Génesis 30
30
Raquel Jacobnö ajebina jawa, jömöayujukwö ö̧jobö
1Raquelma, ötjöwe, tjemu debujusa, ja̧danö Jacob i̧tji̧munö 'yatebökakwujusa, jö̧ba̧lö ö'wiawinö edijotö jöpöo Leanöma ji̧tji̧mu ö'wejemu luwanö 'yajebioko. Jo̧kwaobetjö̧ Jacobnö jö̧ba̧lijotö:
—Chilekwe ötjökwö kwö̧jo metu'wo batibobö, kwi̧tji̧munö 'yatebinö. Isabenö tjemu debujuchitjö̧ma debö chi̧'yena— jö̧ba̧lijotö.
2Ja̧danö Jacob, jejenö jö̧ja̧lökwe jwiinö labijetö:
—¿Ötjöma Dioschi̧ji̧? Diosda ökwönö iyobö jo̧be kwi̧tji̧munö— labinö jö̧a̧loko:
3—Chilekwe atebakwö: Chömöayuju Bilhakwö kwö̧jo. Jobujutjö kwi̧tji̧munö chöbötjatocha ötjöda chi̧tji̧mudanö— webijotö Raquelma Jacobnöma. 4Jo̧kwaobetjö̧ Raquelma webijotö jömöayujunö Jacobnöma, jobujunö emobö, Jacob jeluju ilekwo baibanö. Jacobma jobujunö emajo̧ ji̧jetö jobujukwö. 5Jemi tupakwöma jobuju Bilhama metu'wo ji̧jotö. Metu'wo ja̧juma Jacob itji̧nö emijotö.
6Ja̧danö, Raquelma jö̧ba̧lijotö:
—Diosma ötjönö sulabenö baledobe edö omukwatö ujunajabe, Raquelma jweinö jomukwata, jö̧ba̧lö. Ja̧danö ötjö budekwabinö ateba̧li̧ma a̧ja̧kwö chitji̧danö cheminö iyajabe— jö̧ba̧lijotö. Jejenö jö̧ba̧lö midijotö jitji̧nö, Dan#30:6 · Dan, jö̧ba̧löma hebreo tjiwenenö omukwatö ujuna, jö̧ba̧lö ökwöi̧danö ökwöobe. , jö̧ba̧lö.
7Ja̧danö, Bilhama jemi tupakwöma yemidanö metu'wo ji̧jotö. Metu'wo ja̧ju jelo̧nö emijotö, Jacobtjö ikena itji̧nö. 8Ja̧danö, Raquelma jö̧ba̧lijotö:
—Ajayinö ötjökwö chöpöokwö labinö ölakwabikwawinö dö̧jajabe ichejekwa, Dios ötjönöbi chi̧tji̧munö iyobö. Babema ö'wiawinö chedokobe chöpöonö ötjöbi chi̧tji̧munö chujuna̧lobetjö̧— jö̧ba̧lijotö Raquelma. Jejenö jö̧ba̧lö jemajökwenö midijotö, Naftali#30:8 · Naftali jö̧ba̧löma, hebreo tjiwenenö isakwabikwawö, jö̧a̧li̧danö ökwöobe. , jö̧ba̧lö.
Lea Jacobnö wejina jawa, jömöayujukwö ö̧jobö
9Ja̧danö, Leama, tjo̧wi̧ tjemunö 'yatebokobe, jö̧ba̧lö, jömöayuju Zilpanö webijotö Jacobnö, jobujunö emobö Jacob jeluju ilekwo baibanö. 10Jemi tupakwö Zilpama, metu'wo jö̧ja̧ju emijotö Jacob itji̧nö. 11Ja̧danö, Lea jö̧ba̧lijotö:
—Ötjönöma otiwanö baledajabe— jö̧ba̧lijotö. Jejenö jö̧ba̧lö jitji̧nö midijotö Gad#30:11 Gad jö̧ba̧löma ötjönö otiwanö baledajabe, jö̧ba̧lö, wanekwachobe , jö̧ba̧lö. 12Ja̧danö, Zilpama yemidanö 'yabebijotö Jacob itji̧nö. 13Ja̧danö, Leama jö̧ba̧lijotö:
—Jwiinö cho̧'wo̧ ösöwanö chö̧ja. Ju'wedö ya̧döma ötjönö edö, Leama jwiinö jo̧'wo ösöwanö juju, jö̧ba̧lö, yötja̧lakwawobe— jö̧ba̧lijotö. Jejenö jö̧ba̧lö, tjemunö midijotö Aser#30:13 · Aser jö̧ba̧löma, o̧'wo ösöwanö ja̧nö, jö̧ba̧lö, wanekwachobe. , jö̧ba̧lö.
14Ja̧danö, ida̧ökö trigo ochobiya 'wiawa möle baibena Jacob itji̧ abönö pöe Rubénma mejebe 'ya̧jo mejetjö̧ pokwi̧ ötjebiyatjö wa̧ji̧ opobiya, mandrágoras#30:14 jojodöma tjomukwatobe opobiya mandágoras mikwma me'tuwo batjibobö pjaati̧ jawa mikwi̧ma 'döbajo̧ e'ewö ȩwa̧jö iyijetö ojo'do Leanö, bipo jukwitjö̧ma yemidanö 'yajebakobe, jö̧ba̧lö. Ja̧danö, Raquelma ja̧ opobiya edö abebijotö Leanö:
—Ja'yubeda chukwo iyitjö— ajeboko:
15—Chiyokobe. Tjo̧wi̧ chilekwenö 'döbebö kwemibinobedanö ichejekwa ökwönö nöinö ösödobetjö̧. Babema ¿chitji̧ iyaja̧bi 'dökebobö jö̧ka̧liji̧? Ökwönö chiyokobe— jö̧ba̧lijotö Leama Raquelnöma. Jejenö jö̧ja̧loko Raquel jö̧ba̧lijotö:
—Jao kwatjö̧ma, ja̧ opobiya balewö makö yö̧te Jacobma ökwökwö ö̧jobö weta— jö̧ja̧loko:
—Jao otiwa— jö̧ba̧lijetö, Leama.
16Jemi ikenama, Jacobma batjobetjö ȩwa̧jobe Leama labeibö 'yi̧jotö ȩwa̧jobekwö. Ja̧danö, jo̧banö 'ya̧wibö jö̧ba̧lijotö:
—Chilekwe, makö yö̧te ötjökwö kwö̧jo kwicho. Midö chemaja̧kwö chitji̧ ötjönö iyaja̧ opobiyanö balewö— jö̧ba̧lijotö. Jokwaobetjö̧ Jacobma Leakwö ji̧jetö ja̧ yö̧tema. 17Ja̧danö, Diosma Lea ajebi̧ma, jitji̧nö 'yajebobö pjaatobö a̧ja̧kwajabetjö̧ jobujuma metu'wo ji̧jotö. Ja̧danö, metu'wo ja̧juma Jacob itji̧ jelo̧nö emijotö, jobujutjö bakwamu luwo̧ baibanö 'yajebajawö̧ma. 18Emaju jö̧ba̧lijotö Leama:
—Ötjöma otiwanö wetajabe chömöayujunö chilekwenö. Jejenö otiwanö wetajabetjö̧ Diosma mikwanö iyi̧danö otiwanö iyajabe ötjönöma, ötjöda chitji̧nö— jö̧ba̧lijotö. Jejenö jö̧ba̧lö midijotö jitji̧nö Isacar#30:18 Isacar jö̧ba̧löma hebreo tjiwenenö, mikwanö iyö, jö̧ba̧lö ökwöi̧danö ökwöobe. , jö̧ba̧lö.
19Jemi ikenama Leama inabi metu'wo ji̧jotö. Ja̧danö, Jacob itji̧nö emijotö, jobujutjö jelemutjö̧ bakwo̧ ji̧tji̧mutjö̧ bajaliya luwo̧nö. 20Ja̧danö, jobujuma jö̧ba̧lijotö:
—Diosma otiwanö iyajabe ötjönöma. Isabenö babema chilekwema ötjönö edö, jwiinö mikwawuju, jö̧ba̧lö ösödakobe ötjönöma, jȩlȩmu̧tjö̧ bakwo̧nö itji̧mu̧nö 'yabebö chiyobetjö̧— jö̧ba̧lijotö Leama. Jejenö jö̧ba̧lö jitji̧nö midijotö, Zebulón#30:20 Zebulón jö̧ba̧löma hebreo tji̧wȩnenö, otiwi̧ iyawa, jö̧ba̧lö ökwöi̧danö ökwöobe. , jö̧ba̧lö. 21Ja̧danö, ju'wi möle jitjijunö emijotö. Jobujunö Dina, jö̧ba̧lö, midijotö.
22Jemi ikenama, Diosma Raquelnö lȩlö̧jinö edö pjabatijetö. Jobuju ajeba̧li̧ma a̧ja̧kwö pjabatijetö metu'wo jö̧jinö. 23Ja̧danö, jobujuma metu'wo ja̧ju jitji̧nö emijotö. Emajaju jö̧ba̧lijotö:
—Diosma chötabakwi̧ma emö loajabe— jö̧ba̧lijotö. 24Ja̧danö, Isabenö Jo̧ Diosma jelo̧ chitji̧nöbi iyobö chösöda, jö̧ba̧lö, jitji̧nö José#30:24 · José jö̧ba̧löma hebreo tjiwenenö, jelonö iyobö ateba, ökwöi̧danö ökwöobe. , jö̧ba̧lö midijotö.
Jacob jwiinö juna̧lo̧ baibanö baledina jawa
25Ja̧danö, Raquel Josénö jemina tupakwö Jacobma abebijetö Labánnö:
—Webitjö chitebobe chȩwa̧jo— abebijetö—. 26Ja̧danö, ötjö chi̧lȩkwa̧munö, chi̧tji̧munö webitjö chȩwa̧jo, jobadönö chotidawatjö cheminobetjö̧. Kwöwaisa ökwö weköbi̧ma lekwe o̧biya otiwanö otidiachijatö— abebijetö.
27Jejenö aebökwe:
—Jacob, ötjönö otiwanö kweditjö̧ma benada ötjökwö ja̧wi. Ötjöma baledakwa̧ tjöwaisachibobö alewiatjidanö alewö chöwaisachibijatö ötjökwö kwö̧jobetjö̧ Isabenö Jo̧ Diosma ötjönö dösölö̧jinö pjaatajabe, otiwanö chö̧jobö. Jo̧kwaobetjö̧ Isabenö Jo̧ Dios ötjönö pjaatakobetjö̧, benada kwö̧jo. 28Ja̧danö, benada ja̧nö kwotido. Ökwönö nöinö chimidocha, ökwö akebi̧da— jö̧ba̧lijetö Labánma.
29Jejenö jö̧a̧lökwe:
—Chöjaba, kwöwaisa ötjönöma. Otiwanö, lekwe o̧biya chotidajabe ökwö weköbi̧ma. Kwa̧jwi̧muma yelösöda tjöba̧jekwachinobe ötjö chite'ada̧lenama. 30Ajayinö chichinanöma kwa̧jwi̧muma du̧ju̧tajanöda tjö̧jinobe. Ikenama otiwanö chite'ada̧lobetjö̧ nöinö yebawö tjöba̧jekwachinobe. Isabenö Jo̧ Diosma ötjökwö ösödinö pjabatö ö̧jobetjö̧ ökwönö otiwanö ösödinö pjaatajinobe. Jokwaijayonö babema ötjöda chotidawa chotidobö chösöda, ökwö weköbi̧maö̧kö̧. Babeda ötjö chi̧lȩkwa̧munö, chi̧tji̧munö otiwanö chite'ada̧lobö jö̧ta̧la, otiwanö tjujuna̧lobö— jö̧ba̧lijetö Jacobma Labánnöma.
31Jo̧kwaijayonö Labánma öpöjödijetö Jacob yöa̧li̧ma. Ina abebijetö:
—Abebitjö ¿dokwa nöinö chimidobö akeba?— aebökwe:
—Baladama kwimidatjö. Jo̧kwaijayonö bakwöta ateba̧li̧ ja̧köbitjö̧ma ȩwa̧jökönö benada chö̧jiba kwa̧jwi̧munö te'ada̧lö.
32Baikwö atebakwö: Babema webitjö kwebachö chedo okobe deinö kwa̧jwi̧munö. Ja̧danö, jobadötjö o̧bȩja̧dö okobe deinö wȩyu̧wadönöbi, yȩbadönöbi 'da̧batö chemocha, ötjö cha̧jwi̧mu baibanö. Ja̧danö, chi̧wo̧dötjöbi wȩyu̧wadönö 'da̧batö chemocha, ötjö cha̧jwi̧mu baibanö. Jobadönö chemi̧da ötjönö kwimidi̧ma. 33Jejenöobetjö̧ ju'winöma kwöwaisakobe ötjö cheminawö̧ cha̧jwi̧munöma, wȩyu̧wadönöda, yȩbadönöda. Ja̧danö, cha̧jwi̧mutjö̧ bakwo̧ wȩyu̧wö̧kö̧nö, yȩbö̧kö̧nö chu̧ju̧na̧litjö̧ma kwöwaiso ötjöma chönaukwinökwe— jö̧ba̧lijetö Jacobma Labánnöma.
34Jejenö jö̧a̧lökwe:
—Jao kwatjö̧ma, otiwa, yöka̧li̧danö weto— jö̧ba̧lijetö Labánma.
35Jejenö jö̧a̧lijayonö Labánma sulabenö omukwatö, chöpöjöda, jö̧ba̧lö, iteda a̧jwi̧munö Jacob emapji, jö̧ba̧lö, okobe deinö wȩyu̧wadö a̧jwi̧munöma, ya̧dönöbi, ömadönöbi ja̧danö, yȩbadö o̧bȩja̧dönöbi 'da̧batö webijetö i̧tji̧munö jelobe öbibö tji̧'yobö, jobadönö tjite'ada̧lobö. 36Ikenama Labánma i̧tji̧mukwö a̧jwi̧munö öbibö 'yi̧jadötö, ödöobe, Jacob ö̧jelöma wa̧pötakwa mö̧lȩ 'ya̧kwawobe. Jobadö jelobe tjö̧jonö Jacobma te'ada̧lijetö ju'wedö Laban a̧jwi̧munö.
37Ikenama Jacobma towi öjasabiju bulabijetö, wa̧powikwatjö okwa dewi̧ owitjö, álamo mikwowitjö, avellano mikwowitjö, castaño mikwowitjö. Ikenama solawijetö ömiyanö okwa dewinö öwawobö. 38Solawajo̧ ja̧ towi öjasabiju jawama anijetö a̧jwi̧mu tjowemi, Labán a̧jwi̧muma owö tjedobö. Ja̧danö, o̧bȩja̧dö chi̧wo̧dö owö ichajadöma jobetjöda 'da̧tja̧wobetjö̧, jobeda anijetö öjasabijuma, tjowemi okwa. 39Jokwabetjö̧ o̧bȩja̧dö, chi̧wo̧dö ja̧ towi öjasabiju jo̧bekwö bajalenö ja̧nö i̧tji̧kwakwawijadötö. Ikenama jobadöma tji̧tji̧munöma wȩyu̧wadönöda 'yabebijadötö.
40Ju'wibi ja̧bijetö Jacobma, baikwö: Labán a̧jwi̧mutjö ya̧dönö, iwo lö̧ja̧dönö 'da̧batö junijetö. Ja̧danö, jobadönö junijetö Labán a̧jwi̧mu̧ wȩyuwadö, yȩbadö tjö̧jobekwö tjedobö. Jenada ja̧nö i̧tji̧kwijadötö, wȩyuwadö yȩbadö tjö̧jobekwö edö. Jo̧kwaobetjö̧ tji̧tji̧munö tjemenama wȩyuwadönöda, yȩbadönöda emijadötö. Jejenö Jacob a̧jwi̧muma ba̧jekwachijadötö. Jobadönöma Labán a̧jwi̧mu tjö̧jelöma wainö junijetö Jacobma, pjabacha̧lökönö tjö̧jobö.
41Ja̧danö, Labán a̧jwi̧mu o̧bȩja̧dötjö juluwadöda, chi̧wo̧dötjö juluwadöda, iwo lö̧jadöma owö tjichena Jacobma towi öjasabiju jawa anijetö tjowemi okwa, jelö towi öjasabiju jo̧bekwö bajalenö ja̧nö tji̧tji̧kwobö. Jejenö, jobadö a̧jwi̧muma 'yabebijadötö wȩyu̧wadönö, yȩbadönö, juluwadönöda. Jejenöobetjö̧ Jacob a̧jwi̧muma wȩyuwadö, yȩbadö, juluwadöda ju̧kwijadötö. 42Ja̧danö, Labán a̧jwi̧mutjö me'dawadö, iwo lö̧jadöma owö tjichenama aniabijökötö towi öjasabiju jawama. Jejenöobetjö̧ jobadö i̧tji̧kwinadöma dewadönöda, me'dawadönöda 'yabebijadötö, Labán a̧jwi̧mu batjibanö. Jo̧kwaobetjö̧ jemi tupakwö Labán okobe deinö a̧jwi̧muma me'dawadöda ju̧kwijadötö. Jo̧kwaijayonö Jacob okobe deinö a̧jwi̧muma, o̧bȩja̧döbi, chi̧wo̧döbi wȩyuwadö, yȩbadö, jwiinö juluwadöda ju̧kwijadötö. 43Jejenö Jacobma jwiinö juna̧lo̧ babibijetö. Jo̧bama o̧bȩja̧dönö, chi̧wo̧dönö, ka̧mȩyu̧dönö, bu̧lu̧dönö, ömöayedö ömadönöbi , ya̧dönöbi ba̧jekwadönö ju̧na̧lijetö.
Currently Selected:
Génesis 30: WPC
Highlight
Share
Copy
Want to have your highlights saved across all your devices? Sign up or sign in
©2021, All Rights Reserved
