Mataayo 24

UYeesu iikuva amalago ulwa kibomolwa inanda imbaagule

(Maluko 13:1-2; Luuka 21:5-6)

1UYeesu wáwuukhaga wáahuma mu lukeeke lwa nanda imbaagule iya kifuunyila. Wáganile kihuma, avamanyisiwa vaakwe vamulutiile kiija, vamusoonele uwusengaaji wa nanda imbaagule iya kifuunyila ni nanda isinji sina siyipiliime. 2Leelo uYeesu wávajovela wáaja, “Mukigaaga goona aga? Shiyooli nikivajovela kusiina ilingʼanga lina likhasigala pashaanya ya lingʼanga liyine. Goona ago gakhagwisiwa!”#24:2 Goona ago gakhagwisiwa: Inanda imbaagule iya kifuunyila yabomolwagwa na Valuumi umwakha gwa mashumi fungati pina wásawaagwa uYeesu Kilisito.

Amalava amakhome gina gakhayinsa

(Maluko 13:3-13; Luuka 21:7-19)

3Lino uYeesu wálutile ku shidunda sha Miseyituni, avamanyisiwa vaakwe vakhamulutiile kushipata, vamuposa vaajova, “Tujovela, gakhawonekha yooli ago goona? Khanji, shimanyilo shishi shina shikhatuwulanisa pina wiyinsa kitema, na kiyinsa kwa wudugo wa luhaavi uluvi ulo?” 4UYeesu wávayankha wáaja, “Muveesaje meeho, asilaave avajanje muunu yoyoona! 5Kiiva vakhayinsa avaanu vinshi kwa litaawa lyangu, vakhajova, ‘One yuune Mukulusaaji!’#24:5 Mukulusaaji: Kwa Shiyunaani yiyandiikhwe Kilisito. Yimba iliswi Kilisito mu Maswi aMahensa. Woope vakhava vikivajanga avaanu vinshi. 6Mu luhaavi ulo mukhava mupulikha imola ni pwepwesi sa wulugu, leelo musikhatungumalaji. Ago goona mbakha gawoneshe, leelo uluhaavi ulwa wudugo lukhava lushaanali. 7Insiku iso inyi yimo yikhalwa ni nyi iyinji, uwutwa wumo wukhalwa nu wutwa uwunji. Injala yikhagwa, imbali soona kukhava mudegenkho. 8Ago goona gakhava ngaja shiyanso sha wuvafi uwa washimaayi pina ali nkholeela kisava.

9“Mu luhaavi ulo, avaanu va nyi yoona vakhavakhalalila omwe, kwa kiiva omwe muli vamanyisiwa vangu. Avayeenyu avamonga vakhakhatwa na kivatova, avanji vakhabudwa. 10Baheene avaanu vinshi vakhanilekha kinifwata one. Vakhava vidolelana, vakhava vikhalalilana veene. 11Mu luhaavi ulo, vakhava viyinsa avakuwamalago vinshi avadehi na kivajanga avaanu vinshi. 12Khanji, kwa kiiva uwunansi wukhava wuyonjelela mandu, avaanu vinshi vakhalekha kiganana. 13Leelo umuunu yoyoona yuna akhajimba mbakha kuwudugo, uNguluvi akhamukulusa. 14Khanji iMola iNofu iya Wutwa wa Nguluvi yikhakhomwa mu nyi soona, baheene avaanu woona mu nyi vakhayipulikha. Apo baheene uluhaavi ulo ulwa wuhigo wa nyi wukhayinsa.

Ishiinu shina shikhalasa shinansi

(Maluko 13:14-23; Luuka 21:20-24)

15“Ino, mu luhaavi ulo mukhashaaga ‘ishiinu shina shikhalasa’#24:15 Yimba mu litaafili lya Daniyeli 9:27; 11:31; 12:11. shiyiimile uluvala ulwa panofu. Ishiinu isho shisheene shajowaagwa nu mukuwamalago uDaniyeli (yuna iyimba amanyaje). 16Pina mukhagaaga amaswi aga, vala vina vali ku nyi ya Yudeya vasijilaje ku fidunda. 17Umuunu yuna ali pashaanya ya nanda, asikhayiikhaga na kitoola shoshoona mukhati. 18Woope yuna ali ku mugunda, asikhagomokhaga kukhaaya kitoola umutote gwakwe. 19Leelo aka, avashimaayi vina vakhava vana lwanda na vina vakhava viyonsa mu nsiku iso! 20Fuunyaji kwa Nguluvi kiija, pina mukhava mwisiga lusilaave luve luhaavi lwa shipepo shikhali awu lijuva lya Sabaato.#24:20 Luhaavi lwa shipepo shikhali awu lijuva lya Sabaato: Kilingana ni ndaji sa Vayahuudi, mu lusiku ulo vasikhayitiikhwe kishuula kiluta uluvala ulunji luna lwishila kilomiita yimo, lukhandi lukhamu mandu kishuula mu luhaavi ulo. 21Kwa kiiva mu luhaavi ulo, avaanu vakhapata amalava makhome mandu gina gasinawonekhaje kaa, kihuma pina uNguluvi wáwumbile inyi, mbakha iminsiyaano. Khanji amalava ago, gasikhawonekha kaa. 22UNguluvi nda akhalekha kisheepusa insiku iso isa malava, kukhava kusiina umuunu yuna akhakulukha kiifwa. Leelo kwa kiiva ya vabaagule vaakwe, uNguluvi akhasisheepusa insiku iso.

23“Lino mu luhaavi ulo, umuunu nda ikivajovela kiija, ‘Loleela, uMukulusaaji#24:23 UMukulusaaji: Kwa Shiyunaani yiyandiikhwe Kilisito. ali apa!’ Awu ‘Ali kula!’ musikhahuvililaga. 24Kiiva vakhayinsa avakuwamalago avadehi na vaanu vina vakhava viijova uwudehi kiija, aveene vakulusaaji. Awo vakhava viigaha amabikha makhome ga miitu, baheene vakhavajanga avaanu na kiija, nda yikwiliile vavajanje hata avabaagule va Nguluvi. 25Muveesaje meeho, kiiva navajovela nkhaani goona ago, pina uluhaavi lusinaafishe. 26Lino avaanu nda vikivajovela kiija, ‘Loleela, uMukulusaaji ali kula ku luvanda!’ musikhajelaga kiluta kiloleela. Awu vikivajovela viijova, ‘Loleela, atyejile mu nanda yila!’ Musikhavahuvililaji. 27Kwa kiiva kiyinsa kwa one Lusawo lwa Muunu kukhava kwa kitinuhisa ngaja lumuli lwa noonya, pina luyinsa nyangu nyangu na kimulikha imbali soona mu wulanga. 28Uluvala luna inkhanu yifwiliile, lulwene luna inumbusi sikungaana.

Kiyinsa khanji kwa Lusawo lwa Muunu

(Maluko 13:24-27; Luuka 21:25-28)

29“Pina lukhashila uluhaavi ulwa nsiku iso isa malava,

‘Ilijuva likhaseetulwa nshiisi,

umwesi gusikhangʼaala khanji.’

‘Inondwe sikhagwa kihuma kushaanya.

Nafi fiinu fina fili kushaanya fikhadegenkha.’#24:29 Yimba mu litaafili lya Isaaya 13:10; 34:4; Yoheli 2:10.

30“Mu luhaavi ulo ifimanyilo ifya Lusawo lwa Muunu fikhawonekha kushaanya, baheene avaanu va nyi soona vakhatungumala na vakhakhoola, avaanu woona vakhanyaaga one Lusawo lwa Muunu niyinsa mu mafunde ni ngufu nu wutupikho wukhome.#24:30 Yimba mu litaafili lya Daniyeli 7:13. 31Baheene nikhavafilikha avamalayikha vangu, kuno viitova ibalagumu kwa shawuti khome. Woope vakhavakungaania avabaagule vangu kihuma imbali soona isa nyi, kihuma kuwudugo uwa wulanga mbakha kuwudugo uwunji.”

Ishihwano sha mujombe

(Maluko 13:28-31; Luuka 21:29-33)

32UYeesu wáyitenekhaga kilogola wáaja, “Yimanyisaaji ishihwano kihuma ku mujombe. Kwa kiiva, nda amansamba na mahamba galembwile, baheene mwimanya kiija, uluhaavi lwa mingo luli nkholeela. 33Shiisho ndeeno, na yuumwe pina mukhagaaga ago goona gisenjekha, manyaji kiija, one Lusawo lwa Muunu nili nkholeela kiyinsa. 34Shiyooli nikivajovela kiija, ishisafi ishi shisikhashila mbakha aga goona pina gakhava gasenjekha. 35Uwulanga ni nyi fikhashila, leelo amaswi gangu gakhava ga shiluta.

Kusiina yuna ameenye uluhaavi ulwa kiyinsa uYeesu

(Maluko 13:32-37; Luuka 12:35-40; 17:26-36)

36“Leelo ulwa lijuva lila nu lwa luhaavi lula, kusiina umuunu yuna iimanya, hata avamalayikha va kushaanya wala Lusawo lwa Nguluvi, leelo yu Daada mwene duguli yuna ameenye. 37Kwa kiiva, kiyinsa one Lusawo lwa Muunu, kukhava ngaja shina yikhandi mu nsiku sa Nuhu. 38Mu nsiku iso, uluhaavi ulwa noonya iya lufuwukho pina yikhandi yishaanali kiyinsa, avaanu vakhandi viilya na kiingʼwa, vitoola na kitoolwa mbakha ilijuva lila pina uNuhu iyinjila mu shipugo ishikhome. 39Avaanu awo vasikhameenye shoshoona kiija, shishi shikhawonekha mbakha pina inoonya iya lufuwukho pina yayinsaga na kivabuda woona. Shiyooli, shiisho ndeeno shina yikhava ilijuva lila pina nikhava niyinsa, one Lusawo lwa Muunu. 40Mu luhaavi ulo nda avaanu vavili vakhava vali mu mugunda, yumo akhatoolwa nu Nguluvi, uyunji akhalekhwa. 41Khanji kukhava na vashimaayi vavili vakhava vihaawula lumo pa lyala, yumo akhatoolwa nu Nguluvi, uyunji akhalekhwa. 42Lino muveesaje meeho, kiiva musiimanya ilijuva ilyo lina uMutwa weenyu akhayinsa. 43Leelo mumanyaje wunofu kiija, umunya nanda nda wáali amanye uluhaavi luna umuhiiji iyinsa, wáali iikhala meeho kiija, amusigame umuhiiji asikhabomolaga inanda yaakwe. 44Ndeeno, na yuumwe yipinyangaji uluhaavi loona kwa kiiva one Lusawo lwa Muunu, nikhayinsa mu luhaavi luna musihuviliile.”

Ishihwano sha vavanda vavili

(Luuka 12:41-48)

45UYeesu wávaposa avamanyisiwa vaakwe wáaja, “Lino yu naani muvanda muyinatifu, khanji munya luhala? Yumwene muvanda yuna umukhome waakwe amuviishile ave muyimililaaji wa vayine mu nanda yaakwe, baheene ave ikivapeela ishakiilya uluhaavi luna lufwaya. 46Shiba umuvanda uyo, pina umukhome waakwe iitina, ikimwaga iigaha gina wámulajisaaga. 47Shiyooli nikivajovela kiija, umukhome waakwe akhamuviikha umuvanda yula, ave muyimililaaji wa fiinu fyakwe fyona. 48Leelo umuvanda umuvi, nda ahiive kiija, ‘Umukhome wangu idiila kitina,’ 49baheene iyansa kivatova avavanda vayine, iilya na kiingʼwa lumo na vagaasi. 50Umukhome waakwe, nda atine ilisiku nu luhaavi luna umuvanda yula asihuviilila, na ikimwaga iigaha aganji, 51akhamupeela ululawo lukhome na kimuviikha lumo na vamyansi vayine. Ukho kukwene avaanu awo vakhakhoola na kigegejula ameeno kwa kiiva ya wuvafi wukhali.”

Currently Selected:

Mataayo 24: Shisangu

Highlight

Copy