Jan 17

Jeju duju Lubba mba njê-njaje goe tə̂

1Go tar tə̂ kə̂ Jeju pa baann le a, aa lo kə darâ ngaâ pa nan: «Bɔy, kar le asə ngaa. Ə-piti Ngonni, arə Ngonni kara pitii tɔ. 2Mba arə Ngonni singa dɔ dəwje tə̂ tɔyn, karə dəwje kə̂ ungude mə jia tə̂ le, narəde təbbə kə̂ to kə ndɔ kə ndɔ. 3Təbbə kə̂ to kə ndɔ kə ndɔ le, to karə n̂-gərije, əi kâra baa kə̂ ə-to Lubba kə̂ tɔkɔrɔ ddəm Jeju-Kristə kə̂ ulɛ̂ ddəm. 4M-pitii dɔ nangə tə̂. M-dda kula kə̂ arəm karə m-dda le m-tunga. 5Bbasinɛn nəənn, Bɔy, ə-pitim lo tə̂ kə̂ ee tə̂ kə piti kə̂ aw pitim nɛ̂n mbɔri tə̂ kete bba duninya to le. 6M-dda marə dəwje kə̂ ə-mbərəde horo marɛ̂je tə̂ duninya tə̂ ungude mə jim tə̂ le gərije. N̂-toje to dəwje ləi â ungude mə jim tə̂ ngaâ n̂-ddaje nɛ̂n kə turu ndui. 7Bbasinɛn n̂-gərəje to nɛ̂nje tɔyn kə̂ arəm inje jii tə̂, 8mba m-ndaji tar kə̂ ə-pa arəm marəde ngaâ n̂-taaje. N̂-gərəje to min rɔi tə̂ bba m-ddee tokə tɔkɔrɔ ngaâ dooje məde tə̂ to əi â ulam.

9«Dede â maw duji mbade. Maw duji mba dəwje kə̂ duninya tə̂ nəənn ang, a maw duji mba dəwje kə̂ ungude mə jim tə̂, mba n̂-toje to dəwje ləi. 10Nɛ̂nje ləm tɔyn toje to ləi ngaâ nɛ̂nje ləi tɔyn toje to ləm. Minga piti ddəw nɛ̂nje tə̂ənn le. 11Mee duninya tə̂ ang ngaa, a dede deeje duninya tə̂ nəənn. Əman maw kə rɔi tə̂. Bɔ kə̂ maji tɔyn, maji karə ə-ngəmde ddəw singa tə̂ ləi, singa kə̂ arəm le karə n̂-toje kâra baa tokə əman je səi n-to kâra baa. 12Kar kə̂ m-nayn kə de bbay le, maw ngəmde ddəw singa tə̂ ləi kə̂ arəm. M-ngəmde marə dəw kâra horode tə̂ nayn kɔrɔ̂ ang. Bbayɛ̂ â to ne kə̂ nâ nayn kə kɔrɔ̂ le, yeenn bba karə tar kə̂ Makəturu tə̂ ləi ddee to tar kə̂ tɔkɔrɔ.

13«Bbasinɛn, maw maw kə rɔi tə̂. A maw pa tar be duninya tə̂ bba karə rɔ-nəəl kə̂ minga le dingaje məde tə̂ tɔ, rɔ-nəəl kə̂ asə loe njaa. 14M-pa tar ləi marəde ngaâ duninya mbətəde mba n̂-toje to dəwje kə̂ duninya tə̂ nəənn ang, ddəw kâra baa tokə əman m-to dəw kə̂ duninya tə̂ nəənn ang le. 15Maw duji karə ɔrude duninya tə̂ nəənn kə ddang ang. A ta karə ə-ngəmde bba karə Nje-mə-majang le dda marə nɛ̂n kə de ang. 16N̂-toje to dəwje kə̂ duninya tə̂ nəənn ang, tokə əman m-to dəw kə̂ duninya tə̂ nəənn ang le. 17Maji karə ə-dda arə n̂-ddeeje maji tɔyn ddəw tar tə̂ kə̂ tɔkɔrɔ: Tar ləi to tar kə̂ tɔkɔrɔ. 18Dede le, mulade duninya tə̂ tɔ tokə əi ulam duninya tə̂ le. 19Ngaâ, m-ngəm rɔm dang mbade, bba karə dede kara n̂-ngəmje rɔde dang ddəw tar tə̂ kə̂ tɔkɔrɔ. 20Maw duji mba tar ləde kə karəde baa ang, maw duju mba tar lə dəwje kə̂ a kooje məde tə̂ səm ddəw mbər tar tə̂ kə̂ dâ kilaje tɔ. 21M-duji karə dede tɔyn n̂-ddeeje to dəwje kə̂ kâra baa. Bɔy, maji karə n̂-ddaje mə-kâra kə je, ddəw kâra baa tokə əi ə-dda mə-kâra səm ngaâ əman m-dda mə-kâra səi le. Maji karə n̂-ddeeje to dəwje kə̂ kâra baa ddəw mə-kâra tə̂ kə̂ n̂-ddaje kə je, bba karə dəwje kə̂ duninya tə̂ gərəje to əi â ulam.

22«Ngaâ əman, marə dingaje piti kə̂ arə minga le tɔ bba karə n̂-ddeeje to dəwje kə̂ kâra baa, tokə əman je səi n-to kâra baa le. 23M-dda mə-kâra kə de ngaâ əi ə-dda mə-kâra səm. Baann bba dâ ddeeje kâra baa tokə tɔkɔrɔ, bba karə dəwje kə̂ duninya tə̂ gərəje to əi â ulam. Ngaâ, ə-ndikide tokə ə-ndikim. 24Bɔy, əi â arəm dəwje le, yeenn bba m-ndiki karə deeje səm lo tə̂ kə̂ mee tə̂. Baann bba karə dooje piti kə̂ ə-pitim, mba ə-ndikim kete bba ə-dda duninya. 25Bɔ kə̂ gatə gatə, dəwje kə̂ duninya tə̂ gərije ang. A əman m-gəri ngaâ njê-njaje gom tə̂ nəənn gərəje to əi â ulam. 26M-dda marə n̂-gərije ngaâ mâ dda karə n̂-təl n̂-gərije bbay bba karə ndiki kə̂ ə-ndikim to məde tə̂ ngaâ əman kara mee məde tə̂ tɔ.»

Currently Selected:

Jan 17: KabbaDkS

Highlight

Copy