Luku 8

Dɛnɛ̂nje kə̂ aw dannje Jeju

1Goe tə̂ a, Jeju nja tɔkə bbeje tə̂ kə ngann bbeje tə̂, aw pa tar lə Lubba ngaâ aw ila mbər Tar kə̂ Maji dɔ kɔn-mbay tə̂ lə Lubba. Njê-kaw-kulaje laa kə̂ dɔku gire joo awje saa ddəm 2marə dɛnɛ̂nje kə̂ n̂-tubba ndilje kə̂ maji ang bba najide rɔ-to tə̂ ləde awje saa ddəm: Mari kə̂ daw bbarɛ̂ nan Magədala kə̂ Jeju tubba ndilje kə̂ maji ang siri rɔɛ̂ tə̂, 3kə Jani dɛnɛ̂n lə nje-ngəm nɛ̂n-kingaje le tɔkə mbay Erodə kə̂ ria nan Kuja, Sujann kə marə dɛnɛ̂nje nya kə̂ aw unnje nɛ̂nje ləde aw umanje nɛ̂n Jeju kə njê-njaje goe tə̂.

Gusu-tar dɔ nje-kila kandə-ko tə̂

4Dəwje tokə banya mbɔnje naan rɔɛ̂ tə̂ ngaâ marə dəwje inje bbeje tə̂ dang dang aw ddeeje rɔ Jeju tə̂. N̂-pa gusu-tar nəənn nan: 5«Nje-nɛ̂n-dubbu tee ta tila kandə-ko laa. Naw tila kandə-ko le a, marə kandə-ko le gayn dɔ ddəw tə̂, dəwje mbɔynje kandə-ko le ngaâ əəlje kə̂ darâ ɔnje. 6Marə dəbbə kandə-ko le gayn dɔ ər tə̂. Kar kə̂ kandə-ko le tee a, tutu njan, mba ninga lo kə̂ nyɔm ang. 7Marə dəbbə kandə-ko le bbay gayn horo konnje tə̂. Konnje le teeje kə de kâra baa, a konnje le orede kə nangə̂. 8A marɛ̂je gaynje dɔ nangə tə̂ kə̂ maji. N̂-teeje ngaâ kakɛ̂ kâra a, andə dɔdɔku dɔdɔku.» Jeju pa tar nəənn ila nangə̂ a, pa kə taar nan: «Dəw kə̂ mbia to a, maji karə oo tar nəənn!»

Jeju unn gusu-tar bba aw pa nɛ̂n tar mba ddi wa?

9 Njê-njaje goe tə̂ dujeje nan: «Gəl gusu-tar nəənn nan ddi wa?» 10Nila tə̂ nan: «Sese, darə ə-gərəje tar kɔn-mbay lə Lubba kə̂ to tar kə̂ iya rɔɛ̂. A kəseje, n̂-pa tarɛ̂ darəde ddəw gusu-tar tə̂ bba karə daaje lo a, dooje nɛ̂n ang ddəm dooje tar a, n̂-ngərəje kandɛ̂ ang ddəm.»

Jeju ɔru gəl gusu-tar kə̂ dɔ nje-kila kandə-ko tə̂ le

11 Gusu-tar nəənn le, gəle tokə be: «Kandə-ko le to tar lə Lubba. 12Kandə-ko kə̂ gayn mbɔr ddəw tə̂ le tɔju dəwje kə̂ ooje tar lə Lubba le ngaâ Əsu ddee ɔru tar le məde tə̂ kə ddang, mba karə dooje məde tə̂ ta dingaje kaji ang. 13Kandə-ko kə̂ gayn dɔ ər tə̂ le tɔju njê kə̂ ooje tar lə Lubba le a, taaje kə rɔ-nəəl. A tar kə̂ dooje le ungu ngirɛ̂ məde tə̂ ang, dooje məde tə̂ mba gɔju kar baa, a ndɔ kə̂ nɛ̂n nan mə tee a, n̂-tusuje dinyaje. 14Kandə-ko kə̂ gayn horo kakə konnje tə̂ tɔju dəwje kə̂ ooje tar lə Lubba le ngaâ ɔtuje a, kəjə-tar kə nɛ̂n-kingaje kə rɔ-nəəlje kə̂ dɔ nangə tə̂ ɔrede kə nangə̂ karə dandə kandə kə majɛ̂ ang. 15Kandə-ko kə̂ gayn dɔ nangə tə̂ kə̂ maji le tɔju njê kə̂ ooje tar lə Lubba kə mə kə̂ maji kə mə kə̂ gatə gatə, a n̂-ngəmje tar le, duwaje darə ngəng ngaâ n̂-naynje daw dandəje kandə.»

Gusu-tar dɔ lambe tə̂

16«Ndɔ kâra dəw ila puru lambe tə̂ a, unn marə bay-sambe dəbbə nɛ̂n ang. Wase dəw le unn lambe le unda kɔ tira tə̂ ang. Nunda lambe le dɔ marə nɛ̂n tə̂ taar mba karə dəwje kə̂ aw andəje kəy le ooje nɛ̂n lo. 17Mba nɛ̂n tɔyn kə̂ to lo-kiyɛ̂ tə̂ kə̂ a tee kə ddaka ang goto, nɛ̂n tɔyn kə̂ n̂-kusu dɔɛ̂ kə̂ a tee kəm dəwje tə̂ kə ddaka ang goto. 18Aaje rɔse gusu tə̂ kə̂ aw ooje nɛ̂n tar, mba dəw kə̂ nɛ̂n laa to a, dâ karɛ̂ marɛ̂ dɔɛ tə̂. A dəw kə̂ nɛ̂n laa goto, nɛ̂n kə̂ nəjə to nɛ̂n laa njaa kara dâ taa jia tə̂ kə ddang.»

Kɔn Jejuje kə ngakɔɛ̂nje kə̂ tɔkɔrɔ

19Kɔn Jejuje kə ngakɔɛ̂nje n̂-ddeeje kə rɔɛ̂ tə̂, a dingaje ddəw ta kaw ngɔsi saa ang, mba dəwje banyaje nya. 20Dəwje paje arə Jeju nan: «Kɔinje kə ngakɔinje arje ddaka. N̂-ndikije ta kooi.» 21A nilade tə̂ nan: «Kɔnʼmje kə ngakɔnʼmje â toje to nje kə̂ ooje tar lə Lubba, a ddaje nɛ̂n kula.»

Jeju pa tar arə bamburanbo əw rɔɛ̂

22Marə ndɔ, Jeju aal tɔkə to kə njê-njaje goe tə̂. N̂-pa narəde nan: «Jawje tura maann tə̂.» Ngaa dawje. 23Daw ləlje tɔkə to le a, Jeju aw tibbi. Bamburanbo ddee ula dɔ maann tə̂ le ngaâ maann aw mə to tə̂ le nayn ngɔsi ta ddusu arə deeje ta yo tə̂. 24Njê-njaje goe tə̂ le ddeeje ngɔsi saa ngaâ n̂-ndoleje n̂-paje nan: «Əbbə-dəwje, Əbbə-dəwje, ja nayn bbo!» N̂-ndol ngaâ n̂-ndangə bamburanbo le ddəm maann kə̂ aw ləngə le ddəm narə əwje rɔde ngaâ lo to nyɛnɛnɛ. 25Jeju pa arə njê-njaje goe tə̂ le nan: «Mə-kunn ləse to dda wa?» Bbəəl uta dɔde ddəm dɔde ayn ddəm ngaâ n̂-paje darə naan nan: «Dəw nəənn to dəw ddi wa? Mba n̂-ndangə nɛ̂n a, ləl kə maann kara ooje tɛɛ̂.»

Jeju tubba ndilje kə̂ maji ang rɔ marə dingaw tə̂

26Jeju kə njê-njaje goe tə̂ n̂-teeje nangə tə̂ kə̂ Gadara kə̂ aa naan kə Galile. 27Jeju uru nangə̂ a, marə dingaw kə̂ ndilje kə̂ maji ang tokə banya isije məɛ̂ tə̂ tila kəmɛ̂. Ləw baa njaa dingaw le ula kubbu ang ddəm to kə̂y ang ddəm a horo dɔbarəje â naw to tə̂. 28Dingaw le oo Jeju a, uru əkii, tee oso nɔn gɔlɛ̂ tə̂ ngaâ pa kə taar nan: «Ddi â osoi tə̂ wa? Jeju, Ngonn lə Lubba kə̂ isi ddutu dara tə̂! Kɔkɔrɔ kari njaa ula kəmʼm ndoo tə̂ ang.» 29N̂-pa baann, mba Jeju pa tar kə ndu kə̂ mɔngu arə ndil kə̂ maji ang le karə n̂-teeje mə dingaw tə̂ le kə ddang. Kete le, nya njaa ndil le aw uwa dingaw le arə daw tɔ gɔlɛ̂ kə kula njamji ngaâ dilɛ̂ kakə bba daw ngəmɛ̂ nɛ̂n. Naw ti kulaje kə̂ n̂-tɔɛ̂ nɛ̂n ngaâ ndilje le aw ɔrɛ̂je awje saa mə kɔr tə̂. 30Jeju duju dingaw le nan: «Rii nan nân wa?» Nila Jeju tə̂ nan: «Rije nan banya banya.» Mba ndilje kə̂ maji ang tokə banya andəje dingaw le. 31Ndilje kə̂ maji ang le ddaje rɔde to ndoo rɔ Jeju tə̂ ta karə narə dawje mə tɔkə buwa tə̂ kə̂ sunrɛ̂ goto le ang. 32Kar tə̂ənn, kusu bərəje kə̂ banya aw usaje nɛ̂n ta kongo tə̂ lo tə̂ənn le. Ndilje kə̂ maji ang le ddaje rɔde to ndoo rɔ Jeju tə̂ karə narəde ddəw narə dandəje mə bərəje tə̂ le ngaâ narəde ddəw. 33Ndilje kə̂ maji ang le teeje rɔ dingaw tə̂ le aw andəje mə bərəje tə̂ le ngaâ kusu bərəje le inje ta kongo tə̂ kə ngɔru gaynje maânn oyje.

34Njê kə̂ aw ngəmje bərəje le ooje nɛ̂n kə̂ to le a, aynje ngaâ aw paje tarɛ̂ tɔkə bbe tə̂ kə ngann bbeje tə̂. 35Dəwje awje ta koo nɛ̂n kə̂ to le. N̂-ddeeje rɔ Jeju tə̂ ngaâ dingaje dingaw kə̂ ndilje teeje məɛ̂ tə̂ kə ddang le, nisi nangə̂ kɔ gɔl Jeju tə̂. Kubbu to rɔ dingaw tə̂ le ddəm kəjə laa təl to kə majɛ̂ ddəm ngaâ bbəəl uta dɔde. 36Dede kə̂ dooje gusu kə̂ Jeju tubba nɛ̂n ndilje kə̂ maji ang rɔ dingaw tə̂ le, dɔruje gəle darə njê kə̂ awje le ooje. 37Dəwje tɔyn kə̂ nangə tə̂ kə̂ Gadara dujuje Jeju ta karə ɔtu kə ddang, mba bbəəl uta dɔde. Jeju aal to ngaâ təl guku. 38Dingaw kə̂ ndilje teeje rɔɛ̂ tə̂ kə ddang le duju Jeju ta nayn saa. A Jeju mbətə nan: 39«Ə-təl aw kə̂y ləi ta ə-pa tar nɛ̂n kə̂ Lubba dda səi le!» Naw ngaâ nila mbər nɛ̂n kə̂ Jeju dda mba tar laa mə bbe tə̂ le tɔyn.

Jeju aji marə dɛnɛ̂n ngaâ ndol ngonn lə Jayirus kə̂ oy

40Kar kə̂ Jeju təl tura maann tə̂ guku a, dəwje tokə banya tɛɛ̂je kə rɔde tə̂, mba dede tɔyn daw ngəbbeje. 41Marə dingaw kə̂ ria nan Jayirus kə̂ to nje-kɔn dɔ kəy mbɔn-naan lə Jiipije ddee, n̂-tee noso nangə̂ nɔn gɔl Jeju tə̂, n̂-dda rɔɛ̂ to ndoo karə naw mə kəy tə̂ laa, 42mba ngonnɛ̂ kə̂ dɛnɛ̂n kə̂ to ngonn-kâra kə̂ bbalɛ̂ asə dɔku gire joo a ta koy.

Jeju aw aw kə kə̂y le a, dəwje kə̂ banya ubbɛ̂je njang. 43Marə dɛnɛ̂n kə̂ məsə aw ddee rɔɛ̂ tə̂ ləw baa asə bbal dɔku gire joo ee tə̂ənn. Dɛnɛ̂n le tuju nɛ̂nje laa tɔyn ji njê-karə-kumanje tə̂, a dəw kâra asə ta kajɛ̂ rɔ-to tə̂ laa le ang. 44N̂-ddee giri Jeju tə̂ ngɔsi, nɔru kubbu laa kə jia, a kar tə̂ənn njaa məsə le gangə. 45Jeju pa nan: «Nân bba ɔrum wa?» Dəwje tɔyn aw ɔruje naji ləde a, Piyɛr pa nan: «Əbbəmje, dəwje kə̂ banya kə̂ gukuje dɔi le â aw ubbaije!» 46A Jeju ila tə̂ nan: «Marə dəw ɔrum, mba m-gərə to marə singa in rɔm tə̂ tee.»

47Dɛnɛ̂n le oo be a, gərə to Jeju gəre ngaâ nisa, n̂-ddee noso nɔn gɔlɛ̂ tə̂. N̂-pa gəl nɛ̂n kə̂ nɔru nɛ̂n Jeju kə gusu kə̂ rɔ-to laa goto nɛ̂n kar tə̂ənn le kəm dəwje tə̂ tɔyn. 48Jeju pa arɛ̂ nan: «Ngonnəm kə̂ dɛnɛ̂n, mə-kunn ləi ajii. Aw kə mə-wul-lɔm.» 49Kar tə̂ kə̂ Jeju aw pa tar bbay a, marə dəw in bbeê lə Jayirus le ddee pa arə Jayirus nan: «Ngonni le oy mban. Ə-jɔku nje-nɛ̂n-tɔju ang ngaa.» 50A Jeju oo tar le ngaâ pa arə Jayirus le nan: «Ə-bbəəl ang, məi njaa unn arəm a, nâ kaji.»

51Jeju ddee tee kə̂y le a, mbətə ta karə dəwje andəje saa kə̂y. Piyɛr kə Jan kə Jakə kə bɔ ngonnje le kə kɔn ngonnje le â ninya ddəw narə dandəje saa kə̂y. 52Dəwje tɔyn aw nɔnje, aw ndingaje rɔde mba ngonn kə̂ dɛnɛ̂n le. Jeju pa nan: «Ə-nɔnje ang. Noy ang, bbi â naw tibbi.»

53Dəwje le aw kokoje Jeju, mba n̂-gərəje to ngonn le oy mban. 54A Jeju uwa ji ngonn le ngaâ pa kə gɔsu kə̂ mɔngu nan: «Ngonn, in taar!» 55Ndil ngonn kə̂ dɛnɛ̂n le təl rɔɛ̂ tə̂, a kar tə̂ənn njaa nin taar ngaâ Jeju pa arəde karə darɛ̂ nɛ̂n nusa. 56Dɔ njê-kujuje ngonn kə̂ dɛnɛ̂n le ayn. A Jeju ndɔru mbide karə n̂-paje tar nɛ̂n kə̂ to le darə dəw kâra oo ang.

Currently Selected:

Luku 8: KabbaDkS

Highlight

Copy