Luku 21

Nɛ̂n-karə-baa lə marə dɛnɛ̂n-ndubba

1Mə kəy-polo Lubba tə̂, Jeju unn kəmɛ̂ ngaâ oo njê-nɛ̂n-kingaje kə̂ aw ilaje nɛ̂n-karə-baa ləde mə nɛ̂n tə̂. 2Noo marə dɛnɛ̂n-ndubba kə̂ to nje-ndoo aw ila ngann kandə narɛ joo mə nɛ̂n tə̂ le tɔ. 3N̂-pa nan: «M-pa marəse, kə̂ tɔkɔrɔ, dɛnɛ̂n-ndubba kə̂ to nje-ndoo nəənn ila nɛ̂n bo uta dəwje tɔyn, 4mba dede tɔyn narɛ kə̂ dooje nɛ̂n ta dda nɛ̂n ang â dilaje. A ne, bbay nɛ̂n kə̂ nayn ta karə n̂-ngəm nɛ̂n rɔɛ̂ â nila.»

Jeju pa tar kəy-polo Lubba kə̂ dâ guru

5Marə dəwje aw paje tar kəy-polo Lubba daw pitije ərje kə̂ kura kə nɛ̂nje kə̂ kura kə̂ dəwje arəje to nɛ̂n-karə-baa kə̂ n̂-dda nɛ̂n kəy le. A Jeju pa nan: 6«Nɛ̂n tɔyn kə̂ aw ooje nəənn marə ndɔje aw ddee kə̂ dâ guru. Marə ər a nayn dɔ marɛ̂ tə̂ ang.»

Nɛ̂nje kə̂ a ddeeje kete bba ddutu ndɔ a kasə

7Dəwje le dujeje nan: «Nje-nɛ̂n-tɔju, ndɔ kə̂ dda bba nɛ̂ɛnn le a to wa? Ddi bba a tɔjuje to nɛ̂njeenn le a toje wa?» 8Jeju ila tə̂ nan: «Aaje rɔse, arəje dəw ərəse ang, mba dəwje nya a ddeeje kə rim ngaâ dâ paje nan: ‹Əman â m-to Kristə le.› Marɛ̂je a paje nan: ‹Ndɔ nayn ngɔsi baa ngaa.› Unnje gode ang. 9Bbo ooje tar ddɔje kə tar dɔ-kətərə kə̂ dəwje a ddaje a, arəje bbəəl ddase ang, mba maji karə nɛ̂ɛnn le tee dɔngɔr bba. A njangə baa goe tə̂, a to ddutu ndɔ ang bbay.» 10Goe tə̂ a, n̂-pa narəde nan: «Marə gəl-dəwje a kin ta ddɔ kə marə gəl-dəwje ngaâ marə bbe-kɔn a kin ta ddɔ kə marə bbe-kɔn. 11Nangə a yəkə to bbəəl nya, bbo a koso, rɔ-toje kə̂ dəwje a koyje nɛ̂n nya a koso marə loje tə̂. Marə nɛ̂n-bbəəlje kə nɛ̂n-mɔrije a kubbaje darâ.»

Nɛ̂n-singaje kə̂ a kinga njê-njaje go Jeju tə̂

12«A dɔngɔr bba karə nɛ̂njeenn teeje le, dâ kuwase ngaâ dâ kula kəmse ndoo tə̂, dâ kilase ji dəwje tə̂ kəy mbɔn-naan tə̂, dâ kilase kəy-kula tə̂, dâ kaw kə se nɔn tɔkə mbayje tə̂ kə nɔn ngann mbayje tə̂ mbam. 13Nɛ̂njeenn le a karəse ddəw karə ə-paje tar ləm kəm dəwje tə̂. 14Əjəje tar kete mba tar kə̂ a paje bba ta kɔru nɛ̂n naji ləse ang, 15mba mâ karəse tar kəm-karɛ kə̂ a gangə singa njê-baanje ləse ddəm dâ kasəje ta mayn ang ddəm. 16Kɔnsese kə bɔsese, ngakɔnse kə njê-nujuje ləse kə njê-buwa-kuraje ləse njaa kara a kilase ji njê-baanje tə̂ ngaâ dâ tɔl marɛ̂je nya horose tə̂. 17Dəwje tɔyn a mbətəse mba rim. 18A biin dɔse kâra a koso nangə̂ ang. 19Uwaje arəje ngəng mba təbbə ləse.»

Nɛ̂n kə̂ a ddee dɔ Jerujalɛm tə̂

20«Bbo ooje njê-ddɔje gukuje dɔ bbe kə̂ Jerujalɛm a, ə-gərəje to kar kə̂ dâ tuju nɛ̂n Jerujalɛm ddee ngɔsi. 21Kar tə̂ənn, maji karə dəwje kə̂ isije nangə Jude tə̂ aynje ər kə dɔ ddingirije tə̂. Maji karə njê kə̂ isije dann bbe tə̂ kə̂ Jerujalɛm aynje kə ddang. Maji karə njê kə̂ isije ngann bbeje tə̂ andəje mə bbe tə̂ kə̂ Jerujalɛm ang. 22Mba a to ndɔ kə̂ Lubba a gangə nɛ̂n sariya dɔ dəwje tə̂, mba karə nɛ̂nje tɔyn kə̂ n̂-dda Makəturu tə̂ lə Lubba ddeeje to nɛ̂n kə̂ tɔkɔrɔ. 23A to ndoo nya karə dɛnɛ̂nje kə̂ uwaje səm kə dɛnɛ̂nje kə̂ ngannde aw ilje mba, dɔ ndɔje tə̂ənn. Mba nɛ̂n kəm-to-ndoo kə̂ ngəng a to mə bbe tə̂ le, wungu a kɔn Lubba dɔ dəwje tə̂ kə̂ bbe tə̂ le tɔ. 24Dâ tɔlde kə tɔkə kiya, dâ kaw kə de to bbərəje horo dəwje tə̂ kə̂ marə bbeje tə̂ tɔyn ngaâ marə dəwje kə̂ gəlde to Jiipije ang a mbɔynje Jerujalɛm kə gɔlde ndərəng ndɔ kə̂ kar ləde a tunga nɛ̂n.»

Ndɔ ddee lə Ngonn lə dəw

25«Nɛ̂nje kə̂ dumje dɔ dəw a teeje kəm kar tə̂ ddəm kəm nɛyn tə̂ ddəm kəm əndɛtɛrɛndɛnje tə̂ ddəm. Bbəəl a tɔl dəwje kə̂ dɔ nangə tə̂ mba ba-katə kə̂ kɔrɛ̂ a bbar ngaâ a ləngə. 26Bbəəl a tɔl dəwje kar tə̂ kə̂ daw ngəbbəje nɛ̂n nɛ̂n kə̂ a ddee dɔ nangə tə̂, mba singa-mɔnguje kə̂ darâ a yəkəje. 27Kar tə̂ənn, dəwje a kooje Ngonn lə dəw kə̂ a ddee mə mum tə̂ kə singa-mɔngu laa tɔyn ddəm piti laa tɔyn ddəm. 28Bbo nɛ̂ɛnn unn kutu ta ddee a, arje njarara dɔ gɔlse tə̂ ta uwaje dɔse kə taar, mba ndɔ kɔruse mə bbərə tə̂ nayn ngɔsi ngaa.»

Gusu-tar dɔ kakə pigə tə̂

29Goe tə̂ a, Jeju pa marə gusu-tar arəde nan: «Ooje kakə pigə kə kəsə kakəje tɔyn. 30Bbo ooje daw dunjuje a, ə-gərəje to nɛyn nɛ̂n-dubbu ddee ngɔsi ngaa. 31Ddəw kâra baa, bbo ooje nɛ̂njeenn kə̂ aw toje a, maji karə ə-gərəje to kɔn-mbay lə Lubba nayn ngɔsi ngaa. 32Tɔkɔrɔ, m-pa marəse, dəwje kə̂ bbokənɛn nəənn a koyje tɔyn ang bbay a, nɛ̂njeenn tɔyn a toje. 33Dara kə nangə a ndayje, a tarje ləm a ndayje ndɔ kâra ang.»

Maji karə undaje kəmse dɔ rɔse tə̂

34«Aaje rɔse! Arəje məse to kə dɔ kay koto tə̂ karə uta dɔse kə kusa nɛ̂n karə uta dɔse dɔrɔ ang, arəje kəjə-tar mba nɛ̂nje kə̂ nangə̂ nəənn uta dɔse ang. Bbo baann ang a, ndɔ nəənn le a ddee dɔse tə̂ busu 35tokə lə bandə kə̂ aw uwa da, mba ndɔ le a ddee busu dɔ dəwje tə̂ tɔyn kə̂ dɔ nangə tə̂. 36Maji karə ə-tibbije ang, ə-dujuje Lubba kə kar tɔyn, yeenn bba â kingaje singa ta tee nɛ̂n ta nɛ̂n tə̂ kə̂ a ta ddee le ddəm ta kar nɛ̂n taar nɔn Ngonn lə dəw tə̂ ddəm.»

37Lo arɛ a, Jeju aw tɔju nɛ̂n mə kəy-polo Lubba tə̂ ngaâ lo ndul a, naw to dɔ ddingiri Olibəje tə̂. 38Dəwje tɔyn awje rɔɛ̂ tə̂ kəy-polo Lubba tə̂ kə əndɔɔ baa ta koo tar laa.

Currently Selected:

Luku 21: KabbaDkS

Highlight

Copy