Génesis 39
39
José Potifar ejunö otidina jawa
1Ja̧danö, Josénö tjiyajawö̧ ismaelitas jojodöma Josénö e'ewö 'yi̧jadötö Egiptobe. Jobe ichibajadö Josénö mikwanö jö̧ba̧lö iyijadötö Egipto jojonö, Potifar mikwo̧nö, jo̧ba wei̧da otidö ö̧jobö. Potifarma Egipto jojodö tjuluwo̧ ipjea luwo̧. Jo̧bama guardia tjuluwo̧, Egipto jojodö tjuluwo̧nö te'ada̧ladö guardiama. 2Ja̧danö, Isabenö Jo̧ Diosma Josénö pjabatö ö̧jobetjö̧ Joséma uluwo̧ Potifar ejunö ja̧nö okobe jwiinö otidi̧ma otiwijetö. 3Ja̧danö, uluwo̧ma Josénö edö, Chedemi Isabenö Jo̧ Diosma bitenö pjaatobe, okobe jwiinö otidi̧ma otiwanö ji̧nö, jö̧ba̧lö, omukwatijetö. 4Jejenöobetjö̧ uluwo̧ Potifarma jwiinö ösödijetö Josénöma, iteda inesö ömöayo̧ baibanö junö. Ju'wedö ömöayedö tjuluwo̧ baibanö junijetö Potifarma Josénöma. Ja̧danö, iteda iteabi, la'aka te'ada̧lakwawa jojo baibanö junijetö Josénöma. 5Ja̧danö, Josénö la'aka jojo baibanö ujuninemi baikwöma Isabenö Jo̧ Diosma Josénö omukwatö jwiinö pjabatijetö Potifarnöma. Eju okwa otikwabi otiwanö baibanö, ja̧danö batjonö junawabi otiwanö pokwobö pjabatijetö Isabenö Jo̧ Diosma. 6Ja̧danö, Potifarma okobe jwiinö itea, iteda otikwa, ja̧danö, ju'wi jawa, ju'wi jawabi Josénöda ite'ada̧lobö webijetö. Ja̧danö, ja'yubebi omukwatijökötö iteda jawama, Josénöda webö. Kwakwawa ukwakwa̧da omukwatijetö.
José uluwo̧ ilekwo Josénö jösödina jawa
Ja̧danö, Joséma ujulubi juluwijetö, otiwi̧bi jwiinö otiwijetö. 7Ju'wi möle José uluwo̧ ilekwoma ösödö edö obijotö Josénöma, Ötjökwö dö̧lo ichi, jö̧ba̧lö.
8Jejenö jö̧ja̧lijayonö Joséma jö̧ba̧lijetö:
—Chichökö, sula. Ökwöma chuluwo̧ ilekwoja. Ja̧danö, chuluwo̧ itea weibinökwesa ötjöma. Jo̧bama omukwatökönö ötjönö webö ujunijatö chite'ada̧lobö okobe jwiinö jo̧ba iteama. 9Bejunö ötjötjö bajalekwönönö jo̧ma dea. Kwilekwema ju'wi jawabi a̧'dȩlokobe ötjönöma. Ökwönöda ile niebobe ilekwoköbobetjö̧. Sulabenö kwomukwati̧ma chöpöjöda. Dios öba a'otjö ¿dakwö sulabenö ja̧tobö ökwö kwösödi̧ma? Chöpöjöda— jö̧ba̧lijetö Joséma uluwo̧ ilekwonö.
10Jo̧kwijayonö jobujuma ju'wi möle, ju'wi mölebi Josénöma abeba̧liabijotö isukwöda ö̧lobö. Jo̧kwaijayonö Joséma jobuju ajeba̧li̧ma öpöjödö a̧ja̧kwiabijökötö, jobujukwö jökönö. 11Ja̧danö, ju'wi möle Joséma uluwo̧ eju okwa tebachijetö otidö. Jo̧dawa'ye tebachijetö, ju'wedö uluwo̧ ömöayedöbi deinö. 12Ja̧danö, Josénöma tebachajo̧nö uluwo̧ ilekwoma jo̧ba ökamijido̧nö do̧batö jö̧ba̧lijotö:
—Ötjökwö dö̧lo ichi— jö̧ba̧lijotö.
Jejenö jö̧ba̧lö do̧jatajökwe 'döbekwachibö ökamijido̧ma bi̧bo̧nö juluwanö labebajijetö apetube. 13Laeibaja̧ okobe jobujuma yada bi̧bo̧nö laebaja̧do̧ma jömamunö do̧ba̧lö 14jwöbijotö jeju okwa otidadönö, Ichaduwi, jö̧ba̧lö. Ichajadönö omöna yöba̧lö jö̧ba̧lijotö:
—Edaduwi bido̧ hebreo jojo ökamijido̧. Isabenö chilekwema jo̧banö ichejebinökötjö̧ma otiwena. Ökwödö ya̧dönö sulabenö ja̧otö jö̧ba̧lö ichajo̧. Obo̧. Ötjökwö ö̧lotö jö̧ba̧lö teachitjö̧ labinö jwöteba̧latö. 15Ikenama jwöteba̧liökwe ökamijido̧ma ötjö chipjeanö lödibö labeibö döibajatö apetube— ömöna yöba̧lö jö̧ba̧lijotö.
16Ikenama, ökamijido̧ juna̧lö te'ada̧lijotö jilekwe ȩwa̧jenanö, jo̧banö ji̧sebobö.
17Ja̧danö, jilekwe ȩwa̧jena yöbawijotö:
—Chilekwe, jo̧da ökwö kwichejebinökwe hebreo jojo, kwömöayo̧ma ötjönö sulabenö ja̧otö jö̧ba̧lö teachatö 18Jo̧kwaijayonö jwöteba̧liökwe ökamijido̧ma ötjö chipjeanö lödibö labeibö döibajatö apetube— yöbawijotö jilekwenö.
Josénö ka̧lela ba̧kwaweju okwa tjödina jawa
19Ja̧danö Potifarma, ilekwo yöjawi̧, Kwömöayo̧ma sulabenö ja̧atö ötjönöma, jö̧ba̧lö, yöjawi̧ a̧ja̧kwö jwiinö labijetö Josénöma. 20Ja̧danö, webijetö ömöayedönö Josénö do̧batö ka̧lela ba̧kwaweju okwa tjödobö, Egipoto la'aka luwo̧ tjödobö weinawö̧kwö. Jo̧kwaobetjö̧ ka̧lela ba̧kwaweju okwa bi̧jetö Joséma. 21Jejunö ö̧jijayonö Isabenö Jo̧ Diosma Josénö pjabatö, lȩlö̧jinö edijetö. Ja̧danö, jeju okwa ba̧jadönö te'ada̧lo̧ma Josenö otiwanö edobö pjabatijetö Isabenö Jo̧ Diosma. 22Jo̧ba te'ada̧lo̧ma Josénö otiwanö edö junijetö ömöayo̧danö, ju'wedö ka̧lela ba̧kwaweju okwa ba̧jadönö ite'ada̧lobö. Ja̧danö, okobe jwiinö ka̧lela ba̧kwawejunö ji̧ma Joséda webijetö. 23Ja̧danö, Isabenö Jo̧ Diosma Josénö pjabatö ö̧jobetjö̧ okobe jwiinö José otidi̧ma otiwijetö. Jo̧kwaobetjö̧ jeju ba̧ja̧dadönö te'ada̧lo̧ma jeju okwa ji̧ma omukwatöbi omukwatijökötö, Joséma otiwanö otidobetjö̧.
Currently Selected:
Génesis 39: WPC
Highlight
Share
Copy
Want to have your highlights saved across all your devices? Sign up or sign in
©2021, All Rights Reserved
