Markus 2
2
To panangpalaing ne̍ Je̍sus ka lugpi
Mat. 9:1-8; Luk. 5:17-26
1Kalpasan niya sumagpipiga nga algew, simoli nge̍ Je̍sus enna Kape̍rnaum. Ket nagdinamag ngarud nga sinumpuc iya paged-edyanan na nga baley yin. 2Ket naguurnung diya adu nga toley iyan nga baley. Itu nga orey iya ruwar niya gagayangan niya baley, awan pe̍ madalan, gapu iya kaadu diya toley yin. Ket e̍ Je̍sus, uwed iya uneg nga mangikaskasaba iya kagi ne̍ Apu Diyus kadito toley.
3Ket itun, uwed da nangipen igina ka isa nga lugpi nga binuligan diya eppat nga lalaki. 4Ngem gapu iya kaadu diya toley, madi da met maiyadenni e̍ Je̍sus to lugpi. Itu nga nawe̍ da met inakas nga inbutan ya atep iya batug ne̍ Je̍sus. Ket ito uwed ebbut nan, binaluyubuy da to lugpi nga siiida pekkem iya ida na.
5Ket ito nasingen ne̍ Je̍sus nga sipapati da, kinunen na ito lugpi, “Anac ku, napakawan diya basbasul mun,” kunen na.
6Ket uwed da met pe̍ manursuru iya Linteg nga nakipagtugtugew antuni. Ket kinunen da iya lemlemmet da, 7“Ahah! Ape̍ agten iyan ya kagkagiyen nidi nga toley? Maikuntra met e̍ Apu Diyus yan, ta awan met makapakawan ka basul no di yas e̍ Apu Diyus!” kunen da.
8Ket sigida met nga emmu ne̍ Je̍sus iya panpanunut na to uwed iya lemlemmet dan, ket kinunen na igida, “Ape̍ nga agten iyan ya lemlemtan nu? 9Nagan ngarud ya nalaclaka nga patiyen nu? No kunec idi nga lugpi nga, ‘Napakawan diya basbasul mun,’ winno kunec igina nga, ‘Bumangun kan, bacrunem ya idam se̍ manalan kan’? 10Itan, panecnekkac ngarud dakayu nga ya Anac nga Naipatoley, uwed turay na idi nga lubung nga mamakawan ka basul,” kunen ne̍ Je̍sus. 11Ket kinunen na ngarud ito lugpi yin, “Ket ikew, bumangun kan. Bacrunem ya idam, se̍ agawir kan,” kunen na.
12Ket bimangun ngarud to lugpi, ket sigida met nga binacrun na to ida na, se̍ rinumwarin. Ket amin da, nasingen da met yan, itu nga nasdaaw da ngarud nga amin. Ket nidaydayaw da nge̍ Apu Diyus, nga kinunen da, “Awan pekkem agten idi nga nas-asingen tida itun!” kunen da.
To panangpasurut ne̍ Je̍sus e̍ Le̍bi
Mat. 9:9-13; Luk. 5:27-32
13Ket itun, nawe̍ manin nge̍ Je̍sus enna pingit nito baybay ka Galilya. Ket adu diya toley nga nawe̍ naguurnung iya edyan na antuni, ket sinursuruwan na da ngarud.
14Ket ito manmanalan manin nge̍ Je̍sus nga pimanaw iyanin, tumaltalib met iya upisina nga babayadan ka buis. Ket uwed nasingen na nga isa nga lalaki nga nakatugew ito upisina, nga itu nge̍ Le̍bi nga anac ne̍ Alpiyu. Ket kinunen ne̍ Je̍sus igina, “Suruten nac,” kunen na. Ket ginumnukat ngarud nge̍ Le̍bi, nga nawe̍ simurut iginan.
15Ket bayat nito kauwed ne̍ Je̍sus se̍ diya adalan na iya baley ne̍ Le̍bi nga agsasangu da nga mangmangan, adu met diya agsingsingir ka buis se̍ diya naibilang nga managbasul nga makisangsangu igida nga mangan, ta adu da nga simurut e̍ Je̍susin. 16Ket diya Parisiyu nga manursuru iya Linteg, nasingen da nge̍ Je̍sus nga makisangsangu nga mangan kadiya agsingsingir ka buis se̍ kadiya managbasul nga toley. Itu nga kinunen da ngarud kadito adalan na, “Ape̍ nga kasangsangu na met nga mangan diya agsingsingir ka buis se̍ diya managbasul?” kunen da.
17Ket ito nagicna ne̍ Je̍sus to kinunen da, kinagi na met igida, “Bekken met nga diya nakaradkad ya makasapul ka mangngagas, no di lugud diya agsakit. Ket agten nac met iyan, ta ya numbe̍tac, bekken met nga tasun awisec diya nalinteg nga toley, no di lugud diya managbasul,” kunen na.
To panursuru ne̍ Je̍sus maipanggep iya panangiparit iya pannangan
Mat. 9:14-17; Luk. 5:33-39
18Ket ito name̍nsan, dito adalan ne̍ Juan nga Mammautisar, se̍ dito Parisiyu, madama da nga tungtungpalen ya kari da nga madi mangan. Ket uwed da toley nga nawe̍ iya edyan ne̍ Je̍sus, nga kinunen da igina, “Ape̍ kad nga diya adalan ne̍ Juan nga Mammautisar se̍ diya pasurut diya Parisiyu, ket emmu da met ya agariman ka kari da nga madi mangan, ngem diya adalan mu nga gennung, madi da met wanglen ya agten iyan?” kunen da.
19Ket kinunen ne̍ Je̍sus igida, “Kaspagarigan no uwed pakalun, ket bayat niya kauwed pekkem niya nubyu kadiya kabulun na, rumbeng kad aya no iparit da iya beggi da ya mangan? Bekken met! Ta bayat niya kauwed niya nubyu igida, rumbeng met igida ya mangan. 20Ngem madatngan nad ya timpu nga maipanaw igidan ya nubyu, ket itu nad mettasin ya timpu nga mangiparit da iya beggi da nga mangan.
21“Kaspagarigan pe̍ no ya panangitakup ka luput, ket madi ngarud rumbeng nga itakup tida ya kabarbaru nga luput iya daan nga kawwes. Ta no kumsen nad ya naitakup, mapigis ngarudin to pakaitakupan na, ket dumacdackel mettin to sigud nga pigis na.
22“Ket kaspagarigan manin no ya papayan ka basi, madi met rumbeng nga ipay tida ya banal nga basi ka daan nga kadus nga lalat. Ta no agten iyan ya wanglen tida, bettaken nad met niya banal nga basi ya kadus nga lalat. Ket masayang nad ya basi yin, se̍ masayang pe̍ yin ya kadus nga lalat nga nakaipayan na. Dikad pe̍ no ya banal nga basi, ket ya kabarbaru kuma ngarud nga kadus nga lalat ya pakaipayan na,” kunen na.
To panursuru ne̍ Je̍sus maipanggep iya Algew Ngilin
Mat. 12:1-8; Luk. 6:1-5
23Ito name̍nsan nga Algew Ngilin, manmanalan de̍ Je̍sus iya laplapug nga namulaan ka trigu. Ket ito panagdaldalan da, nagkelkeltung diya adalan na kadiya dawa niya trigu nga kinan da. 24Ket uwed da met Parisiyu nga nagkunen e̍ Je̍sus, “Singem! Ape̍ nga wanglen da ya maiparit iya Linteg tida iya Algew Ngilin?” kunen da.
25Ket kinunen ne̍ Je̍sus igida, “Di nu pekkem aya nga nabasa ya maipanggep ito winangel nito Ari Dabid ito nagkasapulan itun, se̍ nabisin, igina se̍ dito kinabulun na? 26Ta ito timpu nga e̍ Abiyatar to kangatuwan nga agsirsirbi iya pagdaydayawan, imuneg met to Dabid iya pagdaydayawan nga maawagan ka baley ne̍ Apu Diyus, ket nangan met ito tinapay nga naidatun mettas e̍ Apu Diyus. Ket emmu nito Dabid nga sigun iya paglinteggan tida, diyan nas met agsirsirbi iya pagdaydayawan ya mapalubusan nga mangan iyan nga tinapay. Ngem nangan latta to Dabid, se̍ ne̍cdan na met pe̍ dito kabulun na,” kunen na.
27Ket nituluy ne̍ Je̍sus nga kinunen na manin kadito Parisiyu, “Ya Algew Ngilin, nabangun met nga maipaay iya toley, bekken met nga ya toley ya maipaay iya Algew Ngilin. 28Ket ya Anac nga Naipatoley, ket Apu met, itu nga Apu met pe̍ niya Algew Ngilin,” kunen na.
Currently Selected:
Markus 2: YBT
Highlight
Share
Copy
Want to have your highlights saved across all your devices? Sign up or sign in
© 1990 New Tribes Mission, Sanford, FL 32771-1487, USA.
Printed in the Philippines.
