Luku 20

Nân â arə ddəw Jeju karə dda nɛ̂n nɛ̂nje wa?

1Marə ndɔ, Jeju aw tɔju nɛ̂n dəwje kə̂ banya mə kəy-polo Lubba tə̂ ddəm aw ila mbər Tar kə̂ Maji ddəm. Mbayje lə njê-poloje Lubba kə njê-gərəje-Ndu kə tɔkəje lə Jiipije undaje lo teeje. 2N̂-dujeje nan: «Nân bba ari singa karə ə-dda nɛ̂n nɛ̂njeenn wa? Nân njaa bba ari singa wa?» 3Nilade tə̂ nan: «Əman kara mâ dujuse tar kâra tɔ: 4Ə-paje arəmje moo, batɛm lə Jan in dda wa? In rɔ Lubba tə̂ darâ wase in rɔ dəwje tə̂ wa?» 5A n̂-paje horode tə̂ nan: «Bbo jilaje tə̂ n-pa nan in rɔ Lubba tə̂ darâ a, nâ pa nan: ‹Mba ddi bba ə-ndikije tə̂ kə Jan le ang wa?› 6A bbo n-pa nan dəwje â ulɛ̂ a, dəwje tɔyn a tilajeje kə ər, mba n̂-gərəje to Jan to nje-kila mbər tar lə Lubba njaa.» 7Yeenn le bba dilaje Jeju tə̂ nan: «N-gərə dəw kə̂ ula Jan arə dda batɛm dəwje le ang.» 8Jeju pa arəde nan: «Əman kara mâ bbar ri dəw kə̂ arəm singa kə̂ ta dda nɛ̂n nɛ̂njeenn le karəse ang tɔ.»

Gusu-tar dɔ njê-ddaje kula binyə tə̂

9Goe tə̂ a, Jeju unn kutu pa gusu-tar nəənn arə dəwje nan: «Marə dəw dda ndɔɔ binyə. Ninya kula ndɔɔ le ji njê-ddaje kula binyə tə̂ a nɔtu naw marə bbe tə̂ mba ndɔ nya. 10Nɛyn kuja kandə-ko asə a, nje-ndɔɔ le ula marə nje-kula laa rɔ njê-ddaje kula binyə tə̂ le karə duja kandə binyə le darə ddee nɛ̂n arɛ̂. A duwaje nje-kula le n̂-tundɛ̂je ngaâ n̂-tubbɛ̂je darə n̂-təl jia baa. 11N̂-təl nula marə nje-kula kə̂ dang bbay a, duwɛ̂je n̂-tundɛ̂je, n̂-tajɛ̂je ngaâ n̂-tubbɛ̂je darə n̂-təl jia baa. 12Gɔl mota laa, n̂-təl nula marə nje-kula bbay a, darɛ̂je do ngaâ n̂-tubbɛ̂je. 13Nje-ndɔɔ le pa nan: ‹Ddi â mâ dda wa? Mâ kula ngonnəm kə̂ m-ndike nya, a du ang, dâ bbəəleje.› 14A koo njaa kə̂ njê-ddaje kula binyə le ooeje a, n̂-paje nan: ‹Nje-kuwa nɛ̂n-ndubba le â nəənn, arəje n-tɔlɛ̂je bba karə ta nɛ̂n-ndubba le təl to ləje.› 15N̂-ndɔrɛ̂je n̂-teeje saa mə ndɔɔ tə̂ le kə ddang ngaâ n̂-tɔlɛ̂je.» Jeju duju tar nan: «Yeenn, ddi ngaa bba nje-ndɔɔ le a dda kə de wa? 16Nâ ddee tɔl njê-ddaje kula binyə le ngaâ nâ kinya ndɔɔ le ji marə dəwje tə̂ kə̂ dang.»

Dəwje kə̂ banya le ooje tar le a, n̂-paje nan: «Maji karə nɛ̂ɛnn ddee tokə baann ang!»

17Jeju ɔru kəmɛ̂ aade ngaâ pa nan: «Tar kə̂ n̂-dda Makəturu tə̂ lə Lubba nəənn gəle nan ddi wa?

Tar le nan: ‹Ər kə̂ njê-kɔsuje kəy mbətəje le,

təl ddee to singa gɔl kəy kə̂ dungu nangə̂.› »

18Dəw kə̂ oso dɔ ər tə̂ le a, a guru rɔɛ̂ ngaâ dəw kə̂ ər le oso dɔɛ̂ tə̂ a, a nyarɛ̂. 19Kar tə̂ənn njaa mbayje lə njê-poloje Lubba kə njê-gərəje-Ndu aw sangəje ddəw ta kuwɛ̂, a n̂-bbəəlje kəm dəwje. Mba n̂-gərəje to dede â Jeju aw pa gusu-tar nəənn ɔju dɔde.

Tar kuka lambo karə tɔkə mbay kə̂ Rɔm

20 Njê-poloje Lubba kə Njê-gərəje-Ndu le undaje kəmde kə dɔ Jeju tə̂. Dulaje dəwje kə̂ ddaje rɔde to dəwje kə̂ maji rɔɛ̂ tə̂. Dəwje le awje ta duje tar mba nɛɛ̂n nɛ̂n, ta bbo dingaje tar kə̂ maji ang tɛɛ̂ tə̂ a, kuwɛ̂ kulɛ̂ ji njê-gangəje sariya tə̂ kə ji njê-kɔn-bbeje tə̂. 21Dəwje le dujeje tar nan: «Nje-nɛ̂n-tɔju, n-gərə to tar-pa ləi kə nɛ̂n-tɔju ləi to kə dɔgɔlɛ̂ ngaâ ar go marə dəw tə̂ ang. Aw tɔju ddəw lə Lubba tɔkɔrɔ tə̂ njaa. 22Ndu arəje ddəw karə juka lambo kə tɔkə mbay kə̂ Rɔm wase ndu arəje ddəw ang wa?»

23A Jeju gərə gusu ləde le ngaâ ilade tə̂ nan: 24«Ə-tɔjuje marə kandə narɛ kâra arə jooje. Əndaji dɔ dəw nəənn kə makəturu kə̂ n̂-dda narɛ tə̂ nəənn le to lə nân wa?» Dilaje tə̂ nan: «To le tɔkə mbay kə̂ Rɔm.» 25Yeenn ngaâ n̂-pa narəde nan: «Arəje tɔkə mbay kə̂ Rɔm nɛ̂n kə̂ to lə tɔkə mbay kə̂ Rɔm, arəje Lubba nɛ̂n kə̂ to lə Lubba.» 26Tarje tɔyn kə̂ Jeju pa kəm dəwje tə̂ənn le, dingaje marə nɛ̂n ta kunda nɛ̂n tar dɔɛ̂ tə̂ ang. Tar le dum dɔde ngaâ dutuje tade.

Tar ndol lə dəwje kə̂ oyje

27 Sadusinyɛje ddeeje rɔ Jeju tə̂. Sadusinyɛje le toje to dəwje kə̂ paje nan dəwje kə̂ oyje a ndolje ang ngaa. N̂-dujuje tar Jeju nan: 28«Nje-nɛ̂n-tɔju, oo, Mɔyijə dda makəturu tə̂ nan: ‹Bbo dəw taa dɛnɛ̂n ngaâ inga ngonn ang a oy a, maji karə ngokɔɛ̂n ta dɛnɛ̂n-ndubba laa uju nɛ̂n ngannje ture tə̂.› 29Ləw, marə ngakɔn-naanje eeje siri. Ne kə̂ n̂-to dərə n̂-taa dɛnɛ̂n ngaâ ninya ngonn ture tə̂ ang, a noy. 30Nje-goe kə̂ to joo ləde taa dɛnɛ̂n-ndubba le ngaâ nuju saa ngonn ang, a noy. 31Mota ləde taa dɛnɛ̂n-ndubba le a, to tokə baann tɔ. Dede siri kəm njaa n̂-taaje dɛnɛ̂n-ndubba le, a dujuje saa ang a, doyje. 32Gode tə̂ a, dɛnɛ̂n-ndubba le oy tɔ. 33Ndɔ ndol lə dəwje kə̂ oyje a, nân horo ngakɔn-naanje tə̂ənn a to nje-dɛnɛ̂n le wa? Mba dede siri tɔyn njaa n̂-taaje dɛnɛ̂n le.» 34Jeju ilade tə̂ nan: «Dəwje kə̂ dɔ nangə tə̂ nəənn aw taaje dɛnɛ̂n ngaâ aw taaje ngaw. 35A dəwje kə̂ oyje kə̂ Lubba a koode to dasəje ta ndol ta kisi kəm baa duninya tə̂ kə̂ aw ddee le, dede dâ taaje dɛnɛ̂n ang ddəm dâ taaje ngaw ang ddəm. 36Dâ kasəje ta koy ang ngaa, mba n̂-toje kâra baa kə anjəje. N̂-toje to ngann lə Lubba, mba doyje, a n̂-ndolje mban. 37Mɔyijə tɔju kə majɛ̂ nan dəwje kə̂ oyje ndolje. Mba nɛ̂n kə̂ Mɔyijə oo bər-kam tə̂ kə̂ dda tarɛ̂ makəturu tə̂ le, Mɔyijə bbar ri Əbbə-dəwje nan Lubba lə Abaraham, Lubba lə Ijakə, Lubba lə Jakobbo. 38Lubba to Lubba lə dəwje kə̂ oyje ang, n̂-to Lubba lə dəwje kə̂ isije kəm baa, mba dəwje tɔyn isije kəm baa kəm Lubba tə̂.» 39Marə njê-gərəje-Ndu ilɛ̂je tə̂ nan: «Nje-nɛ̂n-tɔju, ə-pa tar maji nya.» 40Yeenn bba n̂-tay n̂-dujeje tar ang ngaa.

Kristə le to ngonn lə Dabbiti wa?

41Jeju pa arəde nan: «Dəwje a kasəje ta pa nan Kristə le to ngonn lə Dabbiti tokə baânn wa? 42Dabbiti njaa pa Makəturu tə̂ lə Sɔmje nan:

‹Əbbə-dəwje Lubba pa arə Əbbəmje nan: Isi dɔ ji-kɔləm tə̂

43ndərəng ta mungu njê-baanje ləi kɔ gɔli tə̂.›

44A bbo Dabbiti bbar Kristə le to Əbbeeje mban a, Kristə le a to ngonnɛ̂ tɔ bbay tokə baânn wa?»

Aaje rɔse rɔ Njê-gərəje-Ndu tə̂

45Dəwje kə̂ banya aw ooje tar lə Jeju a, Jeju pa arə njê-njaje goe tə̂ nan: 46«Aaje rɔse rɔ njê-gərəje-Ndu tə̂, mba n̂-ndikije ta kula kubbu kə̂ ngal bba ta nja nɛ̂n. N̂-ndikije karə dəwje ddade lapiya natâ. N̂-ndikije nɛ̂n-kisije kə̂ to kete mə kəy mbɔn-naan tə̂ kə nɛ̂n-kisije kə̂ dunda kete ta nɛ̂n-kusa tə̂. 47Daw taaje nɛ̂nje lə dɛnɛ̂n-ndubbaje tɔyn jide tə̂, daw dujuje Lubba darə kure əw mba kəm dəwje. Mba yeenn bba sariya kə̂ dɔde tə̂ a ngəng nya kuta lə kəsə dəwje.»

Currently Selected:

Luku 20: KabbaDkS

Highlight

Copy