Lukas 12
12
Pamagbaga maipanggep kadiya aginnanacman nga toley
Mat. 10:26-27
1Ket itun, rinibu met diya toltoley nga naur-urnung, ket naggiginnudel da mettin ka sacsaka da gapu iya kaadu da. Ket iya imatang didi nga toltoley, nagkagi nge̍ Je̍sus itun, nangruna kadito adalan na, nga kinunen na, “Annadan nu ngarud ya panaginnanacman diya Parisiyu, nga maiyarig ka pangpablad nga uwed igida. 2Ngem orey agten iyan ita ya ugali da, ket tutu met nga maiparangarang nad diya amin nga palimed ita, se̍ maipakaemmu nad met diya amin nga madi naipadlaw ita. 3Ket diya kinagi nu nga sililimed iya gicbet, ket magicna nad diya toltoley iya wada. Se̍ orey diya niyasasim nu iya uneg niya nakagiset nga kuwartu, ket maiwaragawag nad manipud iya tuctuc diya babaley.”
E̍ Apu Diyus kuma ngas ya kansing tida
Mat. 10:28-31
4Ket kinunen manin ne̍ Je̍sus, “Gagayyem ku, bekken kuma nga diya mabalin nga mangpatey ngas iya beggi ya kansing nu, ta beggi yas ya patingga niya mabalin da nga pirdiyen. 5Ngem ibagac dakayu ya kansing nu kuma nga gennung, ket itu nge̍ Apu Diyus. Ta e̍ Apu Diyus, bekken nas nga pumatey ya mabalin na, no di lugud uwed pe̍ igina ya turay nga mangipisuc ka impiye̍rnu. Ngarud, igina kuma ya kansing nu.
6“Panunuten nu pe̍ yani: Diya sibud nga lignes, malaku da met ka duwa nga pisus ngas ya lima. Ngem orey e̍teng ya pateg da, awan madi laglagipen ne̍ Apu Diyus igida. 7Ket no dakayu, orey ya bilang mettas diya ebbuc nu, emmu na met pe̍. Dikad pe̍ madi kayu lugud mansingin, ta napatpateg kayu met ngem iya orey adu nga lignes,” kunen na.
Ya pagbanagan diya mangilibac e̍ Kristu
Mat. 10:32-33; Mat. 12:32, 10:19-20
8Ket kinunen manin ne̍ Je̍sus, “Pudnu met nga amin nga mangipakaemmu nga siaannamung iya imatang diya toley iya pannakitipun da iyaken, ket siaannamung nad met nga ipakaemmu niya Anac nga Naipatoley iya imatang diya anghe̍le̍s ne̍ Apu Diyus ya pannakitipun na kadiyan nga toley. 9Ngem ya mangipakaemmu iya imatang diya toley nga di nac kanu annamunganin, ket maipakaemmu nad met iya imatang diya anghe̍le̍s ne̍ Apu Diyus nga madic pe̍ annamungan nga pulusin.
10“Ket ya orey nagan na nga agkagi ka maikuntra iya Anac nga Naipatoley, mabalin pekkem nga mapakawan. Ngem ya agkagi ka dake̍c nga maikuntra iya Ispiritu Santu, pulus nga madi mapakawan.
11“Ket no tacmen dakayu gapu iyaken, se̍ dakayu ipasangu kadiya pangpangulu niya gigimungan, winno kadiya kustisiya winno kadiya agtuturay, madi kayu madanagan no nagan ya isungbat nu kuma nga mangikalinteggan iya beggi nu, winno nagan kuma ya ikagi nu. 12Ta iyan mettas nga kanitu, isuru nakayu nad ya Ispiritu Santu no nagan ya kagiyen nu,” kunen na.
Maipanggep iya panagagum ka kinabacnang
13Ket itun, uwed isa nga lalaki nga nailauc kadiya toltoley, ket kinunen na e̍ Je̍sus, “Mistru, ibagam kay e̍ kabsat ku nga lalaki, ta ibingayan nac kuma ngarud iya tawid min,” kunen na.
14Ket kinunen ne̍ Je̍sus ito lalaki, “Ape̍? Bekken met nga iyaken ya naisaad nga mangeddeng winno mangbingay iya tawid nu,” kunen na. 15Ket nituluy ne̍ Je̍sus nga kinunen igida nga aminin, “Agannad kayu ngarud, nga madi kayu mairaman ka orey nagan na nga kita kinaagum. Ta kinapudnu na, ya kaipapennan niya biyag niya toley, bekken met nga maigapu iya kinaadu niya sanicwa na,” kunen na.
16Ket nagpangngarig nge̍ Je̍sus nga kinunen na manin igida, “Uwed isa nga bacnang nga nawadwad ya maapit kadiya laplapug na. 17Itu nga kinunen na iya lemlemmet na, ‘Kumaan na ngarudin? Ta awan met umanay nga pagipunduwac iya apit kun. 18Ay, agten idi met ya wanglec kun: Ipaakas ku diya sarusar kun, ket mangpabangun nac ka dacdackel nga pangipunduwac iya apit ku se̍ diya duduma nga sanicwac. 19Ket iya agten iyan, makunec nad iya beggic kun, nga nagasat tac, ta adu met ya naipunduc kun, ket makaanay nga usarec ka adu nga dagun. Mabalin ku ya aginana ngin. Mangmangan, agin-inum, se̍ agragsakac ngarudin,’ kunen na iya lemlemmet na.
20“Ngem e̍ Apu Diyus, kinunen na ito bacnang, ‘Kurang latta met ya pannakaawat mu! Ta ita mettas nga gabi, matey kan. Ket iya agten iyan, amin didi nga inurnung mu, bekken met nga ikew nad ya makin-kuwa ngin,’ kunen na.”
21Ket kinunen manin ne̍ Je̍sus, “Agten ngarud iyan ya pagbanagan niya toley nga agpundu ngas ka kinabacnang na idi nga lubung, ngem awan maibilang nga kinabacnang na iya imatang ne̍ Apu Diyus,” kunen na.
E̍ Apu Diyus ya makaemmu kadiya kasapulan tida
Mat. 6:25-34
22Ket kinunen ne̍ Je̍sus kadito adalan na, “Dikad pe̍ idi ngarud ya ibagac dakayu: Madi kayu kuma nga pakadanagan ya pagbiyag nu, nga agten no nagan ya kanen nu, se̍ madi kayu kuma pe̍ pakadanagan ya beggi nu, nga agten no nagan ya pagkawwes nu. 23Ta bekken nga didi ya kapatgan, no di lugud napatpateg met ya biyag ngem kadiya makan, se̍ napatpateg met ya beggi ngem kadiya lupluput. 24Kaspagarigan, panunuten nu kuma nga nalaing diya gayang. Madi da met agmula winno agapit, se̍ awan pagipunduwan winno sarusar da. Ngem orey agten iyan, pakanen met ne̍ Apu Diyus da. Ket dakayu, napatpateg kayu met nga unay iya imatang na ngem kadiya sibsibud!
25“Ngarud, awan sirsirbi niya panagdanag, ta awan met toley nga makapadeddu iya biyag na, orey no is-isa ngas nga uras, gapu ngas ka panagdandanag na. 26Ket gapu ta awan kabaellan nu iya agten iyan nga tekkut ngas nga banag, ape̍ nga idanag nu pekkem diya duduma nga pakasikuran nu?
27“Kaspagarigan manin, panunuten nu pe̍ nga nalaing ya panagdackel diya napaw-is nga belbellad ruut. Madi da met agtartarabaku winno agab-abel. Ngem kinapudnu na, orey to Ari Sulumun nga napalaus ya kinabacnang na itun, awan met latta pagkawwes na nga maipada iya kapaw-is niya orey nagan na kadiyan nga bellad. 28Ket agten iyan ngarud ya arig nga panangkawwes ne̍ Apu Diyus kadiya rucruut iya away. Ruut ngas nga e̍teng ya pateg da, ta orey uwed da ita nga sibibiyag, ket maidungsu da nad ngas met no damlagin. Ket no agten iyan ya kinalaing niya arig nga panangkawwes ne̍ Apu Diyus kadiya rucruut, di ngarud nangnangruna ya panangisagana na ka pagkawwes nu? Paya ngin, nakapsut ngas met ya panamati nu!
29“Madi kayu kuma ngarud madanagan nga mangpanpanunut no awac ya pamettan nu ka kanen se̍ inumen nu. 30Bay-an nu ngarud ya agten iyan nga panpanunut, ta amin diya agten kadiyan nga kasapulan toley, itu met diya panpanunuten nga pe̍yeng diya uwed idi nga lubung nga di makaemmu e̍ Apu Diyus. Ngem no dakayu, emmu met niya Ama nu nga masapul nu diyan. 31Itu nga diya banbanag maipanggep iya panangituray na, itu kuma nga gennung ya panpanunuten nu. Ket iya agten iyan, mae̍cdan kayu pe̍ yin kadiyan nga kasapulan nu.”
Maipanggep iya nailangitan nga kinabacnang
Mat. 6:19-21
32“Dakayu nga tekkut nga bungguy ku, madi kayu kuma mansing. Ta ya Ama nu, magustuwan nakayu met pe̍ nga pagturayen iya pagiturayan na.
33“Itu nga ilaku nu diya sanicwa nu, ket ya paglakuwan nu, ikaasi nu kadiya napanglaw. Ta ipateg nu kuma ya pagpunduwan nga madi marukup, nga itu ya pagurnungan enna langit ka kinabacnang nga madi macsayan. Ket madi pe̍ makalnec antuni diya mannanakew, se̍ awan pe̍ mabucbuc antuni. 34Ya nailangitan nga kinabacnang kuma ngarud ya ipateg nu, ta no awac ya edyan niya kinabacnang nu, itu pe̍ ya panpanunuten nu nga pe̍yeng.”
Sisasagana tida kuma iya umbe̍t niya Apu
35“Masapul nga sisasagana kayu, nga arig nga toley nga pe̍yeng nga sikakawwes ka luput nga para wangel, se̍ sisisibet ya dilag na. 36Ta arig kayu kuma nga diya tagabu nga nibati niya amu da nga nawe̍ nakipakalun. Ket sinanama da nga padpadaanan ngarud ya amu da, tasun no sumpuc nga agtogtogin, sigida nga ilukat da ya ruwanganin. 37Ket maragsakan ngarud met diya tagabu, no madatngan niya amu da nga silulukag da. Ta pudnu met nga no agten iyan ya madatngan niya amu da, igina nga gennung ya agkawwes ka luput nga para wangel lin, nga arig nga tagabu, ket patugawen na diya tagabu na iya panganan. Ket igina mettasin ya agsirbi igidan. 38Ket no tengnga niya gabi winno parbangun ya idadateng niya amu da, maragsakan ngarud diya silulukag pekkem nga tagabu nga agpadpadaan pekkem iya amu da!
39“Ket panunuten nu kuma pe̍ yani: No naemmuwan kuma niya makin-kuwa iya isa nga baley to uras nga umbe̍t ya mannanakew, madi na ngarud nipalubus nga takawan nito mannanakew ya baley na. 40Ket no dakayu met pe̍, masapul nga sisasagana kayu. Ta ya Anac nga Naipatoley, umbe̍t nad pe̍ iya uras nga pagpagarupen nu nga di pekkem nadatngan,” kunen na.
Ya maibilang nga mapagtalkan no umbe̍t nad ya Apu
Mat. 24:45-51
41Ket kinunen ne̍ Pe̍dru e̍ Je̍sus, “Apu, dacdakami ngas kadi ya pangiturungam iyan nga pangngarig, winno amin diya toltoley?” kunen na.
42Ket kinunen niya Apu, “No nagan kuma ya maibilang nga mapagtalkan se̍ nasirib nga mangsingen iya baley niya amu na, ket igina mettas ya pangitalkan niya amu na nga makaemmu kadiya pada na nga agsirsirbi iya baley niya amu na, tasun igina ya mangbingay ka kanen niya tunggal isa igida kada kustu nga uras na. 43Ket maragsakan ngarud yan nga tagabu no madateng niya amu na nga agten iyan nga tutu ya wangwanglen na. 44Ket pudnu met nga ya agten iyan nga mapagtalkan nga tagabu, isaad nad niya amu na nga igina ya makaemmu win kadiya amin nga sansanicwa na.
45“Ngem kaynun no kunen niyan nga tagabu iya lemlemmet na nga, ‘Mabayag pekkem nga sumpuc ya amuc,’ kunen na, se̍ pagdamdamsakan na ngas mettin diya pada na nga tagabu, lalaki man winno babey. Ket yan nas mangmangan se̍ agin-inum nga age̍ng-e̍nglew ya wanglen na. 46Ket ya mapasamac iya agten iyan nga tagabu, pagamwan na ngas nga sumpuc ya amu na iya algew nga madi na ipagpagarup nga idadateng na, winno iya uras pe̍ nga madi na emmu. Ket dusaen ngarud niya amu na, ket ipababa na ya saad na, nga iraman na ngasin kadiya madi makaemmu nga agtungpal.
47“Ket ya tagabu nga nakaemmu iya tarigagay niya amu na, ngem madi nakasagana winno madi na tinungpal to gabay niya amu na, madusa ngarud ka mame̍n-adu nga baut. 48Ngem ya tagabu nga madi nakaemmu iya tarigagay niya amu na, se̍ nakaariman met ka tumutup nga pakadusaan na, ket madusa nad ngarud pe̍, ngem e̍l-e̍leng ngas ya baut na.
“Ket no adu ya nae̍cde̍ iya isa nga toley, adu mettas ya nabaru nga manamnama nga gayat igina. Ket no adu ya nitalec diya toley iya isa nga pada da nga toley, ad-adu mettas ya manamnama da nga gayat nad igina,” kunen na.
Ya pannakabingay diya toley gapu e̍ Je̍sus
Mat. 10:34-36
49Ket kinunen manin ne̍ Je̍sus, “Iyaken, inumbe̍t tac met nga mangipaay iya arig nga apuy nga mangpoor kadiya toltoley iya lubung ngi. Ket nabaru kunec no masibtan kuma ngin! 50Ngem masapul nga malak-am mac pekkem ya panagsagabac nga arig nga pannakabautisar ku, ket awan met talnac agingga nga di pekkem matungpal yani iyaken.
51“Mabalin nga ipagarup nu nga inumbe̍t tac tasun pagtutunusec kuma diya toltoley idi nga lubung. Ngem bekken met. Ta ya kinapudnu na, inumbe̍t tac idi nga lubung tasun bingabingayec diya toltoley. 52Itu nga manipud ita, kaspagarigan no lima diya toley iya isa nga kabbalayan, mabingabingay da. Dikad diya tellu igida, kuntraen da nad met diya duwa. Ket dito duwa, kuntraen da met dito tellu. 53Ngarud, mabingabingay ya pamilya, ta ya ama, kuntraen na ya anac na nga lalaki. Ket ya anac nga lalaki, kuntraen na pe̍ ya ama na. Ya ina, kuntraen na met ya anac na nga babey. Ket ya anac nga babey, kuntraen na pe̍ ya ina na. Ya katugangan nga babey, kuntraen na met ya manugang na nga babey. Ket ya manugang nga babey, kuntraen na met pe̍ ya katugangan na nga babey,” kunen na.
Ya panangilasin ka timpu
Mat. 16:2-3
54Ket kinunen pe̍ ne̍ Je̍sus kadiya toltoley, “No uwed masingen nu nga ulep nga gayat iya ellod, kunen nu met, ‘Ay, agudan no deddan!’ kunen nu, ket tutu met nga agudan no uwed agten iyan. 55Ket no madlaw nu nga gayat iya abagatan ya belluut, kunen nu, ‘Dandani met ya timpu pudutin,’ kunen nu, ket tutu met. 56Ngem ape̍ nga aginsisirib kayu? Emmu nu met ya mangilasin iya langa niya abac lawa se̍ ya lubung ngi, ngem ape̍ ngarud nga madi kayu malasin ya banag niya agdama nga timpu?”
Makitunus tida kuma e̍ Apu Diyus
Mat. 5:25-26
57“Ape̍? Di ngarud rumbeng no panunuten nu nga mona ya kustu nga mawangel nu kuma? 58Ta kaspagarigan no uwed mangidarum ikew, se̍ manmanalan kayu nga mawe̍ iya pangukumanin. Di ngarud nabaru no arimanem amin nga kabaellam tasun agtunus kayu kuma no uwed kayu pekkem iya dalan, tasun madi naka kuma isangu iya kuis? Ta kaynun no iyawat naka ya kuis iya pulisiya, ket ya pulisiya, ibalud naka. 59Ket no agten iyan, pulus nad nga madi ka makaruwar iyanin, agingga nga di ka mabayadan ya amin nga nikeddeng da. Ket awan pe̍ asi da ikew, orey no isa ngas nga siping,” kunen na.
Currently Selected:
Lukas 12: YBT
Highlight
Share
Copy
Want to have your highlights saved across all your devices? Sign up or sign in
© 1990 New Tribes Mission, Sanford, FL 32771-1487, USA.
Printed in the Philippines.
