Maluko 11

UYeesu iyinjila ku Yelusalemu kwa filuulu

(Mataayo 21:1-11; Luuka 19:28-40; Yohana 12:12-19)

1UYeesu na vamanyisiwa vaakwe pina vakhandi nkholeela mu lijumbi lya Yelusalemu, vaafikha ku lujinji lwa Betifage nu lwa Betaniya, ku shidunda shina shikhandi shitambulwa shidunda sha Miseyituni. Baheene wávafilikha avamanyisiwa vaakwe vavili. 2Wávajovela wáaja, “Lutaji mu lujinji lula luna luli pamwandi yeenyu. Pina muhuluta mula, baaho musiyaaje inyana dogovi yipinyiilwe, yina yisinajelwajwe kiyangalwa nu muunu. Yiyawulilaji, muyileete panu. 3Umuunu nda avapose kiija, ‘Mwigaha wuli ndeeni?’ mujovelaji kiija, ‘UMutwa ana nsengo nayo, asigomose pina wásenjela.’”

4Avamanyisiwa vala vakhayaajile inyana dogovi yiyiimile palubali pa nsila, yikhandi yikunjiilwe pa shikwilo, baheene vayiyawulila. 5Avaanu vamonga vina vaali nkholeela vavaposiise kiija, “Kwashi mukiyiyawulila inyana dogovi?” 6Avamanyisiwa vavayanshile shina wávalajisa uYeesu. Avaanu vala vavatawuliile, vawuushile viiluta nayo. 7Vamutwalila uYeesu inyana dogovi, baheene vatandikha amenda gaanave pa dogovi,#11:7 Dogovi: UYeesu pina wáyangeele idogovi badala ya falaasi, wáwonensaaga avaanu kiija, umwene iyinsa ngaja mutwa wa wulindamafu, asili ngaja mutwa wa kileeta uwulugu. baheene uYeesu wáyangala. 8Avaanu vinshi vatandikha amenda gaanave mu nsila, vamonga vakhandi viyalaalisa amansamba ga mapishi gina vapanyula mu magunda. 9Avaanu woona vina valongwele pamwandi na vina vakhandi vifwata kunyuma yaakwe, valogola kwa shawuti nkhome vaaja,

“Hosana!#11:9 Hosana: Uluganulo lwakwe, Atunwajwe uNguluvi.

Ayimililwajwe yuna iyinsa kwa litaawa lya Mutwa uNguluvi!#11:9 Yimba mu litaafili lya Sabuli 118:26.

10Wuyimiililwe uwutwa wa wiheesu uDawudi wuna wiyinsa!

Atunwajwe uNguluvi yuna ali kushaanya!”

11UYeesu wáganile kifikha mu lijumbi lya Yelusalemu, wáyinjila mu lukeeke lwa nanda imbaagule iya kifuunyila.#11:11 Nanda imbaagule iya kifuunyila: Yimba iliswi ili mu Maswi aMahensa. Wáloleelile ifiinu fyona ifya mukhati, leelo kiiva yaali shaamihe, wálutile ku Betaniya lumo na vamanyisiwa vaakwe lishumi na vavili.

UYeesu ikiguyiijila umujombe

(Mataayo 21:18-19)

12Ulwamilaawu njine pina vaali vahumile ku Betaniya, uYeesu injala yamulumaga. 13Wágwajile umupishi umujombe kwa kutali guna gwali gulembwile. Wávejeela kiija pamonga asilyaje ilikhomo lyolyona mu mupishi gula. Leelo pina wáfishile asikhalyajile ilikhomo lyolyona, wágaajile mahamba geene, kiiva lusikhandi luhaavi lwa kikhoma amakhomo. 14UYeesu wágujovile umupishi gula wáaja, “Kihuma iminsiyaano mbakha shiluta, usikhakhoma amakhomo khanji.”#11:14 Usikhakhoma amakhomo khanji: Amakhomo ga mujombe gamanyikhaga mandu na Vayahuudi kiija shihwano. Giwonensa njendo nofu sina uNguluvi wágulumilaga avaanu vaakwe vagahaje. Kiyiijila, panu kiwonensa uwuhigo wa Kilisito kwa Vaisilaheli. Avamanyisiwa vaakwe vapulikhaga sina wájovile.

UYeesu ivalasa inanda imbaagule iya kifuunyila

(Mataayo 21:12-17; Luuka 19:45-48; Yohana 2:13-22)

15Pina vafishile ku Yelusalemu, uYeesu wáyinjilaga mu lukeeke lwa nanda imbaagule iya kifuunyila. Pina wáyinjila, wáyansa kivadaga woona vina vakhandi viigusa na kigula ifiinu mula. Wásigalavandula imeesa isa vina vakhandi vibadiilisa ihela na kifigalavandula ifitengo ifya vagusaaji va nkunda. 16Umwene asamukundaga muunu yoyoona kishilila pa lukeeke lwa nanda imbaagule iya kifuunyila asumwile ishiinu sha kigusa. 17Baheene uYeesu wávawulaniise avaanu wáaja, “Yiyandiikhwe mu Mayandikhwa aManofu, ‘Inanda yangu yikhava nanda ya mafuunyo ku vaanu woona na vamyanja woona.’#11:17 Yimba mu litaafili lya Isaaya 56:7. Leelo omwe mwaseetula kiiva ‘wiikhasi wa vahiiji.’#11:17 Yimba mu litaafili lya Yelemiya 7:11. ”

18Avatambule avakhome na vamanyisaaji va ndaji sa Musa vaganile kipulikha imola iso, vayansa kisakula insila iya kimubuda. Vamutiilaga kiiva ishipuga sha vaanu woona shaswigaga amamanyiso gaakwe. 19Yaganile kifikha shaamihe, uYeesu na vamanyisiwa vaakwe vahumile mu lijumbi.

Iliwulaniso lya kimuhuviilila uNguluvi

(Mataayo 21:20-22)

20Pina kwasheele ulwamilaawu, vashiliile pa mujombe gula, vagwajile guyuumile goona kihuma pa ndela. 21UPetulo wákumbukhaga imola sa mupishi gula, baheene wámujovile uYeesu wáaja, “Mumanyisaaji, loleela umupishi guna wáguyijilaga imihe, guyuumile!”

22UYeesu wámujovile wáaja, “Muhuvililaga uNguluvi. 23Shiyooli nikivajovela, umuunu yoyoona nda ashijove ishidunda ishi, shikuulishe, shiyitoose mu bahali, nda ave ikimuhuviilila angaya muninu muninu mu numbula yaakwe kiija, sina wáajova sisenjekha, hambi sisenjekha. 24Ndeeno nikivajovela kiija, shoshoona shina hambi mwilomba kwa Nguluvi kwa kifuunya, muyihuvililaje kiija mupeelwa, ifyo fisiive fyenyu. 25Na pina mufuunya, mumusajilaje yoyoona yuna ikivananjila, baheene woope uWiheenyu uwa kushaanya asivasaajile na yuumwe uwunansi weenyu. [26Nda musikivasaajila avanji vina vikivananjila, uWiheenyu uwa kushaanya asikhavasaajila uwunansi weenyu.]#11:26 Amaswi aga, gakusiina mu mayandikhwa agamonga amakuulu.”

UYeesu iposewa ulwa wutawulilwa waakwe

(Mataayo 21:23-27; Luuka 20:1-8)

27UYeesu na vamanyisiwa vaakwe vafishile khanji ku Yelusalemu na vayinjilaga mu lukeeke lwa nanda imbaagule iya kifuunyila. UYeesu pina akhandi ijenda umo, avatambule avakhome, avamanyisaaji va ndaji sa Musa na vakhome va Vayahuudi vamulutilaga. 28Vamuposiise kiija, “Aga gina wiigaha, wiigaha kwa wutawulilwa wa naani? Yu naani yuna wákupeela uwutawulilwa uwo?” 29UYeesu wávayankha wáaja, “Na yuune nisivapose liswi limo. Nda muniyanshe, na yuune nisivajovele kiija, niigaha aga kwa wutawulilwa wa naani. 30Uwutawulilwa wa Yohana uwa kitwinia wahumaga kwa Nguluvi awu kwa vaanu? Muniyanshe.”

31Baheene vaposania veene vaaja, “Nda timuyanshe kiija, wahumaga kwa Nguluvi, asitupose kiija, ‘Lino kwashi musikhamuhuviliile?’ 32Khanji nda tijove, ‘Wahumaga kwa vaanu,’ avaanu vasikwiliile kitukunda.” Vakhandi viijova ndeeno, kwa kiiva vakhandi vitiila ishipuga sha vaanu, kiiva woona vakhandi vihuviilila kiija, shiyooli uYohana akhandi mukuwamalago. 33Baaho vamuyankha vaaja, “Tisimeenye.” Woope uYeesu wávajovela wáaja, “Na yuune nisikivajovela kiija yu naani anipeelile uwutawulilwa uwa kisenga aga.”

Currently Selected:

Maluko 11: Shisangu

Highlight

Copy