Mataayo 23

UYeesu ikivakhanyansa avakhome va Vayahuudi

(Maluko 12:38-40; Luuka 11:37-52; 20:45-47)

1Baheene uYeesu wáfijovelaga ifipuga fila ifya vaanu na vamanyisiwa vaakwe wáaja, 2“Avamanyisaaji va ndaji sa Musa na Vafalisaayo vana wutawulilwa uwa kivamanyisa avaanu indaji sa Musa. 3Lino yinatilaji na kigasenga goona gina vikivajovela. Leelo musikhayinatilaji insengo saanave, kwa kiiva aveene vasisenga na kigayinatila goona gina vimanyisa. 4Aveene viipinya amasigo amafuno na kivasumusa avaanu mu mavega gaanave, leelo aveene vasiigana hata kipyasa kwa ludole lwanave. 5Aveene visenga insengo saanave soona kiija, avaanu vavaaje. Woona vifwala ifisepe fya nkwembe mu mawokho na ifisepe pa weeni fina fiyandiikhwe indaji, na woona tifwala inkhansu inya fisepe ifya kitutanga kifuunya. Hata ndeeno avaanu ava, vifwala ifisepe ifikhome mandu kishila avanji, na vitalifya ifisepe fya nkhansu saanave. 6Mu fiwungo, viiva vidobokha mandu kikhala ku fitengo ifya vahensa avanya lishima na ku fitengo ifya lishima fina fili pamwandi mu nanda isa kifuunyila. 7Khanji, vidobokha mandu kiija, avaanu vavahunjilaje kwa lishima pina vakheele pa munaada, avaanu vave vikivashemeela viija, ‘Wee Mumanyisaaji.’

8“Leelo omwe musikhakundaji nda avaanu vikivajova ‘Mumanyisaaji!’ Kiiva uMumanyisaaji weenyu ali yumo hela, omwe woona muli lukholo. 9Musikhamushemeelaji umuunu yoyoona kiija, ‘Daada’ mu nyi muno, kiiva uDaada ali yumo hela, yuna ali kushaanya. 10Musikhayitikhaji kishemeelwa ‘Valongosaaji’, kiiva uMulongosaaji weenyu ali yumo hela, yu Mukulusaaji yuna uNguluvi wátahisaaga kimufilikha.#23:10 Mukulusaaji yuna uNguluvi wátahisaaga kimufilikha: Kwa Shiyunaani yiyandiikhwe Kilisito. Yimba iliswi Kilisito mu Maswi aMahensa. 11Umuunu yoyoona yuna isakula kiiva muyimililaaji weenyu, isakulwa ave muvanda weenyu. 12Kwa kiiva umuunu yoyoona yuna ikiyitufya, uNguluvi akhamuyiisa. Umuunu yoyoona yuna ikiyiyiisa, uNguluvi akhamutufya.

13“Aka omwe, vamanyisaaji va ndaji sa Musa na Vafalisaayo vamyansi! Mukivasivila avaanu kiyinjila mu Wutwa wa Nguluvi, kwa kiiva ya mamanyiso geenyu. Na yuumwe musikhayinjila, khanji musikivatawula avaanu avanji vina visakula kiyinjila.

[14“Aka omwe, vamanyisaaji va ndaji sa Musa na Vafalisaayo, vamyansi! Mwipokha ifiinu fya vafwile! Khanji mu wumyansi weenyu mwifuunya amafuunyo matali, baheene avaanu vave vikivaaga muli vagolofu. Mu lijuva ilya mukhole, shiyooli mukhaposheela amalava makhome kihuma kwa Nguluvi.]#23:14 Amaswi aga, gakusiina mu mayandikhwa agamonga amakuulu. Yimba mu litaafili lya Maluko 12:40.

15“Aka, omwe vamanyisaaji va ndaji sa Musa na Vafalisaayo, vamyansi! Mwipilima mandu mu nyi inyuumu na kilowokha ibahali kiija mukimukuviilisa umuunu yuna asili Muyahuudi, ahuviilile ilihuuvi ilya Shiyahuudi. Leelo nda mumukuviilise umuunu uyo aseetushe, mukimugaha ave munansi mandu mala khavili, kivashila omwe.

16“Aka omwe, vayimililaaji vapofu! Mukivamanyisa avaanu mwijova, ‘Nda yive umuunu ikiyiyiiga kwa nanda ya Nguluvi, asikhamilisiwa. Leelo nda yive ikiyiyiiga kwa sahaabu yina yikwali mu nanda ya Nguluvi, umuunu uyu ikhamilisiwa kigaha ngaja shina wáyiyiigaga.’ 17Omwe muli vapofu khanji muli vayasu! Shiinu shishi shina sha lutono kishila ishinji? Wuli, isahaabu iyo yina yikwali mu nanda ya Nguluvi, awu inanda iyo yina yikiyigaha isahaabu kiiva mbaagule kwa Nguluvi? 18Khanji mukivamanyisa avaanu mwijova, ‘Umuunu nda ikiyiyiiga pa luvala ulwa kihumisa ishadanda, asikhamilisiwa. Leelo nda yive ikiyiyiiga kwa sadaakha sina sili pa luvala ulo, umuunu uyo ikhamilisiwa kigaha ngaja shina wáyiyiigaga.’ 19Omwe muli vapofu! Shiinu shishi shina sha lutono kishila ishinji? Wuli, isadaakha iso awu uluvala ulwa kihumisa ishadanda shina shiigaha isadaakha kiiva nofu? 20Lino nda yive umuunu ikiyiyiiga pa luvala ulwa kihumisa ishadanda mu nanda imbaagule, ikiyiyiiga kwa fiinu fyona fina fikwali pashaanya yaakwe. 21Umuunu yoyoona yuna ikiyiyiiga kwa nanda ya Nguluvi, ikiyiyiiga kwa nanda iyo na kwa Nguluvi yuna iikhala mu nanda iyo. 22Woope umuunu yuna ikiyiyiiga kushaanya, ikiyiyiiga ku shitengo sha Nguluvi na kwa Nguluvi yuna iikhala pa shitengo isho.

23“Aka omwe, vamanyisaaji va ndaji sa Musa na Vafalisaayo, vamyansi! Mukimuhumisa uNguluvi ishipuga shimo mu fipuga ishumi hata ifiinu fya lutono ludoodo ngaja inyungu sa maboga, ibisaali nu wumeeja. Leelo, mwikhaana injowo sina sisakulwa mandu isa ndaji ngaja kiiva mugolofu pa Nguluvi, kiiva nu lusungu, kiiva ni lihuuvi kwa Nguluvi na kwa vaanu avanji. Lino, mwisakulwa kigasenga amaswi aga, na kihumya ishipuga shimo, mu fipuga fyenyu ishumi. 24Omwe muli vayimililaaji vapofu! Mwiwuusa inyaasi mu fiinu fyenyu fina mwingʼwa, leelo mwimila ingamiya!#23:24 Mwiwuusa inyaasi: Uluganulo lwakwe, kiyinatila mandu injowo inangʼana. Mwimila ingamiya: Uluganulo lwakwe, kilekha kiyinatila injowo inkhome, mu ndaji sa Nguluvi.

25“Aka omwe, vamanyisaaji va ndaji sa Musa na Vafalisaayo vamyansi! Muli ngaja umuunu yuna iyoosa ikhoomasi ni sahani kwa kunja hela, leelo iilekha kiyoosa uwushaafu wuna wuli mukhati. Na yuumwe muna wushaafu winshi uwa wushemi nu wushooyo mu numbula seenyu. 26Omwe Vafalisaayo, vina muli ngaja vapofu! Yoosi tangusiina uwunansi wuna wuli mukhati yeenyu, baheene insengo hambi yiiva nofu.

27“Aka omwe, vamanyisaaji va ndaji sa Musa na Vafalisaayo vamyansi! Kiiva muli ngaja amajooja gina viipakha ishokha, yina yiwonekha wunofu panja, leelo mukhati gamemile amafupa nu wushaafu winshi. 28Shiisho ndeeno na yuumwe kwa kunja, muwonekha kwa vaanu kiija, vagolofu, leelo shiyooli mukhati mu numbula seenyu, mumemile uwumyansi nu wunansi.

29“Aka omwe vamanyisaaji va ndaji sa Musa na Vafalisaayo vamyansi! Kiiva musenga na kiganosa wunofu amajooja ga vakuwamalago va Nguluvi, na ga vagolofu pa Nguluvi. 30Baheene mwilogola mwijova, ‘Nda ose tive tikwali mu luhaavi luna avambuyeesu vakhandi wuumi, ndi tisikhakwiliile kitanjilisania nawo kivabuda avakuwamalago va Nguluvi.’ 31Kilogola ndeeno, mwikwisa kiija, omwe muli vanansi ngaja avambuyeenyu vala vina vavabudaga avakuwamalago va Nguluvi! 32Lino kwisaaji uwunansi uwa vambuyeenyu wuna vawuyansaaga!

33“Omwe woona muhwaneene ni njokha inya wanga! Wuli, muhiiva kiija mukhakulukha mu malafyo ga mooto gwa shiluta? 34Kwa kiiva ya ilyo nisivafilishe kunyeenyu avakuwamalago, avaanu avanya luhala na vamanyisaaji wa ndaji sa Musa. Leelo mu vaanu ava, avamonga mukhavabuda na kivakhomeelela pa musalaaba, avanji mukhavatova na majalidi mu nanda seenyu isa kifuunyila, avanji mukhavafwatilila kihuma ku lijumbi mbakha ku lijumbi na kivalafya. 35UNguluvi akhavahiga omwe kwa kiiva ya vaanu woona avagolofu vina mwavabudaga. Mwagahaga ndeeno, kihuma pina uKayini wámubudaga uAbeli yuna akhandi mugolofu pa Nguluvi, mbakha uSakaliya umushina Balakiya, yuna wábudwagwa mu lukeeke paakhati ya nanda ya Nguluvi nu luvala ulwa kihumisa ishadanda.#23:35 Yimba mu litaafili lya Shiyanso 4:8; 2 Njowo sa Luhaavi 24:20-22. 36Shiyooli nikivajovela kiija, avaanu va shisafi ishi, uNguluvi akhavahiga kwa kiiva ya ago goona.”

UYeesu isugumilwa kwa kiiva ya vaanu va ku Yelusalemu

(Luuka 13:34-35)

37Baheene uYeesu wáaja, “Omwe vaanu va ku Yelusalemu, mukivabuda avakuwamalago vina uNguluvi wávafilikhaga kunyeenyu. Mu luhaavi lwinshi nisakula kivakungaania omwe ngaja shina inkuku yikungaania inyana nkuku saakwe mu mapikho gaakwe, leelo wiila mukhandi mwikhaana! 38Loleeli! Lino uNguluvi wávalekha omwe ni nanda yeenyu imbaagule iya kifuunyila, kiija mutowe! 39Lino, nikivajovela kiija, shiyooli musikhanyaaga khanji, mbakha uluhaavi luna mukhajova, ‘Ayimililwajwe yuna iyinsa kwa litaawa lya Mutwa uNguluvi.’#23:39 Yimba mu litaafili lya Sabuli 118:26.”

Currently Selected:

Mataayo 23: Shisangu

Highlight

Copy