Luku 24

Jeju kə̂ oy le ndol

1Ndɔ-kuwa-rɔ tə̂ kə əndɔɔ baa, dɛnɛ̂nje le teeje awje kə yamboje kə̂ dede njaa n̂-gɔlje le buwa-yo tə̂ le. 2Dooje a, ər kə̂ dutu nɛ̂n ta buwa-yo le tokə ndubbu kə ddang. 3Dandəje mə buwa tə̂ le a, dooje niinn Əbbə-dəwje Jeju le ang. 4Dəjəje nɛ̂n kə̂ dooje le pin. A ta koo a, dingawje joo kə̂ ulaje kubbu kə̂ ndɔnrɛn undaje lo tee ingajede. 5Bbəəl uta dɔ dɛnɛ̂nje le ngaâ dulaje dɔde kə nangə̂. Dingawje kə̂ joo le paje arəde nan: «Mba ddi bba aw sangəje dəw kə̂ isi kəm baa horo dəwje tə̂ kə̂ oyje wa? 6Nee nəənn ang, n̂-ndol mban. Oleje məse dɔ tar tə̂ kə̂ n̂-pa narəse, kar tə̂ kə̂ n̂-nayn nɛ̂n Galile le. Kar tə̂ənn le n̂-pa nan: 7Maji karə dula Ngonn lə dəw ji njê-nɛ̂n-ddaje tə̂ kə̂ maji ang. Dâ tɔlɛ̂je kakə-dəsə tə̂ ngaâ ndɔ mota a, nâ ndol.»

8Ngaâ doleje məde dɔ tarje tə̂ lə Jeju le. 9Dinje ta buwa-yo tə̂ le n̂-təlje mba kɔru gəl nɛ̂njeenn tɔyn karə njê-kaw-kulaje lə Jeju kə̂ dɔku gire kâra kə kəsə dəwje tɔyn. 10Mari kə̂ Magədala kə Jani kə Mari kɔn Jakəje kə marə dɛnɛ̂nje â paje tar le arə njê-kaw-kulaje le. 11A dooje tar lə dɛnɛ̂nje le to tar mbə ngaâ n̂-ndikije tə̂ ang. 12A Piyɛr in ayn ngɔru aw ta buwa-yo tə̂ le. Nula gɔsɛ̂ a, ta-kubbu kə̂ to nangə̂ â noo ngaâ naw təl kə kə̂y a, dɔɛ̂ ayn mba nɛ̂n kə̂ to le.

Jeju tee inga marə njê-njaje goe tə̂ ddəw Emawus tə̂

13Ndɔɛ̂ tə̂ənn njaa dəwje joo horode tə̂ awje kə marə bbe tə̂ kə̂ ria nan Emawus kə̂ əw asə kilometere dɔku gire kâra kə Jerujalɛm. 14Daw tɔnje tam nɛ̂nje tɔyn kə̂ toje le. 15Kar tə̂ kə̂ daw tɔnje tam le ngaâ daw maynje naan tar a, Jeju ddee ngɔsi kə de ngaâ aw nja kə de. 16Daw dooeje, a marə nɛ̂n ɔkude ddəw karə n̂-gəreje. 17N̂-pa narəde nan: «Tar ddi bba aw paje horose tə̂ aw njaje nɛ̂n nəənn wa?» Darje lo kâra, rɔde nəəlde ang. 18Marɛ̂ kâra horode tə̂ kə̂ ria nan Kelewopas ilɛ̂ tə̂ nan: «Nɛ̂nje kə̂ toje mə ndɔje tə̂ nəənn, əi kə kari baa njaa ə-to dəw kə̂ Jerujalɛm kə̂ gərə tarɛ̂ ang wa?» 19Jeju dujude nan: «Ddi wa?» Dilɛ̂je tə̂ nan: «Nɛ̂n kə̂ inga Jeju kə̂ Najarɛtə. N̂-to nje-kila mbər tar lə Lubba kə̂ ngəng nya ddəw kula tə̂ ddəm ddəw tar tə̂ ddəm nɔn gɔl Lubba tə̂ kə nɔn gɔl dəwje tə̂ tɔyn. 20Mbayje lə njê-poloje Lubba kə̂ bbeê ləje kə tɔkə mbayje ləje ilɛ̂je ji dəwje tə̂ arə n̂-gangəje sariya-yo dɔɛ̂ tə̂ ngaâ n̂-tɔlɛ̂ kakə-dəsə tə̂. 21Jeje, junda məje to nɛ̂n â nâ kɔru Ijarayɛl kɔ bbərə tə̂. A nɛ̂ɛnn kə̂ to le, ndərəng bbokənɛn to ndɔ mota laa ngaa. 22Tɔkɔrɔ, marə dɛnɛ̂nje horoje tə̂ ddee paje marə tar kə̂ dum dɔje. Dawje kə əndɔɔ baa dɔbarə tə̂, 23a dingaje niinn Jeju le ang. N̂-təlje n̂-ddee n̂-paje tar lə anjəje kə̂ teeje ingajede ngaâ paje nan Jeju le isi kəm baa. 24Marə dəwje kə̂ eeje kə je awje ta buwa-yo tə̂ le. Dooje nɛ̂nje le tokə dɛnɛ̂nje le paje, a Jeju le dooeje ang.» 25Jeju pa arəde: «See njê-dɔ-gotoje! Tarje tɔyn kə̂ njê-kilaje mbər tar lə Lubba paje arəse le, ə-ndikije tə̂ kə de kə ngɔru ang mba ddi wa? 26Maji karə Kristə le oo ndoo tokə baann kete bba karə ninga piti ji Lubba tə̂ ang wa?» 27Jeju unn kutu kɔru gəl nɛ̂nje kə̂ Mɔyijə kə njê-kilaje mbər tar lə Lubba tɔyn paje dɔɛ̂ tə̂ makəturuje tə̂ le.

28N̂-teeje ngɔsi kə bbe kə̂ daw dawje kə tə̂ le a, Jeju dda tokə nâ ta nday kaw lo tə̂ kə̂ ddəw əw. 29A n̂-gangɛ̂je nan: «Ə-nayn kə je, mba lo aw wul ngaâ kar a ta kandə ngaa.» Nandə mə bbe tə̂ le ngaâ n̂-nayn kə de. 30Nisi ta nɛ̂n-kusa tə̂ kə̂ de a, nunn mapa, narə wooyo Lubba ngaâ goe tə̂ a, n̂-tətə dannâ n̂-kaynde. 31Yeenn ngaâ kəmde uja dɔɛ̂ tə̂ arə n̂-gəreje. A niki kəmde tə̂ nyɔm. 32N̂-paje tar horode tə̂ nan: «Kar tə̂ kə̂ naw pa tar narəje ddəw-boô ngaâ naw nɔru gəl Makəturuje narəje le, məje aw unda dɔ binya ang wa?»

33Mə kar tə̂ənn njaa dinje n̂-təlje Jerujalɛm ngaâ dingaje njê-kaw-kulaje kə̂ dɔku gire kâra kə njê-buwa-njaje ləde le, 34kə̂ aw paje arəde nan: «Tɔkɔrɔ, Əbbə-dəwje ndol, mba Simɔn ooe kə kəmɛ̂.» 35Njê-njaje go Jeju tə̂ kə̂ joo le ɔruje gəl nɛ̂n kə̂ ingade ddəw-boô kə ddəw kə̂ n̂-gərəje nɛ̂n Jeju le, kar tə̂ kə̂ naw kayn nɛ̂n de mapa le.

Jeju tee inga njê-njaje goe tə̂

36Daw paje tar baann bbay a, Jeju le njaa tee ar dannde tə̂ ngaâ n̂-pa narəde nan: «Mə-wul-lɔm ee kə se.»

37Ndilde ɔru ddəm bbəəl uta dɔde ddəm ngaâ dəjəje to uman â dooeje. 38A n̂-pa narəde nan: «Mba ddi bba arəje məse aw sangəse wa? Mba ddi bba aw maynje tar məse tə̂ wa? 39Aaje jimje kə gɔləmje ooje, əman njaa mar nəənn, ɔrumje ooje, taal rɔ uman to ang ddəm singa rɔɛ̂ to ang ddəm. A əman, taal rɔm to ddəm singa rɔm to ddəm.»

40Naw pa tar le a, n̂-tɔjude jiaje kə gɔlɛ̂je le. 41Rɔde nəəlde nya, rɔ-nəəl le dda bba dooje nɛ̂n le to nɛ̂n kə̂ tɔkɔrɔ ang bbay ngaâ dɔde ayn. Yeenn le bba Jeju dujude nan: «Eeje kə marə nɛ̂n-kusa nəənn ang wa?»

42Darɛ̂je marə gɔju kanji kə̂ kɔbbu. 43N̂-taa nusa kəmde tə̂. 44Goe tə̂ a, n̂-pa narəde nan: «Nɛ̂n kə̂ m-pa marəse kar tə̂ kə̂ m-nayn kə se le â nəənn. Maji karə tar kə̂ dɔm tə̂ kə̂ mə makəturu-ndu tə̂ lə Mɔyijə kə makəturu tə̂ lə njê-kilaje mbər tar lə Lubba kə makəturu Sɔmje tə̂ ddee to nɛ̂n kə̂ tɔkɔrɔ.»

45Yeenn ngaâ n̂-təəyn nɛ̂n-gərə ləde narə n̂-gərəje nɛ̂nje kə̂ Makəturu lə Lubba pa le. 46N̂-pa narəde nan: «Makəturu lə Lubba pa nan: ‹Kristə le a koo ndoo ngaâ ndɔ mota a, nâ ndol. 47Dâ kila mbər tar kə ri Kristə le karə gəl-dəwje tɔyn turuje nɛ̂n məde, mba karə tar majang ləde ɔru dɔde tə̂. Mbər tar le a kunn-kute Jerujalɛm tə̂.› 48Ə-toje to njê-tar-naji nɛ̂nje nəənn le. 49Əman, mâ kula nɛ̂n kə̂ Bɔy unn ndue ta karəse le dɔse tə̂. Sese, maji karə ə-naynje Jerujalɛm nəənn ndərəng ndɔ kə̂ â kingaje nɛ̂n singa-mɔngu kə̂ in darâ.»

Jeju təl kə darâ

50Goe tə̂ a, Jeju ɔrude aw kə de ər kə Betani, nula jia kə taar ngaâ n̂-bbar tar kə̂ maji dɔde tə̂. 51Kar tə̂ kə̂ naw bbar tar kə̂ maji dɔde tə̂ le a, nɔtu ninyade ngaâ dunnɛ̂ daw saa darâ. 52Dede le, n̂-poleje ngaâ goe tə̂ a, n̂-təlje Jerujalɛm kə rɔ-nəəl. 53Ndɔ tɔyn njaa, deeje mə kəy-polo Lubba tə̂ daw dɔsuje gaji Lubba.

Currently Selected:

Luku 24: KabbaDkS

Highlight

Copy