Mataayo 6

Amamanyiso aga kivatanga avapiina

1“Loleelaji, musikhagahaji amanofu pa vaanu kiija vavaaje, nda mugahe ndeeno, uWiheenyu yuna ali kushaanya asivapeela ulutono. 2Ndeeno pina ukivatanga avapiina, usikhayiwonensaaga kwa vaanu ngaja avamyansi shina viigaha mu nanda sa kifuunyila na mu nsila, baheene avaanu vavasufye. Shiyooli, nikivajovela kiija awo viiva vaposheela ulutono lwanave. 3Leelo owe pina ukivatanga avapiina, usikhavajovelaga avaanu awu avamanyi vaakho, 4baheene avaanu vasikhamanyaga umutango gwakho. UWiheenyu yuna agameenye gina gatyejile, asikupeele ulutono.

Amamanyiso aga kimufuunya uNguluvi

(Luuka 11:2-4)

5“Pina mwifuunya kwa Nguluvi, musikhaveesaga ngaja avamyansi, kiiva aveene vidobokha kiyiwonensa kwa vaanu. Vidobokha kiyiima kifuunya mu nanda isa kifuunyila na mu nsila malekhano, baheene avaanu vavaagaje. Shiyooli nikivajovela kiija, awo shi vaposheela ulutono lwanave. 6Leelo owe pina wifuunya kwa Nguluvi, yinjilaga kumwandi yaakho, udinde umulyango. Baheene umufuunye uWiheenyu yuna asiwonekha. Baheene uWiheenyu yuna ameenye gina gatyejile, asikupeele ulutono.

7“Khanji, pina mufuunya kwa Nguluvi, musikhalyovaji ngaja vaanu vina vasili Vayahuudi. Awo vihiiva kiija amanguluvi gaanave gasivapulishe pina vilogola injowo nyinshi. 8Musikhafuunyaji ngaja awo, kwa kiiva uWiheenyu ameenye gina mwisakula hata pina musinamulombe. 9Pina mufuunya kwa Nguluvi, fuunyaji ndeeni,

‘Owe Wiheesu yuna uli kushaanya,

ilitaawa lyakho litunwajwe.

10UWutwa waakho, wuyinse.

Shina widobokha, gasenjeshe pa nyi apa,

ngaja shina gisenjekha ukho kushaanya.

11Utupeelaje wiila, ishakiilya sheesu.

12Utusaajile uwunansi weesu,

ngaja na yuuse shina tikivasaajila vina vatunanjiile.

13Usikhatuviikhaga mu majelo,

leelo utukuluse kwa Munansi yula.

[Kwa kiiva uWutwa, ingufu nu wutupikho fyakho shiluta na shiluta!

Amina!]#6:13 Amaswi aga, gakusiina mu mayandikhwa agamonga amakuulu.’ ”

14UYeesu wálogolaga khanji wáaja, “Nda mukivasaajila avayeenyu uwunansi waanave, uWiheenyu uwa kushaanya asivasaajile na yuumwe uwunansi weenyu. 15Leelo nda musikivasaajila avayeenyu uwunansi waanave, uWiheenyu uwa kushaanya asivasaajila na yuumwe uwunansi weenyu.

Amamanyiso aga kilekha kiilya kwa kiiva ya kimufuunya uNguluvi

16“Pina mwilekha kiilya ishakiilya, musikhagonjaji uweeni weenyu ngaja shina viigaha avamyansi. Kiiva viwonensa uweeni waanave, baheene avaanu vavaaje kiija valeshile kiilya ishakiilya kwa kiiva ya kimufuunya uNguluvi. Shiyooli nikivajovela kiija, shi vaapata ulutono lwanave. 17Leelo owe pina uleshile kiilya ishakiilya, yishuulaga uweeni na kiyisusuuta amafuta ku weeni. 18Baheene avaanu vasikhamanyaga kiija uleshile kiilya ishakiilya kwa kiiva ya kifuunya, leelo uWiheenyu mwene duguli asiimanye. Woope uWiheenyu yuna iloleela gina gatyejile, asikupeele ulutono.

Amamanyiso aga wusi

(Luuka 12:33-34; 11:34-36; 16:13)

19“Musikhayivishilisaaji uwusi mu nyi muno, kiiva muna mumehe ni nkhamasi fina finanga na muna vahiiji vina vidowola na kihiija. 20Leelo muviikhaje uwusi kushaanya kuna umumehe ni nkhamasi fisikwiliile kinanga na vahiiji vasidowola na vasihiija. 21Kiiva kuna muviishile uwusi weenyu, kukwene kuna inumbula seenyu sikhava.

22“Ameeho gaakho ngaja lumuli luna lumulikha umuvili gwakho. Ameeho gaakho nda manofu, baheene umuvili gwakho goona gwiva mu wuvalafu. 23Leelo ameeho gaakho nda maboofu, umuvili gwakho goona gwiva ni nshiisi. Nda uwuvalafu wuna wuli mukhati yaakho wiiva nshiisi, baheene inshiisi yiiva nkhome mandu!

24“Kusiina umuunu yuna akwiliile kiiva muvanda wa vatwa vavili. Kwa kiiva pina ikimudobokha na kimusenjela wunofu umutwa yumo, baheene ikimukhalalila na kimusala uyunji. Uwusi nda wukikutema, usikwiliile kisenga insengo ya Nguluvi!

Amamanyiso ulwa kiiva nu muninu muninu

(Luuka 12:22-31)

25“Shiyooli one nikivajovela kiija, musikhalavilaji uwuumi weenyu, kiija musiilye shishi awu musifwale shishi! Wuli, uwuumi wusili wuweene wuna wiitunwa kishila ishakiilya? Goope umuvili shiisho ndeeno, gwitunwa kishila amenda! 26Siloleelaji inyuni, sisivyala, sisikungula, khanji singaya shihenje shoshoona. Leelo uWiheenyu yuna ali kushaanya ikisiliisa. Lino omwe mwitunwa mandu nu Nguluvi kishila inyuni! 27Yu naani mu omwe yuna akwiliile kiyonjelesa padoodo uwutali wa wuumi waakwe, kwa nsila ya kiiva nu muninu muninu mandu?

28“Kwashi mwitungumala kwa kihiiva kiija musifwale shishi? Wuloleelaji uwuluva uwa mu mahakha shina wilembula, wusisenga nsengo wala kihona amenda gaanave ga kifwala. 29Leelo nikivajovela kiija, hata uSelemaani mu lutogo lwakwe loona, asikhafwasiiwe amenda na kinojela ngaja uwuluva uwo! 30UNguluvi ikiwufwasa uwuluva uwa mu mahakha ngaja ndeeni, hata nda wuve wunojela kwa luhaavi lufupi hela, leelo wiyuuma na kinyaanywa. Lino, asikhavasenjela na kishila, omwe muna muli vanya lihuuvi lidoodo?

31“Lino, musikhalavaji kiija musiilye shishi, awu musiingʼwe shishi, awu musifwale shishi. 32Avaanu vina vasili Vayahuudi vikigalavila mandu ago. Leelo uWiheesu yuna ali kushaanya ameenye kiija mukigasakula. 33Leelo omwe wusakulaji tangusiina uWutwa wa Nguluvi#6:33 Omwe wusakulaji tangusiina uWutwa wa Nguluvi: Uluganulo lwakwe kiija, tisakulwa kimufuunya uNguluvi uluhaavi loona mu wiikhasi weesu. na kisenga gina idobokha. Baheene na ganji goona ago musipeelwe.

34“Ndeeno musikhahiivaji kwa kiiva ya pamulaawu, kwa kiiva aga pamulaawu gakhayilavila geene. Shila lijuva lina maswi gaakwe amakhamu.

Currently Selected:

Mataayo 6: Shisangu

Highlight

Copy