Luku 14
14
Jeju aji marə dəw ndɔ-kuwa-rɔ tə̂
1Marə ndɔ-kuwa-rɔ tə̂, Jeju andə mə kəy tə̂ lə marə tɔkə mbay lə Parijinyɛje ta kusa nɛ̂n. 2Kəm dəwje tɔyn to kə dɔɛ̂ tə̂. Marə dingaw kə̂ məɛ̂ ti ar nɔɛ̂n tə̂. 3Jeju pa arə Njê-gərəje-Ndu kə Parijinyɛje le nan: «Ndu arə ddəw ta kaji dəw ndɔ-kuwa-rɔ tə̂ wase ndu arə ddəw ang wa?» 4A dilɛ̂je tə̂ ang ngaâ nuwa nje-rɔ-to le najɛ̂ narə nɔtu. 5Goe tə̂ a, n̂-pa narəde nan: «Nân horose tə̂ nəənn bbo ngonnɛ̂ wase mangə laa oso mə buwa-maann tə̂ ndɔ-kuwa-rɔ tə̂ a, nâ kɔrɛ̂ kə ddaka kə tɔkɛ̂ ndɔɛ̂ tə̂ənn njaa ang wa?» 6A dingaje tar kâra ta kila tə̂ ang.
Tar dɔ lo-kisi tə̂ kə̂ kete
7Goe tə̂ a, Jeju pa gusu-tar arə dəwje kə̂ tɔkə mbay lə Parijinyɛje bbarde kə nɛ̂n-kusa, mba noode daw duwaje lo-kisi kə̂ kete ngaâ n̂-pa narəde nan: 8«Bbo marə dəw bbari kusu taa-naan tə̂ a, aw uwa lo-kisi kə̂ kete ang, mba bbo n̂-bbar marə dəw kə̂ utai tɔ 9ngaâ dəw kə̂ bbarse le ddee nan: Inya lo-kisi arɛ̂ a, rɔ-kul a ddai ta kaw kisi lo tə̂ kə̂ guku. 10A bbo n̂-bbari a, aw uwa lo-kisi kə̂ guku ta bbo nje-bbari le ddee a, nâ pa nan: Namʼm, aw isi kete. A yeenn a to nɛ̂n wali kəm dəwje tə̂ tɔyn kə̂ a kisije ta nɛ̂n-kusa tə̂ səi. 11Tɔkɔrɔ, dəw kə̂ dda rɔɛ̂ bo a, dâ dda karə n̂-ddee ngaji baa. A dəw kə̂ dda rɔɛ̂ ngaji, dâ dda karə n̂-ddee bo.»
Tar bbar njê-ndooje kə nɛ̂n-kusa
12Jeju pa arə dəw kə̂ bbarɛ̂ le tɔ nan: «Bbo a ta bbar dəwje kə nɛ̂n-kusa kə̂ karâ wase kə̂ lo-kul tə̂ a, ə-bbar njê-buwa-kuraje ləi ang ddəm ngakɔinje ang ddəm njê kə̂ ləi ang ddəm njê-ninn-kəy marije kə̂ toje to njê-nɛ̂n-kingaje ang ddəm mba dâ ddaje nɛ̂n-kusa bbarije nɛ̂n tɔ. Yeenn le a tɔju to inga kuka ləi mban. 13A bbo ə-dda nɛ̂n-kusa tokə bo a, ə-bbar njê-ndooje, njê kə̂ jide wase gɔlde goto, njê-mətəje kə njê-kəm-tɔje. 14Yeenn bba a kisi kə rɔ-nəəl, mba dingaje nɛ̂n ta kari ture tə̂ ang. A Lubba a təl nɛ̂n kari ndɔ tə̂ kə̂ dəwje kə̂ gatə gatə kə̂ oyje a ndolje.»
Gusu-tar dɔ dəwje tə̂ kə̂ n̂-bbarde tɔkə kusu tə̂
15Marə dəw horo njê kə̂ isije ta nɛ̂n-kusa tə̂ le oo tarjeenn le a, pa arə Jeju nan: «Maji arə dəw kə̂ a kusa nɛ̂n Bbe-kɔn tə̂ lə Lubba!»
16A Jeju ilɛ̂ tə̂ nan: «Marə ndɔ, marə dingaw dda tɔkə kusu ngaâ n̂-bbar dəwje nya nya. 17Kar nɛ̂n-kusa asə a, nula nje-kula laa narə dəwje kə̂ n̂-bbarde le nan: Ə-ddeeje ngaa, nɛ̂n tɔyn to ngɔsi mban. 18A dəwje le tɔyn unnje kutu pa nɛ̂nje kə̂ ɔkude ddəw karə n̂-ddeeje arɛ̂je go naan tə̂. Dəw kə̂ dɔngɔr pa nan: ‹M-ndoko ndɔɔ arə mâ kaw koo bba. M-wali nya, ɔru tar dɔm tə̂.› 19Marɛ̂ pa nan: ‹M-ndoko mangəje dɔku arə m-ndiki ta nande koo. M-wali nya, ɔru tar dɔm tə̂.› 20Marɛ̂ pa bbay nan: ‹M-taa dɛnɛ̂n bbasinɛn bbay arə minga ddəw ta ddee ang.› 21Nje-kula le təl ngaâ ndaji tarjeenn le arə əbbeeje le. A wungu ɔn nje-kəy le ngaâ pa arə nje-kula laa le nan: ‹Aw njangə lo tə̂ kə̂ dəwje banya tə̂ kə dɔ ddəwje tə̂ kə̂ tɔkə bbe tə̂ nəənn, ə-ddee kə njê-ndooje kə njê kə̂ jide wase gɔlde goto, njê-kəm-tɔje kə njê-mətəje lo tə̂ nəənn.› 22Nje-kula le pa nan: ‹Dəw kə̂ tɔkə, m-dda nɛ̂n kə̂ ndui pa le mban, a kəsə lo nayn baa bbay.› 23Əbbə-nje-kulaje le pa arɛ̂ nan: ‹Aw ngann ddəwje tə̂ kə kar ndokoje tə̂, uwa dəwje kə singa arə dandəje kəy ta n̂-ddusu mə kəy ləm tɔyn.› 24M-pa mari, dəwje kə̂ m-bbarde dɔngɔr le, nɛ̂n-kusa ləm a kɔru ta dəw kâra horode tə̂ ang.»
Ddəw kə̂ ta kunn nɛ̂n go Jeju
25Dəwje kə̂ banya aw njaje kə Jeju ddəw-boô. N̂-kəl goe ngaâ n̂-pa narəde nan: 26«Bbo dəw ddee rɔm tə̂ ngaâ ndikim uta bɔɛ̂je kə kɔɛ̂nje kə dɛnɛ̂n laa kə ngannɛ̂ kə ngakɔɛ̂nje kə ngakɔn-nannɛ̂je kə da-rɔɛ̂ njaa ang a, nân to nje-nja gom tə̂ ang. 27Dəw kə̂ oto kakə-dəsə laa ang ddəm uwa gom ang ddəm a kasə ta to nje-nja gom tə̂ ang.
28«Mba horose tə̂ nəənn, bbo marə dəw ndiki ta dda tɔkə kəy kə̂ ndəw a, nisi nangə̂ dɔngɔr n̂-tura kɔr narɛ̂ kə̂ nâ tuju noo, bbo n̂-gərə to narɛ le asə ta tunga nɛ̂n kəy le bba nâ kunn-kutu dda kəy le. 29Mba bbo nungu gɔl kəy le nangə̂ ngaâ nasə ta dda tunga ang a, dəwje tɔyn kə̂ a kooje kəy le a kokeje ngaâ a paje nan: 30‹Dəw nəənn unn kutu dda kəy a, asə ta dda tunga ang!› 31Tɔ bbay, bbo tɔkə mbay aw ta ddɔ kə marə tɔkə mbay marɛ̂ a, nisi nangə̂ dɔngɔr nuwa dɔɛ̂ noo, bbo n̂-gərə to nasə ta kaw kə dəwje doro dɔku ddɔ nɛ̂n kə mbay kə̂ dəwje laa ee doro dɔjoo mba tətə nɛ̂n ddɔ le bba nâ kaw. 32Bbo noo to singɛ̂ asə ang ngaâ nje-marɛ̂ le nayn ddəw əw bbay a, nâ kula dəw karɛ̂ mba duje nɛ̂n kə̂ dâ kasəje ta dda bba karə mə-wul-lɔm təl horode tə̂.» 33Yeenn le bba Jeju ila tə̂ nan bbo marə dəw horose tə̂ mbətə nɛ̂n-kingaje laa tɔyn ang a, nâ to nje-nja gom tə̂ ang.
34«Katə to nɛ̂n kə̂ maji. A bbo dɔɔn lə katə goto kə ddang a, ddi bba dəw a dda kə katə le bba a təl dɔɔn bbay wa? 35Nɛ̂n kə̂ maji kə̂ katə le a dda karə nangə wase ndɔɔ goto. Dâ kungu katə le kɔrɔ̂. Dəw kə̂ mbia to a, maji karə oo tar nəənn!»
Currently Selected:
Luku 14: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA
