Mataayo 25

Ishihwano sha vahinja ishumi

1Baheene uYeesu wávajovelaga avamanyisiwa vaakwe wáaja, “Mu luhaavi ulo uWutwa wa Nguluvi wukhahwanana ni shiwungo shimonga, shina shikhandi na vahinja ishumi vina vatoolaga itaala saanave na kiluta kimuposheela yuna itoola. 2Avasaanu mu awo ishumi, vakhandi vanya luhala na vanji vasaanu vakhandi vayasu. 3Avayasu vasaanu, vatoola itaala saanave vaalekha kitoola amafuta aganji aga kiyonjelesa. 4Leelo avanya luhala vasaanu vatoola itaala saanave na mafuta mu nsupa saanave aga kiyonjelesa. 5Umunya kitoola wáganile kidiila kiyinsa, utulo twavakhata avahinja vala woona vagoneelela. 6Leelo paashilo paakhati, avaanu vaashima vaajova, ‘Loleeli, yuna itoola ayinsile! Humi, tilute kimuposheela.’ 7Baaho avahinja vala woona valamukha na kisiyandaala itaala saanave.

8“Avahinja vasaanu avayasu vavajovelaga avanya luhala vaajova, ‘Tilomba mututanje amafuta madoodo kwa kiiva itaala seesu siisima.’ 9Leelo avanya luhala vavayankha vaajova, ‘Ndaali! Tisikwiliile kivatanga kwa kiiva amafuta gina tinago, gasikitukwila hata padoodo omwe noose. Shiba mulute mugule kuna viigusa.’

10“Ndeeno avahinja avayasu vawuukha kiluta kigula amafuta. Uluhaavi luna viiluta, umutolaaji wáyinsa. Avahinja avanya luhala vina vakhandi vayipinyanjile, vayinjila lumo nawo mu nanda muna shikhandi ishiwungo, baheene umulyango gwadindwa. 11Kuwudugo avayasu woope vaatina vagwaga umulyango gudindiilwe, vayiima panja vashemeela vaajova, ‘Wee mutwa! Wee mutwa! Tilomba utudindulile!’ 12Leelo umutolaaji wávayankha wáaja, ‘Shiyooli nikivajovela kiija, nisivameenye omwe!’”

13UYeesu wávajovela avamanyisiwa vaakwe wáaja, “Lino muveesaje meeho, kwa kiiva musilimeenye ilijuva wala uluhaavi luna one Lusawo lwa Muunu, nikhatina.”

Ishihwano sha vavanda vina vapelwagwa ihela

(Luuka 19:11-27)

14UYeesu wáyitenekhaga kilogola wáaja, “Kiyinsa kwa Wutwa wa Nguluvi kukhahwanana ni shihwano ishi. Akhandi akwali umuunu yuna iiluta ku lushuulo ulutali. Uluhaavi pina asinashuule, wávashemeela avavanda vaakwe na kivapeela uwusi waakwe, kiija vawuyoolose. 15Wámupeelile shila muvanda shina akwiliile kisenga. Wámupeelile umuvanda uwa wutasi mafungu gasaanu aga hela,#25:15 Mafungu gasaanu aga hela: Kwa Shiyunaani yiyandiikhwe, talanta sisaanu. Talanta yimo yikhandi yilingeene na mahombo ga muunu yumo, kwa maakha ishumi na mutanda. uwa wuvili mafungu gavili na uwa wutatu wámupeela ilifungu limo, baheene wáshuula.

16“Baaho, umuvanda yuna umukhome waakwe wámupeelile mafungu gasaanu, wáaluta kigula ifiinu na kifigusa, wáapata sina sisapushiile mafungu gasaanu. 17Shiisho nayu muvanda yula yuna wáapata mafungu gavili, wáaluta naso kigula ifiinu na kifigusa, wáapata sina sisapushiile mafungu gavili. 18Leelo umuvanda yula yuna wápataga lifungu limo, wáaluta kihimba ililindi, wásiila pansi.

19“Lwaganile kishila uluhaavi lutali, umukhome waanave wáawuya kuna akhandi ashuulile. Wávashemeela avavanda vaakwe vala, baheene vamutaviilila shina vasenjelaga uwusi waakwe. 20Umuvanda yula yuna wáposheelaga amafungu gasaanu, wáyinsa na mafungu gasaanu gina gasapushiile, wámujovela umukhome waakwe wáaja, ‘Wee mutwa, wanipeelaga mafungu gasaanu, nigasenjele insengo, loleela, naapata mafungu gasaanu gina gasapushiile.’ 21Umukhome waakwe wámujovela wáaja, ‘Waagaha wunofu mandu, owe uli muvanda munofu khanji uli muyinatifu. Nisikuviishe kiiva muyimililaaji wa wusi winshi kwa kiiva ukhandi muyinatifu kwa fisheefu fina nakupeelaga. Yinsa ku shiwungo shangu.’

22“Umuvanda yula yuna wáposheelaga amafungu gavili, woope wáyinsa na mafungu gavili gina gasapushiile, wámujovela umukhome waakwe wáaja, ‘Wee mutwa, wanipeelaga mafungu gavili nigasenjele insengo, loleela, naapata mafungu gavili gina gasapushiile.’ 23Umukhome waakwe wámujovela wáaja, ‘Waagaha wunofu mandu, owe uli muvanda munofu khanji uli muyinatifu, kwa kiiva ukhandi muyinatifu kwa fisheefu fina nakupeelaga, lino nisikuviishe kiiva muyimililaaji wa wusi winshi. Yinsa ku shiwungo shangu.’

24“Baheene umuvanda yula yuna wáposheelaga ilifungu limo, wáyinsa wámujovela umukhome waakwe wáaja, ‘Wee mutwa, namanyaga kiija, owe uli mukhamu mandu. Owe uli ngaja muunu yuna ikungula inkungulo pina asivyalile na wikungaania muna usikhapalankheenie imbeyu. 25Natiilaga kiliyasa ilifungu lyakho, ndeeno nalutaga kilisiila ku lilongo. Lino, toola ilifungu lyakho ili.’ 26Umukhome waakwe wámuyankha wáaja, ‘Owe uli muvanda muvi, khanji uli moolo! Nda ukhandi umeenye kiija, one nikungula inkungulo pina nisivyalile na nikungaania muna nisikhapalankheenie imbeyu. 27Lino kwashi usikhasiviishile ihela sangu kwa vashulusi, baheene nitoole lumo ni sa pashaanya sina siyonjeleele?’ 28Baheene umukhome waakwe wálajisa wáaja, ‘Pokha ilifungu ilyo, mupeela umuvanda yula yuna ana mafungu ishumi.’

29“Kiiva umuunu yoyoona yuna iimanya gina nilogola, uNguluvi asimupeele kimanya mandu, woope asiyonjelesewe mandu. Leelo umuunu yoyoona yuna asikigamanya gina nilogola, hata uwumanyi uwudoodo wuna anawo akhapokhwa. 30Umuvanda uyu asifwaya, mutaaji kunja ku nshiisi, kuna asikhoole na kigegejula ameeno kwa kiiva ya wuvafi wukhali.”

Ilisiku lya wuhigo kuwudugo

31UYeesu wáyitenekhaga kivajovela avamanyisiwa vaakwe wáaja, “Uluhaavi luna one Lusawo lwa Muunu pina niyinsa mu wutupikho wangu lumo na vamalayikha woona, baheene nisiikhale ku shitengo shangu sha wutupikho. 32Avamalayikha va Nguluvi vakhavakungaania avaanu va nyi yoona panyangu. Na yuune nikhavabagulania ngaja umudimaaji shina ibaagula inkholo mu mene. 33Na yuune Lusawo lwa Muunu, nikhavaviikha avaanu vina vakhandi visenga gina gisakulwa pa Nguluvi ulubali lwangu ulwa kundiilo, avanansi nikhavaviikha ulubali lwangu ulwa kunshiji.

34“Baheene one Mutwa nisivajovele avaanu vala vina vali lubali lwangu ulwa kundiilo nisiijove, ‘Yinsi, omwe muna uDaada wangu avayimiliile. Yinjilaji mu Wutwa wuna uNguluvi avavishiile nkhaani kihuma uluhaavi luna wáwumbaga inyi. 35Kwa kiiva nikhandi nina njala, mukhanipeelile ishakiilya, nikhandi nina nkhawu, mukhanipeelile amalenga aga kiingʼwa, khanji nikhandi muhensa, mukhanisajiise mu nanda seenyu. 36Nikhandi bwinda, mwanifwasaaga amenda. Nikhandi nili mutamu, mukhayinsile kinitamya, nikhandi nidindiilwe mu nanda ya vadindilwa, mukhayinsile kiniloleela.’ 37Ndeeno avagolofu vakhanigomosesa viija, ‘Wee Mutwa, luhaavi lushi luna takwagaga una njala takupeelaga ishakiilya? Awu takwagaga una nkhawu yikukheete takupeelaga amalenga ga kiingʼwa? 38Khanji, luhaavi lushi luna ukhandi uli muhensa takusajisaaga mu nanda seesu? Awu ukhandi wijenda bwinda takufwasaaga amenda? 39Khanji, luhaavi lushi luna ukhandi uli mutamu takutamyaga, awu ukhandi uli mu nanda ya vadindilwa tayinsaga kikuloleela?’ 40Baheene one Mutwa nikhavayankha niijova, ‘Shiyooli nikivajovela, lyolyona lina mwamugahilaga umunyaayumo wa ava avahuvililaaji vangu, mwanigahilaga one.’

41“Baheene nisivajovele vala vina vali lubali lwangu lwa kunshiji nisiijove, ‘Wuushi apa omwe muna muyijiilwe nu Nguluvi! Lutaji mu malafyo ga mooto gwa shiluta guna uNguluvi aviishile kwa kiiva ya Shetaani na vamalayikha vaakwe. 42Kwa kiiva nikhandi nina njala, musikhanipeelile ishakiilya, nikhandi nina nkhawu, musikhanipeelile amalenga aga kiingʼwa, 43nikhandi nili muhensa, musikhanisajiise mu nanda seenyu, nikhandi nijenda bwinda, musikhanifwasiise amenda, nikhandi nili mutamu musikhayinsile kinitamya, nikhandi nili mu nanda ya vadindilwa musikhayinsile kiniloleela.’ 44Baheene woope vakhaniyankha viija, ‘Wee Mutwa, luhaavi lushi luna ukhandi una njala, awu ukhandi una nkhawu, awu ukhandi uli muhensa, awu ukhandi wijenda bwinda, awu ukhandi mutamu, awu ukhandi mu nanda ya vadindilwa, na yuuse tisikhakusunjile?’ 45One nikhavayankha niijova, ‘Shiyooli nikivajovela, goona gina musikhamusunjile umunyaayumo umunangʼana mu vahuvililaaji vayeenyu ava, ndeeno musikhanisunjile one.’

46“Baheene avanansi, vakhawuukha na kiluta kipata amalava ga shiluta. Leelo avagolofu, vakhayinjila ku wuumi wa shiluta.”

Currently Selected:

Mataayo 25: Shisangu

Highlight

Copy