Luku 13
13
Jeju bbar dəwje karə n̂-turuje məde
1Kar tə̂ənn, marə dəwje ddee paje arə Jeju nan: «Pilatə arə n̂-tɔl dəwje kə̂ Galile, kar tə̂ kə̂ daw darəje daje Lubba to nɛ̂n-polo.» 2Nilade tə̂ nan: «Əjəje to dəwje kə̂ Galile kə̂ Pilatə tɔlde baann le toje to njê-nɛ̂n-ddaje kə̂ maji ang uta kəsə dəwje kə̂ Galile tɔyn wa? 3Baann ang, m-pa marəse: Bbo ə-turuje məse ang a, a koyje tɔyn tokə baann tɔ. 4Tɔ bbay, dəwje dɔku gire jijoo kə̂ kəy kə̂ ndəw kə̂ Silowe oso dɔde tə̂ tɔlde le, dede â n̂-ddaje maji ang dutaje kəsə dəwje kə̂ Jerujalɛm tɔyn wa? 5Baann ang, m-pa marəse: Bbo ə-turuje məse ang a, â koyje tɔyn tokə baann tɔ.»
Gusu-tar dɔ kakə pigə tə̂ kə̂ andə ang
6Jeju pa gusu-tar nəənn arəde tɔ nan: «Marə dingaw ula kakə pigə mə ndɔɔ binyə tə̂ laa#13:6 Pigə to kakə kə̂ unn da-rɔ tungu.. Naw ta kuja kandə pigə le a, ninga ang. 7N̂-pa narə nje-kula laa nan: ‹Dda bbal mota ngaa kə̂ m-ddee ta kuja kandə pigə nəənn a, minga ang. Ə-tukɛ̂ kə ddang nan naw taa lo baa.› 8Nje-kula le ilɛ̂ tə̂ nan: ‹Dəw kə̂ tɔkə, inyɛ̂ bbal tə̂ nəənn bbay. Mâ kuru buwa guku nɛ̂n gɔlɛ̂ ngaâ mâ kungu sin daje kɔyɛ̂ tə̂. 9A du ang, kaal a, nâ kandə. A bbo nandə ang bba ta arə m-tukɛ̂.› »
Jeju aji marə dɛnɛ̂n kə̂ nje-rɔ-to
10Marə ndɔ-kuwa-rɔ tə̂ lə Jiipije, Jeju aw tɔju nɛ̂n mə marə kəy mbɔn-naan tə̂ ləde. 11Marə dɛnɛ̂n kə̂ ndil kə̂ maji ang tuju dəbbə rɔɛ̂ dda bbal dɔku gire jijoo ee mə kəy tə̂ənn. Ndil le uwɛ̂ dduke arə ninga ddəw ngaji ta ndɔju rɔɛ̂ ang. 12Jeju ooe ngaâ bbarɛ̂ pa arɛ̂ nan: «Dɛnɛ̂n rɔi ddee maji ngaa.» 13Nila jia dɔɛ̂ tə̂, a kar tə̂ənn njaa, dɛnɛ̂n le ndɔju rɔɛ̂ kə majɛ̂ ngaâ ɔsu gaji Lubba. 14A nje-kɔn dɔ kəy mbɔn-naan le rɔɛ̂ nəəle ang, mba Jeju aji dəw ndɔ-kuwa-rɔ tə̂. N̂-pa narə dəwje kə̂ banya le nan: «Ndɔ misan to mba dda nɛ̂n kula. Maji karə ə-ddeeje arə dajise mə ndɔje tə̂ənn bbo ə-ddeeje ndɔ-kuwa-rɔ tə̂ ang.» 15A Əbbə-dəwje ilɛ̂ tə̂ nan: «Njê-ngəmje! Sese kâra kâra tɔyn, ndɔ-kuwa-rɔ tə̂, aw tutuje mangəje wase kororoje ləse lo tə̂ kə̂ daw dusaje nɛ̂n tə̂, awje kə de arəje dayje maann ang wa? 16A dɛnɛ̂n nəənn kə̂ to ngonn lə Abaraham kə̂ Satan tɔɛ̂ bbal dɔku gire jijoo bbokənɛn nəənn, to maji ta tute ndɔ-kuwa-rɔ tə̂ ang wa?» 17Jeju aw pa tar le baann a, rɔ njê-baanje laa tɔyn wul. A dəwje kə̂ banya le rɔde nəəlde mba nɛ̂n-pitije kə̂ Jeju aw dda le.
Ddi â ta kunn kɔju nɛ̂n Bbe-kɔn lə Lubba wa?
18Jeju pa nan: «Bbe-kɔn lə Lubba unn da-rɔ ddi wa? Ddi â mâ kunn kɔju nɛ̂n wa? 19To kâra baa kə kandə mutardə kə̂ tɛn baa kə̂ dəw dubbu mə ndɔɔ tə̂ laa. Kandə-ko le tee ngaâ ddee to kakə arə əəlje kə̂ darâ ddaje kəy ləde barkəmɛ̂je tə̂.» 20N̂-pa bbay nan: «Ddi â mâ kunn kɔju nɛ̂n Bbe-kɔn lə Lubba wa? 21To kâra baa kə wum kə̂ dɛnɛ̂n bɔkɔlɔ nɛ̂n nduju kə̂ mə ka tə̂ mota arə ndərəng a, bɔr nduju le tɔyn ti.»
Ta-kəy kə̂ tɛn
22Jeju nday mə tɔkə bbeje tə̂ kə mə ngann bbeje tə̂ aw tɔju nɛ̂n aw nɛ̂n ər kə Jerujalɛm. 23Marə dəw duje nan: «Əbbə-dəwje, dəwje kâra kâra baa â, a kingaje kaji wa?» Jeju ila dəwje tə̂ tɔyn nan: 24«Maji karə ə-ddaje singa andəje kə ta-ddəw kə̂ ngaji. Mba, m-pa marəse: Dəwje nya a sangəje ddəw ta kandə. A dâ kasəje ang.
25«Bbo nje-kəy in utu ta-kəy a, â naynje ddaka. Ngaâ bbo unnje kutu kunda ta-kəy ta pa nan: ‹Əbbə-dəwje, ɔru ta-kəy arəje!› A nâ kilase tə̂ nan: ‹M-gərə lo kə̂ inje tə̂ ang.› 26Â kunnje kutu pa nan: ‹Jusa nɛ̂n ddəm jay nɛ̂n ddəm kəmi tə̂, ə-tɔju nɛ̂n dəwje dɔ ddəwje tə̂ ləje.› 27A nâ kilase tar tə̂ nan: ‹M-gərə lo kə̂ inje tə̂ ang. Ɔtuje mbɔrəm tə̂ kə ddang, sese tɔyn kə̂ ə-toje to njê-nɛ̂n-ddaje kə̂ gatə gatə ang.› 28Lo tə̂ənn, â nɔnje ngaâ â ngəərje ngangəse kar tə̂ kə̂ â kooje Abaraham kə Ijakə kə Jakobbo kə njê-kilaje mbər tar tɔyn mə Bbe-kɔn tə̂ lə Lubba. A dâ kilase ddaka. 29Dəwje a kinje kəm kar tə̂ kə lo kə̂ kar aw andə tə̂. Dâ kinje bəər ddəm dagoo ddəm ngaâ dâ kisi ta nɛ̂n-kusa tə̂ mə Bbe-kɔn tə̂ lə Lubba. 30Marə dəwje kə̂ dɔ guku, a ddeeje to dəwje kə̂ dɔngɔr. A dəwje kə̂ dɔngɔr, a ddeeje to dəwje kə̂ dɔ guku.»
Mə-kɔn dda Jeju mba Jerujalɛm
31Kar tə̂ənn, marə Parijinyɛje awje ngɔsi kə Jeju paje arɛ̂je nan: «Ɔtu lo tə̂ nəənn kə ddang mba Erodə ndiki ta tɔli.» 32Nilade tə̂ nan: «Aw paje arəje mula le ə-paje nan: ‹Maw tubba ndilje kə̂ maji ang, maw maji njê-rɔ-toje bbokənɛn kə bara. Ndɔ mota laa a, kula ləm a tunga. 33A maji karə m-nja nja ləm bbokənɛn, bara kə nunan. Mba ddəw kə̂ ta karə nje-kila mbər tar lə Lubba oy nɛ̂n marə lo tə̂ dang kə Jerujalɛm goto.›
34«See dəwje kə̂ Jerujalɛm! See dəwje kə̂ Jerujalɛm! Sese kə̂ aw tɔlje njê-kilaje mbər tar lə Lubba ngaâ aw tilaje dəwje kə̂ Lubba ulade arəse kə ər aw tɔljede. M-ndiki nya ta mbɔnse tokə kɔn-kunja aw mbɔn ngannɛ̂ kɔ bakɛ̂ tə̂, a ə-ndikije ang. 35Ooje: Mâ tusu kəy ləse kinya. Tɔkɔrɔ, m-pa marəse: Unn kute bbokonɛn, â koomje ang ndərəng ndɔ tə̂ kə̂ â paje nan: Maji karə Lubba bbar tar kə̂ maji dɔ dəw tə̂ kə̂ ddee kə ri Əbbə-dəwje!»
Currently Selected:
Luku 13: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA
