Lucas 8
8
Ya̧dö Jesúsnö pjatjatina wene
1Jemi ikena ja'yubenö lekwajabetjö, Jesúsma jamatö yöbawö kweachinobe ja̧ niji bakwameachibanö. Okobe jwiinö ja̧ niji comunidadtenia techaiabö, otiwa jawa wene Dios la'aka luwo̧ ö̧jakwa̧ wene kwebachö yöawinobe.
Jejenö yöbawö kweachonö, Jesús webawedö a̧li̧nösamutjö duju̧tajabedöma Jesúskwö kwetjachinobe, 2ja̧danö ju'wedö ya̧döbi Jesúsnö pjabatö jo̧bakwö kwetjachinobe, tjö'wöchi̧tjö Jesús otidö loinawö̧bi, tjo̧'wo̧ luwo̧ sulabedönö a'dewö loinawö̧bi. Jobadö ya̧döma bidö: María Magdalena ötjabokobi Jesúskwö kwejachinobe. Jobuju María Magdalenama ajayinöma jo̧'wo̧ luwo̧nö sulabedö jelemutjö du̧ju̧tajabedö tjö̧jinoko, jo̧kwaijayonö jö̧bibajinö otidö loinobe Jesúsma. 3Ja̧danö, Juana mikwujubi Jesúskwö kwejachinobe. Jobuju Juanama, la'aka luwo̧ Herodes ömöayo̧ Chuza mikwo̧ ilekwo. Jo̧ba Chuzama okobe deinö Herodes eju otidadötjö tjuluwo̧ ö̧jinobe. Ja̧danö Susana mukwujubi, Jesúskwö kwejachinobe. Jobadö María Magdalenabi, Juanabi, Susanabi, ju'wedö ya̧döbi Jesúskwö kwebachö, idöda tjujuna̧li̧tjö tjiyinobe, Jesúsbi Jesús webawedöbi kwakwawa tjukwobö. Jejenö iyö otiwanö pjatjatinobe Jesúsnö, ja̧ niji bakwameachibanö yöbawö kweachonö.
Batjo otido̧nö Jesús wanedö yöawina wene
4Comunidadteniatjö ba̧jekwadö jojodö Jesús yöawi̧ tja̧ja̧kwobö tjichinobe, ja̧danö ba̧jekwadö jojodö tjoko̧ko̧kwachibenama, Jesúsma jobadönö wanedö yöawinobe baikwö:
5—Chömöledö, baikwö wanedö yötawa: Bakwo̧ batjo otido̧ma, ödebiya lobö kweachinobe, ja̧danö ödebiya loenama, loaja̧ ödebiyatjö mananö meinobe. Ja̧danö, ja̧ mananö meaja̧dema, jojodö kwebachö tjö̧jatinobe, ja̧danö pji̧yu̧ma ichibö tjukwinobe. 6Ja̧danö loaja̧tjö, inakoena, niji ja'yuwena meinobe. Ja̧danö jobe pokwenama, juluwanö kököachibinobe, niji yoliwokobetjö̧. 7Ja̧danö loaja̧tjö sȩa'wonö meinobe, ja̧danö sȩi̧bi pokwobetjö̧, loaja̧ ödebiyama otiwanö pokwinokobe, ja̧danö wa̧ji̧ma wa̧jinokobe. 8Jo̧kwaijayonö, niji otiwenabi meinobe loaja̧ ödebiyama, ja̧danö jobe meajabema, otiwanö pokwinobe, ja̧danö otiwanö wa̧jinobe, bakwachokwena cien jenanö ödebiya wa̧jinobe—
jö̧ba̧lö. Jejenö wanedö yöawinobe Jesúsma jojodönö, ja̧danö yöawenama, jojodönö jwöinobe:
Yötawi̧ma okobe deinö otiwanö tja̧ja̧kwobö jo̧be, jö̧ba̧lö.
Batjo otido̧nö wanedö yöawaja̧ Jesús labebö lobö yöawina wene
9Jemi ikenama Jesús öba̧ja̧di̧ waisachadöma Jesúsnö abebö tja̧ja̧kwinobe:
—Wanedö yökawaja̧ma, ¿dakwö badekwachobeda?—
jö̧ba̧lö. 10Atjebökwe, Jesúsma jobadönö yöawinobe:
—Diosma ökwödö chöba̧ja̧di̧ waisachadönö iyinobe, jojodö wajwitji̧ jawa, mölejȩbe jo̧ Dios la'aka luwo̧ ö̧jakwa̧ jawa kwöwaisaduwobö, jo̧kwajabetjö̧ ökwödönö jweinö yöbawö labebö lobö yötawocha. Jo̧kwaijayonö ju'wedönö sule wanedö yöbawöda yötawobe, labebö lobökönö. Jejenö jobadönö yötawobe, Dios iwene damötjö tjiwȩyudinadanö badekwachakobetjö̧, Baikwö laebobe Dios iwene damötjö tjiwȩyudinama:
Jobadöma tjedijayonö, waisachibanö tjedoböma jwitjakwedö, ja̧danö tja̧ja̧kwijayonö, waisachibanö tja̧ja̧kwoböma jwitjakwedö,
jö̧ba̧lö laebobe Dios iwene damötjö tjiwȩyudinama. Ja̧ laebachi̧ma bidönö wanekwachobe, jo̧kwajabetjö̧ ökwödönö labebö lobö yötawijayonö, ju'wedönö sule wanedö yöbawöda yötawobe—
jö̧ba̧lö yöawinobe Jesúsma iteda öba̧ja̧di̧ waisachadönöma.
11Ikenama Jesúsma iteda öba̧ja̧di̧ waisachadönö labebö lobö yöawinobe wanedö yöawaja̧ma, baikwö:
—Wanedö yötawaja̧ laebachi̧ma biya̧: Ödebiya badekwachi̧ma Dios iwene. 12Ja̧danö, mananö meaja̧ ödebiyama baikwö badekwachobe, jojodö Dios iwene tja̧ja̧kwijayonö, Awetjama tjomajadetjö ja̧ wene 'döebobedanö jo̧be, Dios iwene ösödö tjö̧jibapji jö̧ba̧lö.
13Ja̧danö inakoena meaja̧ ödebiyama baikwö badekwachobe, Dios iwene tja̧ja̧kwenama, tjo̧'wo̧ ösöwachibanö tja̧ja̧kwobe, otiwa jawa wene jö̧ba̧lö. Jo̧kwaijayonö, bö'dia jwibadödanö tjichejekwobe, tjomajade okwanö söibokobetjö̧, ja̧danö lekwema ösödöködö. Usula tjemawenama, juluwanö kabatibadö, tjösödi̧ la'aka jawa jwiobetjö̧.
14Ja̧danö sȩa'wonö meaja̧ ödebiya badekwachi̧ma, Dios iwene a̧ja̧kwö tjösödijayonö, jemi tupakwö böjȩnö tjö̧ji̧ jawa nöinö tjomukwatobe, ja̧danö balada tjemobö tjisakwobe, ja̧danö böjȩ jawatjö tjo̧'wo̧ ösöwobö tjisakwobe. Jobadöma ja̧ jawa nöinö tjomukwatobetjö̧, otiwanöma tjöda̧peachokobe, ja̧danö tjo̧'wo̧ luwo̧ wa̧ji̧ jawama otiwanöma wa̧jököwö̧.
15Ja̧danö niji otiwena meaja̧ ödebiya badekwachi̧ma, otiwanö a̧ja̧kwö, tjomajadenö 'diinö do̧ba̧ladönö badekwachobe. Jobadöma sule omöna yöba̧lödama chösöda jö̧ba̧lö yöba̧löködö, tjomajadenö otiwanö omukwatö isabenö ösödadö, ja̧danö wene baledijayonö, tjo̧'wo̧ 'dibachibö ja̧nö tjo̧'wo̧ luwo̧ wa̧ji̧ jawa otiwanö tjöwa̧jobe—
jö̧ba̧lö. Jejenö yöbawö Jesúsma iteda öba̧ja̧di̧ waisachadönö labebö lobö yöawinobe jojodönö wanedö yöawaja̧ma.
Dejewa'yu̧ jawa Jesús wanedö yöawina wene
16Ju'wibi Jesúsma wanedö yöawinobe:
—Chömöledö, bakwo̧ dejewa'yu̧ önötedenama, ¿wi̧lȩyu teebe ujunenaji̧? ¿Kamapjo teebe ujunenaji̧? Ja̧maökö chömöledö. Mesasöte wameda ujunena, okobe deinö o̧do okwa ju̧kwadö otiwanö tjedobö, ¿jö̧tö? 17Dios iwene jejenö dejatobö jo̧be chömöledö, okobe jwiinö otiwanö öwawakobetjö̧. Jau chömöledö, ja'yubebi ji̧bökönö okobe jwiinö babe öwawökö ji̧ma tupakwö öwaetjöda öwawakobe. Ja̧danö, okobe jwiinö tjöwaisapji jö̧ba̧lö tojö tjujuni̧ma, isabenö okobe deinö tjöwaisachibanö öwawakobe—
jö̧ba̧lö. 18Jobekwö wanedö yöawinobe Jesúsma, ja̧danö tupakwö yöawinobe jojodönö:
—Chömöledö, isabenö yötawi̧ otiwanö kwa̧ja̧kwaduwobö jo̧be. Yötawi̧ a̧ja̧kwadönöma, Diosma tupakwönönö iyakobe, tupakwöbi tjöwaisachibobö. Jo̧kwaijayonö a̧ja̧kwöködönöma iyökakobe Diosma tupakwö tjöwaisachiboböma. Ja̧danö ju'wibi, tja̧ja̧kwobö tjöpöjödobetjö̧, waisadösa jö̧ba̧lö tjomukwati̧ma, ja̧ tjöwaisi̧bi Diosma 'döebakobe, bakwainö wajwibadö tjö̧jobö—
jö̧ba̧lö yöawinobe Jesúsma.
—Yöne chömöledöma Dios iwene a̧ja̧kwadöda— jö̧ba̧lö Jesús yöawina wene
19Jesús jojodönö yöawonö, Jesús ojo'do Maríabi, öja̧wo̧döbi tjichinobe, Jesúsnö tjedobö. Jo̧kwaijayonö, yelösöda ba̧jekwadö jojodö Jesúskwö tjö̧jinobe, Jesús öba a'o tjichibökenanö. 20Jo̧kwajabetjö̧ jelo̧ Jesúsnö yöawinobe:
—Kwojo'dobi, kwö̧ja̧wo̧döbi a̧petube tjö̧jobe, ökwönö edö ichajadöma—
jö̧ba̧lö. 21Jejenö yöa̧liökwe, Jesúsma atadinobe:
—Baikwö yötawaduwakwö ötjö isabenö yöne chömöledönöma chömöledö: Dios iwene a̧ja̧kwö, laebi̧danö ja̧bö ju̧kwadöma yöne chömöledö tjö̧jobe. Jau chömöledö, Dios iwene a̧ja̧kwö ja̧badöda chojo'dobi chö̧ja̧wo̧döbi tjö̧jobe—
jö̧ba̧lö atadinobe Jesúsma.
Jwa̧lȩ'epjo yöachibobö Jesús yöa̧lina wene
22Ju'wi möle, Jesúsma iteda öba̧ja̧di̧ waisachadökwö isowinö a̧jibinobe, ja̧danö jobadönö yöa̧linobe:
—Tupakwö o̧pesobu bakwachobube pedibaduwo—
jö̧ba̧lö. Yöa̧liawö̧, petjibotö jö̧ba̧lö latjebinobe, 23ja̧danö petjibonö Jesúsma abibinobe bö̧ti̧lö̧jabobetjö̧. Ja̧danö, pjetjibemi ja'ötjö, jwa̧lȩ'epjo labinö doibajinobe, ja̧danö balawa loobetjö̧ isowi su̧'bȩ babibö meajo jö̧a̧linobe. 24Jejenö balediawö̧, Jesúsnö wiludö labinö jwötjeba̧linobe:
—Duluwo̧, Duluwo̧, mebajö o̧dibakobe—
jö̧ba̧lö. Jwötjeba̧liökwe, Jesúsma wiluinobe, ja̧danö a̧laibö, jwa̧lȩ'epjo yöachibobö yöa̧linobe, ja̧danö balawa loaja̧bi yöachibobö yöa̧linobe. Yöa̧lenama juluwanö yöachibinobe jwa̧lȩ'epjoma, ja̧danö o̧pesobubi juluwanö yöachibinobe. 25Ja̧danö, Jesúsma iteda öba̧ja̧di̧ waisachadönö abebö a̧ja̧kwinobe:
—¿Tajawedö Diosnö kwo̧'wo̧ wana̧lökönö yekabiduwobedaja̧?—
jö̧ba̧lö. Jejenö balediawö̧ Jesús öba̧ja̧di̧ waisachadöma yebaibö yötja̧lakwawinobe idödada:
—Ayö, ¿tijö bite Jesúsma? Jwa̧lȩ'epjobi, ojwebi bite wei̧ a̧ja̧kwobe. ¿Ditejayo̧jö?—
jö̧ba̧lö yebaibö yötja̧lakwawinobe Jesúsnö.
O̧'wo̧ luwo̧nö sulabedö tjö̧jökwenö Jesús pjaatina wene
26Ja̧danö, tupakwö pebibö, gadarenos tjitebobe ichibö tjölamatinobe, Galilea nijitjö bakwachobube. 27Ja̧danö, Jesús isowitjö mebibö öjamatenama, ja̧ niji comunidad jojodötjö bakwo̧ o̧'wo̧ luwo̧nö sulabedö tjö̧jökwema Jesúsnö öbadekwajinobe. Jo̧ba jojoma, ajayinö comunidadnö ö̧jinajayonö, ida̧ökö lekwe möle kamijido̧ jwibö, ja̧danö eju jwibö wobiakonöda ö̧jinobe.
28-29Jo̧ba jojo o̧'wo̧ luwo̧nö sulabedö tjö̧jinobe, ja̧danö nöinö jo̧banö tjujuluwinobe, wetji̧danö ja̧o jö̧ba̧lö. Ajayinö ina comunidadnö ö̧jayima, sulabenö ja̧iawö̧, jojodö jo̧banö ka̧lena tjödinobe, 'dii̧ jawanö ömajamijunöbi ömasapiyanöbi yö̧beba̧lö tjödinobe, ja̧danö te'ada̧la̧dönö tjujuninobe, jo̧banö tjite'ada̧lobö. Jo̧kwaijayonö o̧'wo̧ luwo̧nö sulabedö tjuju̧kwobetjö̧, yö̧ekwa 'döbekwa̧lö loinobe, ja̧danö o̧'wo̧ luwo̧nö sulabedö wetjökwe, jojodö deobe i̧'yinobe.
Jesúsma o̧'wo̧ luwo̧nö sulabedö ja̧dönö weinobe jojotjö latjebajobe, ja̧danö weawö̧, Jesús öba a'otjö meinobe jojoma, ja̧danö labinö yöa̧linobe Jesúsnö:
—Ökwö Inesö La'aka Luwo̧ Dios i̧tji̧ma, ¿tajawedö dö̧jobekwö kwichobeda? Ökwönö adeba, ökwödönö lȩkebapji jö̧ba̧lö—
jö̧ba̧lö. 30Jejenö jojonötjö o̧'wo̧ luwo̧nö sulabedö ja̧dö yötja̧liökwe, Jesúsma abebö a̧ja̧kwinobe o̧'wo̧ luwo̧nö sulabedö ja̧dönö:
—Ökwödöma ¿dakwö kwimikwaduwobeda?—
jö̧ba̧lö. Abebö a̧ja̧kwawö̧, o̧'wo̧ luwo̧nö sulabedö ja̧döma tjatadinobe:
—Ba̧jekwadö jö̧ba̧lö mikwadösa—
jö̧ba̧lö. Jejenö tjatadinobe, ba̧jekwadö tjo̧'wo̧ luwo̧nö sulabedö jo̧ba jojo o̧'wo̧ luwo̧nö tjö̧jobetjö̧.
31Ja̧danö, jojo o̧'wo̧ luwo̧nö sulabedö ja̧döma Jesúsnö budekwödanö atjebinobe:
—Ökwödönö lȩbebökönuwi. Inesö yȩa'wo Dios lȩebakwawö̧ tjö̧jena'wo dö̧bobö webökönuwi—
jö̧ba̧lö. 32Jobe tjipjeanö, mö'ösa'onö ba̧jekwadö ku̧si̧döma tju̧kwa kwa̧nö tjö̧jinobe, ja̧danö o̧'wo̧ luwo̧nö sulabedö ja̧döma Jesúsnö atjebinobe:
—Jobadö ku̧si̧dönö tebachibö dö̧jamatobö webi—
jö̧ba̧lö. Atjebökwe ku̧si̧dönö tebachibö tjöjamatobö weinobe, 33ja̧danö jojotjö labebajö ku̧si̧dönö tebachibö tjöjamatinobe tjo̧'wo̧ luwo̧nö sulabedö ja̧döma. Ja̧danö jejenö tetjachibawö̧, okobe deinö ku̧si̧döma mö'ösa'otjö ya̧likwaobe yutubakwaibö labinö ö'öbakwawö södöbakwaibö o̧tjawinobe o̧pesobunö.
34Jejenö balediawö̧, ku̧si̧dönö te'ada̧ladöma dötjibajinobe, ja̧danö comunidadnö ju̧kwadönöbi, comunidad ö'öbö niji ju̧kwadönöbi yötjawinobe baledaja̧ma. 35Yötjawiawö̧, edö tjichinobe jojodöma, ja̧danö Jesús ö̧jobe ichibö tjedinobe ajayinö o̧'wo̧ luwo̧nö sulabedö tjö̧jajökwenö. Ajayinö o̧'wo̧ luwo̧nö sulabedö tjö̧jajökwe o̧'wo̧ jwibö, kamijido̧ jwibö ö̧jinajayonö, o̧'wo̧ luwo̧nö sulabedö debo̧, otiwanö omukwato̧nö tjedinobe, ja̧danö kamijido̧ 'dubawo̧, Jesús öba a'o bo̧nö tjedinobe. Jejenö edö, jojodö yetjaibinobe, bite Jesúsma tijö jö̧ba̧lö.
36Jesús jojonö otidö loaja̧ edajadöma jojodönö yötjawinobe, Jesús jojo o̧'wo̧ luwo̧nö sulabedö tjö̧jajökwenö otidö loaja̧ tjedaja̧ma, 37ja̧danö yötjawiawö̧, jwiinö yetjaibinobe jojodöma. Ja̧danö, jwiinö yetjaibobetjö̧, okobe deinö gadarenos tjitebo jojodöma Jesúsnö atjebinobe, tjitebotjö laebajobö. Ja̧danö, atjebökwe, Jesúsma yemidanö isowinö a̧jibinobe, ȩwa̧jobö.
38Ju'wedö Jesúsnö yetjaibijayonö, o̧'wo̧ luwo̧nö sulabedö tjö̧jajökwema Jesúskwö i̧'yobö ösödinobe, ja̧danö Jesúsnö aeba̧linobe, Jesúskwö i̧'yobö. Jo̧kwaijayonö aebökwe, Jesúsma atadinobe,
39—Ötjökwö ichökönuwi. Kwejubeda da̧ji, ja̧danö jojodönö yökawo Dios inesö otiwanö ökwönö pjaataja̧ wenema—
jö̧ba̧lö. Ja̧danö jejenö weökwe, o̧'wo̧ luwo̧nö sulabedö tjö̧jajökwema comunidad bakwameachibanö yöbawö kweachinobe, Jesús jo̧banö otiwanö pjaataja̧ wenema.
Jesús Jairo itjijunöbi, ku̧kwinö usula emawujunöbi Jesús otidö loina wene
40O̧pesobu bakwachobetjö jojodö ba̧jekwadö Jesús ichibakwa̧ tjite'ada̧linobe, ja̧danö gadarenos tjitebobetjö Jesús ȩwa̧jenama, tjo̧'wo̧ ösöwanö tjedinobe, Jesúsma otiwanö ichibajabe jö̧ba̧lö. 41Ja̧danö, jobe judío jojodö ba̧nö tja̧ja̧kwa̧leju luwo̧ Jairo mikwo̧ma, Jesús ö̧jobekwö ichibinobe, ja̧danö Jesús öba a'o apaneakwö bamatö, Jesúsnö aeba̧linobe, ejube ichö itjiju jö'wöchi̧ otidö loobö. 42Jo̧ba Jairoma itjiju jo̧dawujunöda ujuna̧linobe, a̧li̧nösamutjö dötölataja jenanö o̧biya junalujuma, ja̧danö itjijuma jwiinö jö'wöchinobe, ö'wö bajibenanö. Ja̧danö jejenö jö'wöchiökwe, Jairoma Jesúsnö abebö i̧'yinobe.
Aebökwe, Jesúsma jo̧bakwö i̧'yinobe, ja̧danö ba̧jekwadö jojodöma isayunö bakobe Jesúskwö tji̧'yinobe. 43Ja̧danö, Jesúskwö 'ya̧jadötjö bakwuju a̧li̧nösamutjö döbalataja o̧biya ku̧kwinö usula emawujubi ji̧'yinobe. Jobujuma lekwe o̧biya usula jemawinobe, ja̧danö okobe jwiinö jitea balada 'dö̧jibajenanö kabatö ba̧jekwadö dötölödönö pjatjatobö jimidinobe, jo̧kwaijayonö, waekwinobe. Jwaikwöda ku̧kwi̧nö usula jemawinobe. 44Jobujuma Jesús ökömanö 'ya̧nö, Jesús ökamijido̧ majinobe, ja̧danö majenama, juluwanö ku̧kwinö jö'wöchi̧tjö jö̧bibajinobe.
45Jejenö baibiökwe, Jesúsma abebö a̧ja̧kwinobe:
—¿Ti ötjönöma maaja̧da?—
jö̧ba̧lö. Abebö a̧ja̧kwawö̧, okobe deinö, Ötjömaökö, jö̧ba̧lö tjatadakwawinobe. Ja̧danö, Pedroma Jesúsnö yöa̧linobe:
—Chuluwo̧, ba̧jekwadö isayunö bakobe kwedachobe, ja̧danö ba̧jekwadö tjösawobetjö̧ ba̧jekwadö ökwönö matjajena— jö̧ba̧lö.
46Jejenö yöa̧lijayonö Jesúsma atadinobe:
—Chöwaisa ötjönö majaja̧ma, majenama isabenö jö'wöchi̧tjö jö̧biba̧jinö otidö lotajobetjö̧—
jö̧ba̧lö. 47Jejenö yöa̧lioko, jojosujuma jöwaisachibinobe, isabenö ötjönö otidö loaja̧ma öwaisobe jö̧ba̧lö, jo̧kwajabetjö̧ yebabinö tjö̧bawö Jesús öba a'o jichibinobe, ja̧danö nijakwö apaneakwö bamatö, okobe deinö jojodö tjöba a'otjö yöjawinobe:
—Lekwe o̧biya ku̧kwinö chö'wöchobetjö̧, Jesús ökamijido̧ matatö, matitjö̧ma chö̧bibajena jö̧ba̧lö. Ja̧danö matenama chö'wöchi̧tjö juluwanö chö̧bibajabeta—
jö̧ba̧lö yöjawinobe jojodönö.
48Jejenö yöjawiökwe, Jesúsma jobujunö yöa̧linobe:
—Chitjiju, isabenö ötjönö ösödö, Ötjönö pjaatobö juluwo̧ Jesúsma, jö̧ba̧lö ötjönö kwösödobetjö̧, kwö'wöchi̧tjö kwö̧bibajabe. Babema wene jwiinö da̧ji— jö̧ba̧lö.
49Jobujunö Jesús ina yöa̧lonö, Jairo ejutjö bakwo̧ yöbawö ichinobe Jaironö:
—Kwitjijuma ida̧ökö ö'wö bajibajabe, jo̧kwajabetjö̧ ba̧ja̧dakwawa luwo̧ Jesúsnö ichobö weköboko, ida̧ökö ö'wö bajibajabe, pjaatoböma jwiobe—
jö̧ba̧lö. 50Jejenö yöa̧liökwe, Jesúsma Jaironö yöa̧linobe:
—Yebabökönuwi. Kwitjijunöma, ötjö chujulu kwösöditjö̧ma isabenö jö'wöchi̧tjö jö̧bibakwuju kwitjijuma— jö̧ba̧lö.
51Ikenama Jairo ejube ichibenama, Jesúsma weinokobe ju'wedö tetjachoböma. Sule Pedrobi, Juanbi, Jacobobi, tjemu jojo'dobi jabe'dobi tetjachobö weinobe. Jobadökwöda teachinobe Jesúsma.
52Jairo ejutjö ba̧jekwadö jojodö tjö̧jinobe, ja̧danö budekwabinö jwötjeba̧linobe, tjemu ö'wö bajibajabetjö̧. Jejenö budekwabinö jwötjeba̧liökwe, Jesúsma jobadönö yöa̧linobe:
—Budekwökönaduwi tjemunöma, ö'wö babibökuju. Sule aba̧löda aba̧luju tjemuma—
jö̧ba̧lö. 53Yöa̧liawö̧, okobe deinö Jesúsnö otjinobe, Isabenö ö'wö bajibajabe, jö̧ba̧lö tjöwaisobetjö̧.
54Jo̧kwaijayonö, Jesúsma tebachö, tjemu jömamunö do̧batö jwöinobe:
—Tjemu, a̧laibi—
jö̧ba̧lö. 55Jejenö jwöenama, jo̧'wo̧ luwo̧ma tjeachajinobe, ja̧danö tjemuma juluwanö ja̧laibinobe. Ja̧danö, ja̧laibenama, Jesúsma weinobe jobujunö ju̧kwa tjiyobö.
56Jejenö balediawö̧, tjemu jojo'dobi jabe'dobi tjöbajale jalaka baibanö tjedinobe, ja̧danö Jesúsma jobadönö weinobe:
—Ju'wedönö yöbawökönaduwi biya̧ baledaja̧ma— jö̧ba̧lö.
Currently Selected:
Lucas 8: WPC
Highlight
Share
Copy
Want to have your highlights saved across all your devices? Sign up or sign in
©2021, All Rights Reserved
