مزگینیا مەرقۆسی 2
2
ساخكرنا فاڵنجیەكی ل كەفەرناحومێ
(مەتتا 9:1-8؛ لوقا 5:17-26)
1پشتی چەند رۆژان، عیسا ڤەگەڕیا ڤە باژێڕێ كەفەرناحوم، خەلكی گو‍‌ھ لێ بوو كو ئەو یێ ل مال. 2ئینا گەلەك ژ وان لێ كۆم بوون تا ل بەر دەری ژی جهی نەدكر، ئەوی ژی پەیاما خودێ بۆ وان رادگەهاند. 3هندەك هاتن و فاڵنجیەك د گەل دا بوو و چوار زەڵامان هەلگرتبوو، 4لێ ژ بەر بۆشاتیێ، نەدشیان نێزیكی وی ببن و چوونە وی جهێ عیسا تێدا و بان كون كر و مرۆڤێ فاڵنجی ب نڤین ڤە داهێلا خوارێ. 5دەمێ عیسای باوەریا وان دیتی، گۆتە یێ فاڵنجی: «كوڕێ من، ل گونەهێن تە هاتە بورین!»
6هندەك مامۆستایێن دەستووری د ناڤ وان دا د روینشتی بوون و د دلێ خۆ دا دگۆتن: 7«چەوا ئەڤ زەڵامە ئاخفتنەكا هۆسا دبێژیت؟ ئەو یێ كوفریان دكەت! ما كی ژ خودێ پێڤەتر دشێت ل گونەهان ببوریت؟» 8د ج‍‌ھ دا عیسای ب گیانێ خۆ زانی ئەو چ هزر دكەن، ئەڤجا گۆتە وان: «بۆچی هوین هۆسا د دلێ خۆ دا هزران دكەن؟ 9كیژ ژ ڤان ب ساناهیترە، كو مرۆڤ بۆ ڤی فاڵنجی بێژیت: ‹ل گونەهێن تە هاتە بورین› یان بێژیت: ‹رابە نڤینێن خۆ هەلگرە و بڕێڤە هەڕە›؟ 10لێ ئەز دێ بۆ هەوە سەلمینم كو كوڕێ مرۆڤ#2:10 كوڕێ مرۆڤ: ناڤەكە د ناڤ جوهیان دا یێ بەرنیاس بوو، ژ بەر كو د پەرتووكا دانیێل پێغەمبەری دا هەیە دانیێل 7:13-14 دەمێ عیسای ب كار دئینا، وی بەحسێ خۆ دكر. ل فەرهەنگۆكێ بنێڕە. ل سەر ئەردی دەستهەلاتا هەی ل گونەهان ببوریت،» ئەڤجا گۆتە یێ فاڵنجی: 11«دبێژمە تە: رابە و نڤینێن خۆ هەلگرە و هەڕە مالا خۆ.» 12د گاڤێ دا ئەو زەڵام رابوو و نڤینێن خۆ هەلگرتن و ل پێش چاڤێن هەمیان دەركەفت. ئینا هەمی گوهشین و پەسنا#2:12 پەسن: مەدح و سەنا خودێ دكر و دگۆتن: «مە چ جاران وەكو ڤی تشتی نەدیتیە!»
عیسا گازی لێڤی دكەت
(مەتتا 9:9-13؛ لوقا 5:27-32)
13جارەكا دی عیسا دەركەفتە كنارێ دەریاكێ. هەمی خەلك هاتنە نك وی و ئەوی دەست ب فێركرنا وان كر. 14دەمێ ئەو بڕێڤە دچوو، لێڤی یێ كوڕێ حەلفی دیت ل جهێ باج وەرگرتنێ یێ روینشتی بوو، عیسای گۆتێ: «ب دویڤ من بكەڤە.» ئەو رابوو و ب دویڤ وی كەفت. 15دەمێ عیسا ل سەر سفرێ ل مالا لێڤی، گەلەك باجگر و گونەهكارێن دی ل گەل وی و شاگردێن وی د روینشتی بوون، چنكو ئەوێن ب دویڤ وی كەفتین گەلەك بوون. 16دەمێ مامۆستایێن دەستووری یێن فەریسی، دیتی عیسا یێ ل گەل گونەهكار و باجگران خوارنێ دخۆت، گۆتنە شاگردێن وی: «بۆچی ل گەل باجگر و گونەهكاران خوارنێ دخۆت؟» 17دەمێ عیسای گو‍‌ھ لێ بووی، گۆتێ: «مرۆڤێن ساخلەم پێدڤی ب نۆژداری نینە، لێ مرۆڤێن نەساخ. ئەز نەهاتیمە گازی مرۆڤێن راستدار#2:17 راستدار: ئەو كەسە یێ كریارا وی یا راست و دروست بیت. بكەم، لێ یێن گونەهكار.»
پرسیار دەربارەی رۆژیێ
(مەتتا 9:14-17؛ لوقا 5:33-39)
18شاگردێن یوحەننای و فەریسی ب رۆژی بوون، ئەڤجا هندەك مرۆڤ هاتنە نك عیسای و گۆتنێ: «بۆچی شاگردێن فەریسیان و شاگردێن یوحەننای رۆژیان دگرن، لێ شاگردێن تە ناگرن؟» 19گۆتە وان: «ئەرێ ما داخوازكریێن داوەتێ دشێن ب رۆژی بن، هێشتا زاڤا د ناڤ وان دا؟ هندی زاڤا د ناڤ وان دا بیت، ئەو نەشێن ب رۆژی بن. 20لێ رۆژ دێ هێن، زاڤا دێ ژ ناڤ وان هێتە راكرن، هنگی ل وێ رۆژێ ئەو دێ رۆژیان گرن. 21كەس جلكەكێ كەڤن ب پاتەكێ ل ئاڤێ نەدای#2:21 هنگی دەمێ پەڕوكێ نوی دهاتە شویشتن، بچویكتر لێ دهات و تێك دچوو، لەوما بەری بهێتە دروین، ل ئاڤێ ددا، دا ئێدی بچویك نەببا. پنی ناكەت، نەكو پاتەیێ نوی تێك بچیت و ژ جلكێ كەڤن بكێشیت و كون خرابتر لێ بهێت. 22كەس ژی شەرابا نوی ناكەتە مەشكێن كەڤن، ئەگەر وە كر شەراب دێ مەشكان پەقینیت و شەراب دێ هێتە رشتن و مەشك ژی دێ پویچ بن. لێ شەرابا نوی دكەنە مەشكێن نوی.»
خودانێ شەمبیێ
(مەتتا 12:1-8؛ لوقا 6:1-5)
23د شەمبیێ دا، عیسا د ناڤ دەخلان را دبوری و شاگردێن وی بڕێڤە دەست ب گولیكرنێ كر. 24ئینا فەریسیان گۆتە وی: «بەرێ خۆ بدێ، بۆچی ئەو وێ دكەن، ئەوا نە رەوایە د شەمبیێ#2:24 بۆ جوهیان رۆژەكا تایبەت و پیرۆزە و كار تێدا ناهێتە كرن. ل فەرهەنگۆكێ بنێڕە رۆژا شەمبی. دا بهێتە كرن؟» 25گۆتە وان: «ما هەوە قەت ئەو نەخواندیە كا داوودی چ كر، دەمێ ئەو و یێن ل گەل وی كەفتینە هەوجەییێ و برسی بووین، 26چەوا ل سەردەمێ ئەبیاتارێ سەرۆككاهن، ئەو چوو د مالا خودێ ڤە و نانێ پێشكێشیێ خوار و دا یێن ل گەل خۆ ژی، هەر چەندە ژبلی كاهنان نە رەوایە كەس ژێ بخۆت؟»#2:26 پەرستن و پیرۆزی 24:9؛ 1 ساموئێل 21:1-6 27و وی گۆتە وان: «شەمبی ژ پێخەمەت مرۆڤان یا هاتیە چێكرن، نە مرۆڤ ژ پێخەمەت شەمبیێ. 28ئەڤجا كوڕێ مرۆڤ خودانێ شەمبیێیە ژی.»
Currently Selected:
مزگینیا مەرقۆسی 2: BHD
Highlight
Share
Copy
Want to have your highlights saved across all your devices? Sign up or sign in
All rights reserved.
