مزگینیا مەتتای 26

پیلانا كوشتنا عیسای

(مەرقۆس 14‏:1‏-2؛ لوقا 22‏:1‏-2؛ یوحەننا 11‏:45‏-53)

1دەمێ عیسای ئەڤ هەمی ئاخفتنە ب دویماهی ئیناین، گۆتە شاگردێن خۆ: 2«هوین دزانن پشتی دوو رۆژێن دی جەژنا دەربازبوونێیە#26‏:2 ل فەرهەنگۆكێ بنێڕە جەژنا دەربازبوونێ. و دێ كوڕێ مرۆڤ رادەست كەن، دا بهێتە خاچدان.»

3هنگی سەرۆكێن كاهنان و ریهسپیێن مللەتی ل كۆچكا سەرۆككاهنی، كو ناڤێ وی قەیافا بوو، كۆمبوون 4و پیلانەك دانا، كو عیسای ب فێلبازی بگرن و بكوژن. 5لێ وان دگۆت: «ئەم ل جەژنێ وی ناگرین، دا تێكدان د ناڤ خەلكی دا چێنەبیت.»

ژنەك گولاڤێ ب سەرێ عیسای دا دكەت

(مەرقۆس 14‏:3‏-9؛ یوحەننا 12‏:1‏-8)

6دەمێ عیسا ل بێت‌عەنیا، ل مالا شەمعونێ گوڕی، 7ژنكەكێ گولاڤدانكەكا#26‏:7 گولاڤدانك: ب یونانی ‹ئەلەباستر›ە، ئامانەكە ژ مەرمەری دهاتە دروستكرن. روینێ بێهنخۆش یێ بهاگران ڤێ بوو، هاتە نك و دەمێ ل سەر سفرێ یێ روینشتی، وێ هەمی ب سەرێ وی دا كر. 8گاڤا شاگردێن وی ئەڤ چەندە دیتی، دلتەنگ بوون و گۆتن: «بۆچی ئەڤ زەعێكرنە؟ 9چێدبوو ئەڤ گولاڤە ب بهایەكێ باش هاتبا فرۆتن و دابا هەژاران.» 10لێ عیسای ب ڤێ چەندێ زانی و گۆتە وان: «بۆچی هوین ڤێ ژنكێ تەنگاڤ دكەن؟ وێ كارەكێ باش بۆ من كر. 11هەژار هەمی دەمان یێن ل نك هەوە هەین، لێ ئەز هەمی دەمان ل نك هەوە نابم. 12دەمێ وێ گولاڤ ب لەشێ من دا كری، وێ ئەز بۆ ڤەشارتنێ ئامادە كرم. 13راستیێ دبێژمە هەوە: ئەڤ مزگینیە ل هەر جهەكی ل سەرانسەری جیهانێ بهێتە راگەهاندن، دێ بەحسێ ئەوا ڤێ ژنكێ كری ژی ژ بۆ بیرهاتنا وێ هێتە كرن.»

بێبەختیا یەهودایێ ئەسخەریوتی

(مەرقۆس 14‏:10‏-11؛ لوقا 22‏:3‏-6)

14هنگی ئێك ژ دوازدە شاگردان، ئەوێ ناڤێ وی یەهودایێ ئەسخەریوتی، چوو نك سەرۆكێن كاهنان 15و گۆت: «دێ چ دەنە من، ئەز وی رادەستی هەوە بكەم؟» ئینا وان سۆزا سی‍‌ھ زیڤان دایێ. 16ئێدی ژ وی دەمی وەرە، یەهودا ل دەلیڤەیەكێ دگەڕیا، دا وی رادەستی وان بكەت.

شیڤا جەژنا دەربازبوونێ ل گەل شاگردان

(مەرقۆس 14‏:12‏-21؛ لوقا 22‏:7‏-13؛ یوحەننا 13‏:21‏-30)

17ل رۆژا ئێكێ ژ جەژنا نانێ شكەڤا#26‏:17 جەژنا نانێ شكەڤا: ل فەرهەنگۆكێ بنێڕە.، شاگرد هاتنە نك عیسای و گۆتنێ: «تە دڤێت ئەم ل كیرێ شیڤا جەژنا دەربازبوونێ ئامادە بكەین، دا تۆ بخۆی؟» 18ئینا گۆتە وان: «هەڕنە باژێڕی ل نك فلان كەسی و بێژنێ: ‹مامۆستا دبێژیت: دەمێ من یێ نێزیك بووی و دێ جەژنا دەربازبوونێ ل گەل شاگردێن خۆ ل نك تە كەم.›» 19شاگردان ئەو كر یا عیسای فەرمان پێ دای و ل وێرێ شیڤا دەربازبوونێ ئامادە كر. 20دەمێ بوویە شەڤ، ل گەل هەر دوازدان ل سەر سفرێ روینشت. 21د بەر خوارنێ را عیسای گۆت: «ب راستی دبێژمە هەوە: ئێك ژ هەوە دێ بێبەختیێ ل من كەت.» 22ئەو گەلەك دلتەنگ بوون و دەست پێ كر ئێك ئێكە پرسیار ژێ كر: «خودان، ئەرێ ئەو ئەزم؟» 23بەرسڤا وان دا: «ئەوێ پاریێ خۆ ل گەل من د سێنیكێ هەلاندی، ئەو دێ من دەتە دەست. 24كوڕێ مرۆڤ دێ وەسا چیت، هەروەكو دەربارەی وی هاتیە نڤیسین، لێ نەخوزیكێن وی كەسی یێ كوڕێ مرۆڤ رادەست بكەت. بۆ وی كەسی باشتر بوو ئەو ژ دایك نەببا.» 25ئەڤجا یەهودا، ئەوێ دێ بێبەختیێ ل وی كەت، بەرسڤ دا و گۆت: «مامۆستا، ئەرێ ئەو ئەزم؟» عیسای بەرسڤا وی دا: «تە گۆت.»

شیڤا خودانی

(مەرقۆس 14‏:22‏-26؛ لوقا 22‏:14‏-23؛ 1 كورنتۆس 11‏:23‏-25)

26دەمێ وان خوارن دخوار، عیسای نان هەلگرت و سوپاسی كر و كەر كر و دا شاگردان و گۆت: «وەرگرن، بخۆن، ئەڤە لەشێ منە!» 27پاشی پەرداغ هەلگرت و سوپاسی كر و دا وان و گۆتێ: «هوین هەمی ژێ ڤەخۆن، 28چنكو ئەڤە خوینا منە، خوینا پەیمانێ، ئەوا ژ پێخەمەتی گەلەكان بۆ لێبورینا گونەهان دێ هێتە رشتن. 29ئەز دبێژمە هەوە: ئێدی ئەز ژ ڤی بەرهەمێ مێوێ ڤەناخۆم، تا وێ رۆژا ئەز ل گەل هەوە ل پاشایەتیا بابێ خۆ ژ یا نوی ڤەدخۆم.» 30پشتی وان سروودەك#26‏:30 خواندنا پارچەیەكا زەبوورێ ب شێوەیێ سترانێ. ل دویڤ نەریتێن جوهیان ل وی دەمی ژ پشكا 113 تاكو 118 دهاتە ستراندن. بۆ پەسنا#26‏:30 پەسن: مەدح و سەنا خودێ گۆتی، چوونە چیایێ زەیتوونان.

عیسا پێشوەخت بەحسێ ماندەلكرنا پەترۆسی دكەت

(مەرقۆس 14‏:27‏-31؛ لوقا 22‏:31‏-34؛ یوحەننا 13‏:36‏-38)

31پشتی هنگی گۆتە وان «ئەڤ شەڤە هوین هەمی دێ ژ بەر من هەلنگڤن، چنكو یا هاتیە نڤیسین:

‹ئەز دێ ل شڤانی دەم،

كەرێ پەزی دێ بژاڵە بیت.›#26‏:31 زەكەریا 13‏:7

32لێ پشتی رابوونا من، ئەز دێ بەراهیا هەوە چمە جەلیل.» 33پەترۆسی بەرسڤا وی دا و گۆتێ: «ئەگەر هەمی ژی ژ بەر تە بهەلنگڤن، ئەز چ جاران ناهەلنگڤم!» 34عیسای گۆتێ: «ب راستی دبێژمە تە: ئەڤ شەڤە بەری دیكل بانگ بدەت، تۆ دێ سێ جاران من ماندەل#26‏:34 ماندەل: ئینكار كەی.» 35پەترۆسی گۆتێ: «خۆ ئەگەر یا پێدڤی بیت ئەز ل گەل تە بمرم ژی، ئەز تە ماندەل ناكەم!» هەمی شاگردان ژی وە گۆت.

عیسا نڤێژێ ل باغێ گەتسێمانیێ دكەت

(مەرقۆس 14‏:32‏-42؛ لوقا 22‏:39‏-46)

36پاشی عیسا و شاگردێن خۆ چوونە وی جهێ دبێژنێ گەتسێمانی و گۆتە وان: «ل ڤێرێ روینن، تا ئەز بچمە وێراهە نڤێژێ بكەم.» 37پەترۆس و هەردوو كوڕێن زەبەدی ل گەل خۆ برن و خەمگینیێ و دلتەنگیێ ب سەر وی دا گرت. 38هنگی گۆتە وان: «دلێ من تا رادەیێ مرنێ یێ ب خەمە! ل ڤێرێ بن و ل گەل من هشیار بمینن.» 39پاشی پیچەكێ پێشڤە چوو و خۆ دەڤ و دەڤ هاڤێتە ئەردی و نڤێژ كر و گۆت: «بابێ من، ئەگەر چێببیت، بلا ئەڤ پەرداغە ژ من دەرباز ببیت. لێ نە وەكو من دڤێت، بەلكو وەكو تە دڤێت.» 40پشتی هنگی ڤەگەڕیا نك شاگردان و دیت د نڤستینە، ئینا گۆتە پەترۆسی: «ما هوین نەشیان دەمژمێرەكێ ژی ل گەل من هشیار بمینن؟ 41هشیار بمینن و نڤێژان بكەن، دا هوین نەكەڤنە د تاقیكرنێ دا. گیان یێ ئامادەیە، لێ لەش یێ لاوازە.» 42دیسان بۆ جارا دوویێ چوو و نڤێژ كر و گۆت: «بابێ من، ئەگەر چێ نەبیت ئەڤە ژ من دەرباز ببیت، تاكو ئەز وێ ڤەنەخۆم، بلا ب حەزا تە بیت.» 43ڤەگەڕیاڤە نك شاگردان، دیسان دیت د نڤستینە، چنكو خەوێ چاڤێن وان گران كربوون. 44ئەو هێلان و زڤڕی بۆ جارا سێیێ نڤێژ كر و هەر ئەو ئاخفتن دووبارە كر. 45پاشی هاتە نك شاگردێن خۆ و گۆتە وان: «ئەڤە هێشتا هوین د نڤستینە و بێهنا خۆ ڤەددەن؟ ئەڤە ئەو دەم هات و كوڕێ مرۆڤ رادەستی گونەهكاران دهێتە كرن. 46رابن دا بچین، ئها ئەڤە ئەوێ من رادەست دكەت، نێزیك بوو!»

گرتنا عیسای

(مەرقۆس 14‏:43‏-50؛ لوقا 22‏:47‏-53؛ یوحەننا 18‏:3‏-12)

47دەمێ ئەو دئاخفت، وەسا چێبوو یەهودا، كو ئێك ژ هەر دوازدان بوو، گەهشت و كۆمەكا مەزن یا مرۆڤان ب شیر و دار ڤە ل گەل بوون. ئەو ژ لایێ سەرۆكێن كاهنان و ریهسپیێن مللەتی ڤە هاتبوونە هنارتن. 48ئەوێ وی رادەست دكەت نیشانەك دابوو وان و گۆتبوویێ: «ئەوێ ئەز ماچی بكەم، ئەو ئەوە. وی بگرن.» 49یەهودا ئێكسەر هاتە نك عیسای و گۆت: «سڵاڤ، مامۆستا!» و ماچی كر. 50عیسای گۆتێ: «هەڤال، تۆ بۆ چ هاتی، وێ بكە.» ئەوێن د گەل یەهودای دا، هاتنە پێش و عیسا دەستەسەر كر و گرت. 51وەسا چێبوو ئێك ژ ئەوێن ل گەل عیسای دەست دا شیرێ خۆ و ئینا دەرێ و ڤەوەشاندە بەنیێ سەرۆككاهنی و گوهێ وی ژێڤە كر. 52ئینا عیسای گۆتێ: «شیرێ خۆ بزڤڕینە جهێ وی! یێ دەست بهاڤێژیتە شیری، دێ ب شیری ژ ناڤ چیت. 53ما تۆ هزر دكەی، ئەز نەشێم داخوازێ ژ بابێ خۆ بكەم و ئەو د ج‍‌ھ دا پتر ژ دوازدە سوپایێن فریشتەیان بۆ من نەهنێریت؟ 54لێ ئێدی دا چەوا نڤیسار ب ج‍‌ھ هێن، كو دبێژن پێدڤیە هۆسا روی بدەت؟» 55وێ گاڤێ عیسای گۆتە وێ كۆمێ: «دێ بێژی هوین بۆ ب سەرداگرتنا قاچاخەكی ب شیر و داران دەركەفتین، دا من بگرن؟ هەر رۆژ ئەز ل پەرستگەهێ یێ روینشتی بووم و من فێركرن دكر و هەوە ئەز نەدگرتم. 56لێ ئەڤێ هەمیێ روی دا، دا نڤیسارێن پێغەمبەران ب ج‍‌ھ بهێن.» ل وی دەمی هەمی شاگردان ئەو هێلا و رەڤین.

دادكرنا عیسای ژ لایێ جڤاتا بلند ڤە

(مەرقۆس 14‏:53‏-65؛ لوقا 22‏:54‏-55، 63‏-71؛ یوحەننا 18‏:13‏-14، 19‏-24)

57ئەوێن عیسا گرتی، ئەو برە نك قەیافایێ سەرۆككاهن. ل وێرێ مامۆستایێن دەستووری و ریهسپی كۆم ببوون. 58پەترۆس ژ دویر ڤە ب دویڤ را تا حەوشا سەرۆككاهنی چوو، قەستا ژۆر كر و ل گەل زێرەڤانان روینشت، دا ئەنجامی ببینیت. 59سەرۆكێن كاهنان و جڤاتا بلند هەمی ل شاهدەییا ب درەو دەربارەی عیسای دگەڕیان، دا وی بدەنە كوشتن، 60لێ وان نەدیت، سەرەڕای كو گەلەك شاهدێن درەوین خۆ دیار كر. ل دویماهیێ دوو هاتنە پێش 61و گۆتن: «ڤی مرۆڤی گۆت: ‹ئەز دشێم پەرستگەها خودێ بهەڕفینم و د سێ رۆژان دا ئاڤا بكەم.›» 62سەرۆككاهن رابوو و گۆتێ: «ما تۆ چ بەرسڤان نادەی؟ ئەڤە چ شاهدەییە ئەڤ كەسە ل سەر تە ددەن؟» 63لێ عیسا بێدەنگ ما. سەرۆككاهنی گۆتێ: «ئەز تە ب خودایێ زیندی ددەمە سویندێ، بێژە مە: ئەرێ تۆی مەسیحێ كوڕێ خودێ؟» 64عیسای بەرسڤا وی دا: «تە گۆت! و ئەز دبێژمە هەوە:

ژ نوكە پێڤە هوین دێ كوڕێ مرۆڤ بینن، ل دەستێ راستێ یێ هێزداری#26‏:64 یێ هێزدار: ئاماژەیە بۆ خودێ. یێ روینشتی#26‏:64 زەبوور 110‏:1 و ل سەر عەورێن ئەسمانی یێ دهێت#26‏:64 دانیێل 7‏:13.»

65هنگی سەرۆككاهنی جلكێن خۆ دڕاندن و گۆت: «وی كوفری كر! ما ئێدی مە چ پێدڤی ب شاهدان هەیە؟ ئها ئەڤە هەوە كوفریا وی بهیست! 66ئەڤجا هوین چ دبێژن؟» وان بەرسڤ دا و گۆت: «ئەو یێ هەژی مرنێیە!» 67ل وی دەمی وان تف كرنە دێمێ وی و دا بەر كولمان و هندەكێن دی زللە‍‌ھ لێدان 68و گۆتن: «هەی مەسیح، ئەگەر تۆ پێغەمبەر بی، بۆ مە بێژە كی بوو دانایە تە؟»

پەترۆس عیسای ماندەل دكەت

(مەرقۆس 14‏:66‏-72؛ لوقا 22‏:56‏-62؛ یوحەننا 18‏:15‏-18، 25‏-27)

69ل وی دەمی پەترۆس د حەوشێ دا یێ روینشتی بوو، ئینا كچكەكا خزمەتكار هاتە نك و گۆتێ: «تۆ ژی ل گەل عیسایێ جەلیلی بووی.» 70ئینا پەترۆسی بەرامبەری هەمیان ماندەل كر و گۆت: «ئەز نزانم تۆ چ دبێژی.» 71دەمێ دەركەفتیە بەر دەرگەهێ حەوشێ، خزمەتكارەكا دی ئەو دیت و گۆتە ئامادەبوویان: «ئەڤە ژی ل گەل عیسایێ ناسیرەیی بوو.» 72پەترۆسی دیسان ماندەل كر و سویند خوار، گۆت: «ئەز وی زەڵامی نانیاسم!» 73پشتی دەمەكێ كورت، ئەوێن كو ل وێرێ بوون، چوونە نك پەترۆسی و گۆتێ: «ب راستی تۆ ژی ئێك ژ وانی، چنكو ژ زاراڤێ تە یا دیارە.» 74هنگی وی دەست ب نفرین و سویندخوارنێ كر و گۆت: «ئەز وی زەڵامی نانیاسم!» ئینا د ج‍‌ھ دا دیكلی بانگ دا. 75ئینا ئاخفتنا عیسای هاتە بیرا پەترۆسی دەمێ گۆتیێ: «بەری دیكل بانگ بدەت، تۆ دێ سێ جاران من ماندەل كەی.» پەترۆس دەركەفتە ژ دەرڤە و گریەكا تەحل كر.

Currently Selected:

مزگینیا مەتتای 26: BHD

Highlight

Copy