Mataayo 11

UYeesu nu Yohana uMutwiniaji

(Luuka 7:18-35)

1UYeesu wáganaga kimala kivalajisa avamanyisiwa vaakwe ishumi na vavili, wáwuukhaga pala. Wáaluta mu majumbi ga Galilaya kikhoma na kivamanyisa avaanu iLiswi lya Nguluvi.

2UYohana uMutwiniaji pina akhandi adindiilwe mu shifungo, wápulikhaga gina uKilisito akhandi iigaha. Baheene wávafilikhaga avamanyisiwa vaakwe 3vamupose uYeesu kiija, “Wuli, owe yuuwe yuna uNguluvi wátahisaaga kimufilikha awu timuheepaje uyunji?” 4Baheene wávayankha avamanyisiwa vala wáaja, “Lutaji mumujovele uYohana goona gina mwagaaga na kigapulikha. 5Avapofu viloleela, avalema vijenda, avanya nyawulova viipona, avadinde vipulikha, vina vafwile vifyukha. Khanji, avapiina viikhomwa iMola iNofu.#11:5 Insengo sina uYeesu iijova mu lukhalala ulu, siseene sina sakuviilwe amalago kiija akhasisenga uKilisito (Mukulusaaji) pina akhayinsa. Yimba mu litaafili lya Isaaya 61:1. 6Shiba umuunu yoyoona yuna ikinihuviilila one, yuna mugaya muninu muninu.”

7Avamanyisiwa va Yohana pina vawuukha, uYeesu wáyansa kishijovela ishipuga sha vaanu, ulwa Yohana uMutwiniaji wáaja, “Pina mukhandi mwiluta ku lunyikha, mukhandi mwija musiite mushaaje shishi? Mukhandi muhuviliile kilwaga ulutete luna ludegensiwa ni lipepo? Ndaali! 8Leelo mukhandi mwiluta kimuloleela yu naani? Wuli, umuunu yuna ayigojeele amenda aga hela nyinshi? Ndaali, avaanu vina vikiyigojela amenda aga hela nyinshi, viikhala mu nanda isa shitwa. 9Lino, mukhandi mulutile kimuloleela yu naani? Mukhandi muhuviliile kimwaga umukuwamalago? Eena! Nikivajovela kiija, uyo asili mukuwamalago hela, leelo uyo yu mukhome kimushila umukuwamalago. 10UYohana uyu yumwene aMayandikhwa aManofu gayandiishe ndeeni ulwa mwene,

‘Loleela, nikimufilikha umunjaajila wangu

yuna akhakulongola kumwandi.

Uyo yumwene yuna akhakunosesa insila yaakho.’#11:10 Yimba mu litaafili lya Malaaki 3:1.

11“Shiyooli nikivajovela kiija, mu vaanu woona asinawonekhaje umuunu yoyoona kiiva mukhome kimushila uYohana uMutwiniaji. Leelo yuna mudoodo mandu mu Wutwa wa Nguluvi, uyo yumwene mukhome kimushila uYohana. 12Kihuma insiku sa Yohana uMutwiniaji akhandi iikhoma mbakha iminsiyaano, uWutwa wa Nguluvi wusakulwa kwa ngufu. Woope avanya ngufu, viijesa kiwupata kwa ngufu. 13Kiiva avakuwamalago woona nu Musa mu ndaji saakwe vakuwaagwa amalago mbakha kijela mu luhaavi luna uYohana wáwonekhaga. 14Lino nda mukiwuyiitikha uwukuwamalago waanave, uYohana yu mukuwamalago uEliya, yuna wájowaagwa kiija akhayinsa.#11:14 AVayahuudi vakhandi vahepeleese kiija akhayinsa khanji umukuwamalago uEliya, ayandaale kiyinsa kwa Kilisito. Yimba mu litaafili lya Malaaki 4:5-6. 15Umuunu yoyoona umunya makutu, apulishe!

16“Wuli, avaanu va shisafi ishi nivahwananise ni shishi? Vahwaneene na vaana vina viikhala pina vigusisa ifiinu na kivashemeela avayaanave viija,

17‘Mbona tavatovela indemo sa wushendeefu,

leelo musikhashimile!

Tavayeyemelaga injeyemo isa kisugumila,

leelo musikhakhoolile!’

18“Shiisho ndeeno uYohana pina wáyinsaga. Akhandi asiilya wala asiingʼwa, avaanu vajovaga, ‘Ana malungu.’#11:18 UYohana akhandi asiilya ishakiilya shina avaanu woona vakhandi viilya wiila, uluhaavi lwinshi akhandi iilekha kiilya. Akhandi iigaha ndeeno ngaja avakuwamalago avanji ava pawukuulu, shina vagahaga kwa kiiva ya nsengo ya Nguluvi. 19Lino, one Lusawo lwa Muunu, nayinsa niilya na kiingʼwa, aveene viijova, ‘Loleeli! Uyu mupafu khanji mugaasi, mumanyi wa vatofya khoodi na vanya wunansi!’ Leelo ulumanyo lwa Nguluvi lumanyikha kiija lwa shiyooli mu nsengo isa vaanu vaakwe.”

UYeesu ipavila amajumbi gina gakhaanaga kimuhuviilila

(Luuka 10:13-15)

20Baheene uYeesu wáyansa kigapiikha amajumbi muna wágahaga amabikha minshi, kwa kiiva avaanu va mu majumbi ago vasikhalambisiile. 21“Aka! Omwe vaanu va lijumbi lya Kolasiini, noomwe muna muli va lijumbi lya Betisayida! Kiiva, amabikha gina nagasengaga kunyeenyu, gaali gave gasenjeeshe mu lijumbi lya Tiilo ni Sidoni,#11:21 Tiilo ni Sidoni: Avaanu ava majumbi aga, vasikhandi Vayahuudi. Khanji aVayahuudi vakhandi vikivajova avaanu awo kiija vanansi mandu. avaanu va mu majumbi ago vaali viwonensa kilambiisila kwa kifwala amagunila na kiyipakha amafuliikho. 22Leelo nikivajovela kiija, mu lisiku ilya kihigwa inyi, yikhava lupeefu kwa vaanu ava ku Tiilo na ku Sidoni kipona kihigwa, kulikho omwe. 23Na yuumwe muna muli vaanu va ku Kapelinawumu, muhiiva kiija mukhafikha kushaanya kwa Nguluvi? Ndaali, yisikhava ndeeno! Leelo, mukhataagwa pansi ku wusimu#11:23 Wusimu: Yimba iliswi ili mu Maswi aMahensa. na kilafisiwa. Kiiva, amabikha gina gasenjekhaga kunyeenyu, gaali gave gasenjeeshe mu lijumbi lya ku Sodoma,#11:23 Yimba mu litaafili lya Shiyanso 19:24-29. ilijumbi ilyo ndi lyava likwali mbakha iminsiyaano. 24Leelo nikivajovela kiija, mu lisiku ilya kihigwa inyi, yikhava lupeefu kwa vaanu va lijumbi lya Sodoma kipona kihigwa, kulikho owe.”

Kwa Yeesu kuna lutuuyo

(Luuka 10:21-22)

25Mu luhaavi luulo uYeesu wáajova, “Wee Daada, wee Mutwa wa kushaanya na mu nyi iyi, nikikuhonjesa kwa kiiva amaswi aga, wavafihaga avaanu avanya luhala na vina vayimbiile, leelo wavawonensa avaanu vina vikiyiyiisa ngaja vanangʼana. 26Eena Daada, ndeeno shilushwali shina uganile.”

27“UDaada anipeelile goona. Kusiina umuunu yuna amumeenye uLusawo, leelo uDaada mwene duguli. Khanji, kusiina umuunu yuna amumeenye uDaada, leelo uLusawo mwene duguli nu muunu yoyoona yuna uLusawo isakula kimuwonensa.

28“Yinsaji kunyangu omwe woona muna mwilava na kifunwa na masigo amafuno, one nisivayanushile. 29Yavalaji ijooki yangu, muyimanyise kunyangu kiija muve nu wulindamafu mu numbula seenyu, kwa kiiva one nili muhuugu khanji nili munya kiyiyiisa. 30Ijooki yangu yina nikivayaavasa meefu kiyisumula, umusigo gwangu goope guna nikivatwikha, mupeefu.”

Currently Selected:

Mataayo 11: Shisangu

Highlight

Copy