Luku 9
9
Jeju ula njê-kaw-kulaje laa kə̂ dɔku gire joo
1Jeju mbɔn njê-kaw-kulaje laa kə̂ dɔku gire joo ngaâ arəde singa ddəm singa kɔn-mbay ddəm karə n̂-tubbaje nɛ̂n ndilje kə̂ maji ang ddəm narəde singa kaji njê-rɔ-toje ddəm. 2Nulade karə dila mbər tar kɔn-mbay lə Lubba darə dəwje ddəm karə daji njê-rɔ-toje ddəm. 3N̂-pa narəde nan: «Unnje nɛ̂n kâra bba awje nɛ̂n ang. Unnje kakə wase bbɔl wase mapa wase narɛ ang. Awje kə kubbu-kul joo ang. 4Kəy njaa kə̂ andəje tə̂ a, ə-naynje tə̂ nyɔm ta ɔtuje nɛ̂n. 5Bbe kə̂ ə-teeje tə̂, â bbo dəwje taase kə kə̂y ang ngaâ â ta kɔtuje kə kete a, ə-tundaje bum nangə kə̂ gɔlse tə̂ ɔruje nɛ̂n naji ləse ta tɔju to n̂-ddaje majang#9:5 Tunda bum kə̂ gɔl tə̂ to nɛ̂n-dda kə̂ tɔju to njê-njaje go Jeju tə̂ le, marə nɛ̂n kə̂ osode tə̂ bbe tə̂ənn le goto ngaa. N̂-ndikije karə marə nɛ̂n kə̂ bbe tə̂ənn ngaji njaa nayn rɔde tə̂ ang. Bum kə̂ bbe tə̂ənn njaa kara n̂-ndikije karə uwa gɔlde ang..» 6Njê-kaw-kulaje lə Jeju le awje ngaâ n̂-njaje kə bbe bbe, n̂-paje Tar kə̂ Maji darəje dəwje ngaâ dajije nje-rɔ-toje tɔ.
Erodə əjə tar dɔ Jeju tə̂
7 Erodə kə̂ to nje-kɔn-bbe oo tar nɛ̂nje tɔyn kə̂ aw nja le a, əjə tar, mba marə dəwje paje nan: «Jan kə̂ oy le â ndol.» 8Marɛ̂je paje nan: «Eli â unda lo tee.» A marɛ̂je paje bbay nan: «Marə nje-kila mbər tar lə Lubba kâra horo marɛ̂je tə̂ kə̂ oyje ləw le â ndol.» 9A Erodə pa nan: «Jan le, əman njaa munn ndu marə n̂-gangə dɔɛ̂ mban. A dəw nəənn to nân bba maw moo tarje dang dang dɔɛ̂ tə̂ nəənn wa?» Yeenn bba n̂-sangə ddəw ta koo Jeju le.
Jeju arə nɛ̂n-kusa dəwje doro min
10 Njê-kaw-kulaje lə Jeju le təlje ngaâ n̂-paje tar nɛ̂nje tɔyn kə̂ n̂-ddaje darɛ̂. Jeju ɔrude kə karəde baa aw kə de ddəw əw, ər kə tɔkə bbe tə̂ kə̂ ria nan Betesayida. 11A dəwje kə̂ banya le gərəje tarɛ̂ ngaâ ɔruje goe. Jeju taade kə rɔɛ̂ tə̂ ngaâ pa tar kɔn-mbay lə Lubba arəde ddəm aji njê-rɔ-toje kə̂ ndikije karə najide ddəm.
12Lo aw ndul ngaâ njê-kaw-kulaje lə Jeju ngəsəje kə rɔɛ̂ tə̂ paje arɛ̂je nan: «Ə-tubba dəwje kə̂ banya nəənn arə daw toje dɔ-ndɔɔ̂ kə ngann bbeje tə̂ kə̂ ngɔsi nəənn ta dinga nɛ̂n-kusa, mba lo kə̂ jar tə̂ nəənn to mə kɔr baa.» 13A Jeju pa arəde nan: «Sese njaa arəjede nɛ̂n dusaje.» Dilaje tə̂ nan: «Mapa min kə kanjije joo baa â to. Ə-ndiki ta karə jeje njaa jaw ndoko nɛ̂n-kusa jarə dəwje kə̂ banya nəənn wa?» 14Dingawje eeje lo tə̂ənn ngɔsi kə doro min. Jeju pa arə njê-njaje goe tə̂ nan: «Arəje disije dɔ naan tə̂ dɔmin dɔmin.»
15Njê-njaje goe tə̂ le arəje dəwje le isije nangə̂ tokə ndue pa le. 16Jeju jin mapa kə̂ min kə kanji kə̂ joo le, naa lo kə darâ ngaâ narə wooyo Lubba. N̂-tətə dannâ ngaâ n̂-kayn njê-njaje goe tə̂ karə kayn dəwje kə̂ banya le. 17Dəwje le tɔyn usaje arə məde ndann, a kəsə nɛ̂n-kusa nayn baa, ddusu karɛ dɔku gire joo.
Piyɛr pa nan Jeju to Kristə le
18Marə ndɔ, Jeju ɔru rɔɛ̂ aw duju Lubba ngaâ njê-njaje goe tə̂ mbɔnje naan rɔɛ̂ tə̂ a, n̂-dujude nan: «Dəwje aw paje nan m-to nân wa?» 19Dilɛ̂je tə̂ nan: «Nan ə-to Jan-Batisi, marɛ̂je paje nan ə-to Eli, marɛ̂je bbay paje nan ə-to marə nje-kila mbər tar lə Lubba kə̂ ləw horo marɛ̂je tə̂ kə̂ oyje â ə-ndol.» 20Jeju dujude nan: «A sese ə-paje nan m-to nân wa?» Piyɛr ilɛ̂ tə̂ nan: «Ə-to Kristə lə Lubba le.» 21Jeju ndɔru mbide nya karə n̂-pa tar nəənn le darə dəw oo ang.
Jeju pa tar nɛ̂n kəm-to-ndoo kə̂ a ddɛɛ̂
22Jeju pa bbay nan: «Maji karə Ngonn lə dəw oo ndoo nya, maji karə tɔkəje lə Jiipije kə mbayje lə njê-poloje Lubba kə njê-gərəje-Ndu mbəteje, maji karə n̂-tɔlɛ̂je ngaâ ndɔ mota goe tə̂ a, n̂-ndol.» 23N̂-pa narəde tɔyn nan: «Bbo dəw ndiki ta kuwa gom a, maji karə nəjə rɔɛ̂ ang. Maji karə noto kakə-dəsə laa kə ndɔ ndɔ bba ta nuwa gom. 24Dəw kə̂ ndiki ta ngəm təbbə laa a, təbbə laa le a goto. A dəw kə̂ a koy mba tar ləm, dəw le a kaji təbbə laa. 25Bbo dəw inga nɛ̂n kə̂ duninya nəənn tɔyn, â bbo təbbə laa nayn kə kɔrɔ̂ wase ne njaa n̂-tuju rɔɛ̂ a, ddi bba nâ kinga goe tə̂ wa? 26Tɔkɔrɔ, dəw kə̂ dda rɔ-kul ləm kə rɔ-kul tar ləm a, Ngonn lə dəw a dda rɔ-kul laa ndɔ tə̂ kə̂ nâ ddee kə piti laa kə piti lə bɔɛ̂je kə lə anjəje kə̂ maji tɔyn. 27M-pa marəse, kə̂ tɔkɔrɔ, marə dəwje horo dəwje tə̂ kə̂ arje nəənn a koyje ang ndərəng dâ kooje kɔn-mbay lə Lubba.»
Piyɛr kə Jan kə Jakə dooje Jeju piti tə̂ laa
28Ndɔ jijoo go tarje tə̂ənn le a, Jeju aw kə Piyɛr kə Jan kə Jakə dɔ ər tə̂ mba duju Lubba. 29Kar tə̂ kə̂ naw duju Lubba a, kəmɛ̂ turu to dang ngaâ kubbuje laa kara turu nda kayn kayn. 30Dəwje joo eeje tə̂ənn kə̂ aw paje saa tar: To Mɔyijə de kə Eli. 31Piti lə Lubba to dɔde tə̂ ngaâ daw paje tar koy lə Jeju Jerujalɛm kə̂ a ddee to nɛ̂n kə̂ tɔkɔrɔ. 32Bbi tɔl Piyɛr kə njê-marɛ̂je le. A n̂-ndolje a, dooje piti lə Jeju ngaâ dooje dingawje joo kə̂ arje mbɔrɛ̂ tə̂ le. 33Kar tə̂ kə̂ dəwje kə̂ joo le aw inyaje Jeju ta kɔtu a, Piyɛr pa arə Jeju nan: «Nje-nɛ̂n-tɔju, maji laa boy â jee nəənn. Ja dda ngann kəy-kamje mota: kâra to ləi, kâra to lə Mɔyijə, a kâra to lə Eli.» Piyɛr gərə nɛ̂n kə̂ aw pa le ang.
34Naw pa tar baann le a, mum ddee kiride ngaâ bbəəl dda njê-njaje go Jeju tə̂ kar tə̂ kə̂ mum le aw dibbi dɔde. 35Marə ndu bbar mə mum tə̂ le pa nan: «Dəw nəənn to Ngonnəm kə̂ m-mbəre, ooje tɛɛ̂.» 36Kar tə̂ kə̂ ndu le bbar a, Jeju ar kə karɛ̂ baa ngaa. Njê-njaje goe tə̂ le paje tar ang. Mə ndɔje tə̂ənn, dɔruje gəl nɛ̂nje kə̂ dooje le kâra darə dəw ang.
Jeju tubba ndil kə̂ maji ang rɔ dəw tə̂
37Lo-karɛ̂ a, Jeju kə njê-njaje goe tə̂ dinje dɔ ər tə̂ le n̂-ddisije. Dəwje tokə banya tilaje kəmɛ̂. 38Horo dəwje tə̂ənn le marə dəw uru əkii nan: «Nje-nɛ̂n-tɔju, m-wali nya, oo ngonnəm nəənn, n̂-to ngonnəm kə̂ kâra baa. 39Ndɔ tɔyn njaa bbo ndil uwa ngonn le a, njangə baa njaa nunda əkii. Ndil le yəke kə singa ngaâ njum-tɛɛ̂ tee. Ndil le ula kəmɛ̂ ndoo tə̂ ndərəng bba inyɛ̂. 40M-duju njê-njaje goi tə̂ karə n̂-tubbaje ndil le a, dumanje nɛ̂n pin.» 41Jeju ilɛ̂ tə̂ nan: «See dəwje kə̂ mə-kunn ləse goto ddəm njê-nɛ̂n-ddaje kə̂ maji ang ddəm. Mâ nayn kə se be mba kumanse ndərəng ndɔ tə̂ kə̂ dda wa? Ə-ddee kə ngonni le nəənn.»
42Ngonn le aw ddee ngɔsi kə Jeju a, ndil kə̂ maji ang le unnɛ̂ ilɛ̂ nangə̂ ngaâ aw yəke kə singa. A Jeju ndangə ndil kə̂ maji ang le. Naji ngonn le ngaâ n̂-təl saa narə bɔɛ̂je. 43Dɔ dəwje tɔyn ayn mba tɔkə-mbangə lə Lubba kə̂ dooje le.
Jeju təl pa tar koy laa
Nɛ̂nje kə̂ Jeju aw dda le dum dɔ dəwje, a n̂-pa narə njê-njaje goe tə̂ nan: 44«Maji karə ə-tukaje mbise kə majɛ̂ ooje nɛ̂n tar nəənn. Dâ kuwa Ngonn lə dəw kulɛ̂ ji dəwje tə̂.» 45A njê-njaje go Jeju tə̂ le gərəje dɔde tar tə̂ kə̂ naw pa narəde le ang. Tar le iya rɔɛ̂ kə de bba karə n̂-gərəje ang. A n̂-bbəəlje ta təl duje.
Dəw kə̂ bo uta marɛ̂je tɔyn
46Kar tə̂ənn, njê-njaje go Jeju tə̂ aw maynje naan tar ta gərə dəw kə̂ uta marɛ̂je horode tə̂. 47A Jeju gərə kəjə ləde ngaâ nunn marə ngonn kə̂ ngaji be nundɛ̂ mbɔrɛ̂ tə̂ 48ngaâ n̂-pa narəde nan: «Dəw kə̂ taa ngonn nəənn kə rɔɛ̂ tə̂ kə rim a, əman njaa n̂-taam kə rɔɛ̂ tə̂ənn. A bbo dəw kə̂ taam kə rɔɛ̂ tə̂ a, taa dəw kə̂ ulam kə rɔɛ̂ tə̂ tɔ. Mba dəw kə̂ to ngaji baa horose tə̂ tɔyn, ne â n̂-to dəw kə̂ bo.»
Dəw kə̂ mbətəse ang to dəw ləse
49A Jan pa nan: «Nje-nɛ̂n-tɔju, joo marə dəw kə̂ unn rii aw tubba nɛ̂n ndilje kə̂ maji ang. N-sangə ddəw ta kɔkɛ̂ ddəwe, mba n̂-nja kə je goi tə̂ ang.» 50A Jeju ilɛ̂ tə̂ nan: «Ɔkɛ̂je ddəw ang, mba dəw kə̂ mbətəse ang, to dəw ləse.»
Dəwje kə̂ marə bbe tə̂ kə̂ Samari mbətəje Jeju
51Ndɔ kə̂ Lubba a ta kunn Jeju ta təl saa darâ ddee ngɔsi. Yeenn bba Jeju le ndiki ta kaw to kaw njaa Jerujalɛm. 52Nula dəwje nɔɛ̂n tə̂ kete. Dawje ngaâ dandəje marə ngonn bbe tə̂ lə dəwje kə̂ Samari ta gɔl nɛ̂n ngəbbe nɛ̂n. 53A njê-bbeje le tɛɛ̂je kə rɔde tə̂ ang, mba naw naw kə Jerujalɛm. 54Jakə kə Jan kə̂ toje to njê-njaje goe tə̂ ooje baann a, paje nan: «Əbbə-dəwje, ə-ndiki karə n-duju jarə puru in darâ ddee ɔn dəwje nəənn wa?»
55Jeju turu rɔɛ̂ kə rɔde tə̂ ngaâ nin kə de nya. 56Dunnje ddəw dawje marə bbe tə̂ kə kete.
Dəw kə̂ ndiki ta kunn go Jeju
57Kar tə̂ kə̂ daw njaje ddəw-boô a, marə dəw pa arə Jeju nan: «Lo tɔyn kə̂ â kaw tə̂, mâ kunn goi.» 58Jeju ilɛ̂ tə̂ nan: «Mulaje, buwa tode to ngaâ əəlje kə̂ darâ kəy tode to, a Ngonn lə dəw, kəy dɔɛ̂ goto.» 59Jeju pa arə marə dəw nan: «Unn gom.» A dəw le ilɛ̂ tə̂ nan: «Əbbə-dəwje arə maw dubbu bɔmje bba.» 60A Jeju ilɛ̂ tə̂ nan: «Inya yoje arə dubbuje yoje ləde. A əi, aw pa tar kɔn-mbay lə Lubba arə dəwje.» 61Marə dəw pa arə Jeju bbay nan: «Mâ ta nja goi tə̂ Əbbə-dəwje, a inya arə maw muwa ji njê kə̂ ləm bba.» 62A Jeju ilɛ̂ tə̂ nan: «Dəw kə̂ uwa kɔsu-mangə bba kəl goe, asə Bbe-kɔn lə Lubba ang.»
Currently Selected:
Luku 9: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA
