MARCOS 10
10
Jesosaa esohui huohuicapoa ejjahueiquijjijo
(Mt 19.1-12; Lc 16.18)
1Majoya aje quijje Jesosa Capernaúm meshijo nequi poquiapoa provincia Judea meshiyasijje ma Jordán cuei eshequi jaasohuani ojjemijiyasijje. Ma meshijoya queahuisocuana jjachichaquicapoa Jesosaque. Jamajjeya Jesosaa esohui huohuicapoa cuana ma ecua ohua huohuicapoquiani cuana jama pea-aiya. 2Jesosa nequiyasijje beca fariseo dejjacuana poepea-aiapoa a'a Jesosaa esohui huohuitaicaje ebajji nisho. Jamajojoya aje Jesosa jama huohuiajjame acapoa cuaa ba'a: —¿A'a dejjaa ehuanase hueicajji?—
3Jesosaa saja-acapoa cuana jama ba'a: —¿Yajja acuae quiana yahuajo Moisesja etehueya acapoa?—
4Jama poa cuana ba'a: —Yahuajo Moisesya jama acapoa ba'a: “Yahueya ehuanase hueisa-amajje ebionei papeni o hueijji caquiaca'yahua.”—
5Majoya aje Jesosa jama po-o'oyapoa ba'a: —Yahuajonei Moisesya jamaya huohuicapoa cuana esohui ehuanase hueijjijo oya queajjashahuabaquiquehuanee poajojoya. 6Eyacuiñajji ca jama sapo-ajjanei poa yahuajoneinei ohua dejja, epona pea-ai panacoocapoajo. 7Eyacuiñajjiya yahuajonei jama poa ba'a: “Jamajjeya dejjacuaa oja chii, oja nae pea-ai jiñacaje jjahuanaquimajje ehuanasenijjenei eba'epoquijji. 8Oya oja huanasenijjenei ba'epoquije oe eyami jayojja epojji, beca pojjeama.” Jamaya oya ba'epoquije becatii pojjeama, oe eyami jayojja ca ba'epoquije. 9Jamajjeya dejjacuaa oja huanase hueica-ajja Eyacuiñajjiya esohui yahuajonei huohuicapoajojoya dejja oja huanasenijje ojee queapame ba'epoquije oe jayojja— jama saja-ameya Jesosaa acapoa.
10Majoya aje quijjepishana equijo ani o shajja-ajjajji poanicuaa Jesosa huohuiajjacao'oyapoa oya esohuiya ehuanasecuana hueijjijo. 11Jamajjeya Jesosaa jama acapoa cuana ba'a: —Dejja joya oja huanase hueijji poani pea eponajo ejjahuanaqui'yojji oya queamimishinee poani oja ebionei eponajo. Oya peacojjojji poani. 12Epona ojahue hueimajje pea dejjajo ejjahueaqui'yojji queamimishi pea-ai poani oja ebionei yahuejo. Oya peacojjojji poani bacani.—
Jesosaa esohui queapame acapoa esho'iquianajo
(Mt 19.13-15; Lc 18.15-17)
13Majoya aje Jesosaque esho'iquiana yecapoa cuaa Jesosaja eme oja sapabiajje ehuanajji. Esho'iquiana yecani bamajje o shajja-ajjajji poanicuaa ma esho'i yejji poanicuana tecueacapoa oja o yejjima yajji. 14O jama tecueame acaje shajja-ajjamajje Jesosa queaquenepishana poa. O shajja-ajjajji poanicuana huohuicapoa jama ba'a: —¡A'a esho'iquiana yejji poanicuana tecueajji! Ohuaya cayecahua eque. Bacue ojjaña jiquio ejo ani esho'iquiana jjashahuabaqui'yani jayojja comacuanaya nobiquije'yo Eyacuiñajjiya ojjañacuana huoojeacapoquianitii meshi Eyahuasijje— jamaya poa Jesosa. 15—Jamajjeya ojjaña joya jiquio ecua esho'iquiana jjashahuabaquiani Eyacuiñajji oja Emeshimesenei epojjijo jama mipomajje oya Eyacuiñajjiya huoojeacapoquianitii meshi Eyahuasijje epoqui'yojjitii pojjeama poaje.—
16Majoya Jesosaa esho'iquiana añacapoa. Oya oja eme esho'ija sapabiajje huanamajje Eyacuiñajjinijje mimiapoa o queapame pomeejjijo.
Dejja quea-aquianahuisonee Jesosanijje miminequiapoa
(Mt 19.16-30; Lc 18.18-30)
17Majoya aje quijje Jesosa poquiajjanijo oe dejja cuajicuajijebeapoa o nequiyasijje. O nequi cojjaneijo oja ecuioshajjajo nequiñamajje Jesosa huohuiajjacañapoa jama ba'a: —Esohuihuohuijji queapamenee, ¿ae ecuea acajji eba'etiitiipoqui'yojji Eyahuasijje?—
18Jesosaa oya jama saja-acapoa ba'a: —¿Yajjajje eya queapamenee poani huohuiaña? Che oeneinei enequi queapameneetii nequipoquiani, oya ca Eyacuiñajji. 19Miquea ojjaña Eyacuiñajjija esohui Moisesja tehuecuana eba jama poani ba'a: “¡A'a pea quecua'yojji! ¡A'a peaja ehuanase siijji! ¡A'a peacojjojji pojji! ¡A'a sii pojji! ¡A'a peacuanajo siajje pojji, a'a oya queamimishi poani siajje ajji! ¡A'a pea dasiajji! ¡Mique chii, mique nae pea-ai queapame apoquiacue, oja esohuijo oe jjashajja-ajjaquicue!”—
20Ma dejjaa Jesosa jama acapoa ba'a: —E'e, ojjaña jiquio miya huohuinaje huisotii esohui jayojjaya eya ba'epoquiani, esho'yahuatii.—
21Jesosaa oya bacapoa queajeanee jamajjeya jama oya acapoa ba'a: —Jiquio jjeya eya mi huohuije miquea acajji mi Eyahuasijje eba'etiitii'yojji. Jamaya acue ba'a: Poqui'yosocue miquea equiyasijje ojjaña miquea aquianacuana quia'yohua bejjo sosejje. Majoya aema'cuana mique bejjo quiajeyo'yocue o asahuajji. Jama poajo miya Eyacuiñajjiya mi queabihui ponequi'yojji queahuiso quiacaje quijje Eyahuasijje nequi'yajo. Jamajjeya miquea bejjo aema'cuana quiajeyo'yomajje poecue eque enijje po'yohua.—
22Jesosaa oya jama acajje ma dejja queacojjayenonee ponanapoa oya quea-aquianahuisonee poanijjejojoya. Jamajjeya oya jamatii poqui'yapoa queayenotii.
23Majoya Jesosaa o shajja-ajjajji poanicuana bajeamajje jama acapoa cuana ba'a: —¡De, queacamajanee poani dejjacuana quea-aquianahuisonee poanija epoqui'yojji Eyacuiñajjiya ojjañacuana huoojeacapoquianitii meshi Eyahuasijje!—
24Majoya aje o shajja-ajjajji poanicuana jjashahuabaneiquiapoa o jama poaje shajja-ajjamajje. Jamajjeya Jesosaa huohuicao'oyapoa cuana jama ba'a: —Ecue bacuaejjacuana, queacamajaneenee ca eaehuisocuanaja Eyacuiñajjiya ojjañacuana huoojeacapoquianitii meshi Eyahuasijje epoqui'yojji. 25Bacue, camello ehuone queaquemo. Queacamajanee agujaquii huejjajje camelloja ejjayejjequijji. Jama pea-aiya queacamajaneenee poaje dejja quea-aquianahuisoja epoqui'yojji Eyacuiñajjiya ojjañacuana huoojeacapoquianitii meshi Eyahuasijje.—
26O shajja-ajjajji poanicuana Jesosa jama poaje shajja-ajjamajje mimimimiapoa ojee oya oopana jama ba'a: —¡De! Jamajojjemo, ¿ache dejja shai Eyahuasijje poqui'yome?—
27Jesosa o shajja-ajjajji poanicuanaja ecojja baneimajje jama mimime poa ba'a: —Dejjacuana oyaneitii ejjanahuequi'yojji pojjeamatii poaje Eyahuasijje epoqui'yojji. Eyacuiñajjijo caca oe oya jjanahuemeequica'yojji; chama'neinei ojaya queacamaja eajji.—
28Majoya Pedro jama poa ma dejja quea-aquianahuisojo jjashahuabaquimajje ba'a: —Ecuaaya ca ecuanaja aquianacuana jeana'yonaje minijje epo'yojji.—
29-30Jesosaa saja-acapoa cuana jama ba'a: —E'ejojonei eyaya esohui huohuiaña. Ojjaña joya oja equi, oja chii, oja nae, oja jjo'icuana, oja bacuacuana, oja meshi pea-ai jiñajji poaje ejo, ecuea esohui peacuana huohuiquijjijo pea-ai, jjeya jiquio meshijotii nequiya jjeshecaje queahuisoneenee, 100 huisome huiso, ma ecua ohuaya jiñacanaje ecuea esohuijo echacochacojji jama pojjeama. Equicuana, meshicuana, oja huapa pojjeamacuana pea-ai queahuisoneenee Eyacuiñajjiya oya quiacaje. Jamatii queahuisocuaa oya queacamajanee acapoquije pea-ai. Majoya quijje Eyacuiñajjiya comacuanaya ba'etiitiimeecaje'yo Eyajo onijje queabihuinee. 31Becacuana joya ca'a-ama jjeya bacani cuaa, oe-ejjenei nequi jayojja, comacuanaya ma pojjajo Eyacuiñajjiya ebionei nequimeecaje ona huoojeajji. Peacuana ca joya queaca'anee jjabaquiani ehuijo enequijji ma pojjajo Eyacuiñajjiya macuanaya oe-ejjenei nequimeecaje'yo.—
Jesosa huohuicao'oyapoa o mano'yojjijo
(Mt 20.17-19; Lc 18.31-34)
32Majoya aje quijje Jesosa o shajja-ajjajji poanicuananijje poquio'oyapoa JerusalĂ©n meshiyasijje. Jesosa ehuidojojji poquiapoa. O shajja-ajjajji poanicuana peacuana pea-ai Jesosaquishishi poquije queamete poa ojo. Majoya Jesosaa ejeojjijje poquijeya oja babaca 12 huisome dejjacuana jjanequishiñameequicapoa onijje oopana ehuohuijji ma quijjepishana o acaje'yojo. 33Jesosaa jama huohuime acapoa oja babaca dejjacuana oopana ba'a: —Miquianaya jjabaquiani jjeya eseya poquiani ejeojjijje JerusalĂ©n meshiyasijje. Ma meshijotii nequiya aje eya Dejjapojji epo siajje acaje cuaa Eyacuiñajjija equi-aijo chacochacopoquiani etiicuanaja, Moisesja tehuehuohuijji poanicuanaja pea-ai e manomee'yojji. Peajaajjicuanaja emanomee'yojji eya quiacaje cuaa. 34Majotii nequiya eya peajaajji judĂo pojjeamacuaa soadojocaje, oja emeshimesenisho eya acaje cuaa. Eya cuiasejjajeacaje jjono ejeapashajjajjaa. Majoya eya ba'ehuanasohuajeacaje cuaa emano'yojji acui ecuiata'apeejo ba'e. Jamatii tres cahuime huiso emano'yo jaa eya shequije'yo.—
35Majoya aje Santiago oja chahua Juan pea-ai, Zebedeoja bacuaejja, jjanequichipiquiapoa Jesosanijje emimijji. Jama poa ba'a: —Esohuihuohuijji, jiquio ecuaa mi jjeya huohuiajjaje esohui che acue.—
36Jesosaa oya huohuiajjacapoa jama ba'a: —¿Yajja acuae quiana oe aje joya miquiaa sañajo?—
37Oya saja-acapoa jama ba'a: —Eyacuiñajjiiya miya Emeshimesenei nequimeecajo ecuana mi pejjejo nequimeecue peacuana huoojeapoquiajji epojji pea-ai. Oe mique ebañeimijijje, pea mique shanimijijje ecuana nequimeecue.—
38Jesosaa saja-acapoa cuana jama ba'a: —Jiquio miquiaa eya huohuiajjaña miquianaja bajjima jama epojji. ¿A'a jiquio ecua eya queaneenee acaje'yo cuaa jama posapea-ai miquiana poani? ¿A'a quiana queaneeca'a pome?—
39Beca Zebedeoja bacuaa Jesosa saja-acapoa jama ba'a: —E'e, jama posapea-aiya ecuana poani queaneeca'a nequije.—
O jama poani shajja-ajjamajje Jesosaa jama huohuime acapoa ba'a: —E'ejojonei miquiana queaneenee acaje'yo cuaa jiquio ecua eya queaneenee acaje'yo jama pea-aiya. 40Jamatii ache dejja ecuea ebañeimijijje queaca'a anije, ache ecue shanimijijje queaca'a anije pea-ai peacuana huoojeapoquiajji epojji ecuea ehuohuijji pojjeama. Ecue Chiiyanei caca oe babacacaje ache dejjacuana mamijijje animeecaje— jamaya poa Jesosa.
41Ma pea diez huisome Jesosaja babaca dejjacuaa Santiagohua, Juanya Jesosa majo huohuiajjacani shajja-ajjacapoa. Ache Jesosamijijje quijje queaca'a anije peacuana huoojeapoquiajji epojji shajja-ajjacapoa cuaa. Jamajje queaquene poa cuana Juannijje Santiagonijje pea-ai. 42Jesosaa ca oja babaca dejjacuana iyaacapoa onijje queaja'a emimijji. Jama mimime poa ba'a: —Miquianajaya eba joya judĂo pojjeama emeshimesecuana oyaneitii queaca'anee jjabaquiani oja meshijo ba'ecacuana echacomeejji epojji queabishaa. Jamajjeya oja meshijo ba'ecacuana oya queaca'anee nequiani bamajje jjashajja-ajjaquiani oja esohuijo o yajjajo. 43Miquianaya ca jama jjashahuabaquime poca-ajja. Joya queaca'a posapoani peacuana huoojeapoquiajji epojji ebionei ojaya pea onijje ba'ecacuana asahuacajji. 44Jamajjeya joya jiquiojo ani oe queaca'a posapoani peacuana huoojeapoquiajji epojji ehuiyasijje enequijji, ebionei ojaya peacuana asahuacajji. 45Eya Dejjapojji epo majoya poeyanaje peacuana queapame asahuaa. Joya ecua emeshimesecuaa queabishaa peacuana chacomeeneicani ojaya yajjijo jama pojjeama pohua eya poeyanaje. Majoya eya quijje jjaquiaquije emano'yojji queahuisocuana nahue'yojji epojji oja mimishijo.— Jamaya Jesosa huohuicapoa cuana.
Jesosaa Bartimeo bajjani dejja jjacojjaja'ameequica'yapoa
(Mt 20.29-34; Lc 18.35-43)
46Majoya aje quijje Jericó meshi bañaquimajje Jesosa o shajja-ajjajji poanicuananijje ma meshi jiñaca'yapoa. O poquianijo queahuiso ma meshijo nequicacuaa Jesosa equijje acapoa ojee. Oe dejja cojjama' jjabaquiajja Bartimeo bajjani, Timeoja bacuaejja, memeaniapoa ejeojjicojjasahuajo ani. 47Jesosa Nazaretcuiñajji o anijje jjayejjequije shajja-ajjamajje ma dejja cojjama', taaasajajeapoa jama ba'a: —Jesosa Davidja osecua, ¡che ejo queayeno jjashahuabaquicue e queapame pomee'yojji!—
48Queahuisocuaa ma Jesosanijje poquianiya oya cojjama' dejja tecueacapoa oya mimima' ejeca ani'yojji nisho.
Jamatii oya taaamajamaja-aniapoa oya esohui jama ba'a: —Jesosa Davidja osecua, ¡che ejo queayeno jjashahuabaquicue e queapame pomee'yojji!—
49Majoya Jesosaa o jama taaame pomajamajajo nequiñaquimajje huohuicapoa cuana jama ba'a: —Joya dejja jjabaquiajja iyaacue, jjequicue jiquiacua eque.—
Majoya aje dejja cojjama' iyaacapoa cuaa jama ba'a: —Cojjama' nequisohuacue, poecuajicue. Jesosaa miya iyaacani, queabihui pocue.—
50Jamajjeya oya oja daqui ebiajjejo ba'e huijjiajeamajje nequisohuananapoa Jesosa nequiyasijje. 51Jesosaa oya huohuiajjacapoa jama ba'a: —¿Yajja ecue asa acuae mi poani so'o?—
52Cojjama' dejjaa saja-acapoa jama ba'a: —Esohuihuohuijji, eya jjabaqui'yosapoani queacojjaja'a epo'yojji.—
Majoya aje Jesosaa oya jama acapoa ba'a: —Ocue poquiajja. Miya e'ejojonei ejo jjashahuabaqui'yonaje, jamajojoya aje mi queacojjaja'a pomee'yonaje.— Jesosaa oya jama esohui acajeahuajo oya jjacojjaja'aquinana'yapoa. Majoya oya Jesosanijje poquipea-aiapoa ejeojjijje.
Currently Selected:
MARCOS 10: ESE
Highlight
Share
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
