مزگینیا مەرقۆسی 15

عیسا ل نك پیلاتۆسی

(مەتتا 27‏:1‏-2، 11‏-14؛ لوقا 23‏:1‏-5؛ یوحەننا 18‏:28‏-38)

1دەمێ بوویە سپێدە، سەرۆكێن كاهنان و ریهسپی و مامۆستایێن دەستووری و جڤاتا بلند هەمی كەفتنە دانوستاندنێ، پاشی عیسا گرێ دا و بر و رادەستی پیلاتۆسی كر. 2ئینا پیلاتۆسی پرسیار ژێ كر: «ئەرێ تۆ پاشایێ جوهیانی؟» عیسای بەرسڤا وی دا: «تە ب خۆ گۆت.» 3سەرۆكێن كاهنان ئەو ب گەلەك تشتان تاوانبار كر. 4پیلاتۆسی جارەكا دی پرسیار ژێ كر و گۆت: «ما تۆ چ بەرسڤان نادەی؟ گوهێ خۆ بدێ یێ چەند تاوانان ئاراستەی تە دكەن!» 5لێ عیسای چ بەرسڤێن دی نەدان و پیلاتۆس حێبەتی بوو.

دادكرنا عیسای ب مرنێ

(مەتتا 27‏:15‏-26؛ لوقا 23‏:13‏-25؛ یوحەننا 18‏:39 تاكو 19‏:16)

6ژ نەریتێن پیلاتۆسی ئەو بوو ل هەر جەژنەكێ گرتیەكی كو خەلك دخوازیت، ئازاد بكەت. 7زەڵامەكێ زیندانكری ب ناڤێ باراباس هەبوو ل گەل كۆمەكا تێكدەران، ئەوێن د دەمێ یاخیبوونێ دا كوشتن كری. 8جەماوەر هات و داخواز ژ پیلاتۆسی كر، كو وێ بكەت ئەوا هەردەم بۆ وان دكر، 9ئینا گۆتە وان: «ئەرێ هەوە دڤێت ئەز پاشایێ جوهیان بۆ هەوە ئازاد بكەم؟» 10چنكو وی دزانی سەرۆكێن كاهنان ژ زكڕەشی عیسا رادەستی وی كریە. 11لێ سەرۆكێن كاهنان جەماوەر ئازراند بۆ داخوازا ئازادكرنا باراباسی ل شوینا عیسای. 12ئەڤجا پیلاتۆسی دیسان پرسیار ژ وان كر: «پا هەوە دڤێت ئەز چ ل وی بكەم یێ هوین دبێژنێ پاشایێ جوهیان؟» 13ئینا ل قێڕیان دان و گۆتن: «ل خاچێ بدە!» 14پیلاتۆسی گۆتە وان: «ما ئەڤی چ خرابی كریە؟» ئینا قێڕیێن وان بلندتر لێ هاتن: «ل خاچێ بدە!» 15لێ چنكو پیلاتۆسی دڤیا جەماوەری رازی بكەت، ئینا باراباس بۆ وان ئازاد كر و عیسا قامچی دا، پاشی رادەستی وان كر داكو بهێتە خاچدان.

سەرباز تڕانەیان ب عیسای دكەن

(مەتتا 27‏:27‏-31؛ یوحەننا 19‏:2‏-3)

16پاشی سەربازان عیسا برە د ناڤ حەوشا كۆچكا والی دا و هەمی بەتالیون#15‏:16 بەتالیون: ئانكو فەوج گازی كر، دا كۆم ببن. 17وان كوركەكێ بنەفشی#15‏:17 ل وی سەردەمی جلكێن بنەفشی گەلەك بهاگران بوون و ژ لایێ كەسوكارێن پاشای ڤە دهاتنە ل بەر كرن. كرە بەر و تانجەك ژ ستریان ڤەهاند و دانا سەر سەرێ وی 18و دەست ب سڵاڤكرنێ ل وی كر و گۆت: «بژی پاشایێ جوهیان!» 19ب لەڤەنەكی ددانا سەرێ وی و تف دكرێ و چۆكڤەدان و بۆ وی سوجدە دبرن. 20پشتی تڕانە پێ كرین، كوركێ بنەفشی ژ بەر كر و جلكێن وی كرنە بەر و برە ژ دەرڤە، دا ل خاچێ بدەن.

عیسا ل سەر خاچێ

(مەتتا 27‏:32‏-44؛ لوقا 23‏:26‏-43؛ یوحەننا 19‏:17‏-27)

21زەڵامەكێ قەیرەوانی ب رێكا خۆ ژ ئاقاری دهات، ناڤێ وی شەمعون بوو و بابێ ئەسكەندەری و روفۆسی بوو. وان ئەو نەچار كر كو خاچا عیسای هەلگریت. 22عیسا ئینا وی جهێ دبێژنێ گۆلگۆتە (كو رامانا وی كلۆخە) 23و بۆ وی شەرابەكا تێكهەل ل گەل موڕێ#15‏:23 موڕ: روینەكێ بێهنخۆشە. ل فەرهەنگۆكێ بنێڕە. ئینا، لێ وی ڤەنەخوار. 24ئەو ل خاچێ دا و جلكێن وی ل خۆ لێكڤەكرن، ب هاڤێتنا پشكێ، دا هەر ئێك بەهرا خۆ بزانیت.#15‏:24 زەبوور 22‏:18 25دەمژمێر نەهێ رۆژێ بوو، دەمێ ل خاچێ دای. 26ل سەر دەپەكی تاوانا وی هۆسا هاتبوو نڤیسین: «پاشایێ جوهیان» 27و دوو قاچاخ ژی ل گەل وی ل خاچێ دان، ئێك ل لایێ وی یێ راستێ و یێ دی ل لایێ وی یێ چەپێ. 28ئەو نڤیسار ژی ب ج‍‌ھ هات: «ل گەل تاوانباران هاتە هژمارتن.»#15‏:28 ئیشایا 53‏:12 29یێن كو د وێرێ را دهاتن و دچوون ئەو كرێت دكر و سەرێ خۆ لێ دهەژاند و دگۆت: «ها! هەی ئەوێ دا پەرستگەهێ د سێ رۆژان دا هەڕفینیت و ئاڤا كەتەڤە! 30ژ خاچێ وەرە خوار و خۆ قورتال بكە!» 31هەروەسا سەرۆكێن كاهنان ل گەل مامۆستایێن دەستووری ژی تڕانە پێ دكرن و دگۆتنە ئێكودوو: «هندەكێن دی قورتال كرن، لێ نەشێت خۆ قورتال بكەت! 32بلا مەسیح، پاشایێ ئیسرائیلێ، ژ خاچێ بهێتە خوارێ، دا ببینین و باوەریێ پێ بینین!» هەروەسا ئەوێن ل گەل وی هاتینە خاچدان ژی ئەو فهێت دكر.

مرنا عیسای

(مەتتا 27‏:45‏-56؛ لوقا 23‏:44‏-49؛ یوحەننا 19‏:28‏-30)

33دەمێ بوویە دەمژمێر دوازدەی نیڤرۆ، ژ وی دەمی تا دەمژمێر سێ، تاریاتیێ هەمی ئەرد گرت. 34ل دەمژمێر سێ، عیسای ب دەنگەكێ بلند كرە هەوار: «ئێلۆیی، ئێلۆیی، لەما ساباختانی؟» رامانا وێ ئەوە كو: «خودایێ من، خودایێ من، بۆچی تە ئەز هێلام؟»#15‏:34 زەبوور 22‏:1 35هندەك ژ ئامادەبوویان گو‍‌ھ ل وی بوو و گۆتن: «ئەڤە ئەو یێ گازی ئلیاسی دكەت!» 36ئێكی كرە غار و ئیسفەنجەك د سهكێ#15‏:36 سهك: ب عەرەبی ‹خەل› هەلاند و دانا سەر لەڤەنەكی و گەهاندە وی دا ڤەخۆت و گۆت: «بهێلن دا ببینین كا دێ ئلیاس هێت وی ئینیتە خوار؟» 37عیسای ب دەنگەكێ بلند كرە قێڕی و گیانێ خۆ ژ دەست دا. 38پەردەیا پەرستگەهێ ژ سەری تا بنی شەق بوو و بوو دوو پارچە. 39سەرلەشكەر بەرامبەر خاچێ یێ راوەستیای بوو و دەمێ دیتی كا چەوا عیسای گیان ژ دەست دا، گۆت: «ب راستی، ئەڤ مرۆڤە كوڕێ خودێ بوو.» 40هەروەسا هندەك ژنكان ژ دویر ڤە بەرێ خۆ ددایێ، مەریەما مەجدەلی و مەریەما دایكا هەردوو برا یەعقوبێ بچویك و یوسی، هەروەسا سالومە ژی د ناڤ وان دا بوون، 41ئەوێن ل جەلیل ب دویڤ كەفتین و خزمەتا وی كری، ژبلی وان گەلەك ژنكێن دی ژی بوون یێن ل گەل وی سەركەفتینە ئورشەلیمێ.

ڤەشارتنا عیسای

(مەتتا 27‏:57‏-61؛ لوقا 23‏:50‏-56؛ یوحەننا 19‏:38‏-42)

42دەمێ بوویە ئێڤار، ژ بەر كو رۆژا ئامادەكرنێ#15‏:42 ل فەرهەنگۆكێ بنێڕە رۆژا ئامادەكرنێ. بوو، ئانكو رۆژا بەری شەمبیێ، 43یوسڤێ ئاریمەتیایی#15‏:43 ئاریمەتیا: ناڤێ كەڤنێ باژێڕێ ‹رامە›یە. هات، ئەو ژی ئەندامەكێ رێزدار بوو د ناڤ جڤاتا بلند دا و چاڤەڕێیا پاشایەتیا خودێ دكر، وی مێرانی كر و چوو نك پیلاتۆسی و داخوازا تەرمێ عیسای ژێ كر. 44پیلاتۆس گوهشی بوو كو ئەو هۆسا زوی مر و گازی سەرلەشكەری كر و ژێ پرسی: «ئەرێ راستە ئەو هۆسا زوی مریە؟» 45و دەمێ ژ سەرلەشكەری زانی، رێ دا یوسڤی تەرمێ عیسای ببەت. 46وی پارچەیەكا كتانی كڕی و تەرم ژ خاچێ ئینا خوارێ و ب وی كتانی كفن كر و دانا د گۆڕەكێ#15‏:46 ل فەرهەنگۆكێ بنێڕە گۆڕ. د كەڤری كۆلای دا و بەرەك گڕێل كرە بەر دەرێ گۆڕی. 47مەریەما مەجدەلی و مەریەما دایكا یوسی دیت، كا ل كیڤە هاتە دانان.

Currently Selected:

مزگینیا مەرقۆسی 15: BHD

Highlight

Copy