Mataayo 16

AVafalisaayo visakula uYeesu agahe amabikha

(Maluko 8:11-13; Luuka 12:54-56)

1Baheene aVafalisaayo na Vasadukaayo vamonga vaaluta kwa Yeesu kimujela kiija avawonense ishimanyilo, kiwonensa kiija afiliikhwe nu Nguluvi. 2UYeesu wávayankha wáaja, “Pina kwava shaamihe, mwilogola mwijova, ‘Pamulaawu kusiishe wunofu, kiiva ku wulanga kuvalafu.’ 3Leelo mu luhaavi ulwa lwamilaawu, mwilogola mwijova, ‘Iminsiyaano inoonya yisitoonye, kwa kiiva ku wulanga kutiitu, khanji kuna mafunde gavijile.’ Lino omwe mufimeenye ifimanyilo ifya luhaavi, leelo mwikunya kigamanya gina gisenjekha insiku isi. 4Ishisafi sha vaanu avanansi, shisakula ishimanyilo! Nisikhavawonensa shimanyilo shoshoona shila, leelo shimanyilo shimo hela shina musishaaje, ngaja shila isha mukuwamalago uYoona.” Baheene uYeesu wáwuukha, wávalekha.

Amamanyiso aga wudehi aga Vafalisaayo na Vasadukaayo

(Maluko 8:14-21)

5Avamanyisiwa va Yeesu vaganaga kilowokha ililamba ilikhome lya Galilaya, vakhandi vasamiilwe kitoola amakhaate. 6Vaganaga kifikha kwa Yeesu wávajovela wáaja, “Muyivavalaje ni lihelu ilya Vafalisaayo na Vasadukaayo.” 7Avamanyisiwa vala vayansa kijovelana veene viija, “Ilogola ndeeno kwa kiiva tisatoola amakhaate.” 8UYeesu wáamanya ago goona, wávajovela wáaja, “Omwe vanya lihuuvi lidoodo! Kwashi mwikhaanania yuumwe kiija mungaya makhaate? 9Wuli, mushaanali musinakumbushe na kimanya? Mushaanali mungaya luuju ulwa vaanu vala magana mashumi gasaanu (5,000) vina vayikutaga amakhaate gasaanu gala? Mwakunganiaga amakhaate amamenyulanie matunduti galinga? 10Awu amakhaate gala fungati kwa vaanu vala magana mashumi gana (4,000), mwakunganiaga amakhaate amamenyulanie matunduti galinga?#16:10 Yimba mu litaafili lya Mataayo 14:20; 15:37. 11Wuli, musiimanya kiija nisilogolela injowo isa makhaate? Lino muyivavalaje ni lihelu ilya Vafalisaayo na Vasadukaayo.” 12Baheene, avamanyisiwa vaakwe vaamanya kiija asikhandi ilogola ulwa lihelu ilya kiwumulila amakhaate, leelo ulwa mamanyiso aga wudehi aga Vafalisaayo na Vasadukaayo.

UPetulo ikimubedela uYeesu kiija Mukulusaaji

(Maluko 8:27-30; Luuka 9:18-21)

13UYeesu na vamanyisiwa vaakwe wáganile kifikha ku booma ya Kayisaliya-Filipi, wávaposa wáaja, “Avaanu viijova one Lusawo lwa Muunu yuune naani?” 14Vamugomosesa vaaja, “Vamonga viija yuuwe Yohana Mutwiniaji, avanji viija yuuwe Eliya mukuwamalago, avanji viija yuuwe mukuwamalago Yelemiya, avanji viija mukuwamalago ngaja vakuwamalago ava paanyuma.” 15UYeesu wávaposa khanji wáaja, “Omwe mwijova one yuune naani?” 16USimoni Petulo wámugomosesa wáaja, “Owe yuuwe Mukulusaaji yuna uNguluvi wátahisaaga kimufilikha.#16:16 Mukulusaaji yuna uNguluvi wátahisaaga kimufilikha: Kwa Shiyunaani yiyandiikhwe Kilisito. Yimba iliswi Kilisito mu Maswi aMahensa. Owe yuuwe Lusawo lwa Nguluvi, yuna muumi.”

17UYeesu wámujovela wáaja, “Uyimiliilwe owe Simoni lusawo lwa Yoona, kwa kiiva kusiina umuunu yuna wákugubutulila ago, leelo yu Daada wangu yuna ali kushaanya. 18One nikikujovela kiija, owe yuuwe Petulo, yuuwe lipaama,#16:18 Petulo: Ilitaawa lya Shiyunaani. Uluganulo lwakwe, ilipaama. na pashaanya ya lipaama ili, nikhashisenga ishipuga sha vahuvililaaji vangu. Ingufu isa mfwa#16:18 Mfwa: Kwa Shiyunaani yiyandiikhwe Wusimu. Yimba iliswi Wusimu mu Maswi aMahensa. sisikhashimena kaa. 19One nisikupeele ifungulo isa Wutwa wa Nguluvi, baheene goona gina usigadinde mu nyi iyi, uNguluvi asigadinde hata kushaanya. Khanji goona gina usigadindule mu nyi iyi, uNguluvi woope asigadindule hata kushaanya.” 20Baheene uYeesu wávapavila avamanyisiwa vaakwe wáaja, vasikhamujovelaga muunu yoyoona kiija, umwene Mukulusaaji.#16:20 Mukulusaaji: Kwa Shiyunaani yiyandiikhwe Kilisito.

UYeesu itaviilila shina hambi iifwa na kifyukha

(Maluko 8:31–9:1; Luuka 9:22-27)

21Kiyansisa uluhaavi ulo, uYeesu wáyansaaga kivataviilila avamanyisiwa vaakwe wáajova, “One Lusawo lwa Muunu nisakulwa kiluta ku Yelusalemu na kipata amalava minshi kwa vakhome va Vayahuudi, avatambule avakhome na vamanyisaaji va ndaji sa Musa. Nikhabudwa, leelo ilisiku lya wutatu, nikhafyukha.” 22Baheene uPetulo wámutoolaga uYeesu wáaluta na woope palubali, wáyansa kimukhajila, wáaja, “Wee Mutwa, ago uNguluvi agasivile! Gasilaave gakupate owe!” 23Leelo uYeesu wáseetukha, wámujovela uPetulo wáaja, “Wuukha kumwandi yangu owe Shetaani, kiiva wiijesa kinisivila kigaha gina isakula uNguluvi, wihiiva ga vaanu.”

24Baheene uYeesu wávajovela avamanyisiwa vaakwe wáaja, “Umuunu yoyoona nda isakula kinifwata one, aleshe gina agadobweshe, ayihumye anifwate hata nda yive kiifwa.#16:24 Kwa Shiyunaani yiyandiikhwe, Umuunu yoyoona yuna isakula kinifwata ayikhaanaje yumwene, asumulaje umusalaaba gwakwe wiila na kinifwata one. 25Kiiva, umuunu yoyoona yuna isakula kiwusaajila uwuumi waakwe, uyo akhawuyasa. Leelo umuunu yoyoona yuna ikiwuyasa uwuumi waakwe kwa kiiva ya one, uyo asiwupate uwuumi wa shiluta. 26Lino umuunu akhayambulila shishi kipata uwusi woona wa nyi, na kiwuyasa uwuumi wa shiluta? Lino, umuunu ahumye shishi kipyanisa uwuumi waakwe? Kusiina shiinu shoshoona. 27One Lusawo lwa Muunu nikhayinsa lumo na vamalayikha vangu mu Wutupikho wa Daada. Baheene nikhamuhomba shila muunu kilingana ni nsengo saakwe. 28Shiyooli nikivajovela kiija, avamonga vina vakwali panu vasikhafwa mbakha pina vakhanyaaga one Lusawo lwa Muunu, pina niyinsa mu Wutwa wangu.”

Currently Selected:

Mataayo 16: Shisangu

Highlight

Copy