Juan 14
14
E̍ Je̍sus ya dalan, ya pudnu se̍ ya mange̍cde̍ ka biyag
1Kinunen manin ne̍ Je̍sus kadito adalan na, “Madi kayu kuma madanagan winno masicsikuran maipanggep iya ipapanaw ku, no di lugud mamati kayu e̍ Apu Diyus se̍ mamati kayu met pe̍ iyaken. 2Enna edyan ne̍ Amac, adu ya pagedyanan, ket mawe̍ yac mangisagana ka pagedyanan nu. Tutu met yan, ta madic met ibaga dakayu no bekken nga pudnu. 3Mawe̍ yac ngarud, ket kalpasan niya panangisaganac iya pagedyanan nu ennan, sumoli yac met nga umbe̍t nakayu alaken, tasun ya pagedyanac, itu met pe̍ ya pagedyanan nu. 4Ket emmu nu ngarudin ya dalan nga mawe̍ iya kapennac,” kunen na.
5Ket e̍ Tumas, kinunen na e̍ Je̍sus, “Madi kami met emmu no awac ya kapennam, Apu. Kumaan na ngarud nga emmu mi ya dalan?” kunen na.
6Ket kinunen ne̍ Je̍sus igina, “Iyaken mettas ya dalan, se̍ ya pagtaudan niya kinapudnu, se̍ ya mange̍cde̍ ka biyag. Awan makapen iya Ama no madi manalan iyaken. 7No em-emmu dac kun, em-emmu nu met pe̍ yin ya Amac. Ket itan, em-emmu nu ngarudin ya Amac, ket arig nga nasingen nun,” kunen na.
8Ket e̍ Pe̍lipe̍, kinunen na e̍ Je̍sus, “Ipasingem kay dakami ya Ama, Apu, tasun mapnec kamin,” kunen na.
9Ket kinunen ne̍ Je̍sus, “Ay Pe̍lipe̍, nabayag gac met nga nakibulubulun dakayun. Di nac kad pekkem em-emmu? Ape̍ kunem pekkem mas nga ipasingec dakayu ya Ama? Ta ya nakasingen iyaken, nasingen na met pe̍ ya Ama ngin. 10Madi ka kad pekkem patiyen nga naitipun nac iya Ama, se̍ ya Ama, naitipun pe̍ iyaken? Ket diya kagkagiyec dakayu, bekken nga tumaud das iyaken. Ta ya Ama nga agedyan iyaken, igina ya mangibilin iyaken kadiya ipawangel na iyaken. 11Mamati kayu kuma ngarudin idi nga ibagac nga naitipun nac iya Ama, se̍ naitipun met ya Ama iyaken. Ket no madi kayu gabay ya mamati gapu was kadiya kagkagic, mamati kayu kuma ngarud gapu kadiya winangel ku nga nasingen nun.
12“Pudnu met yani nga ibagac: Diya mamati iyaken, matulad da met pe̍ diya wangwanglec. Ket bekken nas nga iyan, ta diya mamati iyaken, dacdackel pekkem ya mawangel da nad ngem kadiyan. Tutu met ya agten iyan, ta mawe̍ yac iya pagedyanan mettas niya Ama. 13Ket orey nagan na ya adngen nu nad iya Ama nga sipapati iya kinaturay ku, itungpal ku ngarud dakayu, tasun maidaydayaw kuma ya Ama gapu iya Anac. 14Ngarud, orey nagan na nga adngen nu nad iyaken nga sipapati iya kinaturay ku, tungpalec ngarud para dakayu,” kunen ne̍ Je̍sus.
To kari maipanggep iya Ispiritu Santu
15Ket nituluy ne̍ Je̍sus, nga kinunen na, “No tutu nga ayaten dac, tungpalen nu ngarud diya bilin ku. 16Ket agadeng ngac nad iya Ama, ket paibon ku igina ya sumukat nga Mamagbaga dakayu, tasun uwed dakayu nga agnanayunin. 17Ket igina met ya Ispiritu nga mangipakaemmu iya pudnu. Madi mabalin nga awaten diya bekken nga mamati yan nga Ispiritu, ta madi da malasin winno em-emmu. Ngem dakayu, em-emmu nu mettin, ta uwed dakayu, ket dakayu nad met ya pagedyanan na.
18“Madi nakayu ngarud baybay-an, ta sumoli yac nad mettas dakayu. 19Ket iya di mabayag, madi dac masingen nin diya bekken nga mamati. Ngem no dakayu, malasin dac nad lugud. Ket gapu ta sibibiyag gac nad pekkem, sibibiyag kayu met pe̍. 20Ket nad no madatngan yanin, mapanecnekkan nu nga uwed dac nga tutu iya Amac, ket dakayu, uwed kayu met iyaken, se̍ uwed dac pe̍ dakayu.
21“Ket ya toley nga agtungpal kadiya bilin ku nga naisuru igina, itu ya toley nga pudnu ya panagayat na iyaken. Ket ya agayat iyaken, ayaten pe̍ niya Amac. Ket ayatec pe̍ ya agten iyan nga toley, se̍ ipakaemmuc nad igina ya kauwed ku igina,” kunen ne̍ Je̍sus.
22Ket to Hudas nga bekken nga to Hudas Iskariyute̍, kinunen na, “Apu, ape̍ dakami ngas ya pagpasingnam nad iya kauwed mu? Ape̍ madi ka nad agpasingen kadiya amin nga toltoley?” kunen na.
23Ket kinunen ne̍ Je̍sus igina, “Agten idi: Ya agayat iyaken, agtungtungpal ngarud kadiya kagic. Ket ya agten iyan nga toley, ayaten pe̍ niya Amac. Ket iyaken se̍ ya Ama, umbe̍t kami agedyan igina. 24Ngem ya madi agayat iyaken, madi ngarud agtungpal kadiya kagic. Ket ya kagic nga ipacpakaemmuc dakayu, bekken met nga tumaud iyaken, no di lugud tumaud iya Ama nga nangibon iyaken.
25“Nibagac didi dakayu ita, ta makipagedyan nac pekkem dakayu. 26Ngem gapu nad iya kinaturay ku, ibon niya Ama dakayu ya Mamagbaga, nga itu ya Ispiritu Santu. Ket itu nad ya mangisuru dakayu iya amin nga banag maipanggep kadidi, se̍ ipalagip na nad pe̍ dito amin nga nibagac dakayu.
27“Talna ya ibatic dakayu. Ket idi nga kinatalna nga ipaay ku dakayu, itu ya talna nga tumaud mettas iyaken. Ket yani nga ipaay ku dakayu, sabali iya ipaay diya uwed iya lubung. Dikad pe̍ madi kayu kuma ngarud madanagan winno masikuranin, se̍ madi kayu mansing.
28“Malagip nu ngarud to kaibagbagac dakayu nga pumanaw wac nad, ngem sumoli yac nad mettas dakayu, kunec. Ket no pudnu ya panagayat nu iyaken, naragsakan kayu kuma, gapu ta mawe̍ yac ngarud iya pagedyanan niya Ama. Ket ya Ama, nangatngatu met ngem iyaken.
29“Nibagac ngarud didi dakayun sacbay nga dumateng, tasun nad no mapasamac, mamati kayu kuma. 30Ket ita, madic makapagbayag nga makitbar dakayun, ta nganngani umbe̍tin ya akin-turay idi nga lubung. Awan ngarud turay na iyaken, 31ngem mapasamac ngas didi iyaken tasun maemmuwan diya toltoley iya lubung ngi nga ayatec met nga tutu ya Ama, se̍ tungpalec ngarud diya amin nga ibilin niya Ama iyaken.
“Ala, pumanaw tida idi nin,” kunen na.
Currently Selected:
Juan 14: YBT
Highlight
Share
Copy
Want to have your highlights saved across all your devices? Sign up or sign in
© 1990 New Tribes Mission, Sanford, FL 32771-1487, USA.
Printed in the Philippines.
