Lukas 8
8
Dito babey nga nibulun kade̍ Je̍sus
1Iya di nabayag, nawe̍ pinasyar ne̍ Je̍sus diya il-ili se̍ purpuruc, nga nikasaba na se̍ nilawlawag na ya Makaparagsac nga Damag maipanggep iya panangituray ne̍ Apu Diyus. Ket kabulun na dito sangapulu ket duwa nga adalan na. 2Ket uwed da pe̍ kabulun na nga babey nga dati nga agsacsakit se̍ nasairuwan itun, nga pinalaing mettas ne̍ Je̍sus itun. E̍ Marya nga iMagdala ya isa kadito kabulun na, nga igina ya nakapatalawan itun diya pitu nga sairu. 3Se̍ uwed pe̍ nge̍ Huwana nga asawa ne̍ Tiyusa nga katalec ne̍ Ari He̍rude̍s, se̍ e̍ Susana, se̍ adu pekkem diya duduma nga babey nga nangistimar kade̍ Je̍sus. Nipaay da ngarud diya bukud da nga sansanicwa nga nitulung da kade̍ Je̍sus.
To pangngarig maipanggep iya agmulmula
Mat. 13:1-9; Mar. 4:1-9
4Ket adu diya toltoley nga naguurnung iya edyan ne̍ Je̍sus, nga gayat da kadiya nadumaduma nga il-ili. Ket ito adu diya toley nga naurnungin, kinagi ne̍ Je̍sus yani nga pangngarig:
5“Uwed isa nga toley nga nawe̍ nagimula ka eggic na. Ket ito agiwarwarisin, uwed da bukel nga nagdessag iya dalan. Ket ginudlan ngarud diya toley, ket nawe̍ met kinan diya sibudin. 6Uwed da met pe̍ bukel nga nagdessag ka ginet nga uwed pinas iya uneg na. Ket ito timubu dan, dagus da ngarud nga nacrit, gapu ta bekken nga nadam-eg ya ginet. 7Nagdessag met diya duduma nga bukel iya karuutan nga uwed rasi na. Ket ito dimackel dito ruut, liniyungan da met dito mula ngin. 8Ket uwed da met duduma nga bukel nga nagdessag iya napaw-is nga ginet. Ket timubu, se̍ dimackel dan. Ket didi nga mula, namisic ya tunggal isa nga bukel nga naimula ka sagsangagasut,” kunen na.
Ket ito nalpasin to panangisalaysay ne̍ Je̍sus idi nga pangngarig, kinunen na ka nabileg, “Dakayu nga uwed pannakaawat na, tandaanan nu kuma ngarud yanin,” kunen na.
Maipanggep kadito pangngarig ne̍ Je̍sus
Mat. 13:10-17; Mar. 4:10-12
9Ket dito pasurut ne̍ Je̍sus, sinaludsud da ngarud igina ya kaipapennan niyan nga pangngarig. 10Ket kinunen ne̍ Je̍sus, “No dakayu, napalubusan kayun nga makaawat kadiya nauneg nga adal nga di pekkem naipakaemmu kadiya duduma maipanggep iya panangituray ne̍ Apu Diyus. Ngem diya duduma, diyan nas pangngarig ya maisuru igida, tasun orey masingen da, madi da met pulus nga malasin, se̍ orey magicna da, madi da met pulus nga maawatan.”
Ya kaipapennan nito pangngarig maipanggep iya agmulmula
Mat. 13:18-23; Mar. 4:13-20
11“Ket agten idi ya banag nito pangngarig: To eggic nga kunec, itu ya kagi ne̍ Apu Diyus. 12Ket dito nagdessag iya dalan, itu diya maiyarig kadiya toley nga makagicna iya kagi ne̍ Apu Diyus, ngem male̍panan da. Ta arig nga umbe̍t ya diyablu nga ipac na ya kagi nga uwed iya lemlemmet da, tasun di da mamati se̍ maisalakan. 13Ket dito bukel nga nagdessag ito ginet nga uwed pinas iya uneg na, itu diya maiyarig kadiya toley nga makagicna iya kagi ne̍ Apu Diyus, ket awaten da nga siaanggem. Ngem gapu ta arig da nga mula nga awan nauneg nga gamut da, nalaka da nga mamati iya damu, ngem dagus da nga aglikud no uwed pakasulisugan da. 14Ket dito bukel nga nagdessag iya karuutan nga uwed rasi na, itu diya maiyarig kadiya toley nga makagicna iya kagi ne̍ Apu Diyus, ngem maabac ya pannakabalin na igida, gapu kadiya pakasikuran da, se̍ gapu iya panangtarigagay da ka kinabacnang se̍ pakaragsakan da. Itu nga arig da nga bisic nga madi agmayan. 15Ket dito bukel nga nagdessag iya napaw-is nga ginet, itu diya maiyarig kadiya toley nga makagicna pe̍ iya kagi ne̍ Apu Diyus, ket napudnu se̍ nadalus met ya nakem da no magicna da, ket agtalec da ngarud. Naanus da, ket agbanag ka nabaru ya panamati da,” kunen na.
To pangngarig maipanggep iya dilag
Mar. 4:21-25; Mat. 5:15, 10:26, 13:12
16Ket nagpangngarig manin nge̍ Je̍sus nga kinunen na, “Ya toley nga mangsibet ka dilag, madi na ngarud tacban ka banga ngin, winno isoroc iya sidung niya pagidaan, no di lugud ipay na iya kustu nga pakaipayan na, tasun diya toley nga umuneg iyan nga edyan, masingen da ya wada na. 17Ket itu met ya pakaiyarigan niya amin nga nailinged nga banbanag ita, ta maipalawag nad met. Ket amin nga nailimed ita, maipakaemmu se̍ maiparangarang nad met. 18Itu nga agdengngeg kayu kuma nga nalaing. Ta ya kinapudnu na, ket ya toley nga uwed pannakaawat nan, madgaan nad pekkem. Ket ya awan pannakaawat na, maipac nad met igina orey diya pagpagarupen na nga maawatan na,” kunen na.
Diya maibilang nga kakabsat winno ina ne̍ Je̍sus
Mat. 12:46-50; Mar. 3:31-35
19Ket itun, ya ina se̍ diya kakabsat ne̍ Je̍sus nga lalaki, nawe̍ da iya edyan na, ngem madi da met makaadenni igina gapu iya kaadu diya toley. 20Ket uwed nangibaga e̍ Je̍sus nga kinunen na, “Uwed ya inam se̍ diya kakabsat mu. Agsisikad da iya ruwar, ket gabay da kanu ya makitbar ikew,” kunen na.
21Ngem kinunen ne̍ Je̍sus kadito toley, “Ya maibilang nga inac se̍ diya kakabsat ku, ket itu diya dumngeg se̍ mangtungpal iya kagi ne̍ Apu Diyus,” kunen na.
To panangpatalna ne̍ Je̍sus iya belluut
Mat. 8:23-27; Mar. 4:35-41
22Ket iya name̍nsan nga algew, naglugan nge̍ Je̍sus se̍ dito adalan na ka bangka, ket kinunen na igida, “Dumelmang tidan,” kunen na. Ket naggunay da ngarudin. 23Ket ito dumeldelmang dan, nakatudug nge̍ Je̍susin ito bangka.
Ket ya napasamac itun, nagbelluut met ka nabileg gin, ket adu ya danum nga nawe̍ iya uneg nito bangka dan, itu nga dilikadu ngarud ya kasasaad dan. 24Ket dito adalan, nawe̍ da ngarud linukag nge̍ Je̍susin, nga kinunen da, “Mistru, Mistru! Matey tidan!” kunen da.
Ket bimangun nge̍ Je̍sus, se̍ na met binilin to belluut se̍ dito dadackel nga palung nga agtalna da, ket natalna met ya aminin. 25Ket kinunen ne̍ Je̍sus kadito adalan na, “Ape̍? Awan aya panamati nu?” kunen na.
Ket siaansing da ngarud, se̍ nasdaaw da pe̍, nga kinunen da iya panagtetebbar da, “Nagan kid ya katoltoley nidi? Ta orey ya belluut se̍ diya palung, bilinen na da met, ket agtungpal da gayam igina!” kunen da.
To lalaki nga naluganan ka adu nga sairu
Mat. 8:28-34; Mar. 5:1-20
26Ket nituluy da ngarud ya nagbangka, ket dimateng da iya ginet nga sakup diya iGe̍rasa iya demmang niya ginet niya prubinsiya nga Galilya. 27Ket ito dinumsag nge̍ Je̍sus antuni, uwed simabet igina nga isa nga lalaki nga taga-iyan nga ili. Naluganan met to lalaki ka sairu, ket nabayagin nga madi aglupluput, se̍ di met aged-edyan ka baley, no di lugud aged-edyan nas iya edyan diya tatamennan.
28Ket ito nasingen na nge̍ Je̍sus, nagkerre̍s met, se̍ nawe̍ nagparintumeng iya sangu na. Ket kinunen na ka nabileg, “Je̍sus nga Anac ne̍ Apu Diyus nga Kangatuwan! Nagan ngarud ya biyang mu iyaken? Pangngaasim kay ta di nac kuma parigaten!” kunen na. 29Agten iyan ngarud ya kinunen nito lalaki, gapu ta binilin mettin ne̍ Je̍sus nga pumanaw to sairu igina. Ket kackaasi ngarud to lalaki, ta name̍n-adu nga linugluganan nito sairu. Itu nga pe̍yeng nga as-asikudan diya toley se̍ igapus da met diya ima se̍ saka na, nga kawaran se̍ pusasan da. Ngem lesleskaben na met dito panggapus da igina, ket niturung nito sairu iya away.
30Ket kinunen ne̍ Je̍sus igina, “Nagan kad ya nagan mu?” kunen na.
Ket kinunen nito lalaki, “Bungguy ya nagan ku,” kunen na. Ket tutu met, ta adu ngamin nga sairu ya naglugan igina. 31Ket nipacpakaasi ngarud dito sairu e̍ Je̍susin nga madi na da kuma kanu papennen iya pagtuukan nga uwed iya nauneg nga lugar.
32Ket itun, uwed met iya denni antuni ya isa nga dackel nga bungguy diya abuy nga agsebsebbuc iya are̍b niya tageytey. Ket nagpacpakaasi dito sairu e̍ Je̍sus nga palubusan na da kuma kanu nga mawe̍ aglugan kadito abuy. Ket pinalubusan na da met. 33Ket pimanaw ngarud dito sairu ito lalaki, ket nawe̍ da met limugan kadito abuyin. Ket dito abuy, nagtatagtag da mettin nga nanagus iya nangiras, nga nawe̍ da ito baybayin, ket nalisem da mettin.
34Ket diya agay-aywan kadito abuy, ito nasingen da to napasamac, nagtalew da ngarudin, nga nawe̍ da nipadamag yan enna ili se̍ kadiya purpuruc antuni. 35Ket diya toltoley nga nakadamagin, nawe̍ da singen no nagan to napasamac. Ket ito dimateng da iya edyan ne̍ Je̍sus, nasingen da met to lalaki nga pinanawan dito sairu. Ket agtugtugew nga sitatalna iya sangu ne̍ Je̍susin, ket nakaluput pe̍ yin, se̍ pimulangin to kustu nga panpanunut na. Ket dito toltoley, mansing da mettin. 36Ket dito nakasingen ito napasamac, sinalaysay da no kumaan nito pannakapalaing nito lalaki nga naluganan ka sairu.
37Ket gapu ito napalaus nga ansing dito iGe̍rasa, nipakaasi da e̍ Je̍sus nga pumanaw kuma iya ginet nga masakupan da. Dikad pe̍ nagsakey ngarud nge̍ Je̍sus ito bangka, ket sumoli da ito demmangin. 38Ket sacbay niya isosoli ne̍ Je̍sus iya demmang, nagpacpakaasi to lalaki nga pinanawan dito sairu. Nipacpakaasi na ngarud e̍ Je̍sus nga maibulun kuma igina. Ngem pinagawir ne̍ Je̍sus, nga kinunen na, 39“Agawir ka lugudin, ket ipadamag mu ya nakaskasdaaw nga nipaay ne̍ Apu Diyus ikew,” kunen na.
Ket nagawir ngarud to lalaki, ket nawe̍ kadiya amin nga lugar ito ili, nga niwaragawag na kadiya toltoley to nakaskasdaaw nga inariman ne̍ Je̍sus para igina.
To anac ne̍ Hayru, se̍ to babey nga uwed sarut na
Mat. 9:18-26; Mar. 5:21-43
40Ket ito simoli nge̍ Je̍sus nga dimelmang iya baybay, kinablaawan nga siraragsac diya adu nga toley iya demmang, ta nit-itonan da nga amin. 41Ket ya napasamac itun, uwed inumbe̍t nga isa nga lalaki nga agnagan ka Hayru, nga isa nga pangulu niya gigimungan diya Hudyu antuni. Nawe̍ nagparintumeng iya sangu ne̍ Je̍sus, ket nagpacpakaasi igina nga umbe̍t kuma enna baley na, 42ta makatkatayen ngamin ya kackaisu nga anac na nga babey, nga agsangapulu ket duwa ya dagun na.
Nibulun ngarud nge̍ Je̍sus ito Hayru, ket ito manmanalan da, inil-ilet met diya adu nga toltoley nge̍ Je̍sus. 43Ket uwed pe̍ antuni ya isa nga babey nga uwed sarut na. Sangapulu ket duwa nga dagunin nga agbulbulus ya daga nan. [Nagastu na met amin nga sansanicwa nan nga nagpacpaagas,] ngem awan nakapalaing igina. 44Ket imadenni yin to babey iya likud ne̍ Je̍sus, se̍ na sine̍cde̍ng ya gayad niya luput ne̍ Je̍sus. Ket sigida met nga simardeng ngin ya panagbulus niya daga na. 45Ket kinunen ne̍ Je̍sus, “Nagan ya nangse̍cde̍ng iyaken?” kunen na.
Ngem kinunen da nga amin, “Bekken nga iyaken.”
Itu nga kinunen met ne̍ Pe̍dru, “Mistru, madi ta emmu, ta adu met diya toley iya le̍cbut mu, ket makisinsinne̍let da pe̍ ikew,” kunen na.
46Ngem kinunen manin ne̍ Je̍sus, “Uwed met nangse̍cde̍ng iyaken, ta nadlaw ku nga uwed pannakabalin nga rinumwar iyaken,” kunen na.
47Ket ito naemmuwan nito babey nga naductalanin to winangel na, sipipilpig nga nawe̍ nagparintumeng iya sangu ne̍ Je̍susin. Ket nipalawag na iya imatang dito amin nga toltoley no ape̍ nga sine̍cde̍ng na nge̍ Je̍sus, se̍ nibaga na pe̍ to pannakapalaing na nga sigida ito nase̍cde̍ng nan.
48Ket kinunen ne̍ Je̍sus igina, “Anac ku, nalaingan kan gapu iya panamatim. Agawir ka nga sitatalna kuma ngasin,” kunen na.
49Ket ito agkagkagi pekkem nge̍ Je̍sus, uwed inumbe̍t nga agpadamag, nga gayat iya baley ne̍ Hayru nga pangulu niya gigimungan diya Hudyu. Ket to agpadamag, kinunen na e̍ Hayru, “Natey yin ya anac mu. Orey madi ka tactaken ya Mistru win, a,” kunen na.
50Ngem ito nagicna ne̍ Je̍sus yan, kinunen na e̍ Hayru, “Madi ka madanagan. Basta mamati ka ngasin, ket maunayan met ya anac mu,” kunen na.
51Ket ito sinumpuc de̍ Je̍sus iya baley, de̍ ngas Pe̍dru, Juan, Santiyagu, se̍ to ama se̍ ina nito ebbing ya nipalubus na nga mibulun igina nga lumnec. 52Ket diya amin nga uwed antuni, berberritan se̍ sangsangitan da to ebbing. Ngem kinunen ne̍ Je̍sus, “Madi kayu agberberritin, ta bekken met nga natey ya ebbing, no di ngas mat-atudug,” kunen na.
53Ket nigalgalec ngas dito toley nge̍ Je̍sus, gapu ta siguradu da nga natey yin to ebbing. 54Ket e̍ Je̍sus, nicman na ya ima nito ebbing, ket kinunen na, “Iyang! Bumangun kan,” kunen na.
55Ket tutu met nga simoli igina ya anges nan, ket sigida nga nagsikadin. Ket nibilin ne̍ Je̍sus nga pakanen da to ebbingin.
56Nasdaaw ngarud dito naganac ito ebbing iyan nga napasamac, ngem nibilin ne̍ Je̍sus nga awan kanu pangibagbagaan da iyan.
Currently Selected:
Lukas 8: YBT
Highlight
Share
Copy
Want to have your highlights saved across all your devices? Sign up or sign in
© 1990 New Tribes Mission, Sanford, FL 32771-1487, USA.
Printed in the Philippines.
