Luku 10
10
Jeju ula njê-njaje goe tə̂ dɔsiri gire joo
1Goe tə̂ a, Əbbə-dəwje təl tɔru njê-njaje goe tə̂ dɔsiri gire joo horo marɛ̂je tə̂. Nulade joo joo nɔɛ̂n tə̂ kete karə dawje mə bbeje tə̂ kâra kâra kə loje tə̂ tɔyn kə̂ ne njaa n̂-ndiki ta kaw tə̂. 2N̂-pa narəde nan: «Kula kuja ko-ndɔɔ bo nya, a njê-kulɛ̂je banya ang. Yeenn a, maji karə ə-dujuje nje-ndɔɔ le arəje nula njê-kulaje karə dujaje ko-ndɔɔ laa le. 3Awje! Mulase tokə lə ngann batəje horo ənjakəmnjarje tə̂. 4Awje kə narɛ ang ddəm bbɔl ang ddəm nɛ̂n-gɔl ang ddəm. Ə-ddaje dəw lapiya kə ddəw ang ddəm.
5«Kəy kə̂ andəje tə̂ a, ə-paje nan: ‹Maji karə mə-wul-lɔm ddee mə kəy tə̂ nəənn!› 6Bbo dəw kə̂ ndiki mə-wul-lɔm to mə kəy tə̂ənn le a, mə-wul-lɔm ləse a nayn saa. A bbo, dəw kə̂ ndiki mə-wul-lɔm goto a, mə-wul-lɔm ləse a təl rɔse tə̂. 7Ə-naynje mə kəy tə̂ənn le, usaje nɛ̂n, ayje nɛ̂n kə̂ darəse, mba to tar lə dəw kə̂ dda kula ta kinga kuka laa. Andəje mə kəy tə̂ a, inje marə kəy tə̂ awje marɛ̂ tə̂ marɛ̂ tə̂ ang. 8Marə bbe kə̂ ə-teeje tə̂, a bbo n̂-taase kə rɔ-nəəl a, usaje nɛ̂n kə̂ darəse. 9Ajije njê-rɔ-toje kə̂ toje mə bbe tə̂ənn ta ə-paje arəje dəwje le tɔyn nan: ‹kɔn-mbay lə Lubba ddee ngɔsi kə se ngaa.› 10A bbo, ə-teeje marə bbe tə̂ ngaâ dəwje taase tə̂ kə rɔde tə̂ ang a, aw arje natâ ta ə-paje arəjede nan: 11‹Bum nangə kə̂ mə bbe tə̂ ləse kə̂ uwa gɔlje le njaa kara n-tunda jarə təl kə dɔse tə̂ ta kɔru nɛ̂n naji ləse, a maji karə ə-gərəje to kɔn-mbay lə Lubba ddee ngɔsi kə se#10:11 Luku 9:5 pa tar dɔɛ tə̂..› 12M-pa marəse, ddutu ndɔ a, sariya kə̂ dɔ bbe tə̂ənn a ngəng kuta sariya kə̂ dɔ Sɔdɔm tə̂ ləw.»
Bbeje kə̂ mbətəje ta kunn məde karə Jeju
13«To ndoo nya arəse, see dəwje kə̂ Korajɛn! To ndoo nya arəse, see dəwje kə̂ Betesayida! Nɛ̂n-mɔrije kə̂ m-dda horose tə̂ nəənn, bbo m-dda mə bbeje tə̂ kə̂ Tir kə Sidɔn â be a, ləw baa njaa dəwje kə̂ mə bbeje tə̂ənn a kula kubbu-ndoo ddəm dâ kisije dɔ bu-puru tə̂ ddəm ngaâ dâ turu məde. 14Mba yeenn le bba, ndɔ gangə sariya a, sariya kə̂ dɔse tə̂ a ngəng kuta sariya kə̂ dɔ Tir kə Sidɔn tə̂.
15«A əi, Kapɛrnawum, əjə to â kaw kə taar ndərəng kɔru dara wa? Â ddisi ndərəng lo tə̂ lə dəwje kə̂ oyje.» 16Jeju pa bbay nan: «Dəw kə̂ oo tar ləse a, to əman â noo tar ləm. Dəw kə̂ mbətəse a, to əman â n̂-mbətəm. Dəw kə̂ mbətəm a, ne kə̂ nulam â n̂-mbəte.»
Təl lə njê-njaje go Jeju tə̂ kə̂ dɔsiri gire joo
17Njê-njaje go Jeju tə̂ kə̂ dɔsiri gire joo le təlje kə rɔ-nəəl ngaâ paje nan: «Əbbə-dəwje, ndilje kə̂ maji ang njaa kara bbo junn ndu jarəde kə rii a, dulaje dɔde nangə̂ darəje.» 18Jeju ilade tə̂ nan: «Moo Satan kə̂ in darâ oso tokə lə ndi kə̂ aw təəl. 19Ooje: Marəse singa karə ə-njaje dɔ lije tə̂ ddəm dɔ nyije tə̂ ddəm dɔ singa-mɔngu tə̂ lə nje-baan tɔyn ddəm ngaâ marə nɛ̂n kâra kə̂ a kasə ta ddase maji ang goto. 20Yeenn a, maji karə ndilje kə̂ maji ang kə̂ ulaje dɔde nangə̂ arəse le â ə-ddaje rɔ-nəəle ang. A ə-ddaje rɔ-nəəl mba rise kə̂ Lubba dda mə Makəturu tə̂ darâ.»
Rɔ-nəəl lə Jeju
21Mə kar tə̂ənn njaa, Ndil-mə-nda arə rɔ-nəəl uta dɔ Jeju ngaâ pa nan: «Mɔsu gajii Bɔy, Əbbə-dəwje, əi kə̂ ɔn dɔ dara ddəm nangə ddəm mba iya nɛ̂nje nəənn le njê-kəm-karɛje ddəm njê-nɛ̂n-gərəje ddəm. A ə-tɔju nɛ̂njeenn le dəwje kə̂ toje to dəwje kə̂ ngaji baa. Tɔkɔrɔ, Bɔy, mba əi njaa ə-ndiki karə to tokə baann. 22Bɔy inya nɛ̂nje tɔyn mə jim tə̂. Dəw kâra gərə Ngonn le ang. Bɔ kâra baa â gəre. Dəw gərə Bɔ le ang. Ngonn le kâra baa â gəre, a dəw kə̂ Ngonn le ndiki ta tɔjɛ̂ Bɔ le bba a gərə Bɔ le tɔ.» 23N̂-turu rɔɛ̂ kə rɔ njê-njaje goe tə̂ ngaâ n̂-pa narəde kə karəde baa nan: «Maji arəse, sese kə̂ aw ooje nɛ̂n kə̂ aw ooje nəənn! 24Mba m-pa marəse, njê-kilaje mbər tar lə Lubba kə tɔkə mbayje nya ndikije ta koo nɛ̂n kə̂ aw ooje kə kəmse nəənn, a dooje ang. N̂-ndikije ta koo nɛ̂n kə̂ aw ooje kə mbise nəənn, a dooje ang.»
Tar ndiki Lubba kə tar ndiki dəwje
25Marə nje-gərə-Ndu in ar taar ngaâ duju tar Jeju mba nɛɛ̂n nɛ̂n. N̂-pa nan: «Nje-nɛ̂n-tɔju, ddi â mâ dda bba mâ kinga nɛ̂n təbbə kə̂ to kə ndɔ kə ndɔ wa?» 26Jeju ilɛ̂ tə̂ nan: «Tar ddi â n̂-dda Makəturu-Ndu tə̂ wa? Tar kə̂ ə-tura le pa nan ddi wa?» 27Nila Jeju tə̂ nan: «Maji karə ə-ndiki Əbbə-dəwje kə̂ to Lubba ləi kə məi tɔyn kə kəwn ləi tɔyn kə singai tɔyn kə kəjə ləi tɔyn ngaâ maji karə ə-ndiki nje-mari tokə da-rɔi njaa.» 28Jeju pa arɛ̂ nan: «Ila tə̂ kə dɔgɔlɛ̂ njaa. Ə-dda tokə baann a, â nayn kəm baa.»
Tar lə dəw kə̂ maji kə̂ Samari
29A nje-gərə-Ndu le aw sangə ddəw ta kɔru naji laa ngaâ duju tar Jeju nan: «Nje-marəm â to nân wa?»
30 Jeju ilɛ̂ tə̂ bbay nan: «Marə ndɔ, marə dingaw in Jerujalɛm aw kə Jeriko a, oso ji njê-bbokoje tə̂. N̂-bbokoje nɛ̂nje laa tɔyn ngaâ n̂-tundɛ̂je darə n̂-nayn ngɔsi ta koy bba n̂-tuseje dinyɛ̂je ngaâ dɔtuje. 31Marə nje-polo Lubba unn ddəw le ngaâ tuka gɔlɛ̂ dɔ dəw tə̂ le a, uja oso kete. 32Marə dəw kə̂ gəl Lebi tə̂ tee lo tə̂ənn le tɔ. Noo dəw le a, nuja noso kete. 33A marə dəw kə̂ Samari kə̂ aw aw kə mba tə̂ ddee ngɔsi kə dəw le ooe a, ddɛɛ̂ ndoo. 34N̂-təl n̂-ddee ngɔsi saa bbay, nungu ubbu kə bɛn kəm doje tə̂ laa ngaâ n̂-tɔ. Nunnɛ̂ nundɛ̂ dɔ kororo tə̂ laa njaa. Naw saa kəy-to-mbaje tə̂ ngaâ n̂-dda nɛ̂nje dang dang mba karə naji. 35Ndɔ kâra goe tə̂ a, n̂-tɔru kandə narɛ joo nungu ji nje-kəy tə̂ le ngaâ n̂-pa narɛ̂ nan: ‹Ə-ngəmɛ̂ kə majɛ̂. A bbo ə-tuju narɛ uta ye kə̂ mari nəənn a, tələm a, əman njaa mâ kuka.› » 36Jeju təl duju nje-gərə-Ndu le nan: «Horo dəwje tə̂ kə̂ mota nəənn, nâ bba to nje-mar dəw kə̂ oso ji njê-bbokoje tə̂ le wa?» 37Nje-gərə-Ndu le ilɛ̂ tə̂ nan: «To dəw kə̂ dda saa maji le.» Jeju pa nan: «Yeenn a, əi kara, aw ta ə-dda tokə baann tɔ.»
Jeju aw rɔ Martə de kə Mari tə̂
38Jeju kə njê-njaje goe tə̂ daw njaje ddəw-boô ngaâ n̂-gangə mə marə bbe tə̂, a marə dɛnɛ̂n ria nan Martə gangɛ̂. 39Ngokɔn Martə le kə̂ dɛnɛ̂n to, ria nan Mari. Ngokɔɛ̂n le ddee isi nɔn gɔl Əbbə-dəwje tə̂ aw oo tar laa. 40A kəjə ngann kulaje dang dang â uta dɔ Martə le. N̂-ddee rɔ Jeju tə̂ n̂-pa narɛ̂ nan: «Əbbə-dəwje, ngokɔnʼm kə̂ dɛnɛ̂n kə̂ inyam ta kula tə̂ kə karəm baa nəənn, osoi tə̂ ang wa? Ə-pa arə n̂-ddee numanʼm!» 41Əbbə-dəwje ilɛ̂ tə̂ nan: «Martə, Martə, aw jɔku rɔi ngaâ aw isa mba nɛ̂nje nya. 42A nɛ̂n kə̂ uta nɛ̂nje tɔyn kâra baa. Mari â mbərə nɛ̂n kə̂ maji nya le. Dəw a kɔru nɛ̂ɛnn le jia tə̂ ang.»
Currently Selected:
Luku 10: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA
