Aramid 1
1
Maipanggep iya naikari nga Ispiritu Santu
1Ito nona nga panagsurat ku ikew, Apu Tiyupilu, nipakaemmuc diya amin maipanggep kadiya winangwangel ne̍ Je̍sus, se̍ diya nisursuru na manipud ito damu nga nirugi na ya nagisuru, 2patingga ito pannakaipangudu na ka langit. Ket sacbay nga naipangudu ka langit, uwed bilbilin nga nibilin na kadito pinili na nga apustule̍s na, ket nibilin na didi gapu iya panangidalan niya Ispiritu Santu igina. 3Kalpasan nito pannakatey na, nagpaspasingen nge̍ Je̍sus igida ka unus eppat nga pulu nga algew, ket adu diya pammanecnec na tasun mapanecnekkan da nga tutu nga nagungarin. Nasingen da ngarud nge̍ Je̍sus, ket nilawlawag na igida ya maipanggep iya panangituray ne̍ Apu Diyus.
4Ket ito name̍nsan nga naguurnung da, itu yani ya nibilin ne̍ Je̍sus igida: “Madi kayu pekkem pumanaw ka He̍rusale̍m, ta itonan nu pekkem to nikari niya Ama nga nibagac dakayu itun. 5Ta to Juan, binautisaran nakayu ngarud ka danum itun, ngem iya di mabayag nga algew, uwed bautisar nu nga pannakaiyalubu niya Ispiritu Santu dakayu,” kunen na.
To pannakaipangudu ne̍ Je̍sus ka langit
6Ket ito naguurnung manin dito apustule̍s, sinaludsud da e̍ Je̍sus nga kinunen da, “Ita kad Apu, ya panangipasoli mun iya panangituray diya Israe̍lita?” kunen da.
7Ngem kinunen ne̍ Je̍sus igida, “Bekken nu nga biyang diyan nga banbanag, ta ya Ama ngas met ya makaemmu no nagan pekkem diya nikeddeng na nga maariman se̍ no nungey nad diya timpu nga pannakaariman da. 8Ngem dito banbanag nga kinagic se̍ winangel ku, ket emmu nu dan. Ket no umbe̍t nad dakayu ya Ispiritu Santu, paturedden nakayu nad gapu iya pannakabalin na, tasun mangipakaemmu kayu iya kinapudnu maipanggep iyaken. Mangipakaemmu kayu nad ennid He̍rusale̍m, se̍ iya amin nga prubinsiya nga Hudya ngi, se̍ enna prubinsiya nga Samarya, se̍ orey pe̍ iya amin nga lubung,” kunen na.
9Ket ito nakagi na yanin, naipangudu mettin nga singsingen da. Ket uwed ulep nga nanglinged iginan, itu nga madi da nasingen nin.
10Ket ito lumalangad da pekkem nga sumipsiput ito pannakaipangudu ne̍ Je̍sus, pagamwan da ngas nga uwed met duwa nga lalaki nga agsisikad iya edyan da nga nakaluput ka puraw. 11Ket idi ya kinagi dito duwa nga nagpasingen: “Dakayu nga iGalilya, ape̍ kad nga nakalalangad kayu pekkem? Naipanaw ngarud nge̍ Je̍sus dakayun, nga naipangudu ka langitin. Ngem sumoli nad mettas nga agten ito ipapanaw na nga nasingen nu ita,” kunen da.
To panangsukat da ito Hudas
12Ket simoli dito apustule̍s enna He̍rusale̍m nga gayat da ka tageytey nga maawagan ka Tageytey Ulibu. Pasar isa nga kilume̍tru ya kadeyyu na. 13Ket ito nakadateng dan iya paged-edyanan da ka He̍rusale̍m, nimune̍c da se̍ da nimuneg iya siled da. Igida diyan de̍ Pe̍dru, Juan, Santiyagu, Andre̍s, Pe̍lipe̍, Tumas, Bartulume̍, Matyu, se̍ e̍ Santiyagu nga putut ne̍ Alpiyu, se̍ e̍ Simon nga maawagan ka Pasnec, se̍ e̍ Hudas nga anac niya isa nga Santiyagu. 14Kankanayun nga naguurnung da tasun kaykaysaen da ya agkararag, agraman dito kakabsat ne̍ Je̍sus, se̍ diya babey nga pati e̍ Marya nga ina ne̍ Je̍sus.
15Ket iya isa nga algew itun, naguurnung diya mamati. Agdagup ngata ka sangagasut ket duwa nga pulu da. Ginumnukat nge̍ Pe̍dru ket nagkagi igida, nga kinunen na, 16“Wawagi, napatutuwanin to nipaisurat niya Ispiritu Santu ito Ari Dabid itun, maipanggep ito Hudas nga bagnus dito nangtekkem e̍ Je̍sus. 17Tutu met, ta to Hudas, isa met dakami nga sangapulu ket duwa nga pinili ne̍ Je̍sus nga tumulung igina,” kunen na. 18Ket to kuwarta nga nanangdan diya toley ito Hudas ito winangel na nga dake̍c, itu ya naingina ka isa nga day-as nga nakatayan na. Ta nibaltug met antuni, ket nabetdi ya bessug na, ket nibolnayag diya siney na. 19Nagdinamag yani kadiya amin nga toltoley ka He̍rusale̍m, itu nga napanaganan yan nga day-as ka Ake̍ldama no kagi diya Hudyu, nga kayat na nga kagiyen, “Day-as nga Nadagaan.”
20Ket nituluy ne̍ Pe̍dru nga kinunen na, “Uwed nisurat nito Ari Dabid ito libru Salmu iya Bibliya, nga napatutuwanin gapu ito Hudas. Ta kunen na, ‘Mapanawan kuma ya baley na. Ngarud, awan kuma agedyan iyanin.’ Ket kunen na pe̍, ‘Uwed kuma sabali nga sumukat igina iya akem na,’ kunen na. Agten kadiyan ya naisurat ito libru Salmu.
21“Dikad pe̍ itan, tasun uwed kuma kabulun mi nga apustul, masapul nga piliyen tida ya isa kadiya nibulubulun nga pe̍yeng dakami ito kauwed pekkem ne̍ Apu Je̍sus nga kabkabulun tida, 22nanipud ito panangaskasaba nito Juan nga Mammautisar, patingga ito pannakaipangudu ne̍ Apu Je̍sus ka langit ito naipanaw dactida. Itu nga sapulen tida kuma ngarudin ya agten iyan nga toley, tasun uwed makitipun dakami nga mangipanecnec iya panagungar ne̍ Je̍sus,” kunen na.
23Ket uwed duwa nga toley nga agten iyan nga nibaga da, nga itu de̍ Huse̍ nge̍ Matyas. E̍ Huse̍, napanaganan pe̍ ka Barsabas se̍ Hustu. 24Dikad pe̍ nagkararag da nga kinunen da, “Apu, emmum met ya uwed iya lemlemmet diya amin nga toley. Itu nga ipakaemmum kuma no nagan kadidi nga duwa ya pinilim, 25tasun uwed mangsukat ito Hudas iya akem na nga isa dakami nga apustule̍s. Ta pinanawan nito Hudas ya kinaapustul na nga nawe̍ yin iya lugar nga tumutup igina,” kunen da.
26Ket nagbibinnunut da gapu kadito duwa, ket napagasatan nge̍ Matyas. Itu nga iginan ya naidga kadito sangapulu ket isa nga apustule̍s.
Currently Selected:
Aramid 1: YBT
Highlight
Share
Copy
Want to have your highlights saved across all your devices? Sign up or sign in
© 1990 New Tribes Mission, Sanford, FL 32771-1487, USA.
Printed in the Philippines.
