Luku 6
6
Jeju to nje-ndɔ-kuwa-rɔ
1Marə ndɔ, Jeju aw nday mə ndɔɔ bleje tə̂ ndɔ-kuwa-rɔ tə̂ lə Jiipije a, njê-njaje goe tə̂ tətəje marə jinga bleje le ngaâ ubbaje aw usaje. 2Marə Parijinyɛje paje arəde nan: «Mba ddi bba aw ddaje nɛ̂n kə̂ Ndu mbətə karə dəw dda ndɔ-kuwa-rɔ tə̂ wa?» 3Jeju ilade tə̂ nan: «Nɛ̂n kə̂ Dabbiti dda ləw le, ə-turaje tarɛ̂ Makəturu tə̂ ang bbay wa? Marə ndɔ bbo ddɛɛ̂, ne kə dəwje laa a, 4nandə mə kəy tə̂ lə Lubba, n̂-ndiki tə̂ ta taa mapaje kə̂ darə Lubba nusa ngaâ narə dəwje laa usaje tɔ. Ta koo a, mapajeenn le njê-poloje Lubba kə karəde baa â darəde ddəw karə usaje.» 5Jeju pa arəde bbay nan: «Ngonn lə dəw njaa to nje-ndɔ-kuwa-rɔ.»
Jeju aji marə dəw kə̂ jia oy
6Marə ndɔ-kuwa-rɔ tə̂ le bbay, Jeju andə kəy mbɔn-naan tə̂ lə Jiipije aw tɔju nɛ̂n. Marə dəw kə̂ jia kə̂ kɔl oy, isi mə kəy tə̂ənn le tɔ. 7Kəm njê-gərəje-Ndu kə Parijinyɛje to kə dɔ Jeju tə̂ ta koo se nâ kaji dəw ndɔ-kuwa-rɔ tə̂ wa? Yeenn bba ta kinga nɛ̂n ddəw mba kunda nɛ̂n tar dɔɛ̂ tə̂. 8A Jeju le gərə kəjə ləde ngaâ pa arə dəw kə̂ jia oy le nan: «In ar dannâ nəənn!» Dəw le in ar taar. 9Jeju pa arəde nan: «Mâ dujuse tar. Ddi â Ndu ləje arəje ddəw ta dda ndɔ-kuwa-rɔ tə̂ wa? Ndu arə ddəw ta dda maji wase ta dda majang wa? Ta kaji dəw wase ta dda karə dəw oy wa?» 10Naade mbetete tɔyn ngaâ n̂-pa narə dəw le nan: «Ə-ndɔju jii!» Dəw le ndɔju jia le ngaâ jia le təl ddee maji. 11Wungu ɔn Njê-gərəje-Ndu kə Parijinyɛje le nya ngaâ daw dujuje naan se ddi â dâ kasəje ta dda kə Jeju le wa?
Jeju mbərə njê-kaw-kulaje laa dɔku gire joo
12Mə ndɔje tə̂ənn njaa Jeju aal marə ddingiri ngaâ duju Lubba. N̂-duju Lubba tile tə̂ənn le nyɔm. 13Lo arɛ a, n̂-bbar njê-njaje goe tə̂ ngaâ n̂-mbərə marɛ̂je dɔku gire joo horode tə̂, nunda ride nan: Njê-kaw-kulaje. 14Ride tokə be: Simɔn kə̂ nunda ria nan Piyɛr kə ngokɔɛ̂n Andere, Jakə, Jan, Pilipi, Bartelemi, 15Matiye, Toma, Jakə ngonn lə Alpe, Simɔn kə̂ daw bbarɛ̂ nan dəw kə̂ tar bbe laa ɔɛ̂n nya, 16Judə kə̂ to ngonn lə Jakə kə Judas Iskariyotə kə̂ a təl to nje-kunn dɔ Jeju.
Dəwje ddeeje ooje tar lə Jeju ngaâ arə najide rɔ-to tə̂ ləde
17Jeju in dɔ ddingiri tə̂, ne kə njê-kaw-kulaje, n̂-ddee nar ndakə lo tə̂. Njê-njaje goe tə̂ tokə banya kə dəwje kə̂ banya nya eeje lo tə̂ənn le. Dinje nangə tə̂ kə̂ Jude tɔyn kə Jerujalɛm tə̂, bbeje tə̂ kə̂ toje kar ba-katə tə̂ ər kə Tir kə Sidɔn. 18N̂-ddeeje mba koo tar lə Jeju ddəm mba karə najide rɔ-toje tə̂ ləde ddəm. Njê kə̂ ndilje kə̂ maji ang aw ulaje kəmde ndoo tə̂ kara ajije. 19Dəwje le tɔyn njaa aw sangəje ddəw ta kɔrɛ̂je kə jide, mba marə singa-mɔngu kə̂ in rɔɛ̂ tə̂ aw tee aw ajide tɔyn.
Tar dɔ kisi maji tə̂ kə kisi maji ang tə̂
20Jeju unn kəmɛ̂ aa nɛ̂n njê-njaje goe tə̂ ngaâ pa nan:
«Maji arəse, see dangətəje,
mba Bbe-kɔn lə Lubba to ləse!
21Maji arəse, see njê kə̂ bbo aw ddase, mba məse a ndann!
Maji arəse, see njê kə̂ aw nɔnje bbasinɛn, mba â kokoje!
22Bbo dəwje
mbətəse, dəwje tubbase,
dəwje tajise
ngaâ paje tar ləse maji ang mba Ngonn lə dəw a,
Maji arəse!
23Arəje rɔse nəəlse ngaâ ə-talje ə-turuje kə rɔ-nəəl karɛ̂ tə̂ənn le,
mba kuka ləse a bo nya mə dara tə̂,
mba baann njaa tɔ â kadede ddaje kə njê-kilaje mbər tar lə Lubba.
24A kəm-to-ndoo to ləse, see njê-nɛ̂n-kingaje, mba bbokənɛn
wurse oso nangə̂ mban!
25To ndoo nya arəse, see dəwje kə̂ məse ndann bbokənɛn,
mba bbo a ddase!
To ndoo nya arəse, sese kə̂ aw kokoje bbokənɛn,
mba nɛ̂n-mə-kɔn a ddase ngaâ maann-nɔn a ndəəyse!
26To ndoo nya arəse, sese kə̂ dəwje tɔyn aw pitijese,
mba kadede ddaje tokə baann kə njê-kilaje mbər tar kə̂ tɔkɔrɔ ang tɔ!»
Tar ndiki njê-baanje
27«A m-pa marəse sese kə̂ aw ooje tar ləm: Ə-ndikije njê-baanje ləse, ə-ddaje maji kə njê kə̂ mbətəse. 28Ə-bbarje tar kə̂ maji dɔ dəwje tə̂ kə̂ aw bbarje tar kə̂ maji ang dɔse tə̂, ə-dujuje Lubba mba njê kə̂ aw paje tar ləse maji ang. 29Bbo dəw unda ka-mbɔri a, ə-turu dəbbe kə̂ kâra arə nunda tɔ. Bbo dəw taa kubbu ləi a, inya arə n̂-taa kubbu-kul ləi tɔ. 30Arə nɛ̂n dəw kə̂ aw duji nɛ̂n, bbo dəw taa nɛ̂n ləi a, ə-bbangɛ̂ nɛ̂n ləi le ang. 31Nɛ̂n kə̂ ə-ndikije karə dəwje ddaje kə se a, maji karə ə-ddaje kə de tɔ. 32Bbo njê kə̂ ndikise dɔrɔ â ə-ndikijede tɔ a, dəwje a gərəje maji ləse tokə baânn wa? Njê-nɛ̂n-ddaje kə̂ maji ang kara aw ndikije njê kə̂ ndikijede tɔ. 33Bbo njê kə̂ ddaje kə se maji dɔrɔ bba ə-ddaje kə de maji a, dəwje a gərəje maji ləse tokə baânn wa? Njê-nɛ̂n-ddaje kə̂ maji ang kara ddaje tokə baann tɔ. 34Bbo dəwje kə̂ undaje məse to dâ kuka bbangə ləse bba arəjede nɛ̂n tunanje a, dəwje a gərəje maji ləse tokə baânn wa? Njê-nɛ̂n-ddaje kə̂ maji ang kara aw ddaje tokə baann tɔ, karə n̂-təl nɛ̂n darəde. 35A maji karə ə-ndikije njê-baanje ləse, ə-ddaje maji, bbo arəje nɛ̂n dəw tunan a, undaje məse dɔ marə nɛ̂n tə̂ goe tə̂ ang. Baann bba kuka ləse a bo nya ngaâ â toje to ngann lə Nje-kisi ddutu dara tə̂. Mba Ne kə̂ ddutu dara tə̂ n̂-dda maji kə dəwje kə̂ arəje wooyo ndɔ kâra ang ddəm njê-mə-majangje ddəm. 36Maji karə ooje kəm-to-ndoo lə naan tokə Bɔsese oo kəm-to-ndoo ləse.»
Tar gangə sariya
37«Maji karə ə-gangəje sariya dɔ dəw tə̂ ang, a Lubba a gangə sariya dɔse tə̂ ang tɔ. Undaje tar dɔ dəw tə̂ ang, a Lubba a kunda tar dɔse tə̂ ang tɔ. Ɔruje tar dɔ dəwje tə̂, a Lubba a kɔru tar dɔse tə̂ tɔ. 38Arəje nɛ̂n, a dâ karəse nɛ̂n: Ka kə̂ maji â dâ kɔju nɛ̂n nɛ̂n karə ddusu julum, dâ mbusu, dâ yəkə karə gayn nangə̂ bba dâ mbəl mə bbɔl-kubbu tə̂ ləse. Mba nɛ̂n kə̂ unnje ɔjuje nɛ̂n nɛ̂n â dâ kunn kɔju nɛ̂n nɛ̂n karəse tɔ.» 39Jeju pa gusu-tar arəde tɔ nan: «Nje-kəm-tɔ asə kila kakə ji nje-kəm-tɔ marɛ̂ tə̂ wa? Dâ kosoje joo kəm mə buwa tə̂ ang wa? 40Nje-nja go dəw tə̂ uta dəw kə̂ naw nja goe tə̂ le ang. A nje-nja go dəw tə̂ kə̂ ndo nɛ̂n kə majɛ̂ a to tokə dəw kə̂ naw nja goe tə̂ le tɔ. 41Mba ddi bba mu kə̂ to kəm ngokɔin tə̂ â oo, a oo tɔkə kakə kə̂ to kəmi tə̂ ang wa? 42Wase, əi kə̂ oo tɔkə kakə kə̂ to kəmi tə̂ ang, â kasə pa karə ngokɔin nan ‹Arə mɔru mu kə̂ kəmi tə̂› tokə baann wa? Nje-ngəm, ɔru tɔkə kakə kə̂ to kəmi tə̂ dɔngɔr bba â koo lo kə majɛ̂ ta kɔru nɛ̂n mu kə̂ to kəm ngokɔin tə̂.»
Tar kakə kə kandɛ̂
43«Kakə kə̂ maji kə̂ aw andə kandɛ̂ kə̂ ndum goto ddəm kakə kə̂ maji ang kə̂ aw andə kandɛ̂ kə̂ maji goto tɔ. 44Mba daw gərə kakə kâra kâra kə kandɛ̂. Dâ kuja kandə nduu kakə konn tə̂ ang, dâ tuja nduu gərgəndə tə̂ ang. 45Nɛ̂nje kə̂ maji inje mə dəw tə̂ kə̂ maji. A nɛ̂nje kə̂ maji ang inje mə dəw tə̂ kə̂ maji ang. Mba nɛ̂n kə̂ ddusu mə dəw â aw tee ddəw tar tə̂ kə̂ tɛɛ̂ tə̂.»
Gusu-tar dɔ kəyje tə̂ joo
46«Mba ddi bba aw bbarəmje: Əbbə-dəwje, Əbbə-dəwje! A ə-ddaje nɛ̂n kə̂ maw pa marəse ang wa? 47Dəw kə̂ ddee rɔm tə̂, oo tar ləm ngaâ dda nɛ̂n kula le unn da-rɔ nân wa? 48N̂-to kâra baa kə dəw kə̂ a ta kɔsu kəy a, uru buwa arə uru bba ungu gɔl kəy le dɔ ər tə̂. Bbo maann taa lo ngaâ unda kar kəy le a, kəy le oso ang, mba nɔsu kəy le kə majɛ̂. 49A dəw kə̂ oo tar ləm, a dda nɛ̂n kula ang to kâra baa kə dəw kə̂ ɔsu kəy laa dɔ nangə tə̂ baa bbo ungu gɔlɛ̂ dɔ ər tə̂ ang. Maann ula unda kar kəy le a, kəm naan tə̂ nəənn njaa kəy le oso ngaâ guru njuku njuku.»
Currently Selected:
Luku 6: KabbaDkS
Highlight
Share
Copy
Want to have your highlights saved across all your devices? Sign up or sign in
© 2020, ACOTBA
