Luku 23
23
Daw kə Jeju nɔn Pilatə tə̂
1Dəwje le tɔyn inje awje kə Jeju nɔn Pilatə tə̂. 2Dulaje tar tɛɛ̂ tə̂ nan: «Jinga dingaw nəənn, naw nɔsu kutu dəwje ta karə n̂-ddaje dɔ-ngəng. N̂-pa narə dəwje ta karə dukaje lambo darəje tɔkə mbay kə̂ Rɔm ang ngaâ n̂-pa nan ne njaa n̂-to Kristə le, n̂-to tɔkə mbay.» 3Pilatə duju tar Jeju nan: «Ə-to tɔkə mbay lə Jiipije wa?» Jeju ilɛ̂ tə̂ nan: «Əi njaa ə-pa.»
4Pilatə pa arə mbayje lə njê-poloje Lubba kə dəwje kə̂ banya le nan: «Minga marə nɛ̂n kə̂ asə karə munda nɛ̂n tar dɔ dingaw tə̂ nəənn kâra ang.» 5A n̂-təlje n̂-paje darə ngəng nya bbay nan: «Naw tɔju nɛ̂n naw nɔsu nɛ̂n kutu dəwje narə aw ddaje dɔ-ngəng nangə tə̂ kə̂ Galile tɔyn. Nunn kute nangə tə̂ kə̂ Jude ndərəng lo tə̂ nəənn.»
6Pilatə oo tarjeenn le a, duju ta gərə se dingaw nəənn to dəw kə̂ Galile wa? 7N̂-pa darɛ̂ nan Jeju in nangə tə̂ kə̂ tɔkə mbay Erodə â ɔn dɔɛ̂ bba ddee. Mba yeenn bba, nula Jeju le narə Erodə. A Erodə le kara ee Jerujalɛm mə ndɔje tə̂ənn le tɔ.
Daw kə Jeju nɔn Erodə tə̂
8 Erodə oo Jeju a, rɔɛ̂ nəəle nya, mba ləw baa njaa naw sangə ddəw ta kooe, mba noo tarje nya kə̂ dəwje aw paje dɔɛ̂ tə̂ ngaâ nunda məɛ̂ karə Jeju dda marə nɛ̂n-mɔrije arə noo. 9N̂-duju tar Jeju nya. A Jeju ilɛ̂ tə̂ ang. 10Mbayje lə njê-poloje Lubba kə njê-gərəje-Ndu eeje tə̂ənn, daw dundaje tar dɔ Jeju tə̂ kə singa singa. 11Erodə kə mbambaje laa ooeje maji ang kəmde tə̂. N̂-kokeje ngaâ dulɛ̂je kubbu kə̂ ndɔnrɛn. Goe tə̂ a, dulɛ̂je darə Pilatə guku. 12Ndɔɛ̂ tə̂ənn njaa, Pilatə de kə Erodə kə̂ n̂-toje to njê-baanje lə naan le, n̂-təlje to njê-buwa-kuraje lə naan ngaa.
N̂-gangə sariya-yo dɔ Jeju tə̂
13Pilatə bbar mbayje lə njê-poloje Lubba kə njê-kɔnje dɔ dəwje kə njê-bbeje le, 14n̂-pa narəde nan: «Ə-ddeeje kə dingaw nəənn kete arəmje ngaâ ə-paje nan: ‹Naw nɔsu kutu dəwje narə dda dɔ-ngəng.› Ooje, m-duje tar kəmse tə̂. A minga marə majang kâra kə̂ n̂-dda bba undaje nɛ̂n tar dɔɛ̂ tə̂ le ang. 15Erodə kara inga majang kə̂ n̂-dda kâra ang tɔ. Mba yeenn bba nulɛ̂ narəje guku. Dingaw nəənn dda marə nɛ̂n kâra kə̂ asə yo ang. 16Mâ karə dundɛ̂ kə ndəy, a mâ kinyɛ̂.» [17Ndɔ kusu Pakə kâra kâra tɔyn, Pilatə aw ɔru dəw kâra kəy-kula tə̂.]
18Dəwje le tɔyn paje kə taar nan: «Ə-tɔl dingaw nəənn, a ɔru Barabas arəje!» 19Barabas le duwɛ̂ dilɛ̂ kəy-kula tə̂, mba nee horo marə dəwje tə̂ kə̂ ddaje dɔ-ngəng mə bbe tə̂ ddəm n̂-tɔl dəw ddəm.
20Pilatə pa tar arəde bbay, mba n̂-ndiki ta kinya Jeju. 21A duruje əkii nan: «Ə-tɔlɛ̂ kakə-dəsə tə̂! Ə-tɔlɛ̂ kakə-dəsə tə̂!»
22Pilatə pa arəde kə̂ gɔl mota laa nan: «Majang ddi â n̂-dda wa? Minga marə nɛ̂n kə̂ n̂-dda kə̂ asə yo ang. Mâ karə dundɛ̂, a dinyɛ̂.» 23A dəwje le uruje əkii dujeje nɛ̂n nya karə n̂-tɔl Jeju kakə-dəsə tə̂. Əkii ləde le uta dɔ Pilatə. 24Yeenn bba Pilatə unn ndu ta dda nɛ̂n kə̂ daw dujuje le. 25Nɔru Barabas kə̂ dəwje le dujeje karə nɔrɛ̂ le, ne kə̂ dilɛ̂ kəy-kula tə̂ mba dɔ-ngəng kə dəw kə̂ n̂-tɔlɛ̂ le. A nula Jeju jide tə̂ karə n̂-ddaje saa nɛ̂n tɔyn kə̂ məde ndiki.
Daw kə Jeju ta tɔlɛ̂
26Mbambaje aw awje kə Jeju a, dingaje Simɔn kə̂ bbe tə̂ kə̂ Sirɛnn, nin ndɔɔ̂ naw təl kə bbeê. Duwɛ̂je dundaje kakə-dəsə le dɔɛ̂ tə̂ darə noto n̂-nja nɛ̂n go Jeju tə̂.
27Dəwje kə̂ banya kə dɛnɛ̂nje aw unnje go Jeju le. Dɛnɛ̂nje le aw undaje karde aw nɔnje nɛ̂n mbɛɛ̂. 28Jeju turu rɔɛ̂ kə rɔde tə̂ ngaâ pa nan: «Dɛnɛ̂nje kə̂ Jerujalɛm, ə-nɔnje mba sese njaa kə ngannse bbo ə-nɔnje mbam ang. 29Ooje, marə ndɔje aw ddeeje kə̂ dəwje a paje nan: ‹Maji arə dɛnɛ̂nje kə̂ awje katə, dede kə̂ dujuje ang bbay kə dede kə̂ darəje mba ngonn il ndɔ kâra ang!› 30Mə ndɔje tə̂ənn le, dəwje a paje karə ddingirije nan: ‹Osoje dɔje tə̂!› Dâ paje karə dɔkubbaje nan: ‹Ə-dəbbəje dɔje tə̂!› 31Mba bbo dəwje ddaje nɛ̂n kə kakə kə̂ təbbə tokə be a, kakə kə̂ tutu a to tokə baânn wa?»
32Kar tə̂ənn, daw daw kə dingawje joo kə̂ toje to njê-nɛ̂n-ddaje kə̂ maji ang ta tɔlde naan tə̂ kə Jeju tɔ.
Mbambaje bbərəje Jeju kakə-dəsə tə̂
33N̂-teeje lo tə̂ kə̂ daw bbar nan «Ka-dɔ-dəw» a, n̂-bbərəje Jeju kakə-dəsə tə̂ ngaâ n̂-bbərəje njê-nɛ̂n-ddaje kə̂ maji ang kə̂ joo le kakə-dəsəje tə̂ tɔ. Kâra dɔ ji-kɔl Jeju tə̂, a kâra dɔ ji-gəle tə̂. 34Jeju pa nan: «Bɔy, ɔru tar dɔde tə̂, mba n̂-gərəje nɛ̂n kə̂ daw ddaje ang.»
N̂-ddɔje mbari n̂-kaynje nɛ̂n naan kubbuje laa. 35Dəwje arje tə̂ənn aw ooje nɛ̂njeenn le. Mbayje lə Jiipije aw kokoje Jeju nan: «Naji marə dəwje. A bbo n̂-to Kristə kə̂ Lubba mbəre a, maji karə naji da-rɔɛ̂ njaa ngaa.» 36Mbambaje kara kokeje. Dawje ngɔsi saa, darɛ̂je maann-binyə kə̂ masə. 37N̂-paje nan: «Bbo ə-to tɔkə mbay lə Jiipije a, əi njaa aji rɔi!» 38N̂-bbərə makəturu dɔ kakə-dəsə tə̂ le taar nan: «Tɔkə mbay lə Jiipije â nəənn.»
39Marə dəw kə̂ maji ang kâra kə̂ n̂-bbəre kakə-dəsə tə̂ le taji Jeju pa nan: «Ə-to Kristə le ang wa? Maji karə əi njaa aji da-rɔi bbo ajije!» 40A dəw kə̂ maji ang kə̂ kâra ndangə nje-marɛ̂ le nan: «Ə-bbəəl Lubba ang wa? Əi kara n̂-gangə sariya dɔi tə̂ tokə laa tɔ. 41Sariya ləje to kə dɔgɔlɛ̂, mba to kuka nɛ̂nje kə̂ maji ang kə̂ n-dda â jinga. A ne, n̂-dda nɛ̂n kə̂ maji ang kâra ang.» 42N̂-pa narə Jeju nan: «Jeju, ole məi dɔm tə̂ ndɔ tə̂ kə̂ â təl ddee kɔn-mbay.» 43Jeju pa arɛ̂ nan: «Tɔkɔrɔ, m-pa mari, bbokənɛn a kisi səm paradis tə̂.»
Jeju oy
44Gɔl kar aw ngɔsi kə dɔku gire joo a, lo ndul dɔ nangə tə̂ le tɔyn ndərəng gɔl kar mota kə̂ lo-kul tə̂. 45Kar ɔsu ang ngaâ kubbu kə̂ n̂-gangə nɛ̂n mə kəy-polo Lubba tiir dannâ joo. 46Jeju uru əkii pa nan: «Bɔy, minya ndilim mə jii tə̂.»
Goe tə̂ a, noy. 47Nje-kɔn dɔ mbambaje oo nɛ̂njeenn le a, ɔsu gaji Lubba pa nan: «Tɔkɔrɔ njaa dəw nəənn to gatə gatə.»
48Dəwje kə̂ banya kə̂ arje lo nɛ̂nje tə̂ənn le ooje nɛ̂nje kə̂ toje le ngaâ undaje karde təlje nɛ̂n kə bbeê. 49Dəwje tɔyn kə̂ gərəje Jeju kə dɛnɛ̂nje kə̂ inje saa Galile tə̂ awje saa arje ddəw əw bba aw ooje nɛ̂nje kə̂ aw toje le.
Jojɛpə dubbu Jeju
50-51Marə dingaw, ria nan Jojɛpə, n̂-to dəw kə̂ maji ddəm dəw kə̂ gatə gatə ddəm. N̂-to dəw kə̂ Arimate kə̂ to marə tɔkə bbe lə Jiipije. Naw ngəbbə kɔn-mbay lə Lubba. Nee horo njê-gangəje sariya tə̂ le. A ne, n̂-mbətə sariya kə̂ njê-gangəje sariya marɛ̂je gangəje dɔ Jeju tə̂ kə nɛ̂nje kə̂ n̂-ddaje kə Jeju le. 52Jojɛpə le aw rɔ Pilatə tə̂, duju ta kunn yo Jeju. 53Nɔru niinn Jeju kakə-dəsə tə̂ nila nangə̂, n̂-kə niinn le kə kubbu, naw nila mə buwa-yo tə̂ kə̂ duru mə ər tə̂. Buwa-yo le dila niinn dəw məɛ tə̂ ndɔ kâra ang bbay. 54Ndɔɛ̂ le to ndɔ gɔl nɛ̂n, mba ndɔ-kuwa-rɔ lə Jiipije a ta kunn-kute.
55Dɛnɛ̂nje kə̂ inje kə Jeju Galile tə̂ ddeeje saa le awje kə Jojɛpə aw ooje buwa-yo le kə gusu kə̂ Jojɛpə ila nɛ̂n niinn Jeju mə buwa-yo tə̂ le. 56N̂-təlje mba kaw gɔl ubbu kə yamboje kə̂ ta kuwa nɛ̂n ninn le. Goe tə̂ a, duwaje rɔde tokə ndu pa, mba to ndɔ-kuwa-rɔ lə Jiipije.
Currently Selected:
Luku 23: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA
