Maluko 14

Ulupulinkhano ulwa kimubuda uYeesu

(Mataayo 26:1-5; Luuka 22:1-2; Yohana 11:45-53)

1Saali sisigeele nsiku sivili kiiva shiwungo sha Pasaakha#14:1 Pasaakha: Yimba iliswi ili mu Maswi aMahensa. na shiwungo sha makhaate gina gasiponyisiiwe ishiwumulilo.#14:1 Shiwungo sha makhaate gina gasiponyisiiwe ishiwumulilo: Yimba iliswi ili mu Maswi aMahensa. Avatambule avakhome na vamanyisaaji va ndaji sa Musa, vakhandi visakula insila iya kimukhata uYeesu kwa jiila, kiija vamubude. 2Vajovelanaga veene vaaja, “Tisikhamukhataga ilisiku lya shiwungo, kiiva avaanu vasilaave valeete ilibaatu.”

UYeesu idudumisiwa amafuta ku Betaniya

(Mataayo 26:6-13; Yohana 12:1-8)

3UYeesu na vamanyisiwa vaakwe vakhandi mu lujinji lwa ku Betaniya, mu nanda ya Simoni yuna ulwamwandi akhandi ana nyawulova. UYeesu pina akhandi akheele iilya, uwashimaayi yumonga wáyinjiile ni nsupa ya mafuta aga lifungu likhome, gina ginunshilila mandu. Wádindula insupa, baheene wámududumisisa uYeesu ku mutwe. 4Avaanu vamonga vina vaali apo vakhaleele vaaja, “Vayaa! Kwashi iveyanga ndeeni? 5Kiiva amafuta aga, ndi gagusiwa kwa hela nyinshi mandu,#14:5 Hela nyinshi mandu: Kwa Shiyunaani yiyandiikhwe, dinaali magana gatatu (300). Ihela isi silingeene na mahombo ga nsiku magana gatatu (300). na kivapeela avapiina.” Baheene vamukhajilaga uwashimaayi yula.

6Leelo uYeesu wáaja, “Muleshi. Kwashi mukimulafya uwashimaayi uyu? Kiiva wánigahila amanofu mandu. 7Avapiina muli lumo nsiku soona, pina musakula mukwiliile kivatanga luhaavi loloona. Leelo one nisiiva lumo noomwe nsiku soona. 8Uwashimaayi uyu wásenga lina akwiliile kisenga. Wáatala kinidudumisisa amafuta umuvili gwangu kwa masiilo. 9Shiyooli nikivajovela, popoona pina iMola iNofu yikhakhomwa mu nyi soona, gakhalogolwa amanofu goona gina uwashimaayi uyu wánigahila, baheene avaanu vakhamukumbukha.”

UYuuda uIsikaliyoote iyiitikha kimudoolela uYeesu

(Mataayo 26:14-16; Luuka 22:3-6)

10UYuuda uIsikaliyoote, umunyaayumo mu vamanyisiwa vala ishumi na vavili va Yeesu, wálutile kwa vatambule avakhome kiija, amudoolele uYeesu kuveene. 11Aveene vaganile kipulikha imola iso, vashendeeva mandu vapulinkhana na woope kimupeela ihela. Baheene uYuuda uIsikaliyoote wáyansa kisakula imwenshe inofu iya kimudoolela uYeesu.

UYeesu iilya ishakiilya sha Pasaakha na vamanyisiwa vaakwe

(Mataayo 26:17-25; Luuka 22:7-14, 21-23; Yohana 13:21-30)

12Ilisiku lya wutasi ilya shiwungo sha makhaate gina gasiponyisiiwe ishiwumulilo, pina aVayahuudi vakhandi vikisishinja inyana nkholo sina sikhandi sivishiilwe kwa kiiva ya shiwungo sha Pasaakha, avamanyisiwa va Yeesu vamuposiise vaaja, “Wisakula tikunosese kwi, ishakiilya sha shiwungo sha Pasaakha?” 13Baheene uYeesu wávafilikha vavili mu vamanyisiwa vaakwe, wáaja, “Lutaji ku Yelusalemu, ukho musitangaane nu mugoosi yumonga, avegeele injiilo ya malenga. Uyo yumwene mumufwataje, 14mbakha ilitembe lina hambi iyinjila. Apo mujovelaji umunya litembe kiija, ‘UMumanyisaaji iijova, “Wuli kwi uwudaama wa vahensa, wuna nikwiliile kiliila ishakiilya sha shiwungo sha Pasaakha lumo na vamanyisiwa vangu?”’ 15Baheene umwene asivasoonele uwudaama uwukhome uwa pa juulu wuna wuvishiilwe pa kikhala. Umo mumwene mutunosese.” 16Avamanyisiwa vala vawuukha, vaaluta ku lijumbi ilyo. Vaganaga kifikha, vagaaga goona ngaja shina uYeesu akhandi avajoveele, baheene vashinosa ishakiilya sha shiwungo sha Pasaakha.

17Shaganile kifikha ishaamihe, uYeesu na vamanyisiwa vaakwe ishumi na vavili vaafikha mu nanda yila. 18Pina viilya, uYeesu wáajova, “Shiyooli nikivajovela kiija, umunyaayumo weenyu yuna iilya noone, asinidoolele.” 19Avamanyisiwa vaakwe vasugumilwa, shila muunu wáyansa kiyiposa kwa Yeesu, “Wuli, yuune?” 20Umwene wáaja, “Umuunu uyo, wa mu shipuga sheenyu, omwe ishumi na vavili, yuna idabisa umukhaate lumo noone mu bakuli. 21One Lusawo lwa Muunu nikhabudwa ngaja shina yiyandiikhwe mu Mayandikhwa aManofu. Leelo aka, umuunu yuna akhanidoolela. Shiba yaali yive umuunu uyo wáali ave asisaviilwe!”

IShakiilya sha Mutwa

(Mataayo 26:26-30; Luuka 22:14-20; 1 Vakolinto 11:23-25)

22Woope pina viliisaga, uYeesu wátoola umukhaate, wámuhonjesa uNguluvi, wágumenyulania, wávapeela avamanyisiwa vaakwe wáaja, “Tooli, ugu gugwene muvili gwangu.” 23Baheene wátoola ikhoomasi ya divaayi, wámuhonjesa uNguluvi, wávapeela, woona vaangʼwa. 24Wávajovela wáaja, “Ishi, shimanyilo sha lufingo#14:24 Lufingo: Ulu lukundano lwa mbali sivili, yikwiliile kiiva ya vaanu vavili, fipuga fivili hata uNguluvi na vaanu vaakwe. Yimba iliswi Lufingo mu Maswi aMahensa. ulupya luna lusenjekha kwa danda yangu. Khanji yikunukha kwa kiiva ya vaanu vinshi. 25Shiyooli nikivajovela kiija, nisikhangʼwa khanji idivaayi, mbakha mu lijuva lina nikhangʼwa idivaayi imya mu Wutwa wa Nguluvi.” 26Vaganile kiyeyema,#14:26 Vaganile kiyeyema: Pina vaalya ishakiilya sha Pasaakha, aVayahuudi vakhandi ni ngʼoma ya kiyeyema iSabuli 113-118. vawuukha viiluta ku shidunda sha Miseyituni.

UYeesu ikimujova uPetulo kiija akhamukhaana

(Mataayo 26:31-35; Luuka 22:31-34; Yohana 13:36-38)

27UYeesu wávajovela avamanyisiwa vaakwe wáaja, “Omwe woona mukhanisiga, kiiva yiyandiikhwe kiija, ‘Nikhamutova umudimaaji wa nkholo, ishipuga sha nkholo shikhapalankhana.’#14:27 Yimba mu litaafili lya Sekhaliya 13:7. 28“Leelo pina nafyukha, nikhavalongola kiluta ku Galilaya.”

29UPetulo wámujovela wáaja, “Hata nda woona vakuleshe, one nisikikulekha kaa!” 30UYeesu wámujovela wáaja, “Shiyooli nikikujovela kiija, ishilo ishi injogolo pina yisinaavishe ulwa wuvili, owe usiive wanikhaana mala khatatu.” 31Leelo uPetulo wáajova kwa kiyikhangasa wáaja, “Hata nda yive kiifwa lumo noowe, nisikulekha kaa.” Woope avamanyisiwa avanji woona vaajova shiisho.

UYeesu ikimufuunya uNguluvi mu Getisemane

(Mataayo 26:36-46; Luuka 22:39-46)

32UYeesu na vamanyisiwa vaakwe vafishile pa shiisi shina shitambulwa Getisemane. Baheene wávajovela wáaja, “Mukhale bahanu pina one nifuunya.” 33Wávatoola uPetulo, uYaakobo nu Yohana, baheene wáaluta nawo. Wáyansa kisugumilwa na kilava mandu. 34Wávajovela wáaja, “Inumbula yangu yisugumiilwe mandu nkholeela na kiifwa. Mukhale baaha, muveesaje meeho.”

35Umwene wáwuukha wáaluta pamwandi padoodo, wáagwa pansi wágubama, wámufuunya uNguluvi wáaja, “Nda yikwiliile, nikikulomba uluhaavi ulwa malava lwali lunihegushe.” 36Wáaja, “Aba,#14:36 Aba: Liswi lya Shialaamu. Ishi shilogolo sha Yeesu. Uluganulo lwakwe, Daada. Daada, owe kusiina lina wigombola. Nikikulomba uniwuusise ikhoomasi iyi iya malava aga, leelo yisikhaveesaga shina nisakula one, leelo yive shina wisakula owe.”

37Wáganile kihuma kifuunya, wávaajile avamanyisiwa vatatu vagoneleele utulo. Baheene wámuposa uPetulo wáaja, “Simoni, ugoneleele? Ugombwele kiiva meeho hata lisala limo?” 38Baheene wávajovela wáaja, “Muveesaje meeho, mufuunyaji uNguluvi kiija, avatanje musikhagahaga uwunansi pina mwijelwa. Mwidobokha kigaha wunofu, leelo umuvili muwoto.”

39UYeesu wálutile kifuunya khanji, wáwuyiila kifuunya maswi gagala. 40Wáganile kifuunya wágomokha khanji, wávaaga vagoneleele, kiiva vakhandi vana tulo tusito. Vasikhandi ni liswi lya kimugomosesa.

41Wáaluta khanji kifuunya ulwa wutatu. Wáganile kitina wávajovela wáaja, “Mushaanali mupigonile utulo na kituuya? Ino lwakwila! Uluhaavi lwangu ulwa malava lwafikha. Lino one Lusawo lwa Muunu, nisikhatwe na kitwalwa mu mawokho ga vanansi. 42Yiimaji, tilutaje! Loleeli, yuna ikinidoolela ali nkholeela.”

UYeesu iikhatwa

(Mataayo 26:47-56; Luuka 22:47-53; Yohana 18:3-12)

43UYeesu pina akhandi ashaanali ilogola, shitu wátwiwukha uYuuda umunyaayumo mu vamanyisiwa vaakwe ishumi na vavili, wáyinsa ni shipuga sha vaanu shina shikhandi ni panga ni ndulugu. Ishipuga isho shafilikhwagwa na vatambule avakhome, avamanyisaaji va ndaji sa Musa na vakhome va Vayahuudi. 44UYuuda umudolelaaji wávajovelaga nkhaani avaanu vala ishimanyilo isha kimumanya uYeesu kiija, “Yula yuna hambi nikimunoonela, uyo iiva yumwene. Mukhataji na kiwuukha nawo, muyangalilaji.”

45UYuuda wáganile kifikha wámuhejeela uYeesu wáaja, “Mumanyisaaji.” Wámunoonela. 46Baheene avaanu vala vamukhata uYeesu. 47Umuyaanave yumonga mu vina vakhandi vayiimile lumo nu Yeesu, wátoola ipanga na kimudumula ilikutu umuvanda wa mutambule umukhome.

48UYeesu wávaposa avaanu vala wáaja, “Kwashi muniyinsiile ni panga ni ndulugu kinikhata one ngaja muyinsile kimukhata muhiiji? Wuli, mwihiiva kiija one nikiyikhaana iselekhaali? 49Nsiku soona tikhandi lumo noomwe, nikhandi nimanyisa mu lukeeke lwa nanda imbaagule iya kifuunyila, leelo musikhanikheete. Leelo aga goona gasenjekha, kiija gakwilane gina gayandiikhwe mu Mayandikhwa aManofu.”

50Baheene avamanyisiwa vaakwe woona vamulekha, vaasiga. 51Kukhandi kuna mujeleelo yumonga yuna wáali ayitoteeshe umutote hela, akhandi ikimufwata uYeesu. Woope visakulaga kimukhata, 52leelo umwene wápulumukhaga mu mawokho, wágulekha umutote gwakwe, wáasiga bwinda.

UYeesu pa livansa lya Vayahuudi

(Mataayo 26:57-68; Luuka 22:54-55, 63-71; Yohana 18:13-14, 19-24)

53Baheene avaanu vala vamutwala uYeesu kwa mutambule umukhome.#14:53 Mutambule umukhome: Yimba iliswi Vatambule mu Maswi aMahensa. Ukho vakungaana avatambule avakhome woona, avakhome va Vayahuudi na vamanyisaaji va ndaji sa Musa. 54UPetulo akhandi ikimufwata uYeesu kwa kutali. Wáyinjila mu lukeeke lwa nanda ya mutambule umukhome, wáakhala lumo na vayangalilaaji, wáava iyoota umooto.

55Baheene avatambule avakhome na vakhome va livansa lyona ilya Vayahuudi,#14:55 Livansa lyona ilya Vayahuudi: Yimba iliswi Livansa lya Vayahuudi mu Maswi aMahensa. vakhandi visakula uwulunjikhaaji wa kimuhiga uYeesu, kiija vamubude. Leelo vasikhawupatile. 56Avaanu vinshi vakhandi viihumya uwulunjikhaaji wa wudehi kwa Yeesu, leelo uwulunjikhaaji waanave, wusikhandi wuhwanana.

57Baheene avaanu avanji vayiima, vaava vilogola isa wudehi viija, 58“Ose tamupulikhaga umuunu uyu ilogola iijova, ‘One nisiyibomole inanda iyi iya Nguluvi yina yisenjiilwe na vaanu. Khanji mu nsiku sitatu nisiyisenje iyinji yina yisisengwa na vaanu.’” 59Leelo hata ndeeno uwulunjikhaaji waanave woope, wusikhandi wuhwanana.

60Baheene umutambule umukhome wáyiima paakhati pa vaanu, wámuposa uYeesu wáaja, “Wuli, usikivagomosesa hata liswi lyolyona? Usipulikha avaanu ava vikikujova shi?” 61Leelo uYeesu wásisimaga tototo, asikhayanshile lyolyona. Umutambule umukhome wámuposa khanji wáaja, “Wuli, owe yuuwe Mukulusaaji,#14:61 Mukulusaaji: Kwa Shiyunaani yiyandiikhwe Kilisito. Yimba iliswi Kilisito mu Maswi aMahensa. Lusawo lwa Nguluvi yuna iitunwa?” 62UYeesu wámugomosesa wáaja, “Eena yuune. Khanji mukhamwaga uLusawo lwa Muunu akheele ulubali lwa kundiilo#14:62 Ulubali lwa kundiilo: Uluganulo lwakwe, uYeesu akhapeelwa ingufu nu wutawulilwa. Yimba mu litaafili lya Sabuli 110:1. lwa Nguluvi, uMunya Ngufu Soona na mukhamwaga iyinsa mu mafunde.”#14:62 Yimba mu litaafili lya Daniyeli 7:13.

63Umutambule umukhome wáganaga kipulikha amaswi ago, wádeemula umwenda gwakwe kiwonensa inkhalasi wáaja, “Tisakula avalunjikhaaji vaashi khanji? 64Yuumwe mwapulikha shina itofola, ikiyiviikha umwene yu Lusawo lwa Nguluvi! Lino, mwijova wuli ulwa muunu uyu?” Ilivansa lyona lyalamula kiija, isakulwa abudwe. 65Baheene avanji vayansa kimufuunyila amata. Vamudinda ameeho, vamutova ni mfunsi, vamuposa vaajova, “Kuva amalago, yu naani yuna wákutova!” Avayangalilaaji woope vamutoola, vamutova na makhoofi.

UPetulo ikimukhaana uYeesu

(Mataayo 26:69-75; Luuka 22:56-62; Yohana 18:15-18, 25-27)

66UYeesu pina akhandi mu nanda, uPetulo wáali apikheele pansi bahala pa lukeeke. Wáyinsa umuhinja umusenga nsengo wa mutambule umukhome. 67Wáganile kimwaga uPetulo iyoota umooto, wámungʼalulila ameeho wáaja, “Na yuuwe ukhandi lumo nu Yeesu uwa ku Nasaleti.” 68UPetulo wákhaana wáaja, “Nisimumeenye, khanji nisigameenye ago gina wilogola!” Wáwuushile wáaluta wáyiima pa mulyango sha mukhati mu lukeeke. Apo injogolo yaavikha.

69Umusenga nsengo yula wámwaga khanji uPetulo, wáyansa khanji kivajova avaanu vina vaali vayiimile pala, “Umuunu uyu woope munyaayumo na vala.” 70UPetulo wákhaana khanji. Lwaganile kishila uluhaavi ludoodo, avaanu vina vaali vayiimile pala vamujovela uPetulo vaaja, “Shiyooli owe uli muyaanave wa vaanu awo, kwa kiiva na yuuwe uhumile ku Galilaya.” 71UPetulo wáyansiise kikhaana na kiyiyiiga iijova, “Nisimumeenye umuunu uyo yuna mulogola!”

72Baaho injogolo yaavikha ulwa wuvili. Baheene, uPetulo wálikumbukha iliswi lila lina uYeesu wálogolaga kiija, “Pina yisinaavishe injogolo ulwa wuvili, owe usiive wanikhaana mala khatatu.” UPetulo wáganile kikumbukha ago, wáyansa kikhoola mandu.

Currently Selected:

Maluko 14: Shisangu

Highlight

Copy