Luku 4

Əsu nan Jeju

1 Ndil-mə-nda ddusu Jeju ngaâ in maann tə̂ kə̂ Jurdɛn təl. Ndil le ɔrɛ̂ aw saa mə kɔr tə̂. 2Lo tə̂ənn Əsu nɛɛ̂n mba ndɔ dɔsɔ. Mə ndɔje tə̂ənn tɔyn Jeju usa nɛ̂n ang ngaâ bbo ddɛɛ̂. 3Yeenn ngaâ Əsu pa arɛ̂ nan: «Bbo ə-to Ngonn lə Lubba a, ə-pa arə ər nəənn təl nɛ̂n-kusa.» 4Jeju ilɛ̂ tə̂ nan: «Makəturu lə Lubba pa nan: Dəw a nayn kəm baa ddəw nɛ̂n-kusa tə̂ kâra baa ang.»

5Əsu aw saa dɔ ddingiri tə̂ kə̂ ndəw ngaâ njangə baa njaa tɔjɛ̂ bbe-kɔnje tɔyn kə̂ duninya tə̂. 6Əsu pa arɛ̂ nan: «Mâ kari singa tɔyn kə piti kə̂ bbe-kɔnje tə̂ nəənn, mba darəm nɛ̂njeenn tɔyn, masə ta karə dəw tokə məm ndiki. 7Bbo ɔsu nɔin nangə̂ nɔnʼm tə̂ a, nɛ̂njeenn tɔyn a toje to ləi.» 8Jeju ilɛ̂ tə̂ nan: «Makəturu lə Lubba pa nan: ‹Əbbə-dəwje kə̂ to Lubba ləi kâra baa â, â kɔsu nɔin nangə̂ nɔɛ̂n tə̂ ta pole.› »

9Əsu aw saa Jerujalɛm bbay aw undɛ̂ taar dɔ kəy-polo Lubba tə̂ lə Jiipije ngaâ pa arɛ̂ nan: «Bbo ə-to Ngonn lə Lubba a, aal dɔ kəy tə̂ nəənn uru nangə̂, mba Makəturu lə Lubba pa nan: 10‹Lubba a kunn ndu karə anjəje laa mbai karə n̂-ngəmi. 11Dâ laije dɔ jide karə unda gɔli ər tə̂ ang.› » 12Jeju ilɛ̂ tə̂ nan: «Makəturu lə Lubba pa nan: ‹Əbbə-dəwje kə̂ to Lubba ləi, â tɔsu tɛɛ̂ ang.› » 13Əsu nɛɛ̂n kə gusu dang dang pin a, ɔtu inyɛ̂ mba nginan marə ndɔ.

Jeju təl aw Galile

14 Jeju təl aw Galile kə singa-mɔngu lə Ndil ngaâ ria bbar dɔ nangə tə̂ənn tɔyn. 15Naw tɔju nɛ̂n mə kəy mbɔn-naanje tə̂ ləde ngaâ dəwje tɔyn ɔsuje gajɛ̂.

Jeju ila mbər Tar kə̂ Maji Najarɛtə

16Jeju aw Najarɛtə bbe tə̂ kə̂ n̂-ngəmɛ̂ tə̂. Naw kəy mbɔn-naan tə̂ lə Jiipije ndɔ-kuwa-rɔ tə̂ ləde, tokə naw dda kə ndɔ tɔyn le. Nin taar ta tura Makəturu 17ngaâ darɛ̂ makəturu lə Ejayi kə̂ to nje-kila mbər tar lə Lubba. N̂-təəyn makəturu le ngaâ ninga lo kə̂ n̂-dda tə̂ nan:

18«Ndil lə Əbbə-dəwje to dɔm tə̂,

mba nungu ubbu dɔm tə̂ karə mila mbər Tar kə̂ Maji marə njê-ndooje.

Nulam karə m-pa marə bbərəje to dâ teeje kɔ bbərə tə̂,

karə m-pa marə njê-kəm-tɔje to dâ təlje kooje lo,

nulam karə mɔru dəwje ndoo tə̂ kə ddang.

19Ta kila mbər karə dəwje to bbal nəənn Əbbə-dəwje a ta dda mə-maji kə de.»

20Goe tə̂ a, Jeju ndəəm Makəturu lə naan tə̂ ngaâ təl nɛ̂n arə nje-kula kə̂ kəy mbɔn-naan tə̂ le ngaâ isi nangə̂. Kəm dəwje tɔyn kə̂ isije mə kəy mbɔn-naan tə̂ le to kə dɔɛ̂ tə̂. 21N̂-pa narəde nan: «Bbokənɛn, tar kə̂ Makəturu tə̂ kə̂ ooje kə mbise nəənn, ddee to nɛ̂n kə̂ tɔkɔrɔ ngaa.»

22Dəwje tɔyn paje tar laa maji ngaâ tar mə-maji tɔyn kə̂ aw tee tɛɛ̂ tə̂ le dum dɔde ngaâ n̂-paje nan: «Ngonn nəənn to ngonn lə Jojɛpə ang wa?» 23Jeju pa arəde nan: «A du ang, â paje kɔn-tar nəənn karəm: Nje-kaji njê-rɔ-toje, əi njaa aji rɔ-to ləi. Nɛ̂nje tɔyn kə̂ ə-dda bbe tə̂ kə̂ Kapɛrnawum kə̂ joo tarɛ̂ le, ə-dda bbeê ləi nəənn tɔ.» 24Jeju təl pa arəde nan: «Tɔkɔrɔ, m-pa marəse: Nje-kila mbər tar lə Lubba, dəwje aw uwɛ̂je kə rɔde tə̂ kə majɛ̂ bbe kuje tə̂ ang. 25M-pa tar kə̂ tɔkɔrɔ marəse: Bbal kə̂ Eli to nje-kila mbər tar lə Lubba, kəm dara utu arə ndi ərə ang bbal mota kə nɛyn misan, tɔkə bbo oso dɔ nangə tə̂ le tɔyn. Bbalɛ̂ tə̂ənn le dɛnɛ̂n-ndubbaje banyaje nya nangə tə̂ kə̂ Ijarayɛl njaa. 26A Lubba ula Eli rɔ marə dɛnɛ̂n-ndubba tə̂ kâra horode tə̂ Ijarayɛl ang, marə dɛnɛ̂n-ndubba kə̂ Sarɛpta, nangə tə̂ kə̂ Sidɔn â Lubba ula Eli rɔɛ̂ tə̂. 27Dɔ bbal tə̂ lə Elije kə̂ to nje-kila mbər tar lə Lubba, njê-banjije banyaje nya nangə tə̂ kə̂ Ijarayɛl njaa. A Elije aji nje-banji kâra horode tə̂ ang, Naama kə̂ to marə dəw kə̂ Siri â najɛ̂ banji tə̂ laa.» 28Dəwje tɔyn kə̂ isije kəy mbɔn-naan tə̂ lə Jiipije le ooje tar kə̂ Jeju pa le a, wungu ɔnde nya. 29Dinje, dutɛ̂je n̂-teeje saa mə bbe tə̂ kə ddang. Dawje saa dɔ ddingiri tə̂ kə̂ n̂-dda bbe kə̂ Najarɛtə dɔɛ̂ tə̂ ta kutɛ̂ kilɛ̂ bəər. 30A ne, n̂-tee horode tə̂ nɔtu.

Jeju tubba ndil kə̂ maji ang rɔ marə dəw tə̂

31Jeju aw bbe tə̂ kə̂ Kapɛrnawum, nangə tə̂ kə̂ Galile aw tɔju nɛ̂n dəwje ndɔ-kuwa-rɔ tə̂ lə Jiipije 32Dəwje kə̂ ooje nɛ̂n-tɔju laa le dɔde ayn, mba naw pa tar tokə lə mbay-bbe. 33Marə dingaw kə̂ ndil kə̂ maji ang isi məɛ̂ tə̂ isi mə kəy mbɔn-naan tə̂ le tɔ. Nuru əkii kə singa nan: 34«Ya! Ddi â ə-ndiki rɔje tə̂ wa? Jeju kə̂ Najarɛtə! Ə-ddee ta tɔlje wa? M-gəri kə majɛ̂. Ə-to dəw kə̂ Lubba undai dang ngaâ ulai.» 35Jeju ndangə ndil le pa nan: «Utu tai bbo ə-tee rɔ dingaw tə̂ nəənn kə ddang.» Ndil kə̂ maji ang le unn dingaw le ilɛ̂ nangə̂ kəm dəwje tə̂ ngaâ tee kə ddang, a nɛ̂n kə̂ maji ang kâra njaa ndil le dda kə dingaw le ang. 36Dɔ dəwje tɔyn ayn ngaâ n̂-paje tar horo naan tə̂ nan: «Tar ddi bba tokə be wa? Nunn ndu kə gɔsu kə̂ mɔngu ddəm kə singa ddəm narə ndilje kə̂ maji ang a, n̂-teeje kə ddang!» 37Ri Jeju aw bbar dɔ nangə tə̂ kə̂ Galile tɔyn.

Jeju aji njê-rɔ-toje dang dang

38Jeju in kəy mbɔn-naan tə̂ lə Jiipije le aw kəy lə Simɔn. Rɔ mum Simɔnje kə̂ dɛnɛ̂n toe, rɔɛ̂ tunga nya ngaâ n̂-dujuje Jeju karə dda marə nɛ̂n mbɛɛ̂. 39N̂-bbunga kə dɔ dɛnɛ̂n tə̂ le, nin kə rɔ-to le ngaâ rɔ-to le inya dɛnɛ̂n le. Kar tə̂ənn njaa, dɛnɛ̂n le in taar unn kutu karəde nɛ̂n-kusa. 40Kar andə ngaâ dəwje tɔyn kə̂ njê-rɔ-toje dang dang toje mə kəy tə̂ ləde awje kə de rɔ Jeju tə̂. Nungu jia joo kəm dɔde tə̂ kâra kâra ngaâ dajije. 41Ndilje kə̂ maji ang teeje rɔ dəwje tə̂ nya kə ddang. Ndilje le uruje əkii nan: «Ə-to Ngonn lə Lubba!» A nin kə de ngaâ nɔkude karə n̂-paje tar, mba ndilje le gərəje to n̂-to Kristə le.

Jeju ila mbər Tar kə̂ Maji kəy mbɔn-naanje tə̂

42Lo arɛ a, Jeju tee aw lo tə̂ kə̂ iya rɔɛ̂. Dəwje kə̂ banya unnje kutu sangɛ̂je. Dawje ndərəng dingɛ̂je ngaâ n̂-ndikije ta karə nɔtu ninyade ang. 43A n̂-pa narəde nan: «To tar ləm ta kila mbər Tar kə̂ Maji kə̂ dɔ Bbe-kɔn tə̂ lə Lubba karə kəsə bbeje tɔ bba, mba yeenn njaa Lubba ulam mbɛɛ̂.» 44Naw nila mbər Tar kə̂ Maji le mə kəy mbɔn-naanje tə̂ lə Jiipije kə̂ Jude tɔyn.

Currently Selected:

Luku 4: KabbaDkS

Highlight

Copy