Shiyanso 16

USalaayi nu muvanda waakwe uHajili

1-3UAbulaamu pina akhandi akheele maakha ishumi mu nyi ya Kanaani, uSalaayi umudala waakwe akhandi ashaanali asinamusavile umwana. Leelo akhandi ana muvanda wa shidala. Umuvanda uyo akhandi iihuma ku Misili, ilitaawa lyakwe itambulwa Hajili. Baheene uSalaayi wámujovela uAbulaamu umugoosi waakwe wáaja, “Puliisa! Umeenye kiija uMutwa uNguluvi anigahile one kiiva mugumba. Lino nisikutawule ulute kwa Hajili umuvanda wangu ave mudala waakho ukhale nawo, pamonga asitusavile avaana.” UAbulaamu wáluyiitikha ulujowo lula luna wájovelwagwa nu Salaayi. Apo baheene uSalaayi wámupeela uAbulaamu uHajili wáava mudala waakwe.#16:1-3 Umudala waakwe: Ingʼoma ya luhaavi ulo, uSalaayi akhandi ikimuleshela uAbulaamu kiija akhale nu Hajili, kiija vapate avaana kwa nsila ya muvanda waakwe, woope uAbulaamu wáyitikhaga. Hata ndeeno, uSalaayi wáali apisigeele kiiva mudala wa Abulaamu.

4UAbulaamu wáaluta kwa Hajili, baheene uHajili wáava nu lwanda. UHajili pina wámanyaga kiija ana lwanda, baaho wáyansa kimusala uSalaayi. 5Umwene wáganile kiwona ndeeno, baheene wámujovela uAbulaamu wáaja, “Aga gina ikinigahila umuvanda wangu uyu, owe yuuwe wagaleetaga. Mbona one nakupeelaga umuvanda uyu uve nawo, lino kihuma apate ulwanda, wáyansa kinisala. UMutwa uNguluvi yumwene yuna asitulamulile owe noone.” 6Woope uAbulaamu wámujovela uSalaayi wáaja, “Puliisa, uHajili uyu muvanda waakho, khanji ali mu wutawulilwa waakho. Mugaha shiinu shoshoona shina widobokha.” Kiyansisa apo, uSalaayi wámulafyaga mandu uHajili, mbakha wáasiga.

UIshimayeli iisawa

7UHajili wáganaga kisiga, uMalayikha wa Mutwa uNguluvi#16:7 UMalayikha wa Mutwa uNguluvi: Avaanu vinshi vihiiva kiija uyu yu Nguluvi yumwene na vanji vihiiva kiija uyu yu malayikha, umunjaajila wa Nguluvi. wáaluta wámwaga ituuya nkholeela ni shisansa sha malenga mu lunyikha, nkholeela ni nsila iya kiluta ku Shuuli. 8Woope wámuposa uHajili wáaja, “Hajili, muvanda wa Salaayi, wiihuma kwi na wiiluta kwi?” UHajili wámugomosesa wáaja, “Nikimusiga umaayi wangu uSalaayi.” 9Baheene uMalayikha yula wámujovela wáaja, “Tina kwa Salaayi umaayi waakho! Ukhalaje na woope kwa kimutiila na kiyiyiisa. 10Nisiluyoolose ulusawo lwakho luve lukhome, mbakha kuve kusiina umuunu yuna akwiliile kivavasa avaana kwa kiiva ya kiyoolokha kwanave.

11“Puliisa, owe una lwanda, usiisave umwana wa shigoosi. Ilitaawa lyakwe asiive yu Ishimayeli,#16:11 Ishimayeli: Litaawa lya Shihebulaniya. Uluganulo lwakwe, uNguluvi ipulikha. kwa kiiva uMutwa uNguluvi wápulikha amangʼuulo ga malava gaakho. 12UIshimayeli akhava ngaja dogovi ya mu lihakha. Akhava mulugu wa shila muunu na shila muunu akhava mulugu waakwe. Khanji asikhava nu wiikhasi wunofu na valukholo lwakwe.” 13Baheene uHajili wáyiposa mwene duguli wáaja, “Shiyooli namwaga uNguluvi nishaanali nipili muumi?”#16:13 Kwa Shihebulaniya yiyandiikhwe, Lino nagwaga umugongo gwa yula yuna ikinyaaga one. Wálamulaga kimushemeela uMutwa yuna wálogolaga nu mwene kwa litaawa ‘uNguluvi yuna iloleela.’ 14Lulwene ilisima lyatambulwa ilitaawa lya Beeli-Lahayi-Loyi, uluganulo lwakwe, “Lisima lya yuna muumi, ikiniloleela.” Ilisima ilyo lili paakhati naakhati ya Kadeshi ni Beledi.

15Insiku pina sashilile, uHajili wámusaviile uAbulaamu umwana umudiimi. Baheene uAbulaamu wámutambulila umwana uyo ilitaawa lya Ishimayeli. 16Uluhaavi ulo, uAbulaamu akhandi ana maakha mashumi munaana na mutanda.

Currently Selected:

Shiyanso 16: Shisangu

Highlight

Copy