Shiyanso 34

UShekemu ikimukhata uDina kwa ngufu

1Ilisiku limonga, uDina umwali wa Yaakobo yuna wásawaagwa nu Leya, wálutile kivahunjila avahinja va nyi iyo. 2UHamoli uMuhivi akhandi mukhome wa nyi iyo, akhandi ana muswamuve itambulwa Shekemu. Lino uShekemu wáganile kimwaga uDina, wámukhata, wáagona nawo kwa ngufu. 3Leelo, uShekemu wámugana mandu uDina umwali wa Yaakobo, wáyansa kimulonsa na kimubembelesa. 4Baheene uShekemu wámujovela uwiihe wáaja, “Wiheesu, nilomba unibanyile umuhinja uyu, ave mudala wangu.”

5UYaakobo pina wápulikha uShekemu shina wámuwaafusa umwali waakwe uDina, avanaakwe vakhandi kidiima. Baheene wásisima tototo mbakha avanaakwe pina vaawuya. 6Apo, uHamoli uwiihe wa Shekemu wáaluta kwa Yaakobo kilogola nawo. 7Avaana va Yaakobo vaganile kipulikha injowo sina sikhandi sisenjeeshe, vaawuya kukhaaya kihuma kidiima. Vakhandi vasugumiilwe na kikhalasiwa mandu nu Shekemu, kwa kiiva ya wuyasu wuna akhandi amugahiile uwulumbu waanave uDina, uwa kimugona kwa ngufu. Uwunansi uwo wukhandi nsoni na mwikho kwa Vaisilaheli.

8UHamoli wáganile kifikha kula, wávajovela, “Umuswamu wangu uShekemu amugeene mandu umwali weenyu, lino nilomba mandu, umuswamu wangu amutoole umwali weenyu. 9Leshi tive titolelana noomwe, avaali veenyu tive tikivatoola na avaali veesu muve mukivatoola. 10Ndeeno, khalaji noose, yiyeshelaji muno mu nyi yoona, musengaje insengo seenyu mbakha mukwave uwusi.” 11Baheene uShekemu wámujovela uwihaanave na vawulumbu vaakwe va Dina wáaja, “Nisungupila, nilomba muniyiitishe, nimutoole uDina. Shoshoona shina musiijove, nisiihumye. 12Nijoveli, nisiikwe shoshoona shina hambi mwijova, baheene nimutoole umuhinja uyu.”

13Leelo, avaana va Yaakobo vamujanga uShekemu nu wiihe uHamoli, kwa kiiva uShekemu akhandi shi amuyafwise uwulumbu waanave uDina, 14vavajovela kiija, “Tisimutwasa uwulumbu weesu kwa muunu yuna asiyinjiile ijando, kwa kiiva, kigaha ndeeno nsoni kunyeesu. 15Tisikwiliile kipulinkhana noomwe, mbakha mugahe shiinu shimo. Shila mugoosi ave ngaja ose, kwa kiyinjisiwa ijando. 16Apo tisipulinkhane noomwe na tisiive titolelana. Tisiive tiikhala lumo. 17Leelo, nda mukhaane kiyinjisiwa ijando, tisimutoole uwulumbu weesu, na tisiwuushe nawo.”

18UHamoli nu mwanaakwe uShekemu, vagadobokha amaswi ago. 19Umudiimi yula asikhadiilile hata padoodo kigaha ulujowo lula, kwa kiiva akhandi amugeene mandu umwali wa Yaakobo. Umudiimi uyo akhandi itiilwa mandu kishila avayine woona pakhaaya yaanave. 20Ndeeno, uHamoli nu Shekemu umwanaakwe, vaaluta pa shikwilo sha lijumbi lyanave kiija, valogole na vaanu va lijumbi lyanave. Vavajovela, 21“Avaanu ava vamanyi veesu, valeshi tivasaajise vakhale baaha panyeesu, vave visenga insengo iya kigusa ifiinu, kwa kiiva inyi yeesu nkhome yisivakwile. Ose tisiive tikivatoola avahinja vaanave, woope vasiive vikivatoola avahinja veesu. 22Leelo aveene vasiyiitikha kikhala lumo noose ngaja shimyanja shimo, ila tipulinkhane tangusiina, shila mugoosi ayinjisiwe ijando, ave ngaja aveene shina vayinjisiiwe. 23Aasi! Nda tigahe ndeeno, inkholo saanave, uwusi waanave, ni fidiimwa fyanave fyona fisiive fyesu! Leshi tivayiitishe, vakhale lumo noose.” 24Avagoosi woona vina vakhandi vakheele shiwungu pa shikwilo sha lijumbi, vayiitikha amaswi ga Hamoli nu mwanaakwe uShekemu. Shila muunu umugoosi wa lijumbi ilyo wáyinjisiwa ijando.

25Ilisiku lya wutatu, uluhaavi pina avaanu vala vakhandi vakhatiilwe mandu nu wushungu, avaana vavili va Yaakobo, uSimiyoni nu Laawi avawulumbu va Dina, shila muunu wátoola ipanga yaakwe, vaaluta mu lijumbi vavayalushila na kivabuda avagoosi woona. 26Vavabuda kwa panga uHamoli nu mwanaakwe uShekemu, apo vamutoola uDina kihuma kukhaaya ya Shekemu, baheene vawuukha nawo. 27Avaana avanji va Yaakobo valiyalushila ilijumbi lila lina avaanu vakhandi vabudiilwe, vatoola shila shiinu, kwa kiiva uwulumbu waanave akhandi awafusiiwe. 28Vatoola inkholo ni mene, ingʼombe, idogovi ni fiinu fyona fya lijumbi lila na fina fikhandi ku magunda. 29Vatoolaga uwusi woona, vavagalula avaana na vashimaayi woona na shila shiinu shina shikhandi mukhaaya saanave.

30Baheene uYaakobo wávajovela uSimiyoni nu Laawi wáaja, “Mwanileetela amalava makhome, mwanigaha nikhalalilwe na Vakanaani, aVapeleesi na vaanu woona va nyi iyi. One nigaya vaanu vinshi, nda vakungaane na kiyansa uwulugu noose, vasitubude woona tipu.” 31Woope vamujovela uwihaanave vaaja, “Wuli, lukhandi lunofu shina wámugahilaga uwulumbu weesu ndenela ngaja mudala mushemi?”

Currently Selected:

Shiyanso 34: Shisangu

Highlight

Copy