Luku 3

Jan-Batisi ila mbər tar lə Lubba

1Bbal dɔku gire min laa kə̂ tɔkə mbay Tibɛr aw ɔn bbe, Pɔnsə Pilatə to nje-kɔn dɔ nangə kə̂ Jude ngaâ Erodə to ngonn mbay nangə tə̂ kə̂ Galile, Pilipi ngokɔn Erodə le to ngonn mbay nangə tə̂ kə̂ Iture kə nangə tə̂ kə̂ Trakonitə. Lijaniyas to ngonn mbay kə̂ Abilɛnn, 2Ann de kə Kayipi n̂-toje to tɔkə njê-poloje Lubba. Dɔ ndɔɛ̂ tə̂ənn â, Lubba pa tar arə Jan ngonn lə Jakari mə kɔr tə̂. 3Yeenn bba Jan nja dɔ nangə tə̂ kə̂ Jurdɛn tə̂, naw nila mbər narə dəwje karə ingaje batɛm ta tɔju to n̂-turuje məde bba karə tar majang ɔru dɔde tə̂. 4Nɛ̂n le to ddəw kâra baa tokə makəturu lə Ejayi kə̂ to nje-kila mbər tar lə Lubba pa nan: «Marə dəw aw ila mbər mə kɔr tə̂ nan:

Ə-ddaje ddəw lə Əbbə-dəwje,

arəje kila-ddəwje laa ndɔjuje.

5Wəlje tɔyn a kutuje,

ddingirije kə dɔkubbaje kâra kâra tɔyn a ddoomje,

nɛ̂n kə̂ dduku a ndɔju,

ngaâ goteje kə̂ to ngann ddəwje tə̂ a kutuje.

6Baann bba dəwje tɔyn a kooje kaji kə̂ Lubba a ta kaji dəwje.»

7Jan pa arə dəwje kə̂ banya kə̂ ddeeje karə n̂-ddade batɛm nan: «See əmbakaraje, nân â tɔjuse karə aynje sariya lə Lubba kə̂ aw ddee wa? 8Arəje kula-ddase tɔju to ə-turuje məse mban, əwje rɔse ta pa nan: ‹Abaraham to kasese!› M-pa marəse, Lubba asə ta turu ərje nəənn karə təlje to ngann ka Abaraham. 9Tinan to ngɔsi ta tuka nɛ̂n kakəje ngirɛ̂ tə̂ mban, kakə kâra kâra tɔyn kə̂ kandɛ̂ kə̂ maji goto tə̂, dâ tuka kila purô.»

10Dəwje kə̂ banya le dujeje nan: «Ddi bba to maji karə n-dda wa?» 11Nilade tə̂ nan: «Maji karə dəw kə̂ kubbu laa kə̂ taar ee joo a, unn kâra arə dəw kə̂ kubbu due, dəw kə̂ nɛ̂n-kusa laa to a, dda tokə baann tɔ.»

12 Njê-taaje narɛ lambo kə̂ ddeeje ta kinga batɛm tɔ dujeje nan: «Nje-nɛ̂n-tɔju, ddi â to maji karə n-dda wa?» 13Nilade tə̂ nan: «Ə-dujuje nɛ̂n uta dɔ ye kə̂ dunn ndu karə ə-dujuje le ang.»

14Mbambaje kara dujeje nan: «A jeje, ddi bba to maji karə n-dda wa?» Nilade tə̂ nan: «Uwaje dəw kə singa ə-taaje nɛ̂n laa ang ddəm ulaje tar ta dəw tə̂ baa ang ddəm. A maji karə narɛ-kunnse njaa undaje məse dɔɛ tə̂.»

Jan pa tar lə marə dəw kə̂ aw ddee

15Dəwje le isije aw nginanje ddee lə Kristə, mba yeenn bba daw dəjəje tar məde tə̂ nan Jan le njaa â to Kristə le wa? 16Nilade tə̂ tɔyn nan: «Əman, m-ddase batɛm maann. A marə dəw kə̂ utam, kə̂ mâ kasə tutu kula nɛ̂n-gɔl laa ang aw ddee. Ne â nâ ddase batɛm Ndil-mə-nda kə batɛm puru. 17Nuwa bagiri laa jia tə̂. Nâ kuta lo kunda ko laa ngaâ nâ jin kandə-ko le kungu mə dam tə̂ laa, a nâ ro tisa kəm puru tə̂ kə̂ a koy ndɔ kâra ang.»

18Jan aw ila mbər Tar kə̂ Maji arə dəwje ngaâ aw arəde ndəjəje dang dang tokə baann.

Erodə Antipas uwa Jan-Batisi ilɛ̂ kəy-kula tə̂

19Jan ndangə ngonn mbay Erodə Antipas mba Erodiyadə kə̂ to dɛnɛ̂n lə ngokɔɛ̂n kə̂ n̂-tɛɛ̂ jia tə̂ ddəm mba kulaje kə̂ maji ang tɔyn kə̂ n̂-dda ddəm. 20A dɔɛ tə̂ bbay, nuwa Jan le nilɛ̂ kəy-kula tə̂.

Jan-Batisi dda Jeju batɛm

21Kete bba karə duwa Jan le, Jan dda batɛm dəwje ngaâ n̂-dda Jeju batɛm tɔ. Kar kə̂ Jeju aw duju Lubba a, dara təəyn, 22ngaâ Ndil-mə-nda unn da-rɔ tokə lə dər ddisi dɔɛ̂ tə̂. Marə ndu in darâ nan: «Ə-to Ngonn ndiki ləm! Rɔm nəələm nya mbai.»

Gəl-kuju Jeju

23Bbal Jeju asə nɛ̂n kə̂ bbal dɔmota a, unn kutu kula laa. Dəwje əjəje nan n̂-to ngonn lə Jojɛpə kə̂ to ngonn lə Eli, 24Eli le to ngonn lə Matatə, Matatə le to ngonn lə Lebi, Lebi le to ngonn lə Mɛlki, Mɛlki le to ngonn lə Yanay, Yanay le to ngonn lə Jojɛpə, 25Jojɛpə le to ngonn lə Matatiyas, Matatiyas le to ngonn lə Amɔs, Amɔs le to ngonn lə Nahum, Nahum le to ngonn lə Esəli, Esəli le to ngonn lə Nagay, 26Nagay le to ngonn lə Maatə, Maatə le to ngonn lə Matatiyas, Matatiyas le to ngonn lə Semeyinn, Semeyinn le to ngonn lə Yosekə, Yosekə le to ngonn lə Yoda, 27Yoda le to ngonn lə Yohanan, Yohanan le to ngonn lə Reja, Reja le to ngonn lə Jorobabɛl, Jorobabɛl le to ngonn lə Selatiyɛl, Selatiyɛl le to ngonn lə Neri, 28Neri le to ngonn lə Mɛlki, Mɛlki le to ngonn lə Adi, Adi le to ngonn lə Kosam, Kosam le to ngonn lə Elemadam, Elemadam le to ngonn lə Ɛr, 29Ɛr le to ngonn lə Jeju, Jeju le to ngonn lə Eliyejɛr, Eliyejɛr le to ngonn lə Yorim, Yorim le to ngonn lə Matatə, Matatə le to ngonn lə Lebi, 30Lebi le to ngonn lə Simenyɔ, Simenyɔ le to ngonn lə Juda, Juda le to ngonn lə Jojɛpə, Jojɛpə le to ngonn lə Yonam, Yonam le to ngonn lə Eliyakim, 31Eliyakim le to ngonn lə Meleya, Meleya le to ngonn lə Menan, Menan le to ngonn lə Matata, Matata le to ngonn lə Natan, Natan le to ngonn lə Dabbiti, 32Dabbiti le to ngonn lə Jese, Jese le to ngonn lə Obɛdə, Obɛdə le to ngonn lə Bojə, Bojə le to ngonn lə Sala, Sala le to ngonn lə Nasɔn, 33Nasɔn le to ngonn lə Aminadabə, Aminadabə le to ngonn lə Adiminn, Adiminn le to ngonn lə Arini, Arini le to ngonn lə Eserɔn, Eserɔn le to ngonn lə Parɛjə, Parɛjə le to ngonn lə Juda, 34Juda le to ngonn lə Jakobbo, Jakobbo le to ngonn lə Ijakə, Ijakə le to ngonn lə Abaraham, Abaraham le to ngonn lə Tera, Tera le to ngonn lə Nawɔr, 35Nawɔr le to ngonn lə Serugu, Serugu le to ngonn lə Rehu, Rehu le to ngonn lə Pelɛgə, Pelɛgə le to ngonn lə Ebɛr, Ebɛr le to ngonn lə Sela, 36Sela le to ngonn lə Kenan, Kenan le to ngonn lə Arpakəsadə, Arpakəsadə le to ngonn lə Sɛm, Sɛm le to ngonn lə Nowe, Nowe le to ngonn lə Lemɛkə, 37Lemɛkə le to ngonn lə Matusalam, Matusalam le to ngonn lə Enɔkə, Enɔkə le to ngonn lə Yeredə, Yeredə le to ngonn lə Malaleyɛl, Malaleyɛl le to ngonn lə Kenan, 38Kenan le to ngonn lə Enos, Enos le to ngonn lə Sɛtə, Sɛtə le to ngonn lə Adam, Adam le to ngonn lə Lubba.

Currently Selected:

Luku 3: KabbaDkS

Highlight

Copy