Jan 16

1«M-pa tar nəənn marəse bba karə ə-tusuje mə-kunn ləse inyaje ang. 2Dâ tubbase kəy mbɔn-naanje tə̂. Kar aw ddee karə dəw kə̂ tɔlse a, əjə to polo â naw polo Lubba. 3Dâ ddaje nɛ̂njeenn mba n̂-gərəje Bɔ ang ddəm n̂-gərəmje ang ddəm. 4M-pa marəse kete ta bbo karɛ̂ tee a, oleje məse to m-pa marəse mban.»

Kula lə Ndil-mə-nda

«M-pa tar nəənn marəse kunn-kute tə̂ ang, mba m-nayn kə se bbay. 5Bbasinɛn maw maw kə rɔ dəw tə̂ kə̂ ulam, a dəw kâra kə̂ nje-dujum nan aw kə̂ dda wa goto tokə baânn wa? 6A rɔse nəəlse ang nya mba tar kə̂ m-pa marəse le. 7To tar kə̂ tɔkɔrɔ njaa â m-pa marəse. Maw a, a ddase maji nya. Mba bbo maw ang a, Nje-kumanse le a ddee rɔse tə̂ ang. A bbo maw a, mâ kulɛ̂ karəse. 8Bbo n̂-ddee a, nâ tɔju dəwje kə̂ duninya tə̂ nəənn karə n̂-gərəje nɛ̂n kə̂ ria nan majang, nɛ̂n kə̂ gatə gatə ddəm nɛ̂n kə̂ to sariya lə Lubba ddəm. 9Nâ tɔjude karə n̂-gərəje nɛ̂n kə̂ ria nan majang, mba dooje məde tə̂ səm ang. 10Nâ tɔjude karə n̂-gərəje nɛ̂n kə̂ gatə gatə, mba maw maw kə rɔ Bɔ tə̂ ngaâ â koomje ang ngaa. 11Nâ tɔjude karə n̂-gərəje nɛ̂n kə̂ ria nan sariya lə Lubba, mba Lubba gangə sariya dɔ nje-kɔn dɔ duninya tə̂ nəənn mban.

12«Tar to nya ta pa karəse bbay, a kə̂ bbasinɛn nəənn, â kasəje ta gərə kandɛ̂ tɔyn ang. 13Bbo Ndil tar kə̂ tɔkɔrɔ le ddee a, nâ tɔjuse nɛ̂n kə̂ tɔkɔrɔ tɔyn. Tar kə̂ məɛ̂ tə̂ njaa â nâ pa ang. Tarje tɔyn kə̂ noo â nâ pa ngaâ nâ pa nɛ̂nje kə̂ a ta ddeeje karəse. 14Nâ tɔju piti ləm kə ddaka, mba nâ kunn nɛ̂nje tɔyn kə̂ m-tɔjuse ta pa karəse. 15Nɛ̂nje lə Bɔmje tɔyn to nɛ̂nje ləm tɔ. Mba yeenn bba, m-pa nan, nâ kunn nɛ̂nje tɔyn kə̂ m-tɔjuse ta pa karəse.

16«Ngaji a, â koomje ang ngaa. Ngaâ, goe tə̂ ngaji bbay a, â təl koomje bbay.» 17Yeenn ngaâ marə njê-njaje go Jeju tə̂ le paje horo naan tə̂ nan: «N̂-pa nan: ‹Ngaji a, â koomje ang. Ngaâ ngaji a, â təl koomje.› N̂-pa bbay nan: ‹Maw maw kə rɔ Bɔ tə̂. Yeenn nan ddi â nəənn wa?› 18Tar kə̂ n̂-pa nan: ‹Ngaji› nəənn, nâ ta pa nan ddi â nəənn wa? N-gərə nɛ̂n kə̂ nâ ta pa nəənn ang.»

19 Jeju gərə to njê-njaje goe tə̂ le a ta dujeje tar. Yeenn ngaâ n̂-pa narəde nan: «M-pa marəse m-pa nan: ‹Ngaji a, â koomje ang ngaa. Ngaâ ngaji a, â təl koomje.› Mba tar nəənn le â, aw dujuje nɛ̂n naan tar wa? 20Tɔkɔrɔ njaa m-pa marəse, â nɔnje ddəm â kəmje rɔse ddəm a rɔ dəwje kə̂ duninya tə̂ a nəəlde. Kəmse a to ndoo, a kəm-to-ndoo ləse le a təl to rɔ-nəəl. 21Bbo dɛnɛ̂n a ta kuju a, noo ndoo mba kar koo ndoo laa â asə. A bbo nuju mban a, məɛ̂ oy dɔ ndoo kə̂ noo le. Rɔɛ̂ nəəle mba nuju dəw nilɛ̂ duninya tə̂. 22Sese kara, bbasinɛn rɔse nəəlse ang. A mâ təl koose. Rɔ-nəəl ləse a kuta dɔɛ̂ ngaâ dəw kâra a kasə kɔru rɔ-nəəl ləse le kə ddang ang.

23«Dɔ ndɔɛ̂ tə̂ənn le, â dujumje tar dɔ marə nɛ̂n tə̂ kâra ang ngaa. Tɔkɔrɔ m-pa marəse, nɛ̂n tɔyn kə̂ ə-dujuje Bɔ kə rim a, nâ karəse. 24Ndərəng bbokənɛn nəənn, ə-dujuje marə nɛ̂n kâra kə rim ang bbay. Ə-dujuje nɛ̂n a, â kingaje bba karə rɔ-nəəl ləse asə loe.

25«Gusu-tar â m-pa nɛ̂n tarje nəənn le tɔyn marəse. A tee marə kar tə̂ a, mâ pa tar karəse ddəw gusu-tar tə̂ ang ngaa. Mâ pa tar dɔ Bɔy tə̂ kə ddaka karəse. 26Dɔ ndɔɛ̂ tə̂ənn, â dujuje nɛ̂n Bɔy kə rim. A m-pa marəse: Mâ duju Bɔy mba tar ləse ang, 27mba Bɔy le njaa ndikise. N̂-ndikise mba ə-ndikimje ngaâ ooje məse tə̂ mban to min rɔ Lubba tə̂ bba m-ddee. 28Min rɔ Bɔy tə̂ bba m-ddee duninya tə̂. Bbasinɛn, maw minya duninya ta təl kə rɔ Bɔy tə̂.» 29Njê-njaje go Jeju tə̂ le paje arɛ̂je nan: «Bbasinɛn aw pa tar kə ddaka arə ujaje ngaa, bbo ə-pa kə gusu-tar ang. 30Bbasinɛn n-gərə to ə-gərə nɛ̂n tɔyn bbo asə karə dəw duji tar ang. Mba yeenn bba, joo məje tə̂ to in rɔ Lubba tə̂ bba ə-ddee.» 31Jeju ilade tə̂ nan: «Bbasinɛn ooje məse tə̂ ngaa wa? 32Ooje! Kar aw ddee. Kar le ddee mban karə ə-sarɛnje naan kâra kâra, ta â kinyamje kə karəm baa. A m-nayn kə karəm ang, mba Bɔy ee səm. 33M-pa nɛ̂njeenn tɔyn marəse karə məse wul lɔm ddəw tə̂ ləm. A kooje ndoo duninya tə̂. A maji karə uwaje arəje ngəng, mba əman m-tətə duninya nəənn kə ddɔ mban.»

Currently Selected:

Jan 16: KabbaDkS

Highlight

Copy