Maluko 15

UYeesu iihigwa kwa Pilaato

(Mataayo 27:1-2, 11-14; Luuka 23:1-5; Yohana 18:28-38)

1Kwaganile kiisha hela, ilivansa lyona ilya vatambule avakhome na vamanyisaaji va ndaji sa Musa lumo na vakhome va Vayahuudi, vapulinkhana kimusitaakha. Vamupinya uYeesu ni pingo, vamutwala kwa Pilaato, umunjaajila wa Shiluumi, kiija ahigwe. 2UPilaato wámuposiise uYeesu, “Wuli, owe yuuwe Mutwa wa Vayahuudi?” UYeesu wámugomosesa wáaja, “Owe walogola.”

3Avatambule avakhome valogolaga injowo nyinshi isa kimusitaakha uYeesu. 4Baheene uPilaato wámuposa khanji wáajova, “Kwashi usiyankha lyolyona? Loleela avaanu ava shina vilogola injowo nyinshi isa kikusitaakha.” 5Leelo uYeesu asikhavagomoseese hata liswi limo. Baheene uPilaato wáswijile.

UPilaato ikivaposa kiija avadindulile naani

(Mataayo 27:15-21; Luuka 23:13-19; Yohana 18:39-40)

6Shila mwakha, uluhaavi lwa shiwungo sha Pasaakha, uPilaato akhandi ana ngʼoma iya kivadindulila umudindilwa yumo, yuna avaanu vamulombaga. 7Wáali akwali umuunu yumonga yuna wáali itambulwa Balaaba, uyo wádindilwagwa lumo na vaanu avanji, kiiva vabudaga vaanu pina vatovalilanaga iselekhaali. 8Ishipuga sha vaanu shamulutiile uPilaato kilomba kiija, avagahile ngaja shina yikhandi ingʼoma yaakwe mu lusiku lwa Pasaakha.

9UPilaato wávaposa kiija, “Musakula nivadindulile uMutwa wa Vayahuudi?” 10UPilaato wájovile ndeeno kiiva wáali ameenye kiija, avatambule avakhome vamutwala uYeesu kwa mwene kwa kiiva vakhandi vana jiila. 11Baheene avatambule avakhome vavafundaga avaanu woona kiija vamulombe uPilaato, avadindulile uBalaaba.

UYeesu iihigwa kiija vamubude

(Mataayo 27:22-26; Luuka 23:20-25; Yohana 19:1-16)

12UPilaato wávaposa khanji wáaja, “Nimugahe shishi umuunu uyu yuna mwijova Mutwa wa Vayahuudi?” 13Avaanu woona valyova vaaja, “Umukhomeelele pa musalaaba!” 14UPilaato wávaposa khanji wáaja, “Umuunu uyu wáagaha luvi lushi?” Leelo aveene vashilile kilyova viijova, “Umukhomeelele!”

15UPilaato wávadindulila uBalaaba, kwa kiiva akhandi isakula kishishendeefya ishipuga sha vaanu. Baheene wávalajisa avasulukhali vaakwe kiija, vamutove uYeesu na majalidi na kimukhomeelela pa musalaaba.

Avasulukhali vikimubeda uYeesu

(Mataayo 27:27-31; Yohana 19:2-3)

16Avasulukhali vamutwala uYeesu mukhati mu mbalino ya munjaajila uPilaato, baheene avasulukhali woona vakungaana. 17Vamufwasa inkhansu induhupafu iya wutwa, vaatava injoola ya mimfwa, baheene vamufwasa pa mutwe. 18Vayansa kimuhunjila kwa mabedo viijova, “Aaje senga Mutwa wa Vayahuudi!” 19Vakhandi vikimutova ku mutwe ni lilansi na kimufuunyila amata, vakhandi vikimufugamila uYeesu na kimusungamila kwa wumyansi. 20Avasulukhali awo vaganile kimubeda na kimuneenela, vamuyaawula inkhansu induhupafu, vamufwasa khanji amenda gaakwe. Baheene vamuhumya kunja, vaaluta kimukhomeelela pa musalaaba.

UYeesu ikhomeelelwa pa musalaaba

(Mataayo 27:32-44; Luuka 23:26-43; Yohana 19:17-27)

21Pina vakhandi mu nsila, vatangaanaga nu muunu yumonga yuna akhandi itambulwa Simoni, yuna akhandi mukhaaya wa lijumbi lya Kileene. Umuunu uyo wáhumile ku magunda iiluta ku Yelusalemu. Uyo akhandi wiihe wa Alekisanda nu Lufo. Avasulukhali vamukhamiilisa kisumula umusalaaba gwa Yeesu. 22Baheene vamutwala uYeesu pina pitambulwa Goligota, uluganulo lwakwe, Lipangalasi lya Mutwe. 23Vaganile kifikha, vamupeela idivaayi iya masabiibu inyansikhanie nu mugoda guna guwuusa uwuvafi, leelo umwene wákhaana kiingʼwa. 24Baheene vamukhomeelela uYeesu pa musalaaba, vagavana amenda gaakwe kwa lulagusanio, valamule kiija yu naani atoole mwenda mushi.

25Yikhandi mu lisala lya wutatu ulwamilaawu, pina vamukhomeleele. 26Pashaanya pa musalaaba vakhomeleelaga ishimanyilo shina shiyandiikhwe amaswi aga kimuhiga kiija,

“Uyu yumwene Mutwa wa Vayahuudi.”

27Vamukhomelelaga uYeesu pa musalaaba lumo na vapokhaaji vavili, shila muunu pa musalaaba gwakwe. Yumo ulubali lwa kundiilo, uyunji ulubali lwa kunshiji. [28Amaswi aga goona gasenjekhaga kikwisa gina gayandiikhwe mu Mayandikhwa aManofu kiija, “Avasiiwe lumo na vahiiji.”]#15:28 Amaswi aga, gakusiina mu mayandikhwa agamonga amakuulu. Yimba mu litaafili lya Isaaya 53:12.

29Avaanu vina vakhandi viishila mu nsila vikimwaga uYeesu pa musalaaba, vakhandi videgensa amatwe gaanave na kimusala, vakhandi viijova, “Owe ukhajovile kiija ukhayibomola inanda iya Nguluvi na kiyisenga khanji kwa nsiku sitatu, 30lino, yikulusa yuuwe, yiikha pa musalaaba!”

31Shiisho ndeeno avatambule avakhome na vamanyisaaji va ndaji sa Musa vakhandi vikimubeda uYeesu viijova, “Uyu wávakulusaaga avanji, leelo igombola kiyikulusa yumwene! 32Nda yu Mukulusaaji,#15:32 Mukulusaaji: Kwa Shiyunaani yiyandiikhwe Kilisito. Yimba iliswi Kilisito mu Maswi aMahensa. uMutwa wa Vaisilaheli, timwaje ayiishe pa musalaaba, baheene na yuuse timuhuviilile.” Avaanu vina vakhomelelwagwa lumo nu Yeesu, woope vakhandi vikimuliga.

UYeesu iifwa pa musalaaba

(Mataayo 27:45-56; Luuka 23:44-49; Yohana 19:28-30)

33Kihuma ilisala lya mutanda paminsi mbakha ilisala lya gonja, inshiisi yagubikhaga inyi yila yoona. 34Baheene mu lisala lya gonja, uYeesu wákhosiise mandu ishawuti wáaja, “Eloyi! Eloyi! Lama sabakhitani?” Uluganulo lwakwe, “Nguluvi wangu! Nguluvi wangu! Kwashi wanilekha?”#15:34 Yimba mu litaafili lya Sabuli 22:1. 35Avaanu vamonga vina vakhandi vayiimile pala, vaganile kipulikha ulo vaajova, “Puliisi vayaa! Ikimushemeela umukuwamalago uEliya!”#15:35 UEliya: Uyo ilogolwa apa kwa kiiva aVayahuudi vinshi vakhandi vihuviilila kiija uEliya asikhafwile kaa, leelo uNguluvi wámutoolaga mu nyi pina ali muumi na kiluta nawo kushaanya. Khanji vakhandi vaheepile kiija, uEliya akhayinsa khanji mu nyi. Yimba mu litaafili lya 2 Vatwa 2:11; Malaaki 4:5. 36Umuunu yumonga wáaluta luvilo, wájabikha ulupembo mu divaayi inkhali, wáviikha mu lulansi wámuvejesesa uYeesu pa mulomo angʼwele, wáaja, “Muleshi timwaje nda uEliya asiyinse kimuyiisa pa musalaaba apo!”

37Baheene uYeesu wákhoosa mandu ishawuti, wáafwa. 38Uluhaavi luulo, umwenda#15:38 Umwenda: Umwenda ugu gugwene gwabagulaga mbali sivili mu nanda ya Nguluvi. Ulubali lumo Panofu, ulubali ulunji Panofu pa Panofu. guna gukhandi gubagwile mbali sivili mu nanda ya Nguluvi, gwadeemukha paakhati kihuma kushaanya mbakha pansi, gwabagunkhana mbali sivili. 39Umuyimililaaji wa vasulukhali, yuna akhandi ayiimile nkholeela pa Yeesu, wáganile kimwaga shina iifwa wáajova, “Shiyooli umuunu uyu akhandi Lusawo lwa Nguluvi!”

40Pina gisenjekha goona aga, vaali vakwali avashimaayi vina vayiimile patali padoodo viloleela. Mu vashimaayi awo, wáali akwali uMaliya uwa ku Magidala, uSalome nu Maliya umaayi wa Yoose nu Yaakobo umunangʼana. 41Ava vaveene vikimufwataga na kimusenjela uYeesu, pina akhandi ku Galilaya. Kukhandi na vashimaayi avanji vinshi vina valutaga nu Yeesu ku Yelusalemu.

UYeesu iviikhwa mu lijooja

(Mataayo 27:57-61; Luuka 23:50-56; Yohana 19:38-42)

42Ishaamihe isha lisiku ilyo ilya Ijumaa, likhandi lisiku lya kilingaania iSabaato#15:42 ISabaato: Kwa Vayahuudi yikhandi yiyansa pa Ijumaa pashaamihe. ya Vayahuudi, iya kifuunya na kituuya. 43Baheene wáyinsa uYusufu yuna wáhumile mu lijumbi lya Alimataaya, yuna akhandi itiilwa mu shipuga sha vakhome va livansa. Uyo, akhandi iheepaga kiyinsa kwa Wutwa wa Nguluvi. Wáyikhangasaaga, wáaluta kwa Pilaato, wálomba umufimba gwa Yeesu, kiija alute agusiile. 44UPilaato wáganile kipulikha kiija uYeesu wáafwa, wáswijile mandu. Wámushemeela umukhome wa shipuga sha vasulukhali ligana wámuposa, nda shiyooli uYeesu wáafwa. 45UPilaato pina wápuliishe kiija uYeesu wáafwa, wámutawula uYusufu kigutoola umufimba gwa Yeesu.

46Baheene uYusufu wáagula umwenda gwa kimusiilila uYeesu. Wáguyiisa umufimba gwa Yeesu pa musalaaba, baheene wámunielenga umwenda gwa kimusiilila. Wáguviikha mu lijooja lina likhandi lihimbe mu shidunda,#15:46 Lijooja lina likhandi lihimbe mu shidunda: Ingʼoma ya Vayahuudi ya kisiila avaanu, vakhandi vikivaviikha vina vafwile mu lijooja lina likhandi lihimbe mu shidunda na kiviikha ilingʼanga pa mulyango. wálibiilusa ilingʼanga ilikhome pa mulyango gwa lijooja, wádinda. 47UMaliya uwa ku Magidala nu Maliya umaayi wa Yoose, vapaajile pina vagusiilile umufimba gwa Yeesu.

Currently Selected:

Maluko 15: Shisangu

Highlight

Copy