Shiyanso 24

UIsaaka nu Lebeka

1UAbulahamu akhandi ana maakha minshi, woope uMutwa uNguluvi akhamuyimiliile kwa shila shiinu. 2Ilijuva limonga, uAbulahamu wámushemeelile umuvanda waakwe umukhome. Uyu yumwene yuna akhandi iyimiilila uwusi waakwe woona. UAbulahamu wámujovela wáaja, “Viikha iliwokho lyakho pansi pa shiima shangu, 3na uyiyiije kwa Nguluvi wa wulanga ni nyi, usimutoolela umuswamu wangu avaali va Vakanaani ava vina tiikhala nawo apa. 4Leelo nisakula ulute mbakha ku nyi#24:4 Yimba mu litaafili lya Shiyanso 12:1. ya valukholo lwangu umutoolele umuswamu wangu uIsaaka umudala.”

5Umuvanda yula wámuposa uAbulahamu wáaja, “Wuli, umuhinja uyo nda akhaane kiyinsa kuno, nimuyisaaje umuswamuwo mbakha ku nyi kuna wahumaga?” 6UAbulahamu wámujovela wáaja, “Ndaali! Pulisaaga wunofu, usikhajelaga kimuwuyiisa umuswamu wangu ukho! 7UMutwa uNguluvi uwa kushaanya, yuna wániwusaaga kukhaaya kwa daada wangu, uluvala luna nasawaagwa, wáyiyiigaga kunyangu wáaja, ‘Nisilupeele ulusawo lwakho inyi iyi.’ Umwene asimufilishe umalayikha waakwe akulongole, baheene na yuuwe usimuleetele umuswamu wangu umudala kihuma ukho. 8Umuhinja uyo nda akhaane kiyinsa lumo noowe, kiyiyiiga kuno kusikhakuyiimya. Leelo, usikhajelaga kimutinia umuswamu wangu ku nyi yina nahumaga!” 9Baheene, umuvanda yula wáviikha iliwokho lyakwe pa shiima sha Abulahamu, wáyiyiiga kwa Abulahamu kiija asikwise goona gina wájovelwa.

10Baheene umuvanda yula, wáhaagula na kisibaagula ingamiya ishumi isa Abulahamu, wáyangasa ifiinu ifinofu mandu ifya kitwala uluvala luna akhandi iiluta. Wáshuula, wáaluta mbakha ku lijumbi lya Naholi lina likhandi ku nyi ya Mesopotamiya. 11Wáganile kifikha, wásifugamya ingamiya nkholeela ni lisima lina likhandi mulubali lwa lijumbi. Yikhandi shaamihe, uluhaavi luna avashimaayi vakhandi viiluta kinega amalenga.

12Baheene umuvanda yula wáyansa kifuunya iija, “Wee Mutwa Nguluvi wa mutwa wangu uAbulahamu, nikikulomba unitanjilise iminsiyaano, khanji umugahile wunofu umutwa wangu uAbulahamu. 13Puliisa, niyiimile apa palubali pa lisima lya malenga, woope avahinja va lijumbi ili viyinsa kinega amalenga. 14Lino nikikulomba yive ndeeni, umuhinja yuna nisimujovele kiija, ‘Nilomba utuule pansi injiilo yaakho iya malenga, ningʼwe,’ nda ajove, ‘Ngʼwesaga hela, nasi ngamiya saakho nisisingʼwese!’ uyo aveesaje yumwene yuna umuhaguliile umwanandeje waakho uIsaaka. Kwa ili, lisinigahe nimanye kiija wamugahila wunofu umutwa wangu.”

15Pina asinaamale kilogola ndeeno, baaho, wáyinsa uLebeka asumwile injiilo ya malenga pa livega. ULebeka akhandi mwana wa Betuweli. UBetuweli woope akhandi mwana wa Milika. UMilika akhandi mudala wa Naholi, umaame wa Abulahamu. 16Umuhinja uyo akhandi munofu mandu, khanji wáali asinajelaje kijenda nu mugoosi yoyoona. Wáhuluta mu lisima, wáanega amalenga mbakha wáamemya injiilo yaakwe, baheene wáahuma mu lisima. 17Umuvanda yula uwa Abulahamu wányangupania kitangaana nu Lebeka. Wáganile kifikha wámujovela wáaja, “Nilomba unipeele amalenga madoodo aga mu njiilo yaakho ningʼwe.”

18Umuhinja yula wámujovela wáaja, “Ngʼwa wiheesu!” Baaho wáyiisa injiilo, wáyikhatilisa kuno umuvanda wa Abulahamu ingʼwela amalenga. 19Wáganile kimala kimupeela amalenga, umuhinja yula wámujovela wáaja, “Hata ingamiya saakho nisisingʼwese mbakha siyikute.” 20Apo, wáagaha nyangu, wásiponyesa ingamiya amalenga mu litiinyi, baheene wáaluta khanji kinega amalenga nyangu mu lisima, wásingʼwesa ingamiya saakwe soona. 21Uluhaavi loona ulo, umuvanda yula akhandi apikimuloleela wunofu, kuno asisiime tototo, wáyitenekha kimuloleela amanye uNguluvi nda aluyimiliile ulushuulo lwakwe awu asiluyimiliile.

22Ingamiya sila saganile kiyikuta amalenga, baheene umuvanda yula wátoola injuma iya sahaabu iya muumula na mabangili gavili amanofu aga mu mawokho aga sahaabu, ifiinu fyona ifyo fikhandi fya lifungu likhome mandu, wámupeela umuhinja yula. 23Baheene wámuposa wáaja, “Owe uli mwali wa naani? Nilomba unijovele. Wuli, kuna mwenshe iya kigona one na vayangu kunyeenyu iminsiyaano?” 24ULebeka wámujovela wáaja, “One nili mwali wa Betuweli, nili musukulu wa Milika umudala wa Naholi. 25Kunyeesu uluvala ulwa kidiimila luna masoli, khanji imwenshe iya kigona avahensa yikwali.”

26Umuvanda yula uwa Abulahamu wáganile kipulikha ndeeno, wáfugama, wáfuunya 27wáaja, “Atunwajwe uMutwa, uNguluvi wa mutwa wangu uAbulahamu, yuna wánisoonela uwunofu waakwe ni shiyooli shaakwe kwa mutwa wangu. Na yuune wánilongosa insila mbakha naafikha kwa lukholo lwa mutwa wangu uAbulahamu.” 28Baheene uLebeka wáasiga luvilo wáaluta kukhaaya kwa maayi waakwe, wáaluta kivajovela avaanu injowo iso. 29-30ULebeka akhandi ana wulumbu waakwe yuna akhandi itambulwa Labani. ULabani wáganile kimwaga uLebeka afwalile injuma yila na mabangili mu mawokho na wáganile kipulikha injowo sila sina uLebeka akhandi ajoveelwe nu muhensa yula, baheene wáwuukha luvilo wáaluta kitangaana nu muhensa yula ku lisima kula. ULabani wáganile kifikha kula, wámwaga umuhensa yula ayiimile nkholeela ni ngamiya saakwe. 31ULabani wámujovela wáaja, “Isaaga kukhaaya, owe yuna uyimiliilwe nu Mutwa uNguluvi! Kwashi uyiimile kunja kuno? One shi naanosa inanda ya kigona nu luvala luna sisiikhale ingamiya saakho.”

32Umuvanda yula wáaluta lumo, wáhuluta mu nanda, uLabani wáyiisa amasigo pa ngamiya, wásipeela amasole, khanji wámuleetela amalenga ga kiyoosa amagulu umuvanda uyo na vaanu vina akhandi nawo. 33Baheene vamuteleshela ishakiilya ishinofu. Leelo umwene wávajovela wáaja, “Nisiilya ishakiilya mbakha nijove shina nigulumiile.” ULabani wámujovela wáaja, “Eena, logola lino.” 34Umuvanda yula wámujovela wáaja, “One nili muvanda wa Abulahamu. 35UNguluvi amuyimiliile uAbulahamu mandu, ana wusi winshi. Amuyoloseese ishipuga sha nkholo ni ngʼombe, ingamiya ni dogovi, ihela ni sahaabu, avavanda va shigoosi na va shidala. 36Umudala waakwe uSaala, amusaviile umutwa wangu umwana wa shigoosi mu wugogolo waakwe. Uyo yumwene yuna ahasiiwe uwusi waakwe woona. 37UAbulahamu wánijovaga niyiyiije wáaja, ‘Usikhajelaga kimutwasa umuswamu wangu umuhinja wa Vakanaani ava vina niikhala nawo apa. 38Nisakula ulute mbakha ku nyi yangu, kwa valukholo lwangu, ulute umutoolele uIsaaka umudala.’

39“Baheene namuposa umutwa wangu, ‘Wuli, umuhinja uyo nda akhaane kiyinsa lumo noone mu nyi iyi?’ 40Leelo, umwene wánijovela, ‘UMutwa uNguluvi yuna one nikimuyinatila nsiku soona, asimufilishe umalayikha waakwe lumo noowe, baheene asikutanje kimupata umuhinja yuna hambi iiva mudala wa muswamu wangu kihuma kukhaaya kwa wiheesu na valukholo lwangu. 41Nda ufishe kwa valukholo lwangu, leelo valeshe kikupeela umuhinja uyo, apo baheene usiiva walunanga uluyiigo lwakho.’

42“Iminsiyaano naagana kifikha pa lisima pala, namulomba uMutwa uNguluvi naaja, ‘Wee Mutwa, Nguluvi wa mutwa wangu uAbulahamu, nikikulomba iminsiyaano uniyimiilile na kinilongosa mu lushuulo lwangu. 43Loleela, niyiimile nkholeela ni lisima ili ilya malenga. Nilomba umuhinja yuna asiyinse kinega amalenga, yuna hambi nikimujova, “Nilomba unipeele amalenga madoodo aga kiingʼwa aga mu njiilo yaakho,” 44khanji yula yuna asinijove, “Ngʼwa wiheesu, nasi ngamiya saakho nisisingʼwese,” nisiimanye kiija, uyo yumwene umuhinja yuna umuhagwile, ave mudala wa muswamuve wa mutwa wangu.’

45“Pina nikhandi nisinaamale kifuunya mu numbula yangu, baaho wáyinsa uLebeka avegeele injiilo yaakwe pa livega. Wáhuluta mu lisima, wáanega amalenga, baheene namujova, ‘Nilomba amalenga ga kiingʼwa.’ 46Baaho, wáyiisa nyangu injiilo yaakwe, baheene wánijova, ‘Ngʼwela wiheesu nasi ngamiya saakho nisisingʼwese.’ Baheene naangʼwa amalenga, soope ingamiya sangu wásingʼwesa. 47Baheene namuposa, ‘Owe uli mwali wa naani?’ Wánijovela, ‘One nili mwali wa Betuweli, umwana wa Milika, uMilika umudala wa Naholi.’ Namufwasa injuma muumula na mabangili mu mawokho. 48Baheene namusufya uMutwa, uNguluvi wa mutwa wangu uAbulahamu, yuna wánilongosa mbakha kwa muhinja wa lukholo lwa mutwa wangu, kiija nimutoolele umudala umwanaakwe uIsaaka. 49Nilomba munijovele nda musiigahe uwunofu nu wugolofu kwa mutwa wangu uAbulahamu. Nda yisikwiliile, nijoveli na yuune nisiimanye isha kigaha.”

50Kuwudugo, uLabani nu Betuweli vamujovela kiija, “Ulujowo ulu luhumile kwa Mutwa uNguluvi, ose tisikwiliile kipyanisa ishiinu shoshoona. 51Puliisa, uLebeka ali baaha, lutaga nawo, ave mudala wa muswamuve wa mutwa waakho uAbulahamu, ngaja shina uNguluvi wásoona.”

52Woope umuvanda wáganile kipulikha ndeeno, wámufugamila uNguluvi mbakha pansi, wámufuunya. 53Apo, umuvanda wa Abulahamu wátoola inkhonkholo saakwe inofu mandu ngaja isahaabu ni hela, na menda amanofu mandu wámupeela uLebeka. Khanji wámupeela uwulumbu waakwe uLebeka nu maayi waakwe uLebeka ulutono lwa hela nyinshi. 54Gaganile kishila ago, umuvanda wa Abulahamu na vaanu vina akhandi alongoseenie nawo, vaalya, vaangʼwa na kigona baaho. Vaganaga kilamukha pamulaawu njine, umuvanda yula uwa Abulahamu wávajovela wáaja, “Nilomba munitawule, niwuye kwa mutwa wangu.”

55Leelo, aveene vamujovela vaaja, “Mulekha umuhinja akhale noose padoodo ngaja nsiku ishumi ndeeni, baheene ulutaje nawo.” 56Woope wávajovela wáaja, “Ndaali, musikhanifuvasaaji, kwa kiiva uMutwa uNguluvi wáluyimiilila ulushuulo lwangu. Nitawulaji hela nitinaje kwa mutwa wangu.” 57Woope vamujovela vaaja, “Lekha timushemeele uLebeka yumwene timupose.” 58Vamushemeela uLebeka, baheene vamuposa vaaja, “Wuli, usiilute lumo nu muunu uyu?” ULebeka wávajovela wáaja, “Nisiilute nawo.”

59Apo, baheene vamuhwesa uLebeka nu muvanda waakwe, kiija valute lumo nu muvanda wa Abulahamu na vayine vina akhandi alongoseenie nawo. 60Vamuyimiilila uLebeka vaaja,

“Wee wulumbu wangu,

ulute uve maayi wa vaana vinshi.

Ishikholo shaakho shive shikhome,

vagagalule amajumbi ga valugu vaanave.”

61Baheene, uLebeka na vavanda vaakwe avashimaayi, vataana ingamiya vawuukha, vaaluta lumo nu muvanda wa Abulahamu. Shiisho ndeeno umuvanda wa Abulahamu wámutoolaga uLebeka na valutaga lumo.

62Uluhaavi ulo, uIsaaka akhandi atinile kihuma ku shisansa sha Beeli-Lahayi-Loyi,#24:62 Yimba mu litaafili lya Shiyanso 16:14. wáava iikhala ulubali lwa Negebu. 63Ilijuva limonga, pashinyiijuva, uIsaaka wálutile ku mugunda kihiiva. Uluhaavi pina akhandi ukho, wáloleela, wáawona ingamiya siyinsa. 64Woope uLebeka wáganaga kiloleela, wámwaga uIsaaka, wáyiikha pansi kihuma pashaanya ya ngamiya. 65Baheene wámuposa umuvanda wa Abulahamu wáaja, “Yu naani yuna ali ku mugunda kula iyinsa kituyaayisa?” Umuvanda wa Abulahamu wámujovela wáaja, “Uyu yu mutwa wangu uIsaaka.” ULebeka wáganile kipulikha ndeeno, wátoola ishitambala wáyigubikha ku meeho.

66Kuwudugo, umuvanda yula uwa Abulahamu wámutaviilila uIsaaka ifiinu fyona fina wágahaga mu lushuulo lwakwe. 67Baheene uIsaaka wámutwala uLebeka mu litinga lina likhandi lya maayi waakwe uSaala. UIsaaka wámutoola uLebeka wáava mudala waakwe. UIsaaka wámugana mandu uLebeka, kwa kiganana kwanave, uIsaaka wáyishilisiwa inumbula kwa kiiva ya mfwa ya maayi waakwe.

Currently Selected:

Shiyanso 24: Shisangu

Highlight

Copy