Matiye 13

Gusu-tar dɔ nje-nɛ̂n-dubbu tə̂

1Ndɔɛ̂ tə̂ənn njaa, Jeju in mə kəy tə̂ tee ddaka ngaâ aw isi kar tɔkə dangə maann tə̂. 2Dəwje tokə banya mbɔnje naan rɔɛ̂ tə̂. Yeenn bba, naw naal tɔkə to nisi məɛ tə̂. A dəwje le tɔyn arje ta kongo dangə tə̂ le. 3N̂-pa tar nya nya narəde kə gusu-tar n̂-pa nan: «Nje-nɛ̂n-dubbu tee ta dubbu nɛ̂n. 4Naw dubbu nɛ̂n le a, marə kandə-koje le gaynje dɔ ddəw tə̂. Əəlje ddeeje ngaâ ɔnje kandə-koje le. 5Marə kandə-koje le gaynje lo tə̂ kə̂ to ər kə̂ nangə ndəər tə̂ ang. Kandə-koje le teeje njangə baa mba nangə le ndəər ang. 6Kar ɔsu nya a, puru kar le ɔn koje le arə tutu, mba ngirade andə nangə̂ ang. 7Marɛ̂je gaynje horo kakə konnje tə̂. Kakə konnje le ngalje ngaâ orede kə nangə̂. 8A marɛ̂je gaynje dɔ nangə tə̂ kə̂ maji ngaâ andəje. Marɛ̂ andə dɔdɔku, marɛ̂ dɔmisan, a marɛ̂ andə dɔmota. 9Dəw kə̂ mbia to a, maji karə oo tar nəənn!»

Jeju unn gusu-tarje pa nɛ̂n tar mba ddi wa?

10 Njê-njaje go Jeju tə̂ ddeeje rɔɛ̂ tə̂ ngaâ dujeje nan: «Mba ddi bba ə-pa tar arəde kə gusu-tar wa?» 11Jeju ilade tə̂ nan: «Sese, darə ə-gərəje tar kɔn-mbay kə̂ darâ kə̂ to tar kə̂ iya rɔɛ̂. A dede, darə n̂-gərəje ang. 12Mba dəw kə̂ nɛ̂n laa to a, dâ kila marɛ̂ dɔɛ̂ tə̂ karɛ̂ karə nɛ̂n-kinga laa banya. A dəw kə̂ nɛ̂n laa goto le, nɛ̂n kə̂ jia tə̂ njaa kara dâ taa kə ddang.#13:12 Tar nəənn to tar nɛ̂n-kinga bba daw pa nəənn ang. To tar gərə nɛ̂nje dɔ Bbe-kɔn tə̂ lə Lubba. 13Mba yeenn bba, maw pa nɛ̂n tar marəde kə gusu-tar, mba daw daaje lo, a dooje nɛ̂n ang ddəm daw dooje tar, a dooje marə tar mbide tə̂ le ang ddəm n̂-gərəje kandə tar le ang ddəm. 14Yeenn bba, tar lə Lubba kə̂ Ejayi kə̂ to nje-kila mbər tar laa pa dɔde tə̂ le ddee nɛ̂n to tar kə̂ tɔkɔrɔ. Tar le nan:

‹A kooje tar kə majɛ̂, a â gərəje kandɛ̂ ang,

a kaaje lo kə majɛ̂ a, a kooje nɛ̂n ang.

15Mba dɔ dəwje nəənn kətərə nya.

Dutuje mbide bba ta koo tar ang,

n̂-bbirije kəmde bba ta koo lo ang,

Yeenn bba, n̂-gərəje kandə tar ang.

Ngaâ, n̂-turuje məde bba karə majide rɔ-toje tə̂ ləde ang.›

16«Maji arəse, sese kə̂ kəmse aw oo lo ddəm mbise aw oo tar ddəm. 17Mba m-pa tar kə̂ tɔkɔrɔ marəse, njê-kilaje mbər tar lə Lubba nya kə dəwje kə̂ toje gatə gatə kəm Lubba tə̂ tokə banya ndikije ta koo nɛ̂n kə̂ aw ooje kə kəmse nəənn, a dooje ang, n̂-ndikije ta koo nɛ̂n kə̂ aw ooje kə mbise nəənn, a dooje ang.»

Gəl gusu-tar kə̂ dɔ nje-nɛ̂n-dubbu tə̂ le

18«Ooje gəl gusu-tar kə̂ dɔ nje-nɛ̂n-dubbu tə̂ le. 19Dəwje kə̂ ooje tar kɔn-mbay lə Lubba, a gərəje kandə tar le ang, toje tokə dɔ ddəw kə̂ kandə-koje gaynje tə̂ le. Nje-mə-majang ddee ɔru nɛ̂n kə̂ n̂-dubbu məde tə̂ le kə ddang. 20Marə dəwje toje kâra baa kə lo kə̂ to ər. Dooje tar le a, n̂-taaje kə rɔ-nəəl njangə baa. 21A tar le ungu ngirɛ̂ məde tə̂ ang, kure əw məde tə̂ ang. Bbo nɛ̂n kəm-to-ndoo wase nɛ̂n-singa ddee ingade mba tar lə Lubba le a, mə-kunn ləde oso njangə baa. 22A marə dəwje toje tokə nangə kə̂ konnje ubbaje tə̂ le. Dooje tar le kə majɛ̂, a kəjə-tarje mba nɛ̂nje kə̂ nangə̂ nəənn kə bbo nɛ̂n-kingaje kə̂ aw ərəde ore dɔ tar le kə nangə̂ arə tar le andə ang. 23A marə dəwje toje tokə nangə kə̂ maji kə̂ n̂-dubbu nɛ̂n tə̂. Dooje tar le a, n̂-gərəje kandɛ̂ kə majɛ̂ ngaâ dandəje kandə. Marɛ̂je andəje dɔdɔku, marɛ̂je andəje dɔmisan, a marɛ̂je andəje dɔmota.»

Gusu-tar dɔ mu tə̂ kə̂ maji ang

24Jeju təl pa marə gusu-tar arəde nan: «Bbe-kɔn kə̂ darâ to kâra baa kə dəw kə̂ dubbu kandə-ko kə̂ maji mə ndɔɔ tə̂ laa. 25Kar kə̂ dəwje aw tibbije til tə̂ a, marə nje-baan ddee dubbu mu kə̂ maji ang horo kandə-ko tə̂ kə̂ maji le a ɔtu. 26Kar kə̂ koje le teeje ngaâ aw andəje a, mu kə̂ maji ang le tee tɔ. 27Njê-kulaje lə nje-ndɔɔ le ddeeje rɔɛ̂ tə̂, paje nan: ‹Əbbəjeje, kandə-ko kə̂ maji â ə-dubbu ndɔɔ̂ ləi. A lo kə̂ dda bba mu kə̂ maji ang nəənn in tə̂ tee wa?› 28Nilade tə̂ nan: ‹Marə nje-baan â dda nɛ̂ɛnn.› Yeenn ngaâ njê-kulaje le dujeje nan: ‹Ə-ndiki karə jaw tɔru mu kə̂ maji ang le kə ddang wa?› 29Nilade tə̂ nan: ‹Ə-tɔruje mu kə̂ maji ang le ang, mba kin karə aw tɔruje a, ə-tɔruje nɛ̂n ko kə̂ maji le tɔ. 30Inyajede arə n̂-nduje naan tə̂ ndərəng ndɔ kuja ko le. A bbo ndɔ kuja ko le asə a, mâ pa karə njê kə̂ a kujaje ko le nan: Ə-tɔruje mu kə̂ maji ang le dɔngɔr, ə-tɔje kə dɔɛ̂ dɔɛ̂ ta ulaje puru tə̂. Goe tə̂ a, ə-tɔje ko kə̂ maji le unguje mə dam tə̂ ləm.› »

Gusu-tar dɔ Mutardə tə̂

31Jeju təl pa marə gusu-tar arəde bbay nan: «Bbe-kɔn kə̂ darâ to kâra baa kə kandə-ko kə̂ ria nan mutardə kə̂ dəw dubbu mə ndɔɔ tə̂ laa. 32To kandə-ko kə̂ tɛn baa uta kəsə kandə-koje tɔyn. A bbo n̂-tee a, n̂-ngal nuta kəsə kandə-koje tɔyn kə̂ mə ndɔɔ tə̂. N̂-ddee to kakə narə əəlje kə̂ darâ ddee ddaje kəy ləde barkəmɛ̂je tə̂.»

Gusu-tar dɔ wum tə̂

33Jeju pa marə gusu-tar arəde bbay nan: «Bbe-kɔn kə̂ darâ to kâra baa kə wum kə̂ dɛnɛ̂n bɔkɔlɔ nɛ̂n nduju kə̂ mə ka tə̂ mota arə ndərəng a, bɔr nduju le tɔyn ti.»

Jeju tɔju nɛ̂n kə̂ iya rɔɛ̂ ddəw gusu-tarje tə̂

34 Gusu-tarje â Jeju aw pa nɛ̂n tarje nəənn tɔyn arə dəwje kə̂ banya le. Marə tar kâra kə̂ n̂-pa narəde kə gusu-tar ang goto. 35Yeenn bba tar lə Lubba kə̂ nje-kila mbər tar pa le ddee to tar kə̂ tɔkɔrɔ. N̂-pa nan:

«Mâ kunn gusu-tar bba mâ pa nɛ̂n tar,

Mâ kila mbər nɛ̂nje kə̂ toje lo-kiyɛ̂ tə̂, unn kute dɔ ndɔ tə̂ kə̂ m-dda nɛ̂n duninya.»

Gəl gusu-tar kə̂ dɔ mu tə̂ kə̂ maji ang

36Yeenn ngaâ Jeju inya dəwje kə̂ banya le ngaâ aw kə̂y. Njê-njaje goe tə̂ awje ngɔsi saa ngaâ paje arɛ̂je nan: «Ɔru gəl gusu-tar kə̂ dɔ mu tə̂ kə̂ maji ang le arəje joo.» 37Nilade tə̂ nan: «Nje-dubbu ko kə̂ maji le to Ngonn lə dəw. 38Ndɔɔ le to duninya nəənn. Ko kə̂ maji le to dəwje kə̂ mə Bbe-kɔn tə̂ le. A mu kə̂ maji ang le to dəwje kə̂ toje to lə Nje-mə-majang. 39Nje-baan kə̂ dubbu mu kə̂ maji ang le to Əsu. Ndɔ kuja kandə-ko le to ddutu ndɔ, njê-kujaje kandə-ko le toje to anjəje. 40Ddutu ndɔ a, nɛ̂n a to kâra baa tokə daw tɔru mu kə̂ maji ang ta kungu purô. 41Ngonn lə dəw a kula anjəje laa karə n̂-tɔruje dəwje kə̂ aw ddaje arə mə-kunn lə njê-marədeje aw oso kə dəwje kə̂ aw ddaje nɛ̂nje kə̂ maji ang mə Bbe-kɔn tə̂ laa, 42ta dâ kungude kəm tɔkə puru tə̂. Lo tə̂ənn, dâ nɔnje ngaâ dâ ngəərje ngangəde. 43A kar tə̂ənn, dəwje kə̂ toje gatə gatə kə Lubba a ndokoje tokə lə kar mə Bbe-kɔn tə̂ lə Bɔdede. Dəw kə̂ mbia to a, maji karə oo tar nəənn!»

Gusu-tar dɔ nɛ̂n-kinga tə̂ kə̂ diya mə ndɔɔ tə̂

44«Bbe-kɔn kə̂ darâ to kâra baa kə nɛ̂n-kinga kə̂ diya mə ndɔɔ tə̂. Marə dəw tee dɔɛ̂ tə̂ ngaâ təl unn iya bbay. Rɔɛ̂ nəəle ngaâ naw labbə nɛ̂nje laa tɔyn, a n̂-təl n̂-ddee n̂-ndoko ndɔɔ le.»

Gusu-tar dɔ mərə tə̂ kə̂ gatɛ̂ ngəng

45«Bbe-kɔn kə̂ darâ to kâra baa tɔ kə nje-nɛ̂n-labbə kə̂ aw sangə mərəje kə̂ kura. 46Ninga marə mərə kə̂ gatɛ̂ ngəng a, naw labbə nɛ̂nje laa tɔyn ngaâ n̂-ddee n̂-ndoko mərə le.»

Gusu-tar dɔ ddəngə tə̂

47«Bbe-kɔn kə̂ darâ to kâra baa tɔ kə ddəngə kə̂ dila ba-katə tə̂ ngaâ uwa kanjije dang dang. 48Kanjije ddusu ddəngə le a, njê-ndɔn-maannje le ndɔruje teeje nɛ̂n ta maann tə̂. Disije nangə̂ ta kɔru kəm kanjije le. Kanjije kə̂ maji a, dunguje mə karɛ tə̂, a n̂-tilaje kanjije kə̂ maji ang kɔrɔ̂. 49Nɛ̂ɛnn a to tokə baann ddutu ndɔ tə̂ tɔ. Anjəje a ddeeje ta kɔru kəm dəwje kə̂ maji ang kə dəwje kə̂ gatə gatə, 50ta dâ kunguje dəwje kə̂ maji ang le kəm tɔkə puru tə̂. Lo tə̂ənn, dâ nɔnje ngaâ dâ ngəərje ngangəde.»

Nɛ̂n-kingaje kə̂ siki kə yeje kə̂ toje to konn nɛ̂n

51Jeju duju njê-njaje goe tə̂ nan: «Ə-gərəje kandə tarje nəənn tɔyn njaa wa?» Dilɛ̂je tə̂ nan: «N-gərə njaa.» 52N̂-pa narəde nan: «Mba yeenn bba, nje-gərə-Ndu kə̂ gərə nɛ̂nje dɔ Bbe-kɔn tə̂ kə̂ darâ, to kâra baa kə nje-kəy kə̂ oto nɛ̂nje kə̂ siki kə nɛ̂nje kə̂ toje to konnɛ̂ mə dam tə̂ laa tee nɛ̂n.»

Dəwje kə̂ Najarɛtə unnje məde arə Jeju ang

53 Jeju pa gusu-tarje nəənn le tunga a, ɔtu lo tə̂ənn le. 54Naw bbeê laa Najarɛtə ngaâ nunn kutu tɔju nɛ̂n dəwje mə kəy mbɔn-naanje tə̂ ləde. Nɛ̂n-tɔju laa le dum dɔde ngaâ n̂-paje nan: «Ninga nɛ̂n-gərə nəənn dda wa? Ninga singa dda nɛ̂n-mɔrije nəənn dda wa? 55Ngonn lə nje-dda kula kakə le â nəənn ang wa? Kɔɛ̂nje â to Mari ngaâ ngakɔɛ̂nje â toje to Jakə, Jojɛpə, Simɔn kə Judə ang wa? 56Ngakɔn-nannɛ̂je tɔyn isije horoje tə̂ nəənn tɔ ang wa? Yeenn a, ninga singa dda nɛ̂nje nəənn dda wa?» 57Nɛ̂ɛnn le dda arə n̂-mbətəje ta kunn məde karɛ̂. A Jeju pa arəde nan: «Dəwje aw walje nje-kila mbər tar lə Lubba kəsə loje tə̂ tɔyn, a bbe kə̂ nisi tə̂ wase mə kəy tə̂ laa, daw walɛ̂ tə̂ ang.» 58Jeju dda nɛ̂n-mɔrije nya Najarɛtə ang, mba mə-kunn ləde goto.

Currently Selected:

Matiye 13: KabbaDkS

Highlight

Copy