Luuka 6

UYeesu yumwene Mutwa wa lijuva lya Sabaato

(Mataayo 12:1-8; Maluko 2:23-28)

1Ilijuva limonga ilya Sabaato, uYeesu na vamanyisiwa vaakwe vakhandi viishila mu magunda ga ngano. Avamanyisiwa vaakwe vakhandi videenya amahoojo ga ngano, na kifigiha ingano na kiilya.

2Baheene aVafalisaayo avanji vamujovela uYeesu vaaja, “Kwashi avamanyisiwa vaakho vikigasenga gina gakhaniilwe pa lijuva lya Sabaato?”#6:2 Gina gakhaniilwe pa lijuva lya Sabaato: Indaji sa Vayahuudi sikhandi sisikimutawula hata padoodo umuunu kideenya amahoojo aga ngano, mu mugunda gwa muunu uyunji (Luuju lwa Ndaji 23:25). AVafalisaayo vakhandi vilalamikha, kwa kiiva, kideenya amahoojo aga ngano vijovaga kiija visenga insengo. 3UYeesu wávayankha wáaja, “Wuli, musinayimbe mu Mayandikhwa aManofu umutwa uDawudi na vayine shina vagahile, pina vakhandi ni njala?#6:3 Yimba mu litaafili lya 1 Samweli 21:1-6. 4UDawudi wáhulwite mu liheema lya Nguluvi wátoola wáalya na vayine amakhaate gina gakhandi gavishiilwe pa Nguluvi. Indaji sa Musa sikhandi sikivakhaana kiilya amakhaate ago, ila avatambule veene duguli.” 5UYeesu wávajovela wáaja, “One, Lusawo lwa Muunu, yuune Mutwa wa lijuva lya Sabaato.”

UYeesu ikimuponia umuunu mu lijuva lya Sabaato

(Mataayo 12:9-14; Maluko 3:1-6)

6Ilijuva ilinji ilya Sabaato,#6:6 Sabaato: Avamanyisaaji va ndaji sa Musa vaweene kiija, lusili lunofu kiponia umutamu mu lijuva lya Sabaato. uYeesu wáyinjiile mu nanda iya kifuunyila, wáyansa kimanyisa avaanu. Mu nanda mula, wáali akwali umuunu yumonga yuna iliwokho lyakwe ilya kundiilo likhandi likholoweeshe. 7AVafalisaayo na vamanyisaaji va ndaji sa Musa, vaali vikimutejela uYeesu kiija, vamwaje nda asimuponie umuunu yula mu lijuva lya Sabaato. Vaali viigaha ilyo, kwa kiiva vakhandi visakula umutego ugwa kimuhijila uYeesu. 8Leelo uYeesu wámanyaga amahiiva gaanave. Baheene, wámujovela umuunu yula umunya liwokho likholoweeshe wáaja, “Yiima, ulute paakhati naakhati.” Baheene wáyiima wáaluta paakhati naakhati yaanave. 9UYeesu wávajovela aVafalisaayo vala wáaja, “Nikivaposa, indaji seesu sikitutawula kigaha shishi mu lijuva lya Sabaato? Kigaha inofu awu imbi? Kiwukulusa uwuumi awu kiwuyasa?” 10UYeesu wávangʼalulila ameeho avaanu mbali soona, baheene wámujovela umuunu yula wáaja, “Golosa iliwokho lyakho.” Woope wágolosa iliwokho lyakwe, baaho lyapona. 11AVafalisaayo vala vakhalala mandu. Vapulinkhana kiija vamugahe shi uYeesu.

UYeesu ikivabaagula avanandeje ishumi na vavili

(Mataayo 10:1-4; Maluko 3:13-19)

12Ilijuva limonga, uYeesu wálutile ku shidunda kifuunya, ukho kukwene wáava ifuunya kwa Nguluvi ishilo shoona. 13Ulwamilaawu njine, wávashemeela avamanyisiwa vaakwe. Mu awo wávabaagula ishumi na vavili, wávatambula vanandeje.#6:13 Vanandeje: Yimba iliswi Mwanandeje mu Maswi aMahensa. 14Avanandeje awo vaveene ava, uSimoni (yuna uYeesu wámupeelaga ilitaawa lya Petulo) nu Andeleya umunangʼana waakwe uSimoni, uYaakobo, uYohana, uFilipo, uBatolomaayo, 15uMataayo, uTomasi, uYaakobo umushina Alufaayo, uSimoni uMulwila Nyi,#6:15 UMulwila Nyi: Kwa Shiyunaani yiyandiikhwe Museloote. Uluganulo lwakwe, uMulwila Nyi. 16uYuuda umushina Yaakobo nu Yuuda uIsikaliyoote, yuna kuwudugo wámudolelaga uYeesu.

UYeesu iiponia avatamu vinshi

(Mataayo 4:23-25)

17UYeesu wáyiikha kihuma ku shidunda, lumo na vamanyisiwa vaakwe. Pina wáafikha pa luvala ulwa lunyikha, wáyiima. Pala, pakhandi ni shipuga sha vamanyisiwa vaakwe, lumo ni shipuga shikhome sha vaanu. Avaanu awo vakhahumile imbali sa ku Yudeya na ku Yelusalemu, ni mbali sa kulubali lwa bahali ya Tiilo ni Sidoni. 18Avaanu vala vakhalutile pala kimupuliisa uYeesu, na kiponisiwa amatamu gaanave. Woope vina vakhandi vilafisiwa na malungu, wáava ikivaponia. 19Avaanu woona, vaali visakula kimupyasa uYeesu, kwa kiiva ingufu saakwe saali sikivaponia woona.

Amamanyiso aga kiyimiililwa na ga aka

(Mataayo 5:1-12)

20UYeesu wávaloleela avamanyisiwa vaakwe, wávajovela wáaja,

“Shiba omwe, muna muli vapiina,

kwa kiiva uWutwa wa Nguluvi weenyu.

21Shiba omwe, muna muli ni njala lino,

kiiva uNguluvi akhavapeela muyikute!

Shiba omwe, muna mwikhoola lino,

kwa kiiva mukhahekha.

22“Shiba omwe, avaanu vina vikivakhalalila, vikivakhaana na kivaliga, na kivajova kiija muli vanya wunansi pina mukiniyinatila one Lusawo lwa Muunu. 23Kiiva shiisho ndeeno hata avambuyaanave shina vavalafyaga avakuwamalago. Baheene ago pina gakhava gisenjekha, shendeevaji na kishima, kwa kiiva uNguluvi avavishiile amahombo amakhome kushaanya.

24“Leelo aka, omwe muna muli vanya wusi,

kwa kiiva ulutono lwenyu, shi mwiva mwapata lino!

25Aka, omwe muna muyikwite lino,

kwa kiiva mukhava ni njala!

Aka, omwe muna mwihekha lino,

kwa kiiva mukhakhoola!

26Aka, omwe pina avaanu woona vikivasufya,

kwa kiiva, ilyo lilyene lina avambuyaanave

vakhandi vikivasufya avakuwamalago avadehi.

Amamanyiso aga kivagana avalugu

(Mataayo 5:38-48; 7:12)

27“Leelo, nikivajovela omwe muna mukinipuliisa, muvaganaje avalugu veenyu! Avaanu vina vikivakhalalila, omwe muvagahilaje amanofu. 28Avaanu vina vikivayiijila, muveesaje mukivafuunyila kwa Nguluvi avayimililaje. Na vina vikivagahila amavi, muveesaje mukivafuunyila kwa Nguluvi. 29Umuunu nda akusale kwa kikutova ilikhatu ulubali lumo, mulekhaga akutove na ulubali ulunji. Khanji, umuunu nda akuposhe ilikhooti lyakho, mulekhaga atoole nayi gwanda. 30Umuunu nda ikikulomba ishiinu shoshoona, mupeelaga. Khanji umuunu nda atoole ifiinu fyakho, usikhamujovaga akugomosese. 31Muvagahilaje avaanu avanji, ngaja omwe shina mwidobokha kigahilwa na veene.

32“Nda muvagane vala hela vina vikivagana, musiipate lutono lushi? Hata vina vasiyinatila indaji sa Nguluvi, vikivagana hela vala vina vikivagana! 33Khanji, nda mukivagahila amanofu hela vala vina vikivagahila amanofu, mukhava nu lutono lushi? Hata vina vasiyinatila indaji sa Nguluvi, viigaha shiisho ndeeno! 34Nda muvakhopese hela, vala vina mwimanya kiija vakhavahomba, mukhava nu lutono lushi? Hata vina vasiyinatila indaji sa Nguluvi, vikivakhopesa avayaanave, kwa kiiva viimanya kiija, avayaanave awo vakhavahomba fyona!

35“Leelo omwe, muvaganaje avalugu veenyu na kivagahila amanofu. Vakhopesaaji, bila kihuviilila kiija vakhavagomosesa. Nda mugahe ago, uNguluvi uMukhome akhavapeela amahombo makhome. Khanji mukhava vanaakwe kwa kiiva, umwene munofu kwa vina vasihonjesa na vina vanansi. 36Lino, muveesaje vanya kivasungupila avaanu woona, ngaja uWiheenyu shina ikivasungupila avaanu.

Kivahiga avaanu avanji

(Mataayo 7:1-5)

37“Musikhavahigaji avaanu avanji, baheene na yuumwe musikhahigwa nu Nguluvi. Musikhavapiikhaji avaanu avanji, baheene na yuumwe musikhapiikhwa. Muvasajilaje avayeenyu, baheene na yuumwe mukhasaajilwa. 38Muvapeelaje avaanu ifiinu, baheene na yuumwe mukhapeelwa, mu shijelo shina shisindiliilwe, khanji shimemile na kikunukha. Kwa kiiva, ishijelo shina mukivajelela avanji, shiisho na yuumwe shina uNguluvi akhavajelela.”

39UYeesu wávajovela kwa shihwano wáaja, “Aasi, umupofu akwiliile kimulongosa umupofu muyine? Nda yive ndeeno, woona vasidubujila mu lilindi? 40Umumanyisiwa asili mukhome kimushila umumanyisaaji waakwe. Leelo, yuna wáamala kimanyisiwa goona, baheene asiive ngaja umumanyisaaji waakwe.

41“Kwashi wiloleela akhabando khina khali mu liiho lya muyaago, leelo usiloleela ulupaati ulukhome luna luli mu liiho lyakho? 42Khanji ukwiliile kimujova umuyaago kiija, ‘Wee lukholo lwangu, lekha nikuwuuse akhabando khina khali mu liiho lyakho,’ leelo owe usiloleela ulupaati ulukhome luna luli mu liiho lyakho? Owe uli mumyansi! Wuusa tangusiina ulupaati ulukhome luna luli mu liiho lyakho. Apo baheene ukwiliile kiloleela wunofu na kiwuusa akhabando khina khali mu liiho lya muyaago.

Ilipishi limanyikha kwa makhomo gaakwe

(Mataayo 7:16-20; 12:33-35)

43“Khanji, ilipishi ilinofu liikhoma amakhomo amanofu, leelo ilipishi ilivi liikhoma amakhomo amavi. 44Avaanu vikilimanya ilipishi kwa kigamanya amakhomo gaakwe, kiiva vasiiyava amakhomo ga litiini awu ga lisabiibu ku lihakha lya mimfwa.#6:44 Yimba mu litaafili lya Mataayo 12:33. 45Shilushwali, hata umuunu umunofu ilogola amaswi amanofu kihuma mu manofu gina gamemile mu numbula yaakwe. Leelo umuunu umunansi ilogola amaswi amavi kihuma mu wunansi wuna wumemile mu numbula yaakwe. Kwa kiiva, amaswi gina umuunu iijova, giihuma mu gala gina gamemile mu numbula yaakwe.

Kisenga mu lipaama, awu kisenga mu luhankha

(Mataayo 7:24-27)

46“Kwashi mukinishemeela ‘Wee Mutwa, wee Mutwa,’ leelo musiigaha amaswi gina nikivajovela? 47Umuunu yoyoona yuna iyinsa kunyangu, na kipulikha amaswi gangu na kiyinatila, nisivajovele shina ashwali kwa shihwano.

48“Ihwanana nu musengaaji wa litembe yuna wáhimbile pansi mandu, mbakha wáafikha pa lipaama. Wásenga uluutu, baheene wásenga ilitembe pashaanya yaakwe, wáamala. Uluhaavi pina yitoonya inoonya, umukhoga gwamemile amalenga gafuwukha, galitova ilitembe ilyo. Hata ndeeno gasikhayihegensiise, kwa kiiva yikhandi yisenjiilwe wunofu. 49Leelo, umuunu yuna ipulikha iliswi lyangu na asikiliyinatila, uyo ihwananisiwa nu muunu yuna asenjile ilitembe lyakwe pa luhankha pina pagaya luutu. Amalenga ga mu mukhoga pina gafuwukha na kiita kwa ngufu ku litembe, baaho ilitembe liigwa na kibomokha lyona.”

Currently Selected:

Luuka 6: Shisangu

Highlight

Copy