Maluko 16

Kifyukha kwa Yeesu

(Mataayo 28:1-8; Luuka 24:1-12; Yohana 20:1-10)

1Lyaganile kishila ilijuva lya Sabaato, uMaliya uwa ku Magidala, uSalome nu Maliya umaayi wa Yaakobo, vagulile amafuta amanofu kiija valute vagususuute umufimba gwa Yeesu. 2Ilisiku ilya Nguluvi palwamilaawu, pina ilijuva liyansa kidibula, vaaluta ku lijooja lya Yeesu. 3Pina vakhandi mu nsila vayansa viposania veene viija, “Lino, yu naani yuna asitubilusise ilingʼanga lila pa mulyango gwa lijooja?” 4Ilingʼanga lila likhandi likhome mandu. Vaganile kifikha, valyaga ilingʼanga libilusiiwe.

5Pina vayinjiile mukhati mu lijooja, vamwaga umujeleelu afwalile amenda mavalafu, akheele ulubali lwa ndiilo ulwa lijooja. Baheene avashimaayi vala, vaswijile mandu. 6Baheene umujeleelu uyo wávajovela wáaja, “Musikhatiilaji. Mukimusakula uYeesu uwa ku Nasaleti yuna vamukhomelelaga pa musalaaba? Wáfyukha, akwasiina apa! Loleeli pina vaava vamugoniise. 7Lino lutaji muvajovele avamanyisiwa vaakwe, mandu uPetulo, kiija wálongola kiluta ku nyi ya Galilaya. Ukho kukwene kuna musimwaje ngaja shina wávajovelaga.” 8Vaganile kipulikha ago, vaswiga na kitetema, vaahuma mu lijooja, vawuukha viisiga. Vasikhamujoveele umuunu yoyoona, kwa kiiva vatiilaga mandu.

UYeesu itwiwukha kwa Maliya uwa ku Magidala

(Mataayo 28:9-10; Yohana 20:11-18)

[9Ilisiku ilyo ilya Nguluvi ulwamilaawu, uYeesu wáganile kifyukha, wámutwiwushilaga tangusiina uMaliya uwa ku Magidala, yuna wámuwusiise amalungu fungati. 10Woope wáaluta kivajovela vala vina vakhandi lumo nu Yeesu pina asinaafwe. Uluhaavi lula vakhandi vikimukhoola uYeesu. 11Leelo vaganile kipulikha kwa Maliya uwa ku Magidala kiija, wámwaga uYeesu muumi, vasikhamuhuviliile.

UYeesu itwiwukha ku vavanda vavili

(Luuka 24:13-35)

12Ulusiku lulula, uYeesu wátwiwukhaga ku vavanda vaakwe vavili mu nsila. Avavanda awo, vaali vahumile ku Yelusalemu viiluta mu njinji isa nkholeela. Vagombolaga kimumanya, kwa kiiva akhandi iwonekha ali paayo. 13Woope vatinile vaaluta ku Yelusalemu vavataviilila avamanyisiwa ishumi na yumo, leelo vasikhavahuviliile.

UYeesu ikivatwiwushila avamanyisiwa vaakwe

(Mataayo 28:16-20; Luuka 24:36-49; Yohana 20:19-23; Nsengo sa Vanandeje 1:6-8)

14Kuwudugo, uYeesu wávatwiwushilaga avamanyisiwa ishumi na yumo, pina vakhandi vakheele lumo viilya. UYeesu wávakhajilaga kiiva vasikhavahuviliile vina vakhamwajile pina wáfyukhaga, kwa kiiva inumbula saanave saali nyuumu.

15Baheene uYeesu wávalajisa avamanyisiwa vaakwe wáaja, “Lutaji mu nyi soona muvakhome avaanu woona iMola yangu iNofu. 16Umuunu yoyoona yuna ihuviilila na kitwinisiwa, uyo akhakulusiwa. Leelo umuunu yoyoona yuna ikhaana kihuviilila, akhahigwa. 17Khanji vina vikinihuviilila vakhagaha amabikha ngaja aga, kwa litaawa lyangu vakhadaga amalungu, khanji vakhava vilogola kwa filogolo ifipya. 18Hata nda vakhate injokha kwa mawokho, awu vangʼwe uwanga wusikhavalemasa. Khanji vakhava vikivaviishila avatamu amawokho gaanave, woope vakhava viipona.”

UYeesu itupulwa iiluta kushaanya

(Luuka 24:50-53; Nsengo sa Vanandeje 1:9-11)

19UMutwa uYeesu wáganaga kilogola nawo, baheene wátupulwa kiluta kushaanya, akheele ulubali ulwa kundiilo ulwa Nguluvi. 20Woope avamanyisiwa vaakwe vawuukha pala, vaaluta koona kikhoma iMola iNofu. UMutwa uYeesu akhandi isenga insengo lumo na veene, na kijinia iliswi lyakwe ilyo kwa nsila ya mabikha gina vagahaga.]#16:9-20 Amaswi aga, gakusiina mu mayandikhwa agamonga amakuulu.

Currently Selected:

Maluko 16: Shisangu

Highlight

Copy