Luku 15
15
Gusu-tar dɔ batə tə̂ kə̂ nayn kɔrɔ̂
1 Njê-taaje narɛ lambo tɔyn kə njê-nɛ̂n-ddaje kə̂ maji ang ddeeje ngɔsi kə Jeju ta koo tar laa. 2Parijinyɛje kə njê-gərəje-Ndu aw nyuruje nan: «Dəw nəənn aw uwa njê-nɛ̂n-ddaje kə̂ maji ang kə rɔɛ̂ tə̂ ngaâ usa nɛ̂n kə de.» 3A Jeju pa gusu-tar nəənn arəde nan: 4«Dəw kə̂ dda horose tə̂ nəənn, bbo batəje laa ee dɔdɔku ngaâ marɛ̂ kâra nayn kɔrɔ̂ a, a kinya kəseje kə̂ dɔjikara gire jikara mə mu tə̂ ta kaw ndole gɔl ye kə̂ n̂-nayn le ndərəng kingɛ̂ bba ang wa? 5Bbo ningɛ̂ a, nilɛ̂ dɔ bakɛ̂ tə̂ kə rɔ-nəəl bba 6n̂-təl kə̂y. N̂-bbar njê-buwa-kuraje laa kə njê-niinn-kəy marɛ̂je n̂-pa narəde nan: ‹Arəje rɔse nəəlse səm, mba minga batə ləm kə̂ nayn le mban.› 7M-pa marəse, to ddəw kâra baa: rɔ-nəəl kə̂ a to darâ mba nje-nɛ̂n-dda kə̂ maji ang kâra kə̂ turu məɛ̂. Rɔ-nəəl le a kuta rɔ-nəəl kə̂ to mba dəwje kə̂ dɔjikara gire jikara kə̂ toje gatə gatə mban arə to tar ləde ta turu məde ang ngaa le.»
Gusu-tar dɔ narɛ tə̂ kə̂ nayn kɔrɔ̂
8«Tɔ bbay, dɛnɛ̂n kə̂ dda njaa bba kandə narɛ laa ee dɔku ngaâ marɛ̂ kâra nayn kɔrɔ̂ a, a kila puru lambe tə̂ ang ddəm a kuta mə kəy laa ang ddəm a sangə lo kə majɛ̂ ndərəng ta kinga kandə narɛ le bba ang wa? 9Bbo ninga kandə narɛ le mban a, n̂-bbar njê-buwa-mandəje laa kə njê-ninn-kəy marɛ̂je ngaâ n̂-pa nan: Arəje rɔse nəəlse səm mba minga kandə narɛ ləm kə̂ nayn le mban. 10M-pa marəse, to ddəw kâra baa, rɔ-nəəl to nya horo anjəje tə̂ lə Lubba mba nje-nɛ̂n-dda kə̂ maji ang kâra kə̂ turu məɛ̂.»
Gusu-tar dɔ ngonn tə̂ kə̂ nayn kə kɔrɔ̂
11Jeju pa bbay nan: «Marə dingaw uju ngannje kə̂ dingaw joo. 12Ne kə̂ mbatə n̂-pa narə bɔɛ̂je nan: ‹Bɔy, arəm nɛ̂n-ndubba kə̂ to mbam.› Bɔdede le kaynde nɛ̂n-kinga laa. 13Ndɔ ngaji goe tə̂ a, ngonn kə̂ mbatə le oto nɛ̂n-kingaje laa tɔyn taa nɛ̂n narɛ ngaâ aw dɔ bbe tə̂ ddəw əw. Lo tə̂ kə̂ nunn, n̂-tuju nɛ̂nje laa ddəw kula-ddaje tə̂ kə̂ maji ang. 14N̂-tuju nɛ̂nje laa le tɔyn a, tɔkə bbo oso bbe tə̂ənn le ngaâ nɛ̂n tɔyn njaa unn kutu due. 15Naw nayn kə marə ngonn nje-bbe le ngaâ ulɛ̂ ndɔɔ̂ laa karə n̂-ngəm bərəje. 16Məɛ̂ ndiki ta kusa nɛ̂n-kusaje lə bərəje le karə məɛ̂ ndann, a dəw kə̂ nje-karɛ̂ goto. 17Nəjə tar məɛ̂ tə̂ ngaâ n̂-pa nan: ‹Njê-kulaje tokə banya aw usaje nɛ̂n kə majɛ̂ kəy lə bɔmje, a əman, maw moy yo bbo lo tə̂ kə̂ nəənn wa? 18Mâ kin kaw rɔ bɔy tə̂ ta mâ pa karɛ̂ nan: Bɔy, m-dda nɛ̂n kə̂ mə Lubba kə̂ darâ mbətə ddəm nɛ̂n kə̂ məi mbətə ddəm. 19Masə karə ə-bbarəm ngonni ang ngaa. Maji karə ə-ddam tokə lə marə nje-kula ləi.› 20Nin taar ngaâ naw kə rɔ bɔɛ̂je tə̂.
«N̂-nayn ddəw əw bbay a, bɔɛ̂je le ooe ngaâ n̂-to ndoo laa. Bɔɛ̂je le ayn ngɔru aw ilɛ̂ uwɛ̂ kə karɛ̂ tə̂ ngaâ to mbia. 21Ngonn le pa arɛ̂ nan: ‹Bɔy, m-dda nɛ̂n kə̂ mə Lubba kə̂ darâ mbətə ddəm məi mbətə ddəm masə karə ə-bbarəm ngonni ang ngaa.› 22A bɔɛ̂je le pa arə njê-kulaje laa nan: ‹Ə-ddeeje kə kubbu kə̂ kura uta marɛ̂je njangə ulɛ̂je, ulaje əninga ngonn-jia tə̂ ta ulɛ̂je nɛ̂n-gɔl. 23Ə-ddeeje kə ngonn mangə kə̂ əmə ə-tɔlɛ̂je arəje jusaje n-ddaje nɛ̂n kusu, 24mba ngonnəm kə̂ ooeje nəənn oy bba ndol. N̂-nayn kɔrɔ̂ bba mingɛ̂.› Dunnje kutu dda kusu le.
25«Kar tə̂ənn, ngonn kə̂ to dərə nayn ndɔɔ̂. Naw təl kə bbeê ngaâ n̂-nayn ngɔsi kə kəy a, noo kɔru nɛ̂n-kəm kə dəwje kə̂ aw laje. 26N̂-bbar marə nje-kula n̂-duje tar dɔ nɛ̂nje tə̂ kə̂ aw toje le. 27Nje-kula le pa arɛ̂ nan: ‹Ngokɔin â təl ddee ngaâ bɔije tɔl ngonn mangə kə̂ əmə, mba n̂-təl kə rɔɛ̂ kə̂ maji.› 28A wungu ɔn ngonn kə̂ to dərə le ngaâ mbətə ta kandə kə̂y. Bɔɛ̂je tee aw dda rɔɛ̂ to ndoo arɛ̂ karə naw kə̂y. 29A nila bɔɛ̂je tə̂ nan: ‹Oo, m-dda kula mari bbal banya nya ngaâ maal tai ndɔ kâra ang. Ngonn binya be njaa kara arəm m-dda nɛ̂n nɛ̂n-kusa m-bbar nɛ̂n njê-buwa-kuraje ləm ndɔ kâra ang. 30A ngonni nəənn kə̂ tuju nɛ̂n-kinga ləi tɔyn dɔ dɛnɛ̂n kayaje tə̂ le â ddee a, ə-tɔl ngonn mangə kə̂ əmə arɛ̂ wa?› 31Bɔɛ̂je pa arɛ̂ nan: ‹Ngonnəm, əi, ee rɔm tə̂ nəənn kə ndɔ tɔyn, nɛ̂nje ləm tɔyn to nɛ̂nje ləi. 32To maji ta dda kusu ta dda rɔ-nəəl, mba ngokɔin nəənn oy bba ndol. N̂-nayn kɔrɔ̂ bba jingɛ̂.› »
Currently Selected:
Luku 15: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA
