Génesis 34
34
Jacob itjiju Dinanö baledina jawa
1Ja̧danö, jo̧be Sequem comunidad ö'öbö ja̧nö, Jacob i̧tji̧muma da̧peachijadötö. Jobadötjö bakwuju, Lea jitjiju, Dina mikwujuma ju'wi möle jejutjö labebö kwebachö 'yi̧jotö, jobe ju̧kwadö, Canaán jojodö möayedö ya̧dönö edö. 2Ja̧danö, Dina kwejachobe edijetö heteo jojo Shequem mikwo̧, jobe la'aka luwo̧ Hamor itji̧. Jobujunö edö, Isunö 'da̧towe, jö̧ba̧lö 'ya̧wibö jobujunö wo̧batö ja̧bijetö, jobujuma jwiinö jöpöjödonö. 3Ikenama jo̧bama o̧'wo̧nö jwiinö ösödijetö jobujunö, Chemobö jö̧ta̧la chilekwo baibanö, jö̧ba̧lö. Jobujunö jwiinö ösödobetjö̧ döyötö yöba̧lijetö jobujunöma, jo̧banö jösödobö. 4Jejenö jwiinö ösödobetjö̧ Shequemma abebijetö webijetö abe'do Hamornö, la'aka luwo̧nö, Chabe'do, bisunö akebiotjö, chilekwo baibanö, jö̧ba̧lö.
5Ja̧danö, Jacobma jejenö itjujunö sulabenö ja̧aja̧ yötjawi̧ a̧ja̧kwijetö. A̧ja̧kwena i̧tji̧mu ömadöma ödö ju̧kwijadötö, tja̧jwi̧munö ödö öbibö yi̧nadö. Jobadö detjobetjö̧ ina yötjawi̧ a̧ja̧kwö ja'yubebi jö̧ba̧lijökötö Jacobma. 6-7Ja̧danö, Jacob i̧tji̧mu ömadöma tjöjawujunö sulabenö ja̧aja̧ yötjawi̧ tja̧ja̧kwena, Tajawedö sulabenö ja̧ajada jwiinö taba̧löji̧ jawa, jö̧ba̧lö, jwiinö labijadötö. Juluwanö ȩwa̧bijadötö tjejube. Tjichibena ida̧ökö Shequem abe'do Hamor bi̧jetö tjeju okwa, tjöjawujunö itji̧ ilekwo baibanö weobö abebö ichajo̧ma.
8Ja̧danö, Jacob i̧tji̧mu ȩwa̧jadöma idöda tjölabi i̧sebökönö tjabe'dokwö Hamorkwö ko̧ko̧kwö bi̧jadötö. Ja̧danö, ko̧ko̧kwö ba̧nö yöba̧lijetö Hamorma:
—Chitji̧ Shequemma omajadenö jwiinö ösödobe kwitjijunö. Atebakwö weköbojö chitji̧ ilekwo baibanö yöbawö chichatö 9Ja̧danö, ju'wibi, bakobe omukwatö yöbawö dujuno baikwö: Ökwödöma kwi̧tji̧muduwi ya̧dönö weköbaduwo di̧tji̧mu ömadöma tjilekwo baibanö tjemobö. Ja̧danö, ökwödöbi di̧tji̧mu ya̧dö nö wedena kwi̧tji̧mu ömadöma tjemobö. 10Jejenö dö̧jobö kwösödaduwitjö̧ma otiwanö pjatatena. Okobe jwiinö bemi niji kwö̧jaduwoböma wetena, kwösödaduwenanö, ja̧danö, bemi niji okobe jwiinö tea iyö, emö kwekachaduwobö wetena, jejenö dö̧jobö kwösödaduwitjö̧ma. Ja̧danö, niji midö kwemaduwoböbi wetena, jejenö bakobe omukwatö weditjö̧ma di̧tji̧muduwinö tjemi̧ma— jö̧ba̧lijetö Hamorma.
11Ikenama Shequem, abe'do yöba̧lö kaatena jö̧ba̧lijetö Dina jabe'do Jacobnö, ja̧danö jöpöedönö:
—Kwitjijunö, kwöjawujunö Dinanö chemobö weköbaduwiitjö̧ma ökwö yöka̧laduwi̧da, okobe jwiinö kwösödaduwi̧ma chiyaduwakwö. 12Ja̧danö, Dinanö chemi̧ mikwama, ja̧danö jömöledönö chimidi̧ma ökwödöda akebaduwotjö. Akebaduwi̧da chimidocha— jö̧ba̧lijetö Shequemma.
Dina jöpöedö balekwa mikwa ja̧bö, jobe ju̧kwadö ömadönö kwakwabakwawö bulabinö lotjina jawa
13Ja̧danö, jejenö aebi̧ a̧ja̧kwö Dina jöpöedöma Shequemnö balekwa mikwa jawa ja̧tjotö jöba̧löda omukwatijadötö. Tjöjawuju Dinanö sulabenö, taba̧löjinö ja̧ajiawö̧ balekwa mikwa ja̧tjotö jö̧ba̧löda omukwatijadötö. Jejenöda omukwatö omöna jö̧ba̧lijadötö Shequemnö, abe'do Hamornö:
14—¿Dakwö wedobö döjawujunöma bakwo̧nö, ötade bajale sa̧do̧ 'wibekwö̧kö̧nö, jo̧ba ilekwo baibanö? 'Wibekwö̧kö̧nö jemitjö̧ma jwiinö tabalö̧jena. Wedokobe. 15Jo̧kwaobetjö̧ bakwöta jawada ja̧köbaduwobö jo̧be. Okwödö ömadöma, ökwödödanö babibö kwötadeduwi bajale jawa o̧diju 'wikekwaduwitjö̧ma 16ökwödötjö ya̧dö nöma wedena kwilekwamu batjibanö. Ja̧danö, jejenö 'wikekwaduwitjö̧ma ökwödöbi ökwödötjö ya̧dö nö demena, dilekwo batjibanö. Jejenö ökwödökwö bakwaibedöda duju̧kwena. 17Jo̧kwaijayonö ja̧ wedi̧ kwa̧ja̧kwaduwökötjö̧ma döjawujunöma jelobekwö e'ewö di̧'yakwuju— jö̧ba̧lijadötö, omönada yöba̧lö.
18Ja̧ yötja̧li a̧ja̧kwö, Shequem, iteda abe'do Hamor, Jao kwatjö̧ma weköbaduwi̧ma da̧ja̧kwa, jö̧ba̧lö, ösödijadötö. 19Ikenama Shequem Dinanö jwiinö ösödobetjö̧ Jacob i̧tji̧mu̧ ömadö atjebi̧ a̧ja̧kwobö jö̧ba̧lijetö te'ada̧lökönö. Ja̧danö abe'do Hamorma ba̧kwȩlö̧jatebö ja̧biabijetö itji̧ Shequem aebi̧ma. Ju'wedö ömöledö atjebi̧ ja̧emitjö̧ o̧penönö ja̧bijetö Hamorma itji̧ Shequem aebi̧ma, ba̧kwȩlö̧jatebö.
20Ikenama Shequemma abe'dokwö comunidad la'aka luwedö teachakwawemi tjö̧bobekwö 'ya̧nö yöbawijadötö jobadönöma, Jacob, Jacob i̧tji̧mu atjebinama. 21Ja̧danö Hamor yöba̧lijetö:
—Jobadöma otiwanö ökwödökwö wene jwiinö tjuju̧kwobe. Jo̧kwaobetjö̧ otiwa bena ökwödö ditebonö tjuju̧kwoböma. Ja̧danö, ökwödönö tea tjiyoböbi, tjemoböbi otiwa. Bemima jalobe, ökwödöbi jobadöbi duju̧kwobö. Ja̧danö, tji̧tji̧mu ya̧dö nö demaduwo di̧tji̧mu ömadö tjilekwo baibanö tjemobö. Ja̧danö, ökwödöbi di̧tji̧mu ya̧dö nö wedo jobadö tji̧tji̧mu ömadö tjilekwo baibanö tjemobö. 22Jo̧kwaijayonö bakwöta jawada atjebobe ökwödönö ömadönöma, jobadökwö bakwaso jojodödanö dö̧jobö. Ökwödö ömadönöma dötade bajale jawa o̧diju 'widekwö lodobö atjebobe— yöbawijetö—. 23Jejenö atjebinadanö ja̧ditjö̧ma okobe jwiinö jobadö tjujuna̧li̧ma, tjiteabi, tja̧jwi̧munöbi, ökwödöda dujuna̧li̧nö baibakobe. Jo̧kwaobetjö̧ yöta̧laduwakwö. Atjebinadanö ja̧daduwo bena ditebonöda tjuju̧kwakobetjö̧, ȩwa̧jökönö— yöbawijetö Hamorma.
24Ikenama okobe deinö jobe ba̧nö a̧ja̧kwajadö, juluwadöma Hamor yöa̧li̧ a̧ja̧kwö ösödijadötö, Hamor, itji̧ Shequem tjösödi̧danö. Jejenö tjösödobetjö̧ okobe deinö jobe ju̧kwadö juluwadö ömadöma tjötade bajale jawa o̧diju 'wibekwö lobijadötö. 25Ja̧danö, 'wibekwö lotjaja̧betjö wa̧pötakwa mölebi ina niawö̧ ju̧kwijadötö. Jacob i̧tji̧mu dujutajama, Simeon, Levi, Dina jöpöedöma, jobadö niawö̧ tjuju̧kwobe 'ya̧nö kwakwabakwawö bulabinö lobijadötö, okobe deinö ömadönö. 26Hamornöbi, Shequemnöbi bulabinö lobijadötö. Lobajadö tjöjawuju Dinanö Shequem ejutjö emibö öbibö ȩwa̧jijadötö.
27Ikenama ju'wedö Jacob i̧tji̧mu ömadöma jobe comunidad 'ya̧nö okobe deinö bulabinö lotjajawö̧ tjöba̧jobe baledibö o̧diju okwa tebachibö naukwijadötö okobe jwiinö tjiteaaja̧ma. Balekwa mikwa ja̧bö naukwijadötö, Shequem tjöjawujunö sulabenö, tabalö̧jinö ja̧ina jawa balekwa mikwa. 28Ja̧danö, tja̧jwi̧munöbi naukwijadötö, o̧bȩja̧dönö, chi̧wo̧dönö, bu̧lu̧dönö. Jobe comunidadnö ju̧kwadö tja̧jwi̧munö, ja̧danö, mejenö ju̧kwadönöbi naukwijadötö. 29Okobe jwiinö nöinö mikwawi̧ jawa tjejutjö naukwijadötö. Ja̧danö, okobe deinö ya̧dö nöbi, tjemunöbi emibö ȩwa̧jijdötö. Ja'yubebi junibökönö u'yudijöködötö, okobe jwiinö tjeju jawa tjö̧naukwajobetjö̧.
30Ja̧danö, Jacobma i̧tji̧mu balekwa mikwa ja̧tja̧ja yötjawi̧ a̧ja̧kwö labijetö. Itji̧mu̧nö jö̧ba̧lijetö Simeonnö, Levinö :
—Sulabenö ja̧köbaduwajabe. Babema jelobe jukwadöma , Canaánitasbi, Perrizitasbi biya̧ baledi̧ tja̧ja̧kwena ökwödönö jwi̧inö tjo̧'wo̧ sulinö tjedakobe. Ökwödönö tjo̧'wo̧ sulinö edö, sulabedö, jö̧ba̧lö, yötja̧lakobe ökwödönöma. Ja̧danö ¿dakwö ja̧dakwa̧da ökwödönö ölakwabikwawö tjichitjöma? Jobadöma bajȩkwadö. Ökwödötjö kwakwaakwawa jojodö waisadöma ba̧jekwöködösa. Biya̧ baledaja̧ a̧ja̧kwö bakobe ko̧ko̧kwachibö kwakwabakwawö tjichakobe ökwödönö söbebö lotjobö,—jö̧ba̧lijetö Jacobma i̧tji̧munö.
31Jejenö jö̧a̧lijayonö Simeon, Levi atadijadötö:
—Jo̧bama sulabenö ja̧inobe döjawujunö, jitebiya webujunö ja̧tji̧danö. Jo̧banöma balekwa mikwa baledo jö̧ba̧lö ja̧dajabe—atadijadötö tjabe'donö.
Currently Selected:
Génesis 34: WPC
Highlight
Share
Copy
Want to have your highlights saved across all your devices? Sign up or sign in
©2021, All Rights Reserved
