, ¡peaja mimishi pajea'yocue!—
Currently Selected:
MATEO 18: ESE
Highlight
Share
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
